The Phnom Penh Post Search

Search form




Logo of Phnom Penh Post newspaper Phnom Penh Post - ពលរដ្ឋ​រស់នៅ​តាម​ច្រាំង​ទន្លេ​សេកុង​ ភាគច្រើន​ព្រម​ប្ដូរ​ទីតាំង​ថ្មី




ពលរដ្ឋ​រស់នៅ​តាម​ច្រាំង​ទន្លេ​សេកុង​ ភាគច្រើន​ព្រម​ប្ដូរ​ទីតាំង​ថ្មី

Content image - Phnom Penh Post
អាជ្ញាធរខេត្ត​ស្ទឹងត្រែង​កំពុង​សម្របសម្រួល​ពលរដ្ឋ​ជាង​ ១៣០ ​គ្រួសារ​ ដែល​រស់នៅ​លើដី​ចំណី​ច្រាំងទន្លេ​​សេកុង​ក្នុង​ក្រុង​ស្ទឹងត្រែង​ឲ្យ​ផ្លាស់ប្ដូរ​លំនៅ​ទៅ​កន្លែង​ថ្មី​ដែល​អាជ្ញាធរ​រៀបចំ​ជូន។ រូបថត ក្រសួងព័ត៌មាន

ពលរដ្ឋ​រស់នៅ​តាម​ច្រាំង​ទន្លេ​សេកុង​ ភាគច្រើន​ព្រម​ប្ដូរ​ទីតាំង​ថ្មី

ស្ទឹងត្រែងៈ អាជ្ញាធរខេត្ត​ស្ទឹងត្រែង​កំពុង​សម្របសម្រួល​ពលរដ្ឋ​ជាង​ ១៣០ ​គ្រួសារ​ ដែល​រស់នៅ​លើដី​ចំណី​ច្រាំងទន្លេ​​សេកុង​ក្នុង​ក្រុង​ស្ទឹងត្រែង​ឲ្យ​ផ្លាស់ប្ដូរ​លំនៅ​ទៅ​កន្លែង​ថ្មី​ដែល​អាជ្ញាធរ​រៀបចំ​ជូន ខណៈ​ក្នុងចំណោម​នោះ​មាន​ភាគច្រើន​បាន​ឯកភាព នៅពេល​ទីតាំង​ច្រាំង​នេះ​ត្រូវ​យក​ទៅ​អភិវឌ្ឍ​ដើម្បី​កុំឱ្យ​បាក់​ និង​រួមចំណែក​លើកកម្ពស់​សោភណភាព​ទីក្រុង​។

លោក ម៉េង គុង មន្ត្រី​នាំពាក្យ​ខេត្ត​ស្ទឹងត្រែង​បាន​ប្រាប់​ភ្នំពេញ​ប៉ុស្ដិ៍​ពី​ម្សិលមិញ​ថា ពលរដ្ឋ​ភាគច្រើនបំផុត​នៅក្នុង​ចំណោម​ជាង​ ១៣០ ​គ្រួសារ​នេះ​បាន​ឯកភាព​រួចហើយ ដើម្បី​រុះរើ​ផ្ទះសំបែង​ចេញ​ពី​ច្រាំងទន្លេ ដើម្បី​ទៅ​រស់នៅ​លើដី​ឡូត៍​ដែល​អាជ្ញាធរ​បាន​រៀបចំ​ផ្ដល់ជូន​មាន​ចម្ងាយ​ជាង​ ២ ​គីឡូម៉ែត្រ​ពី​ទីតាំង​ច្រាំងទន្លេ និង​ផ្សារ​ក្នុង​ក្រុង​ស្ទឹងត្រែង​។

លោក​បាន​បញ្ជាក់ថា​៖ «​ប្រសិនបើ​ពួកគាត់​មានផ្ទះ និង​មានគ្រួសារ​រស់នៅ​ហ្នឹង​ពិតប្រាកដ យើង​នឹង​រៀបចំ​ផ្លាស់ប្ដូរ​គាត់​ទៅ​រស់នៅ​លើ​ដីឡូត៍​ដែល​រៀបចំ​សម្រាប់​គ្រួសារ​ទាំងអស់​ហ្នឹង​ទៅ​នៅ​ទីនោះ​វិញ​។ ដីឡូត៍​ហ្នឹង​ស្ថិត​នៅក្នុង​ក្រុង​ស្ទឹងត្រែង​ដដែល​។ ​យើង​ផ្ដល់ជូន​ពួកគាត់​តែ​ដី​លំនៅឋាន ពីព្រោះ​គាត់​រស់​នៅលើ​ច្រាំងទន្លេ​ក៏​អត់​មាន​ដី​ធ្វើស្រែ​ចម្ការ​អី​ដែរ​។ ពលរដ្ឋ​ភាគច្រើន​ព្រម​ទទួល​សំណង​នេះហើយ នៅ​សល់​តែ​ ២-៣ ​នាក់​ទៀត​ ដែល​កំពុង​ពិចារណា​»​។

