.jpg)
បឹងតាមោក ឬបឹងទំនប់កប់ស្រូវ គឺជាបឹងធម្មជាតិដ៏ធំមួយក្នុងចំណោមបឹងស្តុកទឹកធំៗ ក្នុងរាជធានីភ្នំពេញ។ សហការី
ភ្នំពេញៈ ពលរដ្ឋ ១០ គ្រួសារ ក្នុងចំណោមប្រមាណ ៣០ គ្រួសារ ដែលបានអាស្រ័យផលលើបឹងកប់ស្រូវ ហៅបឹងតាមោក ស្ថិតក្នុងសង្កាត់ពន្សាំង ខណ្ឌព្រែកព្នៅ រាជធានីភ្នំពេញ បានរុះរើផ្ទះ និងចាកចេញពីលើបឹងនេះហើយ ក្រោយអាជ្ញាធរចេញលិខិតជូនដំណឹងឲ្យពួកគេ ចាកចេញពីលើបឹង ដើម្បីរក្សាផ្ទៃបឹងរបស់រដ្ឋ។
លោក សុខ សម្បត្តិ អភិបាលនៃគណៈអភិបាលខណ្ឌព្រែកព្នៅ បានប្រាប់ភ្នំពេញប៉ុស្តិ៍ពីម្សិលមិញថា អាជ្ញាធរបានចេញលិខិតជូនដំណឹងចំនួន ២ លើកមកហើយ ដោយឲ្យប្រជាពលរដ្ឋប្រមាណ ៣០ គ្រួសារ ដែលរស់នៅតាមបណ្ដោយផ្លូវ ១៥១ ស្ថិតក្នុងសង្កាត់ពន្សាំង ខណ្ឌព្រែកព្នៅ ចាកចេញពីបឹងនេះ ក្រោយពួកគេបានទន្ទ្រានចូលកាន់កាប់។
លោកបន្តថា៖ «លិខិតខ្ញុំចេញជារួមតែម្តង ឲ្យតែអ្នកណាសាងសង់ធ្វើអាជីវកម្មលើបឹងតាមោកដែលជាប់នឹងដីអនុក្រឹត្យរបស់រដ្ឋាភិបាល ត្រូវចាកចេញ។ អ្នកទាំងនោះ គឺប្រជាពលរដ្ឋចន្លោះពី ២០ ទៅ ៣០ (គ្រួសារ) នៅតាមបណ្ដោយផ្លូវ ១៥១ ចេញ ដោយឡែក ម្ចាស់ស៊ងត្រីខ្លះ គាត់បានធ្វើស៊ងត្រី ដែលមានចេតនាទន្ទ្រានយកដីនេះ អាហ្នឹងក៏យើងឲ្យចេញដែរ»។
ទោះជាយ៉ាងណា លោកមិនបានបញ្ជាក់ថានឹងមានវិធានការឬដំណោះស្រាយបែបណាទៀតចំពោះពលរដ្ឋ ដែលមិនទាន់ចាកចេញនោះទេ។
បឹងតាមោក ឬបឹងទំនប់កប់ស្រូវ គឺជាបឹងធម្មជាតិដ៏ធំមួយក្នុងចំណោមបឹងស្តុកទឹកធំៗក្នុងរាជធានីភ្នំពេញ ដែលមានផ្ទៃ ៣ ២៣៩,៧ ហិកតា ស្ថិតនៅក្នុងខណ្ឌព្រែកព្នៅ ហើយនៅថ្ងៃទី ០៣ ខែកុម្ភៈ ឆ្នាំ ២០១៦ រដ្ឋាភិបាល ចេញអនុក្រឹត្យស្តីពីការកំណត់ផ្ទៃបឹងនេះ ដែលគ្របដណ្តប់បឹងតាមោក (បឹងកប់ស្រូវ) និងដីជុំវិញ ទុកជាទ្រព្យសម្បត្តិសាធារណៈរបស់រដ្ឋ។
សព្វថ្ងៃបឹងនេះ ត្រូវបានគេយកជាទីតាំងសម្រាប់បង្ហូរទឹកសម្អុយនិងជាទីរំដោះទឹកជំនន់ដែលតែងតែកើតមានឡើងនៅក្នុងទីក្រុងភ្នំពេញ បន្ទាប់ពីបឹងធម្មជាតិធំៗចំនួន ១៥ ក្នុងចំណោម បឹងចំនួន ២៥ ក្នុងរាជធានីភ្នំពេញត្រូវបានគេចាក់ដីលុប ដើម្បីអភិវឌ្ឍន៍។ នេះបើយោងតាមរបាយការណ៍ក្រុមស្រាវជ្រាវរបស់អង្គការសមាគមធាងត្នោត ចេញផ្សាយកាលពីឆ្នាំ ២០១៥។
កាលពីខែសីហា ឆ្នាំ ២០១៨ កន្លងទៅនេះ រដ្ឋាភិបាល បានស្នើសុំដីចំនួន ២០ ហិកតា នៅបឹងតាមោក ស្ថិតក្នុងខណ្ឌព្រែកព្នៅនេះ ដើម្បីធ្វើជាផ្សារផ្គត់ផ្គង់បន្លែ និងចំណតរថយន្ត ខណៈបច្ចុប្បន្ន ផ្ទៃបឹងនេះត្រូវបានចាក់ដីពុះធ្វើផ្លូវកាត់បឹងដែលបង្កការរិះគន់។
