The Phnom Penh Post Search

Search form




Logo of Phnom Penh Post newspaper Phnom Penh Post - ពលរដ្ឋ​កោះកុង​រង​ការ​បណ្តេញ​ចេញ​នឹង​ប្តឹង​មក​នាយក​រដ្ឋ​មន្ត្រី

ពលរដ្ឋ​កោះកុង​រង​ការ​បណ្តេញ​ចេញ​នឹង​ប្តឹង​មក​នាយក​រដ្ឋ​មន្ត្រី

ពលរដ្ឋ​មាន​ជម្លោះ​ដីធ្លី​នៅ ខេត្ត​កោះកុង ធ្វើ​ការ​តវ៉ា​រក​ដំណោះ​ស្រាយ​ពី​អាជ្ញាធរ​កន្លង​មក។
ពលរដ្ឋ​មាន​ជម្លោះ​ដីធ្លី​នៅ ខេត្ត​កោះកុង ធ្វើ​ការ​តវ៉ា​រក​ដំណោះ​ស្រាយ​ពី​អាជ្ញាធរ​កន្លង​មក។ រូបថត សហការី

ពលរដ្ឋ​កោះកុង​រង​ការ​បណ្តេញ​ចេញ​នឹង​ប្តឹង​មក​នាយក​រដ្ឋ​មន្ត្រី

កោះកុងៈ អតីត​ប្រជា​ពលរដ្ឋ​នៅ​ក្នុង​ភូមិ​ចំនួន ២ នៃ ខេត្ត​កោះកុង ដែល​ត្រូវ​បាន​រុះរើ​បំផ្លាញ​ផ្ទះ​សម្បែង​ដោយ​សន្តិសុខ​ក្រុម​ហ៊ុន​ចិន​ឈ្មោះ Union Development Group (UDG) កាល​សប្តាហ៍​មុន កំពុង​រៀបចំ​ដាក់​ពាក្យ​បណ្តឹង​មក​កាន់​លោក​នាយក​រដ្ឋ​មន្រ្តី ហ៊ុន សែន ដើម្បី​សុំ​ជួយ​អន្តរាគមន៍។

ផ្ទះ​អ្នក​ភូមិ​ចំនួន ១៤ ខ្នង ត្រូវ​បាន​បំផ្លាញ​ដោយ​កម្លាំង​សន្តិសុខ​ក្រុម​ហ៊ុន​កាល​ព្រឹក​ថ្ងៃ​ព្រហស្បតិ៍​សប្តាហ៍​មុន។ នេះ​បើ​តាម​អ្នក​ភូមិ និង​តំណាង​អង្គការ​សិទ្ធិ​មនុស្ស​លីកាដូ អះអាង។

ក្រុម​អ្នក​ភូមិ​រង​គ្រោះ ឥឡូវ​នេះ​កំពុង​តែ​ស្នាក់​នៅ​បណ្តោះ​អាសន្ន​ក្នុង​វត្ត​មួយ​នៅ​ជិត​នោះ និង​ពឹង​ផ្អែក​លើ​ម្ហូប​អាហារ និង​ទឹក​ដែល​បាន​មក​ពី​ការ​បរិច្ចាគ​របស់​អ្នក​ភូមិ​ដូច​គ្នា។

អ្នក​ស្រី សេស សេងហៀង តំណាង​អ្នក​ភូមិ​ដែល​ត្រូវ​បាន​បណ្តេញ​ចេញ​ដែល​នៅ​កំពុង​រស់​នៅ​ក្នុង​ដី​សម្បទាន​របស់​ក្រុម​ហ៊ុន UDG បាន​រៀប​រាប់​ថា ស្ថានភាព​របស់​អ្នក​ភូមិ​ដែល​ត្រូវ​បាន​បណ្តេញ​ចេញ គឺ​មាន​លក្ខណៈ​អាក្រក់​ហួស​ហេតុ។

អ្នក​ស្រី​បាន​និយាយ​បន្ត​ថា៖ «ឥឡូវ​នេះ​យើង​កំពុង​រស់​នៅ​ក្នុង​ស្ថានភាព​យ៉ាង​លំបាក​ជា​ខ្លាំង ជា​ពិសេស​បញ្ហា​ម្ហូប​អាហារ ប៉ុន្តែ​សំណាង​ល្អ​អ្នក​ជិត​ខាង​ជួយ​យើង​ច្រើន​ណាស់ ដោយ​ផ្តល់​ឲ្យ​យើង​ម្ហូប​អាហារ​មួយ​ចំនួន​ពី​ក្នុង​ស្បៀង​អាហារ​បន្តិច​បន្តួច​ដែល​ពួក​គេ​បម្រុង​ទុក។

