ព្រះវិហារៈ ព្រះរាជអាជ្ញាអមសាលាដំបូងខេត្តព្រះវិហារ បានអះអាងថា យ៉ាងយូរនៅសប្តាហ៍ក្រោយនឹងមានការដោះលែងប្រជាពលរដ្ឋចំនួន ១៤ នាក់ និងតំណាងពលរដ្ឋម្នាក់ទៀតឈ្មោះ ឡយ លីហ៊ួរ ដែលត្រូវចាប់ឃុំខ្លួនជាបន្តបន្ទាប់ ឲ្យនៅក្រៅឃុំបណ្តោះអាសន្ន ជុំវិញការចោទប្រកាន់ពីបទរំលោភបំពានដីអភិរក្សគូលែនព្រហ្មទេព ប៉ុន្តែពលរដ្ឋថា ជាដីរបស់ខ្លួនមានជម្លោះជាមួយក្រុមហ៊ុនមេត្រីភាព។
លោក ទី សុវិនថាល់ ព្រះរាជអាជ្ញាអមសាលាដំបូងខេត្តព្រះវិហារ អះអាងពីម្សិលមិញថា ការសម្រេចដោះលែងពួកគេទាំង ១៥ នាក់ ឲ្យនៅក្រៅឃុំក្នុងពេលខាងមុខនេះ ក៏ព្រោះតែមានការអន្តរាគមន៍ពីភាគីពាក់ព័ន្ធ ដូច្នេះពួកគេនឹងត្រូវបានដោះលែងក្នុងពេលឆាប់ៗនៅពេលតុលាការរៀបចំឯកសាររួចរាល់តាមសំណើទាំងនេះ។
លោកថា៖ «ឡយ លីហ៊ួរ ហ្នឹងមានបទល្មើស តែដោយសារតែឯកឧត្តមអភិបាលខេត្តព្រះវិហារ ជួយសម្រួលអន្តរាគមន៍ទៅតុលាការហើយ អ៊ីចឹងអាចដោះក្នុងពេលឆាប់ៗហ្នឹង គឺ ១ ទៅ ២ សប្តាហ៍ទៀត ហើយ ១៤ នាក់ទៀត មានការអន្តរាគមន៍ពីមេធាវីរាជរដ្ឋាភិបាលកំពុងរៀបចំសំណើសុំឲ្យនៅក្រៅឃុំជាបណ្តោះអាសន្នជាបន្តបន្ទាប់»។
លោកបន្តថាការដែលតុលាការ សម្រេចបន្តឃុំខ្លួនពួកគេ ដល់ពេលនេះ ព្រោះតែប្រជាពលរដ្ឋទាំងនោះ មិនសហការជាមួយតុលាការនិងព្យាយាមលាក់បាំង ពលរដ្ឋម្នាក់ ឈ្មោះ ស៊ុំ ម៉ឺន ដែលប្រកាសថាបាត់ខ្លួន ក្នុងអំឡុងពេលដែលអាជ្ញាធរ ឃាត់ខ្លួន តែក្រោយមកត្រូវបានរកឃើញវិញថាបានរត់គេចដោយខ្លួនឯងពីសំណាក់អាជ្ញាធរ។
លោក ឡយ លីហ៊ួរ តំណាងពលរដ្ឋដីធ្លីក្នុងខេត្តព្រះវិហារ ត្រូវបានឃាត់ខ្លួនកាលពីថ្ងៃទី ២៤ មេសា ពីបទចាប់បង្ខាំងមនុស្ស ធ្វើទារុណកម្ម និងលួចយកអាវុធ និងត្រូវឃុំខ្លួនបណ្តោះអាសន្នពន្ធនាគារខេត្ត។ ចំណែកប្រជាពលរដ្ឋចំនួន ១៤ នាក់ ទៀត ត្រូវបានចាប់ និងឃុំខ្លួន ជាបន្តបន្ទាប់ចាប់តាំងពីពាក់កណ្តាលខែមករាមក ដោយចោទប្រកាន់ពីបទទន្ទ្រានដីព្រៃរបស់រដ្ឋ និងដីរបស់ក្រុមហ៊ុនមេត្រីភាព។
