មណ្ឌលគិរីៈ ពលរដ្ឋរស់នៅក្នុងសង្កាត់រមនា ក្រុងសែនមនោរម្យ ខេត្តមណ្ឌលគិរី ជាច្រើនគ្រួសារបានប្តឹងជំទាស់នឹងការចេញផ្សាយប្លង់កម្មសិទ្ធិ ដោយលើកហេតុផលថា បានរំលោភលើដីកម្មសិទ្ធិរបស់ពួកគាត់ ដែលរស់នៅជាយូរឆ្នាំ ខណៈពលរដ្ឋមួយចំនួនបានអះអាងថា នៅពេលមានការតវ៉ា អាជ្ញាធរមិនទទួលពាក្យបណ្តឹង។
កាលពីថ្ងៃទី ១ ដល់ថ្ងៃទី ១៥ ខែកុម្ភៈ អាជ្ញាធរសង្កាត់រមនា ក្រុងសែនមនោរម្យបានបិទប្រកាសប្លង់កម្មសិទ្ធិដែលទើបធ្វើរួចរាល់ ដើម្បីប្រកាសឱ្យពលរដ្ឋពិនិត្យ និងប្តឹងជំទាស់ មុននឹងប្លង់កម្មសិទ្ធិនេះចូលជាធរមាន។ ប៉ុន្តែពេលប្រកាសមានពលរដ្ឋដាក់ពាក្យបណ្តឹងទាមទារយុត្តិធម៌ករណីចេញប្លង់មិនត្រឹមត្រូវ។
អ្នកស្រី នូ ចាំង ដែលថាដីគាត់ត្រូវបានចេញប្លង់ឱ្យឈ្មោះអ្នកផ្សេងបានសរសេរក្នុងលិខិតតវ៉ា ពីថ្ងៃទី ១៣ កុម្ភៈថា ពាក្យបណ្តឹងរបស់អ្នកស្រីមិនត្រូវបានអាជ្ញាធរដែនដីទទួលយកទេ ហើយវាគឺជារឿងអយុត្តិធម៌ ដែលដីរបស់អ្នកស្រីបែរជាចេញប្លង់ឱ្យឈ្មោះអ្នកដទៃកាន់កាប់។
អ្នកស្រីថា៖ «នេះជាដីដែលតពីឪពុកម្តាយតាំងពីយូរណាស់មកហើយ។ នាងខ្ញុំមិនមានប្លង់ដីទេ។
ប៉ុន្តែនាងខ្ញុំបានរស់នៅលើដីនេះ ២២ ឆ្នាំហើយ។ នាងខ្ញុំមានផ្ទះមានដំណាំ អ្នកជិតខាងដឹងឮធ្វើជាសាក្សីរបស់នាងខ្ញុំ។ នាងខ្ញុំ និងស្វាមីសូមជំទាស់នឹងការចេញប្លង់ដាច់ខាត»។
ចំណែកអ្នកស្រី រឿន ហែន អាយុ ៣៧ ឆ្នាំជាអ្នកភូមិពូលូង សង្កាត់រមនា បានប្រាប់ភ្នំពេញ-ប៉ុស្តិ៍ពីម្សិលមិញថា ដីឯកជនគ្រួសារអ្នកស្រីត្រូវបានអាជ្ញាធរចេញប្លង់ជូនអ្នកដែលមិនមែនជាម្ចាស់ដី ដោយគ្រួសារអ្នកស្រីមិនបានដឹងថា គេចុះមកធ្វើប្លង់នេះពីពេលណាទេ។
អ្នកស្រីបន្តថា ពេលបិទប្រកាសប្លង់កម្មសិទ្ធិនេះទើបពលរដ្ឋទៅពិនិត្យហើយក៏ឃើញមានភាពមិនប្រក្រតីជាច្រើនចេញពីការធ្វើប្លង់កម្មសិទ្ធិក្នុងតំបន់នេះ ដោយមានអ្នកខ្លះដីរបស់ខ្លួនត្រូវបានចេញឱ្យអ្នកដទៃ ហើយអ្នកផ្សេងទៀតខុសក្បាលដីគ្នា ខណៈអ្នកមានឈ្មោះក្នុងប្លង់មិនមែនជាអ្នកភូមិតែជាមនុស្សមិនស្គាល់មុខ។
