The Phnom Penh Post Search

Search form




Logo of Phnom Penh Post newspaper Phnom Penh Post - ពលរដ្ឋ​សុំ​ឲ្យ​នាយក​រដ្ឋមន្ត្រី​ ជួយ​រឿង​ជម្លោះ​ដី​ជាមួយ​ទាហាន

ពលរដ្ឋ​សុំ​ឲ្យ​នាយក​រដ្ឋមន្ត្រី​ ជួយ​រឿង​ជម្លោះ​ដី​ជាមួយ​ទាហាន

Content image - Phnom Penh Post
ប្រជាពលរដ្ឋ​រស់នៅ​ក្នុង​ស្រុក​បាណន់ និង​ស្រុក​បវេល​មក​សុំ​អន្តរាគមន៍​ពី​លោក​នាយក​រដ្ឋមន្ត្រី​ ហ៊ុន សែន កាលពី​ថ្ងៃ​ម្សិលមិញ​។ ផា លីណា

ពលរដ្ឋ​សុំ​ឲ្យ​នាយក​រដ្ឋមន្ត្រី​ ជួយ​រឿង​ជម្លោះ​ដី​ជាមួយ​ទាហាន

បាត់ដំបងៈ ប្រជាពលរដ្ឋ​ប្រមាណ​ជិត​ ១០០​ នាក់​តំណាង​ឲ្យ​ ៥៩ ​គ្រួសារ រស់នៅ​ក្នុង​ភូមិ​ព្រៃព្រាល ​ឃុំ​ឃ្លាំងមាស ​ស្រុក​បាណន់ ​និង​ស្រុក​បវេល ដែល​បាន​ទទួល​ដីសម្បទាន​សង្គមកិច្ច​ពី​រដ្ឋាភិបាល​តាំង​តែ​ពី​ឆ្នាំ ២០១១ ​កាលពី​ម្សិលមិញ​បាន​ឡើង​មក​ភ្នំពេញ​សុំ​អន្តរាគមន៍​ពី​លោក​នាយក​រដ្ឋមន្ត្រី ហ៊ុន​ សែន​ ដោយសារ​តែ​ដីធ្លី​នោះ​មាន​ជម្លោះ​ជាមួយ​ក្រុម​ទាហាន​ហើយ​អាជ្ញាធរ​ពាក់ព័ន្ធ​មិន​បាន​ដោះស្រាយ​ជាច្រើន​ឆ្នាំ​ហើយ​។

ប្រជាពលរដ្ឋ​ទាំង​នេះ​មាន​ទំនាស់​លើ​ដីសម្បទាន​សង្គមកិច្ច​ទំហំ​ ១៥២ ហិកតា​ជាមួយ​ទាហាន​​តាំងពី​ឆ្នាំ​ ២០១១​ ដែល​រហូត​មក​ទល់​ពេល​នេះ​មិន​ទាន់​មាន​ដំណោះស្រាយ​នៅ​ឡើយ​​។

លោក រិទ្ធ សារ៉េន​ អាយុ​ ៦៣ ​ឆ្នាំ​ជា​តំណាង​ប្រជាពលរដ្ឋ​បាន​ឲ្យ​ដឹង​ថា​ប្រជាពលរដ្ឋ​មាន​ជម្លោះ​ដីធ្លី​ជាមួយ​ខាង​ទាហាន​អស់​រយៈពេល​ ៦ ​​ឆ្នាំ​មក​ហើយ ប៉ុន្តែ​​គ្មាន​ដំណោះស្រាយ​ទើប​ពួកគេ​នាំ​គ្នា​​ឡើង​មក​ភ្នំពេញ​ដើម្បី​រក​ការ​អន្តរាគមន៍។​

លោក​ថា​ រដ្ឋាភិបាល​បាន​ផ្តល់​ដីសម្បទាន​សង្គមកិច្ច​ដល់​អ្នក​ភូមិ​ក្នុង​ឆ្នាំ ​២០១១ តែ​ខាង​ទាហាន​នៅ​តែ​មិន​ព្រម​ និង​មាន​ជម្លោះ​រហូត​មក​ដល់​សព្វ​ថ្ងៃ​។​

