.jpg)
ការរុះរើផ្ទះដែលសង់លើផ្លូវនៅរាជធានីភ្នំពេញកាលពីពេលថ្មីៗនេះ។ រូបថត សាលាក្រុង
ភ្នំពេញៈ ពលរដ្ឋក្រីក្រដែលរស់នៅលើចិញ្ចើមផ្លូវសាធារណៈលេខ ៤៣៤ ក្នុងភូមិ ៤ សង្កាត់ទំនប់ទឹក ខណ្ឌបឹងកេងកង រាជធានីភ្នំពេញជិត ១០០ គ្រួសារ ទទួលបានកម្មសិទ្ធិដីធ្លីពីរាជរដ្ឋាភិបាលនៅតំបន់អភិវឌ្ឍន៍ថ្មីក្នុងឃុំវិហារសួគ៌ ស្រុកខ្សាច់កណ្ដាល ខេត្តកណ្ដាលដែលជាដំណោះស្រាយមួយធ្វើឲ្យពួកគាត់កក់ក្ដៅជាងមុន ខណៈបានក្លាយជាម្ចាស់កម្មសិទ្ធិផ្ទាល់។
លោក អេង ភារិទ្ធ អាយុ ២៤ ឆ្នាំ ដែលទើបបានរុះរើផ្ទះចាស់ចេញពីតំបន់មិនរៀបរយក្នុងសង្កាត់ទំនប់ទឹកបានប្រាប់ភ្នំពេញប៉ុស្តិ៍ពីថ្ងៃទី ១២ កក្កដា ថា ជាមួយដំណោះស្រាយឈ្នះ ឈ្នះ របស់លោកនាយករដ្ឋមន្ត្រី ហ៊ុន សែន អាជ្ញាធររាជធានីភ្នំពេញបានសម្រេចផ្ដល់ដីក្នុងតំបន់អភិវឌ្ឍន៍ឃុំវិហារសួគ៌ ស្រុកខ្សាច់កណ្ដាលខេត្តកណ្ដាលដល់ពលរដ្ឋក្នុងសហគមន៍របស់លោកសម្រាប់ ១ ខ្នងផ្ទះក្នុងទំហំ ៤ ម៉ែត្រx១៥ ម៉ែត្រជាថ្នូរនឹងការរុះរើផ្ទះចេញពីទីតាំងចាស់នៅភ្នំពេញ ដែលពួកគាត់ធ្លាប់រស់នៅកន្លងមក។
លោក ភារិទ្ធ បានថ្លែងថា៖ «កន្លងមកគ្រួសារខ្ញុំរស់នៅគ្មានភាពកក់ក្ដៅនោះទេ ដោយសារតែយើងសង់ផ្ទះរស់នៅលើដីចំណីផ្លូវសាធារណៈ។ ប៉ុន្តែពេលនេះសម្ដេចនាយករដ្ឋមន្ត្រី ហ៊ុនសែន តាមរយៈអាជ្ញាធររាជធានីភ្នំពេញបានផ្ដល់ដំណោះស្រាយជាដីទំហំ ៤ ម៉ែត្រ x ១៥ ម៉ែត្រ និងកម្មសិទ្ធិស្របច្បាប់ដល់ពួកយើង ដើម្បីសង់ផ្ទះរស់នៅសមរម្យ»។ បើតាមលោក ភារិទ្ធនៅទីតាំងថ្មីនោះគឺជាតំបន់រោងចក្រដែលអាចឲ្យពួកគាត់ងាយស្រួលក្នុងការប្រកបការងារ និងមុខរបរចិញ្ចឹមជីវិត។