លោក​បន្តថា ក្នុង​ ១ ​គ្រួសារ​នឹង​ទទួល​បាន​ដីឡូត៍​ដែល​មាន​ទទឹង​ ១០ ​ម៉ែត្រ​​ និង​បណ្ដោយ​ ២០ ​ម៉ែត្រ​ហើយ​ទីតាំង​ថ្មី​នេះ គឺ​ទើប​មាន​ការតភ្ជាប់​បណ្ដាញ​អគ្គិសនី​ចូល ហើយ​នាពេល​ខ្លី​ខាងមុខ​នេះ​អាជ្ញាធរ​នឹង​ចាប់ផ្ដើម​តបណ្ដាញ​ទឹកស្អាត​​ចូល​ថែមទៀត​។

លោក​បាន​បន្ថែមថា ច្រាំងទន្លេ​ប្រហែល​ ៥០០ ​ទៅ​ ៦០០ ​ម៉ែត្រ​ នឹង​ត្រូវ​ចាក់​បេតុង​កុំឱ្យ​បាក់​ដែល​ការសាងសង់​ចាប់ផ្ដើម​ពី​ឆ្នាំ​ ២០២០ ​នេះ​ទៅ​។

លោក​ថា​៖ «​រៀបចំ​ច្រាំងទន្លេ​កុំឱ្យ​បាក់ និង​ជាពិសេស​គឺ​សុវត្ថិភាព​របស់​ពួកគាត់ កាលណា​គាត់​នៅលើ​ច្រាំង​ហើយ​បើ​បាក់​គឺអាច​ឱ្យ​ពួកគាត់​មាន​គ្រោះថ្នាក់​។ មួយ​ទៀត​ដើម្បី​សោភណភាព​ក្រុង កាលណា​គាត់​នៅតាម​ច្រាំងទន្លេ វា​ធ្វើឱ្យ​ប៉ះពាល់​បរិស្ថាន​ផង​។ ពួកគាត់​រស់នៅ​លើដី​ចំណី​ទន្លេ​ហ្នឹង គឺ​អត់​មាន​ប្លង់​អី​ទេ​»​។

តាម​ក្រសួង​ព័ត៌មាន​បាន​ចុះផ្សាយ​ថា​អាជ្ញាធរ​ក្រុង​ស្ទឹងត្រែង​បាន​ឱ្យ​ប្រជាពលរដ្ឋ​រស់នៅ​តាម​មាត់​ទន្លេ​ចាប់ពី​ព្រះរាជដំណាក់​ទៅដល់​ស្ពាន​មេគង្គ​ត្រូវ​រុះរើ​សំណង់​ចេញ​ឱ្យ​រួចរាល់​ត្រឹម​ថ្ងៃទី​ ៣០ ​ខែ​មេសា​ខាងមុខនេះ​ ដើម្បី​ឱ្យ​អាជ្ញាធរ​មាន​លទ្ធភាព​អភិវឌ្ឍ​ទីក្រុង​ស្អាត​។

ក្រសួង​ព័ត៌មាន​ផ្សាយ​ថា​ «​ក្នុង​គម្រោង​អភិវឌ្ឍន៍​ទីក្រុង​ស្អាត​នៅ​ឆ្នាំ​ ២០២០ លោក សាយ កុសល អភិបាលក្រុង​ស្ទឹងត្រែង​នៅ​ថ្ងៃទី​ ១៥ ​កុម្ភៈ​ បាន​ជូនដំណឹង​ឱ្យ​ប្រជាពលរដ្ឋ​ ១៣៩ ​ខ្នង​ផ្ទះ​ ដែល​កំពុង​រស់នៅ​តាម​ជួរ​មាត់​ទន្លេសេកុង ក្នុងភូមិ​ព្រែក សង្កាត់​ស្ទឹងត្រែង និង​នៅតាម​ជួរ​មាត់​ទន្លេមេគង្គ ក្នុង​ភូមិ​បាចុង សង្កាត់​ព្រះបាទ ត្រូវ​រុះរើ​លំនៅឋាន​ឱ្យ​បាន​​រួចរាល់​នៅ​ថ្ងៃទី​ ៣០ ​មេសា​ខាងមុខ​»​។

