.jpg)
ពលរដ្ឋស្វែងរកយុត្តិធម៌រឿងតុលាការបង្គាប់ឲ្យរើផ្ទះ។ រូបថត ហ្វេសប៊ុក
បន្ទាយមានជ័យ: តំណាងពលរដ្ឋ ៣ នាក់ បានព្យាមយាមដាក់ពាក្យបណ្ដឹងកាលពីសប្ដាហ៍មុនទៅកាន់ខុទ្ទកាល័យរបស់លោកនាយករដ្ឋមន្ត្រី ហ៊ុន សែន ស្នើសុំអន្តរាគមន៍ជួយរកយុត្តិធម៌ទាក់ទងនឹងសេចក្ដីសម្រេចរបស់សាលាដំបូងខេត្តបន្ទាយមានជ័យដែលបង្គាប់ឱ្យប្រជាពលរដ្ឋចំនួន ១២២ គ្រួសាររុះរើផ្ទះ និងសំណង់ផ្សេងៗនៅលើទីតាំងដីទំហំទទឹង ១០០ ម៉ែត្រ និងបណ្ដោយ ៣០០ ម៉ែត្រដែលពួកគេកំពុងរស់នៅស្ថិតនៅភូមិអូរជ្រៅ សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ។
យោងតាមពាក្យបណ្ដឹងរបស់អ្នកតំណាងប្រជាពលរដ្ឋទាំង ១២២ គ្រួសារ ដែលមានឈ្មោះ ផល ធា,ហ៊ុយ ឡេង និង លាង ច័ន្ទគ្រឹស្នា បានឱ្យដឹងថា ប្រជាពលរដ្ឋបានទិញដីពីឈ្មោះ ង៉ោ ឆេង ដែលលោក ង៉ោ ឆេង ជាម្ចាស់ដីមានបណ្ណសម្គាល់សិទ្ធិកាន់កាប់អចលនវត្ថុត្រឹមត្រូវចំនួន ៣ បណ្ណចេញដោយក្រសួងរៀបចំដែនដីនគរូបនីយកម្ម សំណង់ និង សុរិយោដីខេត្តបន្ទាយមានជ័យ ហើយទិដ្ឋភាពដីនាពេលនោះគឺជាដីទំនេរពុំមានសំណង់ និងពុំមានប្រជាជនរស់នៅលើទីតាំងដីនោះទេ ថែមទាំងមានរបងបេតុងរឹងមាំព័ទ្ធជុំវិញដីទាំងមូលទៀត ហើយផ្ទេរកម្មសិទ្ធិមកឈ្មោះ ង៉ោ ឆេង និងបានបង់ពន្ធត្រឹមត្រូវតាមផ្លូវច្បាប់។ ប្រជាពលរដ្ឋបានរស់នៅលើដីនោះជាយូរឆ្នាំមកហើយ ប៉ុន្តែទើបតែថ្ងៃទី ៦ ខែសីហា ឆ្នាំ ២០២០ សាលាដំបូងខេត្តបន្ទាយមានជ័យចេញសេចក្ដីបង្គាប់ឱ្យរុះរើ។
យោងតាមពាក្យបណ្ដឹងបានឱ្យដឹងថា៖ «យើងខ្ញុំជាប្រជាពលរដ្ឋបានទទួលដំណឹងអំពីដីកាបង្គាប់ឱ្យរុះរើដោយស្ម័គ្រចិត្តរបស់សាលាដំបូងខេត្តបន្ទាយមានជ័យដែលមានខ្លឹមសារបង្គាប់ឱ្យយើងខ្ញុំ រុះរើផ្ទះ និងសំណង់ផ្សេងៗចេញពីដីលំនៅឋានយើងខ្ញុំ ហើយប្រគល់ដីនេះឱ្យទៅឈ្មោះ វ៉ែន ខេមរិន្ទ តាមដីកាសម្រេចរបស់តុលាការ។ ក្រោយពីបានទទួលដំណឹងនេះភ្លាមធ្វើឱ្យយើងខ្ញុំជាប្រជាពលរដ្ឋមានការតក់ស្លុត និងភ្ញាក់ផ្អើលយ៉ាងខ្លាំង ទើបយើងខ្ញុំបានដាក់ពាក្យតវ៉ា និងពាក្យសុំឱ្យផ្អាកការអនុវត្តទៅតុលាការ ប៉ុន្តែតុលាការមិនទាន់បានពិនិត្យ និងសម្រេចអំពីបណ្ដឹងតវ៉ានេះបែរជាបន្តការអនុវត្ត ហើយបានកំណត់ថ្ងៃអនុវត្តនៅថ្ងៃទី ១៣ ខែ វិច្ឆិកា ឆ្នាំ ២០២០ វេលាម៉ោង ៨ កន្លះព្រឹក ដោយបង្គាប់ឱ្យយើងខ្ញុំរុះរើផ្ទះ និងសំណង់ផ្សេងៗចេញពីទីតាំងដីដែលទង្វើរបស់សាលាដំបូងខេត្តបន្ទាយមានជ័យបានធ្វើឱ្យជាប្រជាពលរដ្ឋទាំង ១២២ គ្រួសារ មានការភិតភ័យ និងតក់ស្លុតយ៉ាងខ្លាំង។ ដូច្នេះសូមលោកនាយករដ្ឋមន្ត្រីជួយស្វែងរកយុត្តិធម៌ និងពិនិត្យភាពមិនប្រក្រតីនៃចំណាត់ការរបស់តុលាការដែលសម្រេចបង្គាប់ឱ្យពលរដ្ឋ ដែលបានទិញដីមានបណ្ណកម្មសិទ្ធិស្របច្បាប់ និងរាល់ការទិញ និងលក់មានការដឹងឮពីអាជ្ញាធរមូលដ្ឋានត្រឹមត្រូវតាមផ្លូវច្បាប់»។
