.jpg)
គ្រឿងចក្ររុះរើសំណង់ក្នុងខេត្តព្រះសីហនុថ្ងៃទី ១៨ ឧសភាដើម្បីស្ថាបនាផ្លូវ។ រូប មន្ទីរសាធារណការ
ព្រះសីហនុៈ ប្រជាពលរដ្ឋ ១៦២ គ្រួសារនៅភូមិ ៤ សង្កាត់ ៤ ក្រុងព្រះសីហនុ កាលពីថ្ងៃទី ១៨ ឧសភាបានជំទាស់នឹងគម្រោងធ្វើផ្លូវរបស់អាជ្ញាធរ ដោយពួកគាត់អះអាងថា ការធ្វើផ្លូវថ្មីនេះប៉ះពាល់ផ្ទះប្រជាពលរដ្ឋស្ទើរទាំងស្រុង ហើយអំពាវនាវឲ្យអាជ្ញាធរយោគយល់ និងរកដំណោះស្រាយ។
លោក ប៊ុន ញឹម អាយុ ៤៥ ឆ្នាំពលរដ្ឋម្នាក់ក្នុងចំណោមអ្នកភូមិទាំងនោះ និយាយថាអាជ្ញាធរជូនដំណឹងឲ្យពលរដ្ឋប្រញាប់រុះរើផ្ទះ និងសំណង់មួយចំនួនដែលប៉ះពាល់ផ្លូវលេខ ២០០ ស្ថិតនៅភូមិ ៤ សង្កាត់ ៤ ក្រុងព្រះសីហនុចាប់ពីថ្ងៃទី ១៣ ឧសភា តទៅ។ គម្រោងធ្វើផ្លូវរបស់អាជ្ញាធរធ្វើឲ្យប៉ះពាល់ផ្ទះប្រជាពលរដ្ឋចំនួន ១៦២ គ្រួសារ ដោយខ្លះប៉ះពាល់ទាំងស្រុង និងមួយចំនួនប៉ះពាល់ពាក់កណ្ដាលដីផ្ទះតែម្ដង។
លោកបន្តថា អាជ្ញាធរបានដាក់គម្រោងចង់ធ្វើផ្លូវទំហំ ៤០ ម៉ែត្រប្រវែងជាង ១ ពាន់ម៉ែត្រ ប៉ុន្ដែប្រជាពលរដ្ឋនាំគ្នាតវ៉ា និងស្នើឲ្យអាជ្ញាធរធ្វើផ្លូវថ្មីនេះត្រឹម ១៧ ម៉ែត្រ គ្រប់គ្រាន់ហើយដើម្បីកុំឲ្យប៉ះពាល់ដល់ប្រជាពលរដ្ឋច្រើនពេក។ ផ្លូវសព្វថ្ងៃមិនសូវមានអ្វីមមាញឹកទេ ដោយគ្រាន់តែដាក់លូ និងជួសជុលបន្ដិចបន្ដួចអាចល្អប្រសើរ។
លោកថា៖ «បើធ្វើផ្លូវហ្នឹង ៤០ ម៉ែត្រគឺមានអ្នកខ្លះនឹងអស់ផ្ទះ អស់ដី និងខ្លះទៀតបាត់បង់លំនៅឋានទាំងស្រុង។ ម្នាក់ៗសុទ្ធតែជំពាក់លុយធនាគារថែមទៀត»។
ពលរដ្ឋម្នាក់ទៀតសុំមិនបញ្ចេញឈ្មោះលើកឡើងថា អាជ្ញាធរគួរតែជួយសម្រួល និងដោះស្រាយបញ្ហានេះ ព្រោះការស្ថាបនាផ្លូវដ៏ធំនេះប៉ះពាល់ដល់ពលរដ្ឋ។ ដីដែលពលរដ្ឋកំពុងរស់នៅមិនមានបណ្ណកម្មសិទ្ធិ (ប្លង់រឹង) ទេ។ ប៉ុន្ដែពលរដ្ឋមានលិខិតបញ្ជាក់ទីលំនៅ ទទួលស្គាល់ពីអាជ្ញាធរមូលដ្ឋាន ត្រឹមត្រូវដោយពលរដ្ឋរស់នៅចាប់តាំងពីឆ្នាំ ១៩៨៨ រហូតមកដល់សព្វថ្ងៃនេះ។
លោកថា៖ «យើងខ្ញុំជាប្រជាពលរដ្ឋមិនហាមឃាត់នឹងការអភិវឌ្ឍទេ ប៉ុន្ដែការអភិវឌ្ឍដែលមានផលប៉ះពាល់ដល់ប្រជាពលរដ្ឋច្រើនគួរតែជួយសម្រួលនិងយោគយល់ដល់ពលរដ្ឋក្រីក្រផង»។
លោក សេង នីម ចៅសង្កាត់ ៤ ថ្លែងកាលពីថ្ងៃទី ១៨ ឧសភា ថាអាជ្ញាធរក្រុង និងខេត្តព្រះសីហនុបានជូនដំណឹងទៅពលរដ្ឋដោយតម្រូវឲ្យពួកគាត់រុះរើសំណង់គ្រប់ប្រភេទ និងរោងអាជីវកម្មនានាដែលប៉ះពាល់លើដីចំណីផ្លូវ។ ព្រោះដល់ពេលដែលអាជ្ញាធរត្រូវធ្វើការអភិវឌ្ឍ និងស្ថាបនាផ្លូវឲ្យបានស្អាត។
