ភ្នំពេញៈ អាជ្ញាធរខណ្ឌចំការមនកាលពីម្សិលមិញបានហៅភាគីជម្លោះក្នុងរឿងសាងសង់សំណង់ដែលបណ្ដាលឲ្យមានផលប៉ះពាល់ដល់អ្នកដែលរស់នៅក្បែរការដ្ឋានឲ្យសម្របសម្រួលពិភាក្សាគ្នារកដំណោះស្រាយ ក្រោយពីទទួលបានពាក្យបណ្ដឹងពីពលរដ្ឋ ២០ គ្រួសារកាលពីពាក់កណ្ដាលខែវិច្ឆិកា។
ពលរដ្ឋ ២០ គ្រួសារ បានដាក់ពាក្យបណ្ដឹងមកអាជ្ញាធរខណ្ឌចំការមនដោយបានរួមគ្នាផ្ដិតមេដៃប្ដឹងក្រុមហ៊ុនឆាយណាខន់ស្ត្រាក់សិនគ្រឹះស្ថានទី ១ ដែលទទួលបានច្បាប់ត្រឹមត្រូវកំពុងសាងសង់អគារកម្ពស់ ៥២ ជាន់ ស្ថិតនៅក្នុងភូមិ ១២ ផ្លូវច្រក ៩៣ សង្កាត់ទន្លេបាសាក់ ខណ្ឌចំការមន រាជធានីភ្នំពេញ ហើយត្រូវបានចោទប្រកាន់ថា ការដ្ឋានសំណង់បានបង្កឲ្យមានផលប៉ះពាល់ដល់ទ្រព្យសម្បត្តិ និងធ្វើឲ្យមានការភ័យខ្លាចដល់ការរស់នៅប្រចាំថ្ងៃរបស់ពួកគេ។
យោងតាមពាក្យបណ្ដឹងរបស់ពលរដ្ឋទាំងនោះបានឲ្យដឹងថា៖ «ក្រុមហ៊ុនឆាយណាខន់ស្ត្រាក់សិនគ្រឹះស្ថានទី ១ បានបើកការដ្ឋានសំណង់នៅជាប់របងផ្ទះយើងខ្ញុំ និងបានបង្កឲ្យមានការរញ្ជួយរង្គើផ្ទះ ស្រុតប្រេះជញ្ជាំងបានបង្កសំឡេងរំខាន ២៤ ម៉ោង សាចកម្ទេចថ្ម សាចផ្កាភ្លើង ជះក្លិនឈ្ងៀម ស្រក់ទឹកស៊ីម៉ងត៍លើទ្រព្យសម្បតិ្ត ដំបូលផ្ទះ និងធ្វើឲ្យមានការភ័យខ្លាចពីសុវត្ថិភាព ការរស់នៅប្រចាំថ្ងៃ ព្រោះតែដែកយោងសម្ភារការដ្ឋានសំណង់ វិលនៅលើដំបូលផ្ទះយើងខ្ញុំជាប្រចាំ»។
លោក ថេង សុថុល អភិបាលខណ្ឌចំកាមនបានប្រាប់ភ្នំពេញប៉ុស្តិ៍ពីម្សិលមិញថា អាជ្ញាធរខណ្ឌបានយកចិត្តទុកដាក់ និងបានចុះទៅដល់ការដ្ឋានសំណង់មុនប្រជាពលរដ្ឋដាក់ពាក្យបណ្តឹងមកអាជ្ញាធរខណ្ឌ។
លោក សុថុល បានឲ្យដឹងថា៖ «ដោយយោងតាមពាក្យបណ្តឹង និងផលប៉ះពាល់ អាជ្ញាធរក៏បានកោះហៅម្ចាស់ការដ្ឋាន និងប្រជាពលរដ្ឋដើមបណ្តឹងមកជួបគ្នានៅសាលាខណ្ឌកាលពីម្សិលមិញ ដើម្បីស្វែងរកដំណោះស្រាយ។ យើងចុះសម្របសម្រួលនេះមិនទាន់បានឯកភាពគ្នាទេ ព្រោះតែខាងក្រុមហ៊ុនក៏គាត់បានស្នើឲ្យយើងរកអ្នកបច្ចេកទេសឯករាជ្យមួយ ដើម្បីវាយតម្លៃស្ថានភាពផ្ទះរបស់បងប្អូនប្រជាពលរដ្ឋ។ មួយទៀត ជាជំហានដំបូងការចុះដល់ទីកន្លែងនេះ គឺដើម្បីពិនិត្យមើលទីតាំងជាក់ស្តែងដែលបញ្ហាធ្លាក់ថ្ម មានមូលហេតុយ៉ាងម៉េច?»។