លោក គាត ហុល អភិបាលក្រុងប៉ោយប៉ែតបានថ្លែងថា សំណុំរឿងនេះមានភាពស្មុគស្មាញ ហើយភាគីទំនាស់ទាំង ២ ក៏បានបញ្ជូនសំណុំរឿងទៅតុលាការរួចរាល់ហើយដែរ។
លោកបញ្ជាក់ថា៖ «ករណីនេះកើតឡើងយូរឆ្នាំហើយ (ឥឡូវ) គេទើបតែសើរើឡើងវិញ រីឯសំណុំរឿងនេះត្រូវបានបញ្ជូនទៅតុលាការ ដូច្នេះខ្ញុំអត់អាចមានសិទ្ធិជួយដោះស្រាយជូនពួកគាត់បានទៀតទេ តែអាជ្ញាធរយើងគ្រាន់តែទៅសម្របសម្រួលមិនឱ្យមានការតវ៉ា ឬហាមមិនឱ្យប្រើអំពើហិង្សាអ្វីឡើយ។ ប្រជាពលរដ្ឋគួរតែស្វែងរកមេធាវីជួយការពារក្ដីជូនពួកគាត់ ទើបប្រសើរជាងការតវ៉ា»។
លោក តេង សម័យ ព្រះរាជអាជ្ញារងនៃសាលាដំបូងខេត្តបន្ទាយមានជ័យបានថ្លែងថា តុលាការបានសម្រេចពន្យារពេលអនុវត្តដីការបស់តុលាការជាបណ្ដោះអាសន្នសិន ដោយនឹងពិនិត្យ និងកំណត់ពេលវេលាអនុវត្តជាថ្មីទៅលើទីតាំងនោះ ហើយពលរដ្ឋមិនគួរមករារាំងការអនុវត្តច្បាប់ទេ ព្រោះអាចមានទោសទាក់ទងការរារាំងភារកិច្ចរបស់មន្ត្រីអនុវត្តច្បាប់។
លោក សម័យ ថ្លែងថា៖ «ពួកគាត់មិនគួរមករារាំង ឬចង់ប្រើហិង្សាមកលើមន្ត្រីអនុវត្តច្បាប់ទេ ប្រសិនពួកគាត់មានអ្វីជំទាស់ គួរតែចាត់តំណាងណាម្នាក់ ឬ ២ នាក់ ហើយកាន់ឯកសារបញ្ជាក់មកតុលាការ ដើម្បីធ្វើការដោះបន្ទុក ឬស្វែងរកមេធាវីមកជួយការពារក្ដី ដោយចៀសវាងការតវ៉ាបែបនេះ»។
លោក វ៉ែន ខេមរិន្ទ ដែលជាអ្នកទទួលបានដីតាមរយៈដីការបស់តុលាការ មិនទាន់អាចស្វែងរកប្រភពទាក់ទងសុំការបញ្ជាក់បន្ថែមជុំវិញករណីនេះបានទេ។
លោក គង់ ចំរើន អ្នកទទួលញត្តិតំណាងខុទ្ទកាល័យលោកនាយករដ្ឋមន្ត្រី បានថ្លែងកាលពីម្សិលមិញថា លោកមិនទាន់បានទទួលញត្តិរបស់ប្រជាពលរដ្ឋទាំងនោះទេ។
លោកបញ្ជាក់ថា៖ «ខ្ញុំអត់ទាន់ឃើញពួកគាត់ដាក់មកខុទ្ទកាល័យ»។
លោក ស៊ុំ ចាន់គា មន្ត្រីសម្របសម្រួលផ្នែកសិទ្ធិមនុស្សនៃសមាគមអាដហុកប្រចាំខេត្តបន្ទាយមានជ័យបានថ្លែងពីម្សិលមិញថា តុលាការត្រូវតែធ្វើការស៊ើបអង្កេតឱ្យបានត្រឹមត្រូវមុននឹងចេញដីកាសម្រេច ឬបង្គាប់ឱ្យពលរដ្ឋរុះរើផ្ទះចេញពីដីលំនៅឋានរបស់ខ្លួនបែបនេះ។ ដីដែលកំពុងមានទំនាស់នេះ ត្រូវបានគេលក់ដូរតៗគ្នាចំនួន ៤ ម្ចាស់ហើយ ប៉ុន្ដែម្ចាស់មុនៗជាអ្នកមានទំនាស់ ក្រោយមកម្ចាស់ចុងក្រោយនេះក៏បានដោះស្រាយរួចរាល់ ហើយក៏បានធ្វើបណ្ណកម្មសិទ្ធិ រួចហើយក៏ពុះឡូត៍លក់ឱ្យពលរដ្ឋទាំង ១២២ គ្រួសារហ្នឹង៕
