.jpg)
ប្រជាពលរដ្ឋនៅភូមិត្រពាំងឈូក ឃុំមានរិទ្ធ ដែលមានវិវាទដីធ្លីជាមួយអតីតអភិបាលរងស្រុកដងទង់ ខេត្តកំពត។ រូបថត ហ្វេសប៊ុក
កំពតៈ ប្រជាពលរដ្ឋចំនួន ១៣ គ្រួសារ ដែលមានគ្នាជាង ៣០ នាក់ រស់នៅភូមិត្រពាំងឈូក ឃុំមានរិទ្ធ ស្រុកដងទង់បានប្រមូលផ្តុំគ្នាកាលពីថ្ងៃអាទិត្យដើម្បីស្នើសុំឲ្យអាជ្ញាធរជួយពន្លឿនការដោះស្រាយទំនាស់ដីធ្លីដ៏រ៉ាំរ៉ៃជាមួយលោក ប្រាក់ ប៊ុយ អតីតអភិបាលរងស្រុកដងទង់។
លោក កង អិត តំណាងប្រជាពលរដ្ឋមានជម្លោះ ១៣ គ្រួសារ បានលើកឡើងនៅក្នុងវីដេអូបន្តផ្ទាល់ពីទីតាំងមានជម្លោះកាលពីថ្ងៃអាទិត្យថា ប្រជាពលរដ្ឋទាំង ១៣ គ្រួសារ បានកាន់កាប់អាស្រ័យផលលើដីប្រមាណ ៤០ ហិកតារយៈពេលជិត ៣០ ឆ្នាំមកហើយ។ ប៉ុន្តែក្រោយមកលោកថា អតីតអភិបាលរងស្រុក លោក ប្រាក់ ប៊ុយ បានប្តឹងពលរដ្ឋដោយទាមទារឲ្យចាកចេញពីដីដែលពលរដ្ឋធ្លាប់រស់នៅតាំងពីឆ្នាំ ១៩៩៣ មកដោយសំអាងថា មានប្លង់ស្លាបមាន់ក្នុងកាន់កាប់ដីនេះ។
លោក កង អិត បានប្រាប់បន្ថែមថា ចាប់តាំងពីមានជម្លោះកាលពីអំឡុង ២០០១ មកពលរដ្ឋរងគ្រោះទាំង ១៣ គ្រួសារ បានព្យាយាមស្វែងរកកិច្ចអន្តរាគមន៍ទៅអាជ្ញាធរគ្រប់ជាន់ថ្នាក់ ហើយករណីនេះក៏បានឆ្លងកាត់តាមប្រព័ន្ធតុលាការទៀត ប៉ុន្តែសេចក្តីសម្រេចរបស់តុលាការខេត្តកំពត នៅតែកាត់ឲ្យពលរដ្ឋចាញ់ក្តី។
លោក អិត បញ្ជាក់ថា ការប្តឹងផ្តល់នៅតុលាការលើដីមានជម្លោះគឺបានធ្វើឡើងដោយភាគី ២ គ្រួសារផ្សេងទៀតជាមួយនឹងលោក ប្រាក់ ប៊ុយ ដោយមិនមានការដឹងឮពីប្រជាពលរដ្ឋចំនួន ១៣ គ្រួសារនោះទេ ខណៈពលរដ្ឋទាំង ១៣ គ្រួសារត្រូវបានគេចោទប្រកាន់ថា រស់នៅលើដីរបស់អ្នកដទៃទៅវិញ។
លោកបញ្ជាក់ថា៖ «ពលរដ្ឋមានទាំងបង្កាន់ដៃ ចុះធ្វើដោយសុរិយោដីថ្នាក់ស្រុក ដើម្បីទទួលស្គាល់ការកាន់កាប់របស់ប្រជាពលរដ្ឋទៀត។ ខាងប្រជាពលរដ្ឋក៏មិនបានដឹងដែរ ថាខ្លួនបែរជាអ្នករស់នៅលើដីគេទៅវិញ ដោយបន្តកាន់កាប់ដីរហូតដល់ឆ្នាំ ២០០១ និងឆ្នាំ ២០០២ ទើបមានការដឹងថា ពលរដ្ឋបែរជារំលោភបំពានដីអភិបាលរងស្រុកទៅវិញ»។
ចំណែកពលរដ្ឋម្នាក់ទៀតដែលនិយាយមិនបានបញ្ចេញឈ្មោះ បានលើកឡើងនៅក្នុងវីដេអូឡាយក្នុងអំឡុងពេលតវ៉ាដែរថា គ្រួសារអ្នកស្រីបានរស់នៅអាស្រ័យផលលើដីនេះជាយូរឆ្នាំមកហើយ ដូច្នេះបើមានការដេញ ពួកគាត់ចេញពីតំបន់នេះនឹងធ្វើឲ្យជីវភាពកាន់តែជួបប្រទះការលំបាកថែមទៀត។