អ្នក​ស្រី ទូច ស្រីម៉ៅ អាយុ ៣៧​ឆ្នាំ ដែល​បាន​រង​របួស​នៅ​ពេល​សន្តិសុខ​ធ្វើ​ការ​បណ្តេញ​អ្នក​ភូមិ​ដោយ​បង្ខំ​បាន​និយាយ​ថា៖ «នៅ​ពេល​ខ្ញុំ​ឃើញ​សន្តិសុខ​រុះរើ​បំផ្លាញ​ផ្ទះ ខ្ញុំ​បាន​ទៅ​ជួយ។ តែ​ត្រូវ​ពួក​គេ​គប់​ដុំ​ថ្ម​មក​លើ​ពួក​យើង​និង​ត្រូវ​ចំ​ភ្លៅ​របស់​ខ្ញុំ»។

ផ្ទះ​របស់​អ្នក​ស្រី ម៉ៅ បាន​គេច​ផុត​ការ​បំផ្លាញ​កាល​ថ្ងៃ​ព្រហស្បតិ៍ ប៉ុន្តែ​ឥឡូវ​អ្នក​ស្រី​បារម្ភ​អំពី​សុវត្ថិភាព​ក្នុង​ការ​រស់​នៅ​ជា​ខ្លាំង។ អ្នក​ស្រី​ថា៖ «ខ្ញុំ​បារម្ភ​ខ្លាច​ពួក​គេ​មក​ម្តង​ទៀត មក​បំផ្លាញ​ផ្ទះ​របស់​ខ្ញុំ​ដែរ។ ប៉ុន្តែ ខ្ញុំ​លែង​ខ្លាច​អ្នក​ទាំង​នោះ​ទៀត​ហើយ។ ខ្ញុំ​នឹង​បន្ត​ការពារ​ដី​ខ្ញុំ នឹង​មិន​ចេញ​ទៅ​ណា​ទេ»។

លោក លី តិចឆៃ ប្រធាន​សន្តិសុខ​របស់​ក្រុម​ហ៊ុន UDG ក្នុង​តំបន់​នោះ មិន​អាច​ទាក់​ទង​សុំ​អត្ថាធិប្បាយ​បាន។

អភិបាល ស្រុក​គិរីសាគរ បាន​ថ្លែង​ថា កម្លាំង​សន្តិសុខ​របស់​អាជ្ញាធរ​មិន​អាច​ទៅ​ជួយ​អន្តរាគមន៍​ទាន់​ពេល​ទេ។

លោក​បន្ត​ថា៖ «យើង​ពិត​ជា​មាន​ការ​សោក​ស្តាយ ដែល​យើង​មិន​អាច​ធ្វើ​អ្វី​បាន។ ដូច​បាន​ដឹង​ហើយ ក្រុម​ហ៊ុន​មាន​ឡាន​ទំនើប​ធំៗ មាន​ល្បឿន​លឿន។ កន្លែង​ជម្លោះ គឺ​នៅ​ឆ្ងាយ​ហើយ​យើង​មិន​ដឹង​ថា តើ​កំពុង​កើត​មាន​រឿង​អ្វី​ទេ ដូច្នេះ​យើង​មិន​អាច​ចាត់​ការ​ជួយ​អន្តរាគមន៍​ទាន់​ពេល​ឡើយ»។

លោក អ៊ិន គង់ជិត មន្រ្តី​សម្រប​សម្រួល​របស់​អង្គការ​សិទ្ធិ​មនុស្ស​លីកាដូ បាន​ឲ្យ​ដឹង​ថា ការ​បណ្តេញ​របស់​ក្រុម​ហ៊ុន UDG ទៅ​លើ​អ្នក​ភូមិ គឺ​ប្រឆាំង​នឹង​បទ​បញ្ជា​របស់​លោក​នាយក​រដ្ឋ​មន្រ្តី ហ៊ុន សែន និង​ធ្វើ​ឲ្យ​ប្រជាជន​ខ្វះ​ម្ហូប​អាហារ។ លោក​ថា៖ «ក្រុម​ហ៊ុន​មិន​អើពើ​នឹង​បញ្ជា​របស់​លោក​នាយក​រដ្ឋ​មន្រ្តី​ទេ។ ខ្ញុំ​នឹង​ផ្ញើ​របាយ​ការណ៍​ទៅ​អាជ្ញាធរ​ពី​បញ្ហា​នេះ»៕

អត្ថបទគួរចាប់អារម្មណ៍