ភ្នំពេញ: ពលរដ្ឋចំនួន ២៧ គ្រួសារដែលថា រងគ្រោះពីការទិញផ្ទះល្វែង និងដីឡូត៍ពីមន្ត្រីយោធាថ្នាក់ឧត្តមសេនីយ៍ទោ និងភរិយាបានអំពាវនាវកាលពីថ្ងៃទី ២ សីហា ឲ្យអាជ្ញាធរជួយអន្តរាគមន៍ បន្ទាប់ពីម្ចាស់គម្រោងនេះបានលក់គម្រោងបន្តឲ្យធនាគារ Prime MF Microfinance LTD និងបានគេចវេះមិនព្រមដោះស្រាយជាមួយអ្នកដែលបានទិញរួច។
លោក ពេជ សារ៉ាត តំណាងពលរដ្ឋ ២៧ គ្រួសារ ដែលរងគ្រោះដោយសារគម្រោងផ្ទះល្វែង និងដីឡូត៍ ១ កន្លែងនៅភូមិត្រពាំងជើងស្រុក សង្កាត់ក្រាំងធ្នង់ ខណ្ឌសែនសុខ រាជធានីភ្នំពេញបានថ្លែងពីថ្ងៃទី ២ សីហាថា គម្រោងដែលពួកលោកបានទិញនេះជាកម្មសិទ្ធិរបស់លោក ឯម សុខពៅ ជាមន្ត្រីយោធាថ្នាក់ឧត្ដមសេនីយ៍ទោ (ផ្កាយ ២) និងភរិយារបស់លោកឈ្មោះ អ៊ុង សុភា ដែលបើកលក់តាំងពីឆ្នាំ ២០១៨ មក។
លោកបន្តថា ផ្ទះល្វែង និងដីឡូត៍ដែលពួកលោកបានទិញនេះមានទំហំ ៤,២ ម៉ែត្រគុណនឹង ១៤ ម៉ែត្រក្នុងតម្លៃចន្លោះពី ៣៩ ០០០ ដុល្លារអាមេរិក ទៅ ៤៥ ០០០ ដុល្លារ។ ពេលទិញដំណាក់កាលដំបូង ម្ចាស់គម្រោងតម្រូវឲ្យបង់ក្នុងលក្ខខណ្ឌផ្សេងៗគ្នាអ្នកខ្លះបង់ ៣០ ភាគរយ អ្នកខ្លះ ៥០ ភាគរយ និងបង់ប្រចាំខែជាបន្តបន្ទាប់។ រីឯអ្នកខ្លះទៀតបង់ដំណាក់ដំបូង ហើយមិនបង់ប្រចាំខែទេ ដោយរង់ចាំផ្ទះសាងសង់ជិតរួចសិន ទើបបង់ប្រាក់បង្គ្រប់តែម្តង។
លោកបញ្ជាក់ថា៖ «សម្រាប់ខ្ញុំផ្ទាល់គឺខ្ញុំបានបង់ដំណាក់កាលដំបូងជាង ១ ម៉ឺនដុល្លារ ហើយនៅសល់ប្រមាណ ២៧ ០០០ ដុល្លារ ត្រូវបង់ពេលផ្ទះសាងសង់រួចរាល់។ រីឯអ្នកទិញខ្លះទៀតគាត់បានបង់ដំណាក់កាលដំបូងរហូតដល់ជាង ២ ម៉ឺនដុល្លារ ហើយត្រូវបង់ប្រចាំខែរហូតដល់ជាង ៥០០ ដុល្លារបន្ថែមទៀត។ ប៉ុន្ដែឥឡូវនេះម្ចាស់គម្រោងបានគេចវេះមិនទទួលខុសត្រូវ ហើយលក់គម្រោងនេះទៅឲ្យធនាគារ Prime ធ្វើបន្តដោយស្ងាត់ៗទៅវិញ»។
លោកបន្ថែមថា បច្ចុប្បន្ននេះធនាគារបានតម្រូវឲ្យអតិថិជនដែលទិញរួចបង់លុយឲ្យធនាគារបន្ថែម ១៣ ០០០ ដុល្លារពីលើតម្លៃនេះ។ ប្រសិនបើតម្លៃផ្ទះត្រឹម ៣៩ ០០០ ដុល្លារគឺត្រូវឡើងដល់ ៥២ ០០០ ដុល្លារ។
អ្នកស្រី ហូ សុខលីម ជាជនរងគ្រោះម្នាក់ក្នុងចំណោមនោះបានថ្លែងថា ពួកអ្នកស្រីស្នើសុំឲ្យម្ចាស់ធនាគារជួយសង់ផ្ទះជូនភាគីអ្នកទិញឲ្យចប់តាមកិច្ចសន្យាចាស់។ បើមិនអាចសាងសង់ទេ ភាគីអ្នកទិញអាចសាងសង់បញ្ចប់តាមលទ្ធភាពរៀងៗខ្លួនដោយត្រូវកាត់កងជាមួយតម្លៃផ្ទះដែលនៅសល់ជាមួយធនាគារ។