អ្នកស្រី យន់ ថុល ដែលអាស្រ័យផលលើបឹងនេះជាង ២ ឆ្នាំ ដើម្បីចិញ្ចឹមជីវិត បានប្រាប់ភ្នំពេញប៉ុស្តិ៍ម្សិលមិញថា ខ្លួន និងពលរដ្ឋប្រមាណ ១០ គ្រួសារទៀតបានចាកចេញតាំងពីថ្ងៃទី ១១ ខែនេះ មកដោយពុំមានការតវ៉ានោះទេ។
អ្នកស្រីបញ្ជាក់ថា៖ «នៅធ្វើអី បើដីហ្នឹង គេថាជាដីរដ្ឋ ដល់ប្រជាពលរដ្ឋរស់នៅ គេប្រាប់ឲ្យចេញយើងមិនចេញតាមគេ។ យើងមិនហ៊ានតវ៉ាទេ បើតវ៉ា ក៏មិនមានបានអីមកវិញដែរ ហើយពួកខ្ញុំបានទៅនៅផ្ទះជួលអស់ហើយ»។
អ្នកស្រី ឃី ធារ៉ា បានប្រាប់ដែរថា ក្រោយទទួលបានលិខិតពីអាជ្ញាធរឲ្យចាកចេញ ខ្លួនក៏បង្ខំចិត្តទៅជួលផ្ទះគេនៅក្បែរនោះ ដើម្បីប្រកបមុខរបរជាអ្នកនេសាទនិងលក់ដូរនៅតាមបណ្តាយផ្លូវនេះ ព្រោះតែគ្មានផ្ទះសំបែង។
អ្នកស្រីបន្តថា៖ «ជីវភាពលំបាក តែធ្វើម៉េច បើគេឲ្យចេញ ហើយនៅជួលផ្ទះគេហ្នឹង ណាមួយថ្លៃផ្ទះ ថ្លៃទឹកភ្លើង។ តែមានអ្នកខ្លះ គាត់មិនដឹងទៅណា គាត់បន្តនៅ ហើយអាជ្ញាធរឲ្យគាត់លក់អីៗនៅក្រោមដើមឈើ ដោយមិនឲ្យធ្វើរោងឬបាំងអ្វីទេដោយលើកឡើងថាខ្លាចពួកគាត់បន្តការកាន់កាប់»។
លោក សឿង សារ៉ន នាយកប្រតិបត្តិនៃសមាគមធាងត្នោត (STT) និយាយថា ប្រជាពលរដ្ឋទាំងនោះ គឺសុទ្ធតែពលរដ្ឋក្រីក្រ ហើយប្រកបរបរតាមរយៈផលនេសាទពីបឹងតាមោកនេះ ហើយបើឲ្យពួកគាត់ចាកចេញ នឹងធ្វើឲ្យប៉ះពាល់ដល់ជីវភាពរបស់ពួកគាត់ រីឯកូនៗរបស់ពួកគាត់ នឹងបាត់បង់ការសិក្សា បើពួកគេគ្មានលទ្ធភាព បន្តការរស់នៅក្នុងតំបន់នោះ។ លោកស្នើឲ្យអាជ្ញាធរ ជាពិសេសរដ្ឋាភិបាល គួរមានគោលនយោបាយជួយពួកគាត់ ដើម្បីបញ្ចៀសផលអវិជ្ជមានលើពួកគាត់។
លោកបញ្ជាក់ថា៖ «វាប្រាកដណាស់ វាអត់មានតម្លាភាពទេ សម្រាប់ប្រជាពលរដ្ឋ ដែលគាត់រស់នៅតោកយ៉ាកហ្នឹង ត្រូវបានស្នើឲ្យចាកចេញ ហើយអ្នកផ្សេងទៀត មិនទទួលបានការបណ្តេញចេញ ខណៈសាលារាជធានីភ្នំពេញ មានគម្រោងលុបដីនៅបឹងនេះ ដែលយើងឃើញសកម្មភាពលុបពុះដីឡូត៍ជាច្រើនក្បែរបឹងតាមោកហ្នឹង។ ទាក់ទងនឹងចំណុចហ្នឹងរដ្ឋាភិបាលមានការបើកចំហព័ត៌មានឲ្យច្បាស់លាស់ តម្លាភាពអ្នកដែលពាក់ព័ន្ធក្នុងដីនេះ»។
នៅពេលសួរថា តើលោកគាំទ្រឲ្យមានការទន្ទ្រានដីរដ្ឋឬទេ? លោកបានឆ្លើយថា៖ «ជាទូទៅអង្គការមិនលើកទឹកចិត្តឲ្យពលរដ្ឋរស់នៅនិងទន្ទ្រានដីរដ្ឋនោះទេ តែករណីខ្លះពលរដ្ឋរស់នៅលើដីរដ្ឋយូរហើយ។ ហេតុនេះអាជ្ញាធរគួរផ្តល់សំណងឲ្យគាត់ទៅតាមច្បាប់ ព្រោះគាត់មិនមែនយកទៅធ្វើមានបាននោះទេ»។
ច្បាប់ភូមិបាលឆ្នាំ ២០០១ បញ្ជាក់ថា ដីសាធារណៈរបស់រដ្ឋជាដីសម្រាប់បម្រើផលប្រយោជន៍សាធារណៈដូចជាព្រៃឈើ ភ្នំ ផ្លូវទឹក បឹងធម្មជាតិ គឺមិនអាចលក់ដូរបានឡើយហើយកម្មសិទ្ធិនៃទ្រព្យសម្បត្តិទាំងនោះ មិនអាចកំណត់អាជ្ញាយុកាលបានទេ៕
