.jpg)
ទីតាំងចាក់សំរាមក្នុងភូមិអន្លង់ពីរ ឃុំត្រពាំងធំ ស្រុកប្រាសាទបាគងខេត្តសៀមរាប។ សហការី
សៀមរាប: ពលរដ្ឋជិត ៥០ គ្រួសារដែលរស់នៅក្បែរគំនរសំរាមក្នុងភូមិអន្លង់ពីរ ឃុំត្រពាំងធំ ស្រុកប្រាសាទបាគងខេត្តសៀមរាប បានអំពាវនាវឲ្យអាជ្ញាធរប្រញាប់ប្ដូរទីតាំងចាក់សំរាមឲ្យនៅឆ្ងាយពីផ្ទះពួកគាត់ ខណៈបច្ចុប្បន្នកំពុងបង្កប៉ះពាល់ដល់សុខភាព ប៉ុន្ដែមន្ត្រី និងក្រុមហ៊ុនថា ខ្លួនកំពុងរកទីតាំងថ្មី។
លោក ឡឹង ម៉ុន ជាពលរដ្ឋម្នាក់រស់នៅជិតទីតាំងចាក់សំរាមក្នុងភូមិខាងលើបានថ្លែងថា គំនរសំរាមនេះត្រូវបានក្រុមហ៊ុនហ្គាអុីយ៉ា ប្រមូលពីក្រុងសៀមរាបមកចាក់ចោលក្នុងភូមិរយៈពេល ១២ ឆ្នាំមកហើយ ប៉ុន្ដែអាជ្ញាធរហាក់មិនទាន់មានវិធានការទប់ស្កាត់ឬក៏រកកន្លែងថ្មីទុកដាក់ឲ្យឆ្ងាយពីភូមិទេ។
លោកថា៖ «រាល់ថ្ងៃនេះ មានក្លិនស្អុយអាក្រក់ខ្លាំងណាស់ចេញពីគំនរសំរាមដែលពួកខ្ញុំរស់នៅក្បែរនេះមានការលំបាកនិងបង្កជំងឺស្ទើរគ្រប់គ្នា រហូតពួកខ្ញុំដាច់ចិត្តឃាំងផ្លូវឡានកុំឲ្យយកសំរាមទៅចាក់នៅទីនោះទៀត ប៉ុន្ដែអាជ្ញាធរគ្រាន់តែថា ចាំថ្ងៃនេះ ចាំថ្ងៃនោះ ចាំដោះស្រាយរាប់រយដងហើយ»។
លោក ម៉ុន បន្ថែមថា អាជ្ញាធរ និងក្រុមហ៊ុននេះបានសន្យាកាលពីដើមឆ្នាំ ២០១៨ ថា ដាក់សំរាមនៅទីនោះតែ ៦ ខែទៀតទេ ប៉ុន្ដែរហូតមកទល់ពេលនេះនៅតែចាក់ទីនេះដដែល។
ពលរដ្ឋម្នាក់ទៀតសុំមិនបញ្ចេញឈ្មោះបានថ្លែងថា សំរាមនៅទីនេះ បានបង្កឲ្យអ្នកភូមិមានជំងឺ ហើយប្រភពទឹកក្នុងដីដែលធ្លាប់ហូបបាន ឥឡូវហូបលែងបានហើយ រីឯដីស្រែក្បែរនោះ ត្រូវបានទឹកសំរាមហូរចូលខូចស្រូវ និងមានក្លិនស្អុយខ្លាំងទៀតផង។
លោកថា៖ «ខ្ញុំសូមអំពាវនាវសូមឲ្យអាជ្ញាធរជួយរកទីតាំងថ្មីសម្រាប់ដាក់សំរាមដែលដឹកពីក្រុងសៀមរាបហើយខ្ញុំតំណាងប្រជាជនសូមប្តូរទីតាំងកន្លែងចាក់សំរាម ព្រោះរាល់ថ្ងៃនេះស្អុយខ្លាំងណាស់ ហើយក្រៅពីនេះ មានអ្នកដួលម៉ូតូរាល់ថ្ងៃ ព្រោះតែទឹកសំណល់សំរាមដែលកង្វក់ធ្លាក់មកពេញលើផ្លូវ»។
លោក សយ សីហា មេឃុំត្រពាំងធំបានទទួលស្គាល់ថា ពលរដ្ឋនៅជិតគំនរសំរាមពិតជាជួបការលំបាកមែន សូម្បីតែរូបលោកធ្វើការនៅសាលាឃុំឆ្ងាយពីគំនរសំរាមប្រមាណ ១ គីឡូម៉ែត្រក៏រងឥទ្ធិពលពីក្លិនវាដែរ ប៉ុន្ដែអាជ្ញាធរបាននិងកំពុងរកទីតាំងថ្មីនៅស្រុកបន្ទាយស្រីត្រង់កន្លែងគ្មានមនុស្សរស់នៅ។