អ្នកស្រីថា៖ «យើងបានដាក់ពាក្យបណ្តឹងប្តឹងទាស់មិនឱ្យចេញប្លង់នេះនៅនឹងសង្កាត់ ប៉ុន្តែខាងមន្ត្រីដែលប្រចាំនេះ គាត់មិនចង់ទទួលពាក្យបណ្តឹងយើងទេ។ មានមួយចំនួន គាត់ព្រមទទួល និងមួយចំនួន គាត់មិនបានទទួលពាក្យបណ្តឹងយើងទេ។ យើងនឹងបន្តតវ៉ាទៀត បើមិនមានដំណោះស្រាយឱ្យពួកយើង រឿងចេញប្លង់កម្មសិទ្ធិលើដីពួកយើងនេះ»។
លោក ភី ងូក ចៅសង្កាត់រមនាបានប្រាប់ ភ្នំពេញ ប៉ុស្តិ៍ ពីម្សិលមិញថា មុនប្រកាសបិទប្លង់កម្មសិទ្ធិនេះគឺបន្ទាប់ពីមន្ត្រីជំនាញបានចុះធ្វើប្លង់ជាលក្ខណៈប្រព័ន្ធ។
ក៏ប៉ុន្តែលោកថា ពេលមានពលរដ្ឋតវ៉ាដូច្នេះអាចមកពីករណីមានភាពមិនប្រក្រតីនៃការចុះវាស់ និងការកំណត់ទីតាំង ហើយលោកថា ពាក្យបណ្តឹងដែលពលរដ្ឋប្តឹងជំទាស់គឺបានបញ្ជូនទៅថ្នាក់លើហើយ ដើម្បីរកដំណោះស្រាយ។
ចំពោះការចោទប្រកាន់ថា អាជ្ញាធរ មិនទទួលពាក្យបណ្តឹង លោកថា នេះជារឿងមិនពិតទេ។
លោកថា៖ «ការទទួលបណ្តឹងនេះគឺមានច្រើនករណីមានការច្រឡំគ្នាពេញហ្នឹង ហើយយើងក៏បានស្នើកែតម្រូវដែរ។ សរុបមកគឺមានពលរដ្ឋចង់ជាង ៥០ ទៅ ៦០ នាក់ហើយដែលតវ៉ានេះ យើងបានដាក់ជូនមន្ទីររៀបចំដែនដីហើយ។ ចុងក្រោយមានលទ្ធផលកែតម្រូវយ៉ាងណាទៀត យើងនឹងធ្វើបន្តទៀត»។
លោក ម៉ៅ ចំរើន ប្រធានមន្ទីរដែនដី នគរូបនីយកម្ម សំណង់ និងសុរិយោដី ខេត្តមណ្ឌលគិរីបានបដិសេធធ្វើអត្ថាធិប្បាយពីម្សិលមិញដោយថា កំពុងរវល់។
លោក គ្រើង តុលា សកម្មជនការពារព្រៃឈើ និងជាតំណាងសហគមន៍ជនជាតិដើមភាគតិចក្នុងខេត្តនេះបានថ្លែងថា រាល់ឯកសាររដ្ឋបាលសាធារណ:ត្រូវតែទទួលពីពលរដ្ឋដែលស្វែងរកកិច្ចអន្តរាគមន៍ ឬប្តឹងនឹងបញ្ហាអ្វីមួយ។ ករណីនេះលោកមើលឃើញថា ពលរដ្ឋជួបបញ្ហាអយុត្តិធម៌ ហើយពាក្យបណ្តឹងពួកគាត់ក៏ត្រូវបានច្រានចោល និងរុញដាក់គ្នាពីស្ថាប័ន ១ ទៅស្ថាប័ន ១។
លោកថា៖ «យើងមិនគួរបដិសេធឯកសារពលរដ្ឋទេ។ ដោយសារតែពលរដ្ឋរងគ្រោះនេះ ដែលខ្ញុំទទួលបាននេះគឺគាត់បានរស់នៅតាំងពីឆ្នាំ ១៩៩០ ជាងឯណោះដោយធ្វើស្រែ ធ្វើចម្ការ»៕