មណ្ឌលគិរី: ប្រជាសហគមន៍ចំនួន ១៧០ គ្រួសារ រស់នៅភូមិអណ្ដូងក្រឡឹង ឃុំសែនមនោរម្យ ស្រុកអូររាំង ខេត្តមណ្ឌលគិរី គ្រោងដាក់ពាក្យបណ្ដឹងប្ដឹងបុគ្គលម្នាក់ទៅតុលាការខេត្ត ដោយចោទថាពាក់ព័ន្ធការរំលោភដីព្រៃសហគមន៍ជិត ២០ ហិកតា ធ្វើជាកម្មសិទ្ធិខុសច្បាប់ ខណៈសង្គមស៊ីវិលជំរុញឱ្យអាជ្ញាធរជួយដោះស្រាយបញ្ចប់ចៀសវាងមានរឿងក្ដីនៅតុលាការ។
លោក ម៉ាល់ ថាច លេខាសហគមន៍ជនជាតិដើមភាគតិចព្នង និងជាអ្នកតំណាងពលរដ្ឋទាំង ១៧០ គ្រួសារបានថ្លែងពីថ្ងៃទី ២៥ មករាថា លោក និងក្រុមពលរដ្ឋកំពុងរៀបចំពាក្យបណ្ដឹងប្ដឹងបុរសឈ្មោះ រុន វណ្ណៈ ជាអ្នកជំនួញល្បីឈ្មោះនៅក្នុងឃុំសែនមនោរម្យទៅតុលាការខេត្តមណ្ឌលគិរី ដោយសារបុគ្គលរូបនេះបានទិញ-លក់ និងរំលោភយកព្រៃសហគមន៍ជនជាតិដើមភាគតិចព្នងប្រមាណជិត ២០ ហិកតា។
លោកបន្តថា ពលរដ្ឋធ្លាប់បានស្នើឱ្យអាជ្ញាធរជួយទប់ស្កាត់ដែរ ប៉ុន្ដែដូចជាគ្មានប្រសិទ្ធភាពទេ។ ដីនេះ ត្រូវបានចុះបញ្ជីជាដីសមូហភាពពីឆ្នាំ ២០១៦ តែធ្លាប់មានគេប៉ុនប៉ងរំលោភយកជាច្រើនលើក ហើយតែងត្រូវពលរដ្ឋតវ៉ាឱ្យដកហូតមកវិញ។
លោក ម៉ាល់ ថាច បញ្ជាក់ថា៖ «ខ្ញុំបានជួបពិភាក្សាជាមួយមេធាវីពីគម្រោងប្ដឹងនេះ ហើយមេធាវីក៏គាត់ជួយផ្នែកបច្ចេកទេសផ្នែកច្បាប់នេះដែរខ្ញុំនឹងដាក់ទៅឆាប់ៗនេះ។ ឈ្មោះ រុន វណ្ណៈ នេះគឺជាពលរដ្ឋធម្មតាទេ ប៉ុន្ដែគាត់ជាអ្នករកស៊ីធូរធារនៅក្នុងឃុំសែនមនោរម្យ អ៊ីចឹងគាត់ទៅឈូសឆាយដីព្រៃដោយខុសច្បាប់ជាច្រើនកន្លែងហើយអួតថា គ្មាននរណាហ៊ានតតាំងជាមួយគាត់ទេ»។
លោក ប្លែវ ប៉ិល ពលរដ្ឋជនជាតិដើមភាគតិចព្នងម្នាក់ក្នុងចំណោមអ្នកប្ដឹងនោះបានថ្លែងថា លោកមិនពេញចិត្តនឹងសកម្មភាពឈ្មោះ រុន វណ្ណៈ ទេ។ លោកស្នើឱ្យអាជ្ញាធរជួយអន្តរាគមន៍លើបុរសម្នាក់នេះដើម្បីថែរក្សាដីព្រៃសមូហភាពដែលអាស្រ័យផលជាច្រើនឆ្នាំមកនេះ។