លោកថា ដីផ្ទះពួកគាត់មិនមានប្លង់រឹងធ្វើជាកម្មសិទ្ធិស្របច្បាប់ត្រឹមត្រូវទេ ប៉ុន្ដែលោកទទួលស្គាល់ថា ពលរដ្ឋមានលិខិតបញ្ជាក់ទីលំនៅពីអាជ្ញាធរមូលដ្ឋាន។ ពួកគាត់មានសិទ្ធិរស់នៅលើដីនោះ ប៉ុន្ដែបើមានតម្រូវការណាមួយពីអាជ្ញាធរ ពួកគាត់ត្រូវតែសហការជាមួយអាជ្ញាធរ។
លោកថ្លែងថា៖ «ខ្ញុំសុំឲ្យបងប្អូន យើងគួរចូលរួមសហការជាមួយអាជ្ញាធរដើម្បីយើងធ្វើផ្លូវទាំងអស់នៅក្នុងក្រុងព្រះសីហនុបានស្អាត គ្រប់ទីកន្លែង។ ពួកគាត់ភាគច្រើនសុទ្ធមានផ្ទះ ២ ឬ ៣ កន្លែងឯណោះ ខ្ញុំថាដូចជាមិនសូវជាប៉ះពាល់អ្វីខ្លាំងទេ។ ព្រោះផ្លូវនេះយើងធ្វើឲ្យមានកន្លែងថ្មើរជើង មានស្លាកសញ្ញាចរាចរណ៍ត្រឹមត្រូវ។ និយាយរួមគឺយើងធ្វើឲ្យស្អាតតែម្ដង»។
លោក អ៊ី សុខឡេង អភិបាលក្រុងព្រះសីហនុថ្លែងកាលពីថ្ងៃទី ១៨ ឧសភា ថា អាជ្ញាធរមិនបានពង្រីកផ្លូវបន្ថែមទៀតទេគឺផ្លូវដែលមានស្រាប់ទំហំ ៤០ ម៉ែត្រ។ ប៉ុន្ដែពួកគាត់បាននាំគ្នាមករស់នៅលើចំណីផ្លូវដែលជាគម្រោងរបស់ក្រសួងសាធារណការ និងដឹកជញ្ជូនគ្រប់គ្រង។
លោកបញ្ជាក់ថា៖ «អ្វីដែលយើងធ្វើគឺយើងផ្អែកលើប្លង់ប្រព័ន្ធដែលជាច្បាប់ដែលមានយូរឆ្នាំហើយ ដោយធ្វើគិតទៅលើប្រយោជន៍រួម ពង្រីកផ្លូវទៅតាមប្លង់ប្រព័ន្ធដែលមានស្រាប់។ ប៉ុន្ដែជាធម្មតាពលរដ្ឋដែលធ្លាប់រស់នៅ ធ្លាប់អាស្រ័យផលគឺចង់ ឬមិនចង់ គឺគាត់តវ៉ាហើយ។ ជាក់ស្ដែងកន្លងមកយើងបានធ្វើផ្លូវជាច្រើនខ្សែដូចបែបនេះ ហើយក៏មានប៉ះពាល់អ៊ីចឹងដែរ ប៉ុន្ដែពួកគាត់ចូលរួមបរិច្ចាគជាមួយអាជ្ញាធរ ដើម្បីប្រយោជន៍រួមទាំងអស់គ្នា»។
លោក បូរី វង្សសានិត្យ ប្រធានមន្ទីរសាធារណការ និងដឹកជញ្ជូនខេត្តព្រះសីហនុពីម្សិលមិញមិនទាន់អាចស្វែងរកប្រភពទាក់ទងសុំការបញ្ជាក់ជុំវិញករណីនេះបន្ថែមបានទេ។
សេចក្ដីជូនដំណឹងរបស់មន្ទីរសាធារណការ និងដឹកជញ្ជូនខេត្តព្រះសីហនុចុះថ្ងៃទី ១៣ ឧសភា ដែលទទួលបានថ្ងៃទី ១៨ ឧសភាបញ្ជាក់ថា ដើម្បីរួមចំណែកក្នុងគោលដៅលើកកម្ពស់ការថែរក្សាសណ្ដាប់ធ្នាប់ របៀបរៀបរយ ការកែលម្អសោភណភាព និងកាត់បន្ថយ ឬបញ្ចៀសការកកស្ទះចរាចរណ៍បង្កការលំបាកដល់ការធ្វើដំណើររបស់ប្រជាពលរដ្ឋដែលកំពុងរស់នៅតាមបណ្ដោយផ្លូវលេខ ២០០ មន្ទីរសាធារណការ និងដឹកជញ្ជូនខេត្តព្រះសីហនុ នឹងរៀបចំជួសជុលកំណាត់ផ្លូវនេះព្រមទាំងស្ថាបនាប្រព័ន្ធលូសំខាន់ៗខាងមុខឆាប់ៗនេះ។
មន្ទីរក៏ស្នើពលរដ្ឋម្ចាស់លំនៅឋាន និងម្ចាស់អាជីវកម្មទាំងអស់ដែលរំលោភដីចំណីផ្លូវសាធារណៈនៅតាមផ្លូវលេខ ២០០ សង្កាត់ ៤ ក្រុងព្រះសីហនុចូលរួមសហការរុះរើសំណង់ទីតាំងប្រកបអាជីវកម្មដែលសាងសង់លើដីចំណីផ្លូវសាធារណៈ៕
