.jpg)
ជំនន់ទឹកភ្លៀងបានជន់លិចកំណាត់ផ្លូវជាតិលេខ ៤ ត្រង់ចំណុចព្រំប្រទល់ខេត្តកំពង់ស្ពឺ និងខេត្តព្រះសីហនុដែលធ្វើឲ្យអាជ្ញាធរបិទចរាចរណ៍ឆ្លងកាត់កាលពីម្សិលមិញ។ រូប ក្រសួងធនធានទឹក
ព្រះសីហនុ/កោះកុងៈ យ៉ាងហោចណាស់មានប្រជាពលរដ្ឋ ២២១ គ្រួសារត្រូវបានជម្លៀសចេញពីលំនៅឋាននៅក្នុងស្រុកថ្មបាំង ខេត្តកោះកុងកាលពីល្ងាចម្សិលមិញ ខណៈដែលអាជ្ញាធរបានផ្អាកជាបណ្តោះអាសន្នការធ្វើចរាចរណ៍តាមបណ្តោយផ្លូវជាតិលេខ ៤ ត្រង់ចំណុចស្ពានអូរគគីរ បន្ទាប់ពីទឹកជំនន់បានបន្ដហក់ឡើងយ៉ាងគំហុក បន្ទាប់ពីមានភ្លៀងធ្លាក់មិនឈប់ក្នុងរយៈពេលជាច្រើនថ្ងៃកន្លងមកនេះ។
លោក យន្ដ មីន អភិបាលខេត្ដព្រះសីហនុបានប្រាប់ភ្នំពេញប៉ុស្ដិ៍កាលពីម្សិលមិញថា សម្ទុះទឹកនៅតំបន់ស្ពានអូរគគីរបានស្រកចុះបន្ដិចហើយតែនៅបន្ដហក់ឡើងនៅតំបន់ ស្ទឹងសំរោងដែលមានចម្ងាយប្រហែលជា ១០ គីឡូម៉ែត្រពីស្ពានអូរគគីរ។
លោកថ្លែងថា៖ «ទឹកបានលិចនៅស្ពានអូរគគីរ តាំងពីម៉ោង ៥ ជាងល្ងាចរហូតដល់ម៉ោង ៦ ល្ងាច (ថ្ងៃទី ១៦ ខែកក្កដា) ទើបលិចលែងអាចធ្វើដំណើរបាន។ ...យើងក៏បានផ្អាកចរាចរណ៍នៅតំបន់នោះដែរ»។ លោកបន្ថែមថា៖ «សម្ទុះទឹកជំនន់នេះ បើសិនជាភ្លៀងរាំងបាន ៤-៥ ម៉ោង នឹងអាចធ្វើចរាចរណ៍បានធម្មតាវិញហើយ»។
ទោះបីជាយ៉ាងណាលោក យន្ដ មីន បានអះអាងថាមិនមានផលប៉ះពាល់អ្វីធំដុំដល់ប្រជាពលរដ្ឋនៅក្នុងខេត្តព្រះសីហនុនោះទេ ព្រោះប្រជាពលរដ្ឋបានទទួលព័ត៌មាន និងដឹងពីការថែរក្សាសុវត្ថិភាពមុនរួចហើយ។
លោក វ៉ា ស៊ឹមសុរិយា អ្នកនាំពាក្យក្រសួងសាធារណការ និងដឹកជញ្ជូនបានឲ្យដឹងថាវិធានការដំបូងខាងអន្ដរក្រសួងមានតែផ្អាកការធ្វើដំណើរបណ្ដោះអាសន្ន ដើម្បីបញ្ចៀសគ្រោះថ្នាក់ផ្សេងៗ។ បន្ទាប់មកទើបគណៈកម្មការអន្ដរក្រសួងពាក់ព័ន្ធធ្វើរបាយការណ៍ ដើម្បីរកវិធានការទប់ស្កាត់បន្ថែម។
រថយន្តត្រូវបានហាមឃាត់មិនឲ្យបើកឆ្លងកាត់កំណាត់ផ្លូវជាតិលេខ ៤ ដែលទឹកជន់លិច។ រូប ក្រសួងធនធានទឹក
លោកបានបន្ដថា៖ «មានតែផ្អាកការធ្វើចរាចរណ៍បណ្ដោះអាសន្ន និងសុំឲ្យអ្នកធ្វើដំណើរវាងតាមផ្លូវផ្សេងវិញ ជាជាងការកកស្ទះ និងអាក់ខាន ហើយផ្លូវវាង យើងមានតែទៅតាមផ្លូវជាតិលេខ ៣ ឬក៏ផ្លូវលេខ ៤១ ដែលបែរមកផ្លូវជាតិលេខ ៤ វិញ»។