លោកបញ្ជាក់ថា៖ «ដីហ្នឹង គឺជាទីវាលដែលអ្នកភូមិអាស្រ័យផល ប៉ុន្ដែមិនមែនជាលក្ខណៈមានព្រៃឈើច្រើន ឬមានដើមឈើធំៗទេគឺមានតែព្រៃរបោះតូចៗ និងមានស្មៅដុះច្រើន។ ចំពោះនៅរដូវភ្លៀងពលរដ្ឋសហគមន៍គាត់ខ្លះដាំដំឡូងមី សណ្ដែកដី ពោត ឬល្ង ពោលគឺពួកគាត់ធ្វើចម្ការរួមគ្នា»។
លោកស្រី ភាន់ ប្រែល មេឃុំសែនមនោរម្យបានថ្លែងយ៉ាងខ្លីពីថ្ងៃ ២៥ មករាថា លោកស្រីបានទទួលព័ត៌មានពីទំនាស់ដីធ្លីនេះ ប៉ុន្ដែលោកស្រីមិនទាន់អាចនិយាយបានទេ ដោយសារកំពុងជាប់រវល់ប្រជុំ។ លោកស្រីថា៖ «ខ្ញុំដឹងថាមានទំនាស់ដីធ្លីនៅតំបន់ហ្នឹង តែខ្ញុំកំពុងប្រជុំមិនអាចនិយាយបានទេ»។
លោក សៀក មុន្នី អភិបាលស្រុកអូររាំងមិនអាចសុំការបញ្ជាក់ជុំវិញករណីបានទេ ដោយទូរស័ព្ទលោកមិនអាចទាក់ទងបាន។
ចំណែកលោក រុន វណ្ណៈ ដែលរងការចោទប្រកាន់នេះមិនទាន់អាចស្វែងរកប្រភព ដើម្បីទាក់ទងសុំការបញ្ជាក់បន្ថែមជុំវិញករណីនេះបានដែរកាលពីថ្ងៃទី ២៥ មករា។
លោក ប៉ែន ប៊ុណ្ណារ៍ មន្ត្រីកម្មវិធីពង្រឹងសិទ្ធិអំណាចសហគមន៍មូលដ្ឋាននៃសមាគមអាដហុកបានថ្លែងថា អាជ្ញាធរមូលដ្ឋានត្រូវតែរកដំណោះស្រាយជូនប្រជាសហគមន៍ឱ្យបានសមស្របទៅតាមច្បាប់ ដោយសារដីពួកគាត់បានចុះបញ្ជីរួចរាល់ហើយ។ ប្រសិនបើនៅគ្មានដំណោះស្រាយពីអាជ្ញាធរមូលដ្ឋាន ពួកគាត់មានជម្រើសប្ដឹងទៅតុលាការ ដើម្បីរកយុត្តិធម៌។
លោកបន្តថា ការរំលោភដីធ្លីនៅខេត្តមណ្ឌលគិរីអាចក្លាយជាទម្លាប់អាក្រក់ ប្រសិនបើអាជ្ញាធរ និងមន្ត្រីពាក់ព័ន្ធគ្មានចំណាត់ការច្បាស់លាស់ចំពោះជនល្មើសទេនោះ។ ជនល្មើសមួយចំនួនតែងតែប្រើអំណាចរបស់ខ្លួនទៅគំរាមពលរដ្ឋ និងអួតពីអ្នកមានអំណាចចាំជួយអន្តរាគមន៍ពីក្រោយខ្នង។
លោកបានបញ្ជាក់ថា៖ «កន្លងមកធ្លាប់មានជនខិលខូចរំលោភយកដីរដ្ឋបានសម្រេចច្រើនករណី បើទោះបីជាប្ដឹងទៅដល់តុលាការក៏ដោយ អ៊ីចឹងគំរូអាក្រក់ហ្នឹងវាជះឥទ្ធិពលទៅដល់អ្នកផ្សេងៗទៀតកាន់តែច្រើនឡើងៗដែលចូលទៅរំលោភយកដីរបស់រដ្ឋ ឬដីសហគមន៍ដែលចុះបញ្ជីរួចហើយ។ អ៊ីចឹងអាជ្ញាធរគួរតែដោះស្រាយជូនពួកគាត់ចៀសវាងមានសំណុំរឿងនៅតុលាការ»៕