ដោយឡែក​ទំព័រ​ហ្វេសប៊ុក​រដ្ឋបាល​ក្រុង​ស្ទឹងត្រែង​បាន​ផ្សព្វផ្សាយ​ដែរ​ថា ការរុះរើ​សំណង់​អនាធិបតេយ្យ​ដែល​សង់​បណ្ដោះអាសន្ន​នៅ​តាម​ដី​ចំណី​មាត់ទន្លេ​គឺ​មាន​ពលរដ្ឋ​ចំនួន​ ១២៩ ​នាក់​បាន​ឯកភាព និង​គាំទ្រ​ដោយ​ទះដៃ​ទទួលយក​ដំណោះស្រាយ​គោលនយោបាយ​។

លោក ប៊ី វ៉ាននី មន្ត្រី​សម្របសម្រួល​សមាគម​អាដហុក​ប្រចាំខេត្ត​ស្ទឹងត្រែង​ដែល​គាំទ្រ​ចំពោះ​គម្រោង​ផ្លាស់​ទី​ពលរដ្ឋ​ពី​ច្រាំងទន្លេ​នេះ​បាន​លើកឡើង​ថា​កន្លង​មក​អាជ្ញាធរ​បាន​ព្យាយាម​ចរចា​ជាមួយ​ពលរដ្ឋ​ទាំងនេះ​ហើយ​លោក​មិនបាន​សង្កេតឃើញ​មាន​ការបង្ខិតបង្ខំ​ណាមួយ​កើតឡើង​នៅឡើយ​ទេ​។

លោក​ថា​៖ «​អាជ្ញាធរ​បាន​ព្យាយាម​ដោះដូរ​ ឬ​ដោះស្រាយ​តាម​សំណើ​របស់​ប្រជាពលរដ្ឋ​។ ​ប្រសិនបើ​ផ្លាស់ប្ដូរ​លំនៅ​ពួកគាត់​ទៅកាន់​ដី​សម្បទាន​សង្គមកិច្ច យើង​គាំទ្រ និង​ចូលរួម​អបអរសាទរ​ចំពោះ​ដំណោះស្រាយ​ហ្នឹង​។ ព្រោះ​វា​គោរព​ទៅ​តាម​គោលការណ៍​សិទ្ធិ​មនុស្ស សិទ្ធិ​ពលរដ្ឋ ឬ​សិទ្ធិ​លំនៅឋាន​ដើម្បី​ឱ្យ​ពួកគាត់​រស់នៅ​ឱ្យបាន​សមរម្យ ថ្វី​ដ្បិត​ពួកគាត់​រស់នៅ​លើដី​រដ្ឋ​ខុស​ច្បាប់​កី្ដ​»៕

អត្ថបទគួរចាប់អារម្មណ៍

  • ខេត្តបាក់និញៈ សួនឧស្សាហ​កម្ម​ Yen Phong 1 Industrial Park នៅខេត្ត Bac Ninh ភាគខាងជើង​បាន​ក្លាយជា​​សួនឧស្សាហ​កម្មលើក​ដំបូង​នៅក្នុងប្រទេស​វៀតណាម ដែលទទួល​បាន​​បណ្ដាញ​ទូរគមនា​គមន៍​ 5G ដោយ​បច្ចេកវិទ្យាថ្មីនេះ​​ បានដាក់​​ឲ្យដំណើរការ​នៅទីតាំងនោះ​ដោយ​ក្រុមហ៊ុន Viettel កាល​ពីថ្ងៃព្រហស្បតិ៍។​​