អ្នកស្រីបន្តថា ភាគីអ្នកទិញតម្រូវឲ្យខាងធនាគាររៀបចំកិច្ចសន្យាទិញ-លក់ឡើងវិញ ដោយត្រូវតែលម្អិត និងមានការដឹងឮពីអាជ្ញាធរមានមេធាវី និងអ្នកឯកទេសផ្នែកអចលនទ្រព្យជំនាញខាងផ្នែកទិញ-លក់ ជាអ្នកជួយមើល និងរៀបចំឯកសារឲ្យភាគីអ្នកទិញ។អ្នកស្រីថា៖ «ខ្ញុំស្នើឲ្យភាគីខាងធនាគាររៀបចំកាត់ប្លង់រឹងជូនម្ចាស់ផ្ទះនីមួយៗទៅតាមកិច្ចសន្យាចាស់»។
ភ្នំពេញប៉ុស្ដិ៍ មិនអាចសុំអត្ថាធិប្បាយពីលោក ម៉ូវ ម៉ានិត អភិបាលខណ្ឌសែនសុខជុំវិញករណីនេះបានទេកាលពីម្សិលមិញ។ ប៉ុន្ដែលោកបានប្រាប់ Fresh News កាលពីថ្ងៃ ២ សីហាថា លោកបានទទួលពាក្យបណ្ដឹងពីពលរដ្ឋរួចហើយ ដោយបានបញ្ជូនបន្តទៅសាលារាជធានីភ្នំពេញ។
លោកថា៖ «បច្ចុប្បន្នខាងសាលារាជធានីភ្នំពេញកំពុងពន្លឿនការដោះស្រាយជូនពួកគាត់ហើយ យើងមិនបានទុកបញ្ហារបស់ពួកគាត់ចោលទេ»។
លោក ម៉េត មាសភក្ដី អ្នកនាំពាក្យសាលារាជធានីភ្នំពេញបានថ្លែងពីម្សិលមិញថា លោកពុំទាន់បានទទួលពាក្យបណ្ដឹងពីបញ្ហានេះទេ ដោយសារឯកសារច្រើនមិនទាន់បានពិនិត្យ។ ប៉ុន្តែលោកបានលើកទឹកចិត្តឲ្យពលរដ្ឋមកស៊ើបសួរ និងដាក់ពាក្យផ្ទាល់នៅសាលារាជធានី ដើម្បីឲ្យមន្ត្រីជំនាញងាយស្រួលត្រួតពិនិត្យ។
លោក សារិន វណ្ណា ប្រធានមន្ទីររៀបចំដែនដី នគរូបនីយកម្ម សំណង់ និងសុរិយោដីរាជធានីភ្នំពេញបានថ្លែងពីថ្ងៃទី ២ សីហា ថា លោកមិនទាន់បានទទួលបណ្ដឹងពីពលរដ្ឋទាំង ២៧ គ្រួសារនេះទេ ដោយសារលោកជាប់រវល់ការងារនៅខេត្តមណ្ឌលគិរី។ ចំណែកលោក យស់ វណ្ណា ប្រធានស្ដីទីមន្ទីរនេះថា លោកក៏មិនទាន់បានទទួលពាក្យបណ្ដឹងនេះដែរ។ «ខ្ញុំគិតថាប្រហែលជាគាត់ដាក់ពាក្យបណ្ដឹងទៅកន្លែងផ្សេងឲ្យជួយដោះស្រាយ»។
លោកស្រី អ៊ុង សុភា និងលោក ឯម សុខពៅ ដែលជាម្ចាស់គម្រោងផ្ទះល្វែង និងដីឡូត៍នេះមិនអាចស្វែងរកប្រភពទាក់ទងសុំការបញ្ជាក់ពីករណីនេះបានទេ។ រីឯលោក ឈុំ សុជាតិ អ្នកនាំពាក្យក្រសួងការពារជាតិក៏មិនអាចសុំការបញ្ជាក់បានដែរ ដោយទូរស័ព្ទរបស់លោកពុំមានអ្នកទទួលកាលពីម្សិលមិញ។
បុគ្គលិកធនាគារ Prime MF Microfinance LTD ម្នាក់ឈ្មោះ វិរៈ ដែលកាន់សំណុំរឿងនេះបានបដិសេធធ្វើអត្ថាធិប្បាយជុំវិញករណីនេះកាលពីថ្ងៃទី ២ ខែសីហា។ លោកថា៖ «ខ្ញុំសូមមិនឆ្លើយអ្វីទាំងអស់ទៅកាន់អ្នកសារព័ត៌មានសូមសួរទៅលោកអគ្គនាយកខ្ញុំវិញទៅ»។ ក៏ប៉ុន្តែលោក គីម សៀងស៊ូ អគ្គនាយកធនាគារនេះមិនអាចស្វែងរកប្រភពទាក់ទងបានទេកាលពីម្សិលមិញ៕