លោកបញ្ជាក់ថា៖ «កាលពីថ្ងៃទី ១៥ កុម្ភៈ ខ្ញុំបានឃើញលិខិតកោះអញ្ជើញអភិបាលស្រុក ខេត្ត និងមន្ទីរពាក់ព័ន្ធចូលប្រជុំពីបញ្ហានេះ ហើយខ្ញុំឮថា គេគ្រោងដាក់នៅទីតាំងថ្មីលើដីប្រមាណជាង ១០ ហិកតានៅឃុំកន្ដែងនិងនៅស្រុកបន្ទាយស្រី ព្រោះទីតាំងនោះគ្មានមនុស្សរស់នៅទេ។ នេះគ្រាន់តែគម្រោង ប៉ុន្ដែខ្ញុំមិនទាន់ជាក់លាក់ទេ»។
លោក ឡឹក ចំរើន ប្រធានគ្រប់គ្រងផ្នែកដឹកជញ្ជូនសំរាមរបស់ក្រុមហ៊ុនហ្គាអុីយ៉ា បានទទួលស្គាល់ថា ពិតជាមានក្លិនស្អុយប៉ះពាល់ដល់ពលរដ្ឋមែន ប៉ុន្ដែលោកសុំពលរដ្ឋអត់ធ្មត់ខណៈអាជ្ញាធរ និងក្រុមហ៊ុនកំពុងរកទីតាំងចាក់សំរាមថ្មី។
លោកបន្តថា ការរកទីតាំងចាក់សំរាមថ្មីនេះជាបន្ទុករបស់អាជ្ញាធរ រីឯក្រុមហ៊ុនគ្រាន់តែជាអ្នកគោរពតាមការណែនាំប៉ុណ្ណោះ។
លោកបញ្ជាក់ថា៖ «នៅប៉ុន្មានថ្ងៃមុននេះ អាជ្ញាធរស្រុកនិងខេត្តចុះទៅជម្រាបពីផលប៉ះពាល់នេះដែរ ព្រោះរណ្ដៅដាក់សំរាមសព្វថ្ងៃនេះវាពេញហើយ ឥឡូវនេះ យើងមិនអាចបន្តចាក់នៅរណ្ដៅចាស់ហ្នឹងទៀតទេ គ្រាន់តែថាឥឡូវនេះ យើងកំពុងរកទីលានថ្មីយើងសុំឲ្យគាត់អត់ធ្មត់ ៤ ខែទៅមុខទៀតសិន ខ្ញុំបានសុំអធ្យាស្រ័យពីគាត់ហើយ»។
លោក សូរ ប្លាតុង អភិបាលស្រុកប្រាសាទបាគង បានថ្លែងថា អាជ្ញាធរពាក់ព័ន្ធកំពុងសិក្សានៅទីលានចាក់សំរាមថ្មី ប៉ុន្ដែមិនទាន់ដឹងពីពេលវេលាផ្លាស់ប្ដូរទេ ព្រោះមន្ត្រីជំនាញត្រូវការសិក្សាលម្អិតដើម្បីចៀសវាងការផ្ដាស់ប្ដូរច្រើនលើកនៅថ្ងៃអនាគត។
លោកបន្តថា ទីតាំងចាក់សំរាមសព្វថ្ងៃ ពិតជាប៉ះពាល់ពលរដ្ឋដែលរស់នៅតំបន់មែន ប៉ុន្ដែលោកបានដឹកនាំក្រុមគ្រូពេទ្យចុះទៅពិនិត្យសុខភាពអ្នកភូមិក្នុងតំបន់នោះរាល់ខែដោយបារម្ភថា ពួកគាត់អាចនឹងមានជំងឺដែលបណ្ដាលមកពីផលប៉ះពាល់ក្លិនសំរាមនេះ។
លោកបញ្ជាក់ថា៖ «កិច្ចការងារនេះ យើងកំពុងគិតរកទីលានថ្មី គឺយើងគិតថា រកកន្លែងថ្មីហ្នឹងគឺជាកន្លែងដែលអាចដាក់សំរាមបានរហូត ដោយមិនចាំបាច់រើទៅនេះ រើទៅនោះទៀត យើងរើតែម្ដងហ្នឹងគឺរួចរាល់តែម្ដង។ យើងរកកន្លែងដែលគ្មានមនុស្សរស់នៅ គឺឆ្ងាយពីភូមិ ស្រុកពលរដ្ឋយើង»៕