លោក ថេង សុថុល បានអះអាងថាបើសិនជាការសិក្សាបញ្ហានេះត្រូវបានរកឃើញថាបណ្តាលមកពីការដ្ឋានសំណង់នោះ ក្រុមហ៊ុននឹងទទួលការពិន័យ និងផ្តល់សំណងដល់ប្រជាពលរដ្ឋរងគ្រោះ។ បន្ថែមពីនេះក្រុមហ៊ុននេះក៏ត្រូវធ្វើការកែតម្រូវលក្ខណៈបច្ចេកទេស និងប្រឈមនឹងវិធានការច្បាប់ដែលមានជាធរមានជាបន្តបន្ទាប់ទៀតដែរ។
លោក សុថុល ថ្លែងថា៖ «ប៉ុន្តែខ្ញុំ មិនបានបញ្ជាក់ទេថា ការសិក្សាចំពោះបញ្ហានេះ ពីសំណាក់អ្នកជំនាញនឹងត្រូវចាប់ផ្តើម និងបញ្ចប់នៅពេលណាដោយគ្រាន់តែអះអាងបានថា ការជួបគ្នានៅពេលនេះគឺជាជំហានមួយដែលល្អឈានទៅរកដំណោះស្រាយដែលអាចទទួលយកបានទាំងអស់គ្នា»។
ទោះជាយ៉ាងណាក៏ដោយម្ចាស់ក្រុមហ៊ុនឆាយណាខន់ស្ត្រាក់សិន មិនអាចស្វែងរកប្រភពដើម្បីសុំការអត្ថាធិប្បាយជុំវិញការចោទប្រកាន់នេះបានទេកាលពីម្សិលមិញ។
លោក ខាត់ ណារិទ្ធ ចៅសង្កាត់ទន្លេបាសាក់បានប្រាប់ភ្នំពេញប៉ុស្តិ៍ពីម្សិលមិញដែរថា តាមគម្រោងសំណង់ការដ្ឋាននេះគ្រោងនឹងសាងសង់កម្ពស់ ៥២ ជាន់ ដោយមានច្បាប់សាងសង់ត្រឹមត្រូវ។
លោក ណារិទ្ធ បានឲ្យដឹងថា ក្រោយពីបង្កផលប៉ះពាល់ដល់ប្រជាពលរដ្ឋ ក្រុមហ៊ុនចិនមួយនេះក៏បានចេញមកទទួលខុសត្រូវចំពោះការខូចខាតផ្ទះរបស់ប្រជាពលរដ្ឋដែលរងការខូចខាតធ្ងន់ធ្ងរចំនួន ៤ គ្រួសាររួចមកហើយ ចំពោះផ្ទះរបស់ប្រជាពលរដ្ឋដទៃទៀត មិនប្រឈមការប៉ះពាល់ខ្លាំងនោះទេ។
លោក ណារិទ្ធ ថ្លែងថា៖ «នៅពេលដែលគាត់ចាប់ផ្តើមខួងគ្រឹះហ្នឹងមានការប៉ះពាល់តែ ៤ គ្រួសារទេ ព្រោះជាធម្មតាពេលខួងទៅ វាខ្ទាតថ្មប្រឡាក់តិចតួចហើយ។ ប៉ុន្តែក្នុងនោះ ខាងក្រុមហ៊ុនបានធ្វើការដោះស្រាយចំពោះផ្ទះប្រេះដោយគេឲ្យបងប្អូនទៅនៅកន្លែងផ្សេង (ពេលកំពុងសាងសង់) គេទទួលខុសត្រូវ ហើយនៅពេលដែលគេខួងហើយ គេអាចនឹងមានដំណោះស្រាយយ៉ាងម៉េច វាអាស្រ័យទៅលើទំហំនៃការខូចខាត»៕