អ្នកស្រីបញ្ជាក់ថា៖ «សូមសម្តេចម៉ែ សម្តេច ហ៊ុន សែន លោកជំទាវ ប៊ុន រ៉ានី សូមជួយកូនចៅផងក្នុងការដោះស្រាយលើទឹកដីនេះ បើសិនដេញកូនចៅចេញពីកន្លែងនេះ កូនចៅមិនដឹងជាទៅរស់នៅកន្លែងណាទេ។ ដូច្នេះខ្ញុំសូមសំណូមពរទៅសម្តេច ហ៊ុន សែន សូមជួយដោះស្រាយដល់កូនចៅផង»។
លោក ប្រាក់ ប៊ុយ មិនអាចទាក់ទងដើម្បីសុំការអត្ថាធិប្បាយលើបញ្ហានេះបានទេ ដោយសារតែទូរស័ព្ទរបស់លោកមិនអាចទាក់ទងបាន។
លោក អឹម តាំ មេឃុំមានរិទ្ធ ស្រុកដងទង់ បានប្រាប់ភ្នំពេញប៉ុស្តិ៍កាលពីថ្ងៃអាទិត្យថា វាគឺជារឿងអយុត្តិធម៌ខ្លាំងណាស់ បើសិនជាតុលាការកាត់ក្តីឲ្យពលរដ្ឋទាំង ១៣ គ្រួសារចាញ់ហើយបាត់បង់ដីដែលជាទីជម្រករបស់ពួកគាត់កាន់កាប់ជាយូរមកហើយនេះ។
លោកបន្តថា អាជ្ញាធរឃុំបានព្យាយាមសម្របសម្រួល ដើម្បីឲ្យពលរដ្ឋទទួលបានដីដែលធ្លាប់កាន់កាប់ជាយូរមកហើយវិញ ប៉ុន្តែភាគីម្ខាងទៀតដែលមិនទាំងបានស្គាល់ទីតាំងដីច្បាស់លាស់ផង មិនព្រមហើយបន្តប្តឹងទៅតុលាការ។ លោកបញ្ជាក់ថា៖ «ដីហ្នឹងយូរឆ្នាំហើយ អភិបាលស្រុកប៉ុន្មានហើយ ក៏ដោះមិនចេញ គាត់ក៏បញ្ជូនទៅលើរហូតទៅ ប៉ុន្តែលោក ប្រាក់ ប៊ុយ គាត់មិនព្រម ហើយតម្រូវឲ្យពលរដ្ឋចេញ។ ខ្ញុំក៏បាននិយាយដែរថា បើពលរដ្ឋចេញឲ្យគាត់ទៅរស់នៅឯណា ព្រោះគាត់មានតែដីហ្នឹង។ ក្នុងនាមខ្ញុំមេឃុំមិនដឹងថា អ្នកណាមានខ្នង មិនមានខ្នងទេ គ្រាន់តែដឹងថា បើសិនជាឲ្យប្រជាជនចាញ់ ដូចអយុត្តិធម៌ពេកហើយគាត់គ្មានអីមានតែដីហ្នឹង»។
លោក វ៉ិត វឌ្ឍនា នាយករដ្ឋបាលខេត្តកំពតបានបដិសេធធ្វើអត្ថាធិប្បាយចំពោះជម្លោះនេះ ដោយអះអាងថា ករណីនេះផុតដែនសមត្ថកិច្ចរបស់ខេត្តហើយ។ លោកបញ្ជាក់ថា៖ «ករណីនេះក៏បានកើតឡើងយូរឆ្នាំហើយដែរ ខ្ញុំមិនចាំទេ ណាមួយផុតដែនសមត្ថកិច្ចហើយ»។
លោក ម៉ាន់ បូរេត ប្រធានលេខាធិការដ្ឋានរដ្ឋបាលសាលាដំបូងខេត្តកំពត ប្រាប់ភ្នំពេញ-ប៉ុស្តិ៍កាលពីថ្ងៃចន្ទថា លោកមិនបានដឹងពីករណីជម្លោះដីធ្លីនេះច្បាស់លាស់ទេ។ ប៉ុន្តែលោកថា បើពលរដ្ឋបានកាន់កាប់ដីនោះដោយស្របច្បាប់ គ្មានអ្នកណាហ៊ានបណ្តេញពួកគាត់ចេញនោះទេ។ លោកបញ្ជាក់ថា៖ «ខ្ញុំមិនដឹងថា តុលាការបានទទួលសំណុំរឿងផង ខ្ញុំអត់ដឹងផង ឆ្លើយថាម៉េច»៕