  • ភ្នំពេញៈ កម្ពុជា​នាំចេញ​ទំនិញ​ទៅ​ទីផ្សារ​អាមេរិក​មានតម្លៃ​ជាង ៦ ​ពាន់​លាន​ដុល្លារ​ ក្នុង​រយៈពេល​ ១១ ​ខែ ឆ្នាំ​ ២០២០ កើន​ជាង ២២ ​ភាគរយ​ធៀបនឹង​រយៈពេល​ដូចគ្នា​ឆ្នាំ​ ២០១៩ ខណៈ​ទំហំ​ពាណិជ្ជកម្ម​ទ្វេភាគី​មានតម្លៃ​ជាង ៦,៣ ​ពាន់​លាន​ដុល្លារ​។ នេះ​បើ​យោងតាម​ទិន្នន័យ​ពី​ការិយាល័យ​ពាណិជ្ជកម្ម​អាមេរិក​។

  • ភ្នំពេញៈ ត្រឹម​រយៈពេល​ជិត​ ១ ​ខែ​ប៉ុណ្ណោះ​ចាប់ពី​ថ្ងៃទី​ ២០ ធ្នូ ដល់​ថ្ងៃទី​ ១៧ មករា ពលករ​ខ្មែរ​ដែល​បាន​វិលត្រឡប់​មកពី​ប្រទេស​ថៃ​តាម​ច្រក​នៃ​បណ្តា​ខេត្ត​ជាប់​ព្រំដែន​កម្ពុជា-ថៃ​ចំនួន​ ៦៩ ​នាក់ ​ត្រូវបាន​រកឃើញ​វិជ្ជមាន​កូវីដ​ ១៩ ដោយ​ក្នុង​នោះ​ពលករ​ដែល​បាន​ព្យាបាល​ជាសះស្បើយ​ ២១ ​នាក់​។

  • ស្ទឹងត្រែងៈ កម្លាំង​នគរបាល​ប្រឆាំង​គ្រឿងញៀន​គ្រោង​នឹង​បញ្ជូន​បុរស​ជនជាតិ​ឡាវ​​ ២ ​នាក់ និង​វត្ថុតាង​គ្រឿងញៀន​ជិត​ ៥០ ​គីឡូក្រាម​ទៅ​តុលាការ​នៅ​ព្រឹក​ថ្ងៃ​ចន្ទ​នេះ​ ខណៈ​ដែល​សមត្ថកិច្ច​កម្ពុជា​កំពុង​សហការ​ជាមួយ​សមត្ថកិច្ច​ឡាវ​ ដើម្បី​តាម​រក​ចាប់ខ្លួន​ជនជាតិ​ឡាវ​ ៤ ​នាក់​ទៀត​ដែល​រត់គេចខ្លួន​។

  • ភ្នំពេញៈ លោក ហង់ជួន ណារ៉ុន រដ្ឋមន្ត្រី​ក្រសួង​អប់រំ ​យុវជន និង​កីឡា​បាន​ដឹកនាំ​កិច្ចប្រជុំ​ដាក់​ចេញ​វិធានការ​បន្ថែម​ដល់​សាលារៀន​ដែល​កំពុង​ត្រូវបាន​ប្រើប្រាស់​ជា​មណ្ឌល​ចត្ដាឡីស័ក ពិសេស​សាលារៀន​តាម​ខេត្ដ​ជាប់​ព្រំដែន​ប្រទេស​ថៃ និង​វៀតណាម​ដើម្បី​ធ្វើយ៉ាងណា​ធានា​ផ្ដល់​ការសិក្សា​ដល់​សិស្ស​គ្រប់គ្នា​ក្នុង​ឆ្នាំ​សិក្សា​ថ្មី​នេះ​។

  • ភ្នំពេញៈ លោក​ឧបនាយករដ្ឋមន្ត្រី ស ខេង រដ្ឋមន្ត្រី​ក្រសួង​មហាផ្ទៃ​បាន​ណែនាំ​ឱ្យ​អាជ្ញាធរ​គ្រប់លំដាប់​ថ្នាក់​លុបបំបាត់​ការបង្ក​សំឡេង​រំខាន​លើស​កម្រិត​ដោយ​យានយន្ដ​គ្រប់​ប្រភេទ និង​លុបបំបាត់​កន្លែង​កែច្នៃ​បំពង់​ស៊ី​ម៉ាំង​ដែល​បង្ក​ភាព​រំខាន​ដល់​អារម្មណ៍ និង​សិទ្ធិ​រស់នៅ​របស់​ពលរដ្ឋ