លោក សុង ច័ន្ទសុជាតិ ប្រធានមន្ទីរបរិស្ថានខេត្តព្រះវិហារ បានប្រាប់ភ្នំពេញប៉ុស្តិ៍យ៉ាងខ្លីថា តំណាងពលរដ្ឋម្នាក់ មានឈ្មោះ ឡយ លីហ៊ួរ ពិតជាត្រូវបានឃាត់ខ្លួន កាលពីថ្ងៃទី ២៤ មែន តែលោកមិនអាចបញ្ជាក់បានក្រៅពីនេះទេ។
វិវាទដីធ្លីរ៉ាំរ៉ៃកើតឡើងក្នុងភូមិអន្ទិល ឃុំយាង ស្រុកជាំក្សាន្ត ខេត្តព្រះវិហារជាប់ព្រំប្រទល់នឹងខេត្តឧត្តរមានជ័យ បានផ្ទុះឡើងរហូតនាំឲ្យប្រជា ពលរដ្ឋប្រមាណ ៣០០ គ្រួសារ ឡើងមកសុំអន្តរាគមន៍ពីលោកនាយករដ្ឋមន្ត្រី ហ៊ុន សែន និងត្រូវបានសម្របសម្រួល កាលពីខែកុម្ភៈ ដោយក្នុងនោះ អភិបាលខេត្តព្រះវិហារ លោក អ៊ុន ចាន់ដា បានសន្យាថា នឹងបញ្ឈប់ការចេញដីកាកោះហៅ ឬចាប់ខ្លួនពលរដ្ឋបន្តទៀត ហើយនឹងរៀបចំបែបបទតាមនីតិវិធីក្នុងការដោះលែងពលរដ្ឋទាំង១៤នាក់ ដែលបានចាប់ខ្លួន។
ភ្នំពេញប៉ុស្តិ៍មិនអាចសុំការអត្ថាធិប្បាយពីលោក អ៊ុន ចាន់ដា អភិបាលខេត្តព្រះវិហារបានទេកាលពីម្សិលមិញ ជុំវិញការឃាត់ខ្លួនពលរដ្ឋជាថ្មីទៀត ព្រោះតែលោកមិនលើកទូរស័ព្ទ។
លោក ឡោ ចាន់ មន្ត្រីសម្របសម្រួលសមាគមការពារសិទ្ធិមនុស្សអាដហុកប្រចាំខេត្តព្រះវិហារ បាននិយាយពីម្សិលមិញថា ការចាប់ខ្លួនតំណាងពលរដ្ឋជាថ្មីទៀត បើទោះជាមានការធានាពីមន្ត្រីរដ្ឋាភិបាលក៏ដោយ នេះគឺជារឿងអយុត្តិធម៌សម្រាប់ប្រជាពលរដ្ឋ ជាពិសេសលោក ឡយ ឡីហ៊ួរ ផ្ទាល់ ព្រោះអាជ្ញាធរបានអះអាងហើយថា នឹងគ្មានការចាប់ខ្លួនលោកនោះទេ។
លោក ឡោ ចាន់ បានបន្តថា៖ «ខ្ញុំសង្ឃឹមថា ពួកគាត់នឹងត្រូវបានដោះលែងទាំងអស់គ្នា ព្រោះករណីចាប់ខ្លួននេះ គឺករណីដីធ្លី ហើយក៏មិនមែនមានវិវាទជាមួយដីរបស់រដ្ឋដែរ គឺដីដែលពលរដ្ឋបានមករស់នៅ តាំងពីក្រុមហ៊ុនមេត្រីភាពមិនទាន់ទទួលបានសិទ្ធិវិនិយោគលើដីនេះ»៕