ចំណែកនៅខេត្តកោះកុងភ្លៀងនៅតែបន្តធ្លាក់ខ្លាំងរយៈពេលជាងកន្លះខែកន្លងមកហើយឈានចូលមកដល់ព្រឹកថ្ងៃម្សិលមិញ ភ្លៀងនៅតែបន្តធ្លាក់ទូទាំងខេត្តនៅឡើយ ហើយបើគិតមកដល់ត្រឹមល្ងាចម្សិលមិញមានប្រជាពលរដ្ឋចំនួន ២២១ គ្រួសារនៅក្នុងស្រុកថ្មបាំងត្រូវបានជម្លៀសចេញពីលំនៅឋានទៅកាន់ទីទួលសុវត្ថិភាព។
ការធ្លាក់ភ្លៀងជាប់ជាបន្តបន្ទាប់នេះក៏បានបង្កឱ្យមានទឹកលិចលង់តំបន់មួយចំនួននៅក្នុងឃុំតាតៃលើ ស្រុកថ្មបាំង និងតំបន់មួយចំនួនជាប់ព្រំដែនកម្ពុជា-ថៃ។ នេះបើតាមអាជ្ញាធរខេត្ត។
លោក អន សុធារិទ្ធ អភិបាលស្រុកថ្មបាំងបានឲ្យដឹងថានៅក្នុងចំណោម ៨ ឃុំ និង ១៦ ភូមិ នៃស្រុកថ្មបាំងមានតែ ៣-៤ ភូមិប៉ុណ្ណោះដែលទទួលរងពីជំនន់ទឹកភ្លៀង ប៉ុន្ដែមិនបានជន់លិចលង់យូរទេ ព្រោះតំបន់នោះជាតំបន់ភ្នំលិចតែមួយភ្លែតនឹងស្រកវិញឲ្យតែមេឃឈប់ភ្លៀង។
លោកបានបន្តថា៖ «ភូមិ ជាំស្លា ជន្លាប់ ស្ពានក្ដារ ត្រពាំងខ្នារដែលក្នុងចំណោមនេះមានតែឃុំតាតៃលើ ស្ថិតក្នុងភូមិស្ពានក្ដារប៉ុណ្ណោះដែលលិចខ្លាំងជាងគេ»។ លោកបន្តថាអាជ្ញាធរបានត្រៀមកម្លាំងគ្រប់ពេលដើម្បីចុះទៅជួយដល់ប្រជាពលរដ្ឋ។
បើតាមលោក ចាន់ យុត្ថា អ្នកនាំពាក្យក្រសួងធនធានទឹក និងឧតុនិយម ទឹកជំនន់ផ្ដើមហក់ឡើងខ្លាំងក្នុងរយៈពេល ២-៣ ថ្ងៃកន្លងមកនេះដោយសារតែមានភ្លៀងខ្លាំង និងទឹកដែលហូរចូលយ៉ាងគំហុកពីប្រទេសថៃ ហើយទឹកនេះនឹងស្រកចុះទៅវិញ ២-៣ ថ្ងៃក្រោយ។ លោកបានថ្លែងបន្ដថា៖ «ទឹកជំនន់ដែលហក់ឡើងនាប៉ុន្មានថ្ងៃនេះមិនមានផលប៉ះពាល់អ្វីដល់ដំណាំប្រជាពលរដ្ឋនៅឡើយទេ ហើយនៅតំបន់មួយចំនួនទឹកនឹងស្រកចុះទៅវិញនា ២-៣ ថ្ងៃខាងមុខនេះ»។
ចំណែកនៅឯខេត្តស្ទឹងត្រែងឯណោះវិញ បើតាមលោក មែន គង់ អ្នកនាំពាក្យសាលាខេត្តស្ទឹងត្រែងបានឲ្យដឹងថាគិតមកដល់ត្រឹមថ្ងៃម្សិលមិញកម្ពស់ទឹកទន្លេមេគង្គបានហក់ឡើងជាបន្តបន្ទាប់ដែលនឹងអាចជន់លិចចូលតាមស្ទឹង ព្រែក និង ប្រព័ន្ធប្រឡាយមួយចំនួននៅក្នុងប៉ុន្មានថ្ងៃខាងមុខនេះ ដោយសារតែលំហូរទឹកដែលហូរចាក់ពីតំបន់អាងទន្លេមេគង្គផ្នែកខាងលើប្រទេសថៃ និងប្រទេសឡាវធ្លាក់មកយ៉ាងគំហុក បន្ទាប់ពីមានភ្លៀងធ្លាក់ជាប់ៗគ្នានាប៉ុន្មានថ្ងៃកន្លងមកនេះ។
លោកបន្តថា៖ «ទោះជាបែបណាក្ដីរហូតមកទល់ពេលនេះ យើងនៅពុំទាន់ទទួលបានសេចក្ដីរាយការណ៍ពីអាជ្ញាធរមូលដ្ឋានណាមួយ ស្ដីពីការជន់លិចនៅឡើយទេ។ ស្របពេលជាមួយគ្នានេះអាជ្ញាធរពាក់ព័ន្ធយើងនៅទូទាំងខេត្តកំពុងធ្វើការត្រួតពិនិត្យតាមដានអំពីស្ថានភាពអាកាសធាតុ និង ទឹកជំនន់ជាប្រចាំ»។