លោក ម៉េត មាសភក្តី អ្នកនាំពាក្យរដ្ឋបាលរាជធានីភ្នំពេញបានប្រាប់ភ្នំពេញប៉ុស្តិ៍ ពីថ្ងៃទី ១២ កក្កដា ថា ការទទួលយកដំណោះស្រាយគោលនយោបាយជាដីឡូត៍ជូនពលរដ្ឋក្រីក្រនេះគឺជាថ្នូរនឹងការរុះរើផ្ទះចេញដោយស្ម័គ្រចិត្តពីដីចំណីផ្លូវ ដើម្បីចូលរួមចំណែកលើកកម្ពស់សណ្ដាប់ធ្នាប់សាធារណៈ សោភណភាព និងបរិស្ថានក្នុងរាជធានីភ្នំពេញឲ្យកាន់តែស្រស់បំព្រងឡើង។
លោកបានថ្លែងថា៖ «ជាការលើកទឹកចិត្តដល់គ្រួសារពលរដ្ឋក្រីក្រទាំងនេះ អាជ្ញាធររាជធានីភ្នំពេញយើងបានសម្រេចផ្ដល់ទាំងប្លង់កម្មសិទ្ធិដីធ្លីក្នុងទីតាំងថ្មីនោះដល់ពួកគាត់ឲ្យរួចជាស្រេចតែម្ដងដើម្បីបង្កលក្ខណៈងាយស្រួលដល់ពួកគាត់ក្នុងការរៀបចំអភិវឌ្ឍលំនៅឋានរស់នៅឲ្យបានសមរម្យ»។
លោក មាសភក្តី បានបន្តថា អាជ្ញាធរក៏បានជួយរុះរើ និងដឹកជញ្ជូនគ្រឿងសំណង់ផ្ទះចាស់ និងសម្ភារប្រើប្រាស់ផ្សេងៗរបស់ពលរដ្ឋទាំងនោះពីទីតាំងចាស់ទៅទីតាំងថ្មីព្រមទាំងបានជួយរកកន្លែងសម្រាប់ពួកគេស្នាក់នៅបណ្ដោះអាសន្នរយៈពេល ១ ខែដោយឥតគិតថ្លៃទម្រាំពួកគេសង់ផ្ទះថ្មីរួចផងដែរ។
ជុំវិញដំណោះស្រាយបែបនេះ លោកស្រី ស៊ុំ សាម៉ន នាយិកាអង្គការអភិវឌ្ឍន៍ស្ត្រីក្រីក្រក្នុងទីក្រុង (UPWD) បានសាទរជាមួយនឹងការរំពឹងថាគ្រួសារក្រីក្រទាំងនោះនឹងខិតខំប្រឹងប្រែងរកការងារធ្វើដោយសុចរិតទៅតាមសមត្ថភាពរៀងៗខ្លួនដើម្បីលើកកម្ពស់សេដ្ឋកិច្ចគ្រួសារឲ្យប្រសើរឡើង។
លោកស្រី សាម៉ន បានបញ្ជាក់ថា៖ «នៅទីតាំងថ្មីនោះ អាជ្ញាធរបានរៀបចំប្រព័ន្ធទឹក ភ្លើងរួចរាល់ហើយ។ ចំណែកផ្លូវបេតុងកំពុងដំណើរការសាងសង់ជិតរួចរាល់ហើយដែរ។ នៅក្បែរទីតាំងថ្មីនោះគឺជាមជ្ឈមណ្ឌលរោងចក្រកាត់ដេរ ហើយនៅប្រមាណ ២ គីឡូម៉ែត្រពីទីនោះមានមណ្ឌលសុខភាព ផ្សារ និងសាលារៀនផងដែរ»។
លោក ស្រី សាម៉ន បានបន្តថា ពេលនេះអង្គការរបស់លោកស្រី និងអង្គការជាដៃគូមួយចំនួនទៀតកំពុងស្វែងរកមូលនិធិ និងសម្ភារមួយចំនួនដើម្បីជួយគ្រួសារពលរដ្ឋក្រីក្រទាំងនោះក្នុងការសាងសង់ផ្ទះស្នាក់នៅឲ្យបានសមរម្យនៅលើទីតាំងថ្មី ដែលអាជ្ញាធរបានផ្ដល់ជូននោះ៕