លោក​បញ្ជាក់​ថា​៖ «​ពលរដ្ឋ​អ្នក​មក​កាប់​ឆ្ការ​នៅ​តំបន់​នេះ​មុន​ហើយ​ខាង​ទាហាន​មក​ចង់​កាន់កាប់​ទើប​មាន​ជម្លោះ​នឹង​គ្នា»។

ពលរដ្ឋ​ម្នាក់​ទៀត​ឈ្មោះ ទូច ចន្ថា ឲ្យ​ដឹង​ថា​ប្រជាពលរដ្ឋ​ធ្លាប់​ដាក់​ពាក្យ​បណ្តឹង និង​រក​ការ​អន្តរាគមន៍​ពី​អាជ្ញាធរ​មូលដ្ឋាន​តែ​នៅ​តែ​គ្មាន​ដំណោះស្រាយ​​។ ​«ធ្លាប់​ដាក់​ពាក្យ​បណ្តឹង​ប៉ុន្មាន​ដង​ហើយ​តែ​គ្មាន​ដំណោះស្រាយ​នោះ​ទេ​ទើប​នាំ​គ្នា​មក​ភ្នំពេញ​ស្នើសុំ​សម្តេច​តេជោ​ជួយ​អន្តរាគមន៍»។​

លោក​​បន្ថែម​ថា​នៅ​ពេល​​ពលរដ្ឋ​មក​មុខ​វត្ត​បទុមវត្តី​មន្រ្តី​ខុទ្ទកាល័យ​របស់​លោក​នាយក​រដ្ឋមន្ត្រី​បាន​ចេញ​មក​ទទួល​ហើយ​ឲ្យ​ពួកគាត់​ទៅ​ដាក់​ពាក្យ​បណ្តឹង​នៅ​ក្រសួង​ដែនដី​ដែល​ជា​ក្រសួង​ទទួល​បន្ទុក​លើ​ការ​ដោះស្រាយ​វិវាទ​ដីធ្លី​វិញ​។

អំឡុង​ពេល​ដែល​ប្រជាពលរដ្ឋ​ទៅ​ក្រសួង​ដែនដី​លោក​ អុល​ សុខយស ក្រុម​ការងារ​ទទួល​ពាក្យ​បណ្តឹង​របស់​ក្រសួង​ដែនដី​បាន​ចេញ​មក​និយាយ​ជាមួយ​ពលរដ្ឋ​ដោយ​ស្នើ​ឲ្យ​ពួកគាត់​ទៅ​រៀបចំ​ញត្តិ​ដើម្បី​ដាក់​មក​ក្រសួង​ដែនដី​ក្នុង​ការ​រក​ដំណោះស្រាយ​។

លោក យិន ម៉េងលី អ្នក​សម្របសម្រួល​សមាគម​អាដហុក​បាន​ថ្លែង​ថា​លោក​មិន​បាន​ជ្រាប​ព័ត៌មាន​លម្អិត​​ពី​ប្រវត្តិ​ដីធ្លី​ប្រជាពលរដ្ឋ​រស់នៅ​ក្នុង​ឃុំ​ឃ្លាំង​មាស​នោះ​ទេ​គ្រាន់​តែ​ដឹង​ថា​ពួកគេ​មាន​ជម្លោះ​ដីធ្លី​ជាមួយ​ក្រុម​ទាហាន​យូរ​ឆ្នាំ​មក​ហើយ​។​ «ពួក​គាត់​សម្រេច​មក​ភ្នំពេញ​ព្រោះ​គ្មាន​ដំណោះស្រាយ​យូរ​ឆ្នាំ​មក​ហើយ»។

បញ្ហា​វិវាទ​ដីធ្លី​នៅ​តែ​ជា​បញ្ហា​ដ៏ក្តៅ​គគុក​មួយ​នៅ​ក្នុង​សង្គម​ខ្មែរ​បច្ចុប្បន្ន ហើយ​ជា​ញឹកញាប់​គេ​តែងតែ​ឃើញ​ប្រជាពលរដ្ឋ​មកពី​តាម​បណ្តា​ខេត្ត​នានា​​ឡើង​មក​តវ៉ា​នៅ​ភ្នំពេញ៕

អត្ថបទគួរចាប់អារម្មណ៍