លោក ប៉ាង ពេញ ប្រធានមន្ទីរធនធានទឹកខេត្តស្ទឹងត្រែងដែលកំពុងត្រួតពិនិត្យអំពីស្ថានភាពកម្ពស់ទឹកជំនន់ទន្លេមេគង្គក្នុងខេត្តស្ទឹងត្រែងបានថ្លែងថា នៅពេលនេះកម្ពស់ទឹកទើបតែហក់ឡើងដល់ ៧,៦៨ ម៉ែត្រប៉ុណ្ណោះ ខណៈកម្ពស់ទឹកដែលត្រូវប្រកាសអាសន្នមានកម្រិត ១០,៥០ ម៉ែត្រ។
លោកឲ្យដឹងទៀតថា ចំណែកនៅតំបន់អាងទំនប់វារីអគ្គិសនីសេសានក្រោម ២ ក៏មិនមានទឹកជន់ឡើងខ្លាំងនោះដែរដោយសារមានការបើកបង្ហូរទឹកដើម្បីដំណើរការទួរប៊ីនចំនួន ២ សម្រាប់ផលិតអគ្គិសនីផ្គត់ផ្គង់នៅក្នុងខេត្ត។
កាលពីម្សិលមិញប្រជាពលរដ្ឋប្រមាណជិត ១០០ គ្រួសារនៅឃុំស្រែគ និង ឃុំក្បាលរមាស ស្រុកសេសានដែលនៅពុំទាន់ទទួលយកសំណងគោលនយោបាយពីរដ្ឋ ដើម្បីចាកចេញពីតំបន់សាងសង់ទំនប់វារីអគ្គិសនីសេសានក្រោម ២ បានប្រាប់ភ្នំពេញប៉ុស្តិ៍ថាកាលពី ៣ ថ្ងៃមុននេះខាងក្រុមហ៊ុនបានបើកទ្វារទឹក ១ កន្លែង ដើម្បីរំដោះទឹកចេញពីអាងស្តុកទឹកនៃទំនប់វារីអគ្គិសនីរបស់ពួកគេ ខណៈដែលមានភ្លៀងធ្លាក់ខ្លាំង នាប៉ុន្មានថ្ងៃជាប់ៗគ្នានេះ។
តំណាងប្រជាពលរដ្ឋភូមិស្រែគចាស់ លោក វុធ ឃឿន បានថ្លែងថា៖ «ក្នុងរយៈពេល ២-៣ ថ្ងៃមកនេះទឹកនៅក្នុងតំបន់ដែលយើងកំពុងរស់នៅបានស្រកចុះប្រមាណ ៣០ សង់ទីម៉ែត្រ ការស្រកនេះយើងយល់ថាពិតជាមានការបើកទ្វារអាងស្តុកទឹកនៃទំនប់វារីអគ្គិសនីនេះ»។
ខណៈភ្លៀងនៅតែបន្តធ្លាក់អ្នកនាំពាក្យគណៈកម្មាធិការជាតិគ្រប់គ្រងគ្រោះមហន្តរាយលោក កែវ វី បានអំពាវនាវឲ្យប្រជាពលរដ្ឋដែលរស់នៅតាមបណ្ដោយស្ទឹង ព្រែក និងដងអូរនានា ជាប់ព្រំដែនថៃត្រូវបង្កើនការប្រុងប្រយ័ត្នខ្ពស់ចំពោះគ្រោះទឹកជំនន់ដែលហូរចាក់យ៉ាងគំហុកមកពីប្រទេសថៃ។ ដូចគ្នានេះដែរប្រជាពលរដ្ឋដែលរស់នៅតាមដងទន្លេមេគង្គផ្នែកខាងលើដូចជានៅខេត្តកំពង់ចាម ក្រចេះ និងស្ទឹងត្រែងក៏ត្រូវបង្កើនការប្រុងប្រយ័ត្ន និងយកចិត្តទុកដាក់អំពីសុវត្ថិភាពកូនៗ និង ឪពុកម្ដាយដែលចាស់ជរា។
លោក កែវ វី បានថ្លែងថា៖ «ដើម្បីសុវត្ថិភាពសូមបងប្អូនរក្សាការពារកូនៗ និង ឪពុកម្ដាយចាស់ជរារបស់បងប្អូនឲ្យនៅឲ្យឆ្ងាយពីទឹកក្នុងអំឡុងពេលដែលមានទឹកជំនន់កើតឡើង»៕
