ព្រះវិហារ៖ ប្រជាពលរដ្ឋក្នុងភូមិចំនួន ៣ ស្ថិតក្នុងឃុំរមទម ស្រុករវៀង ខេត្តព្រះវិហារ បានថ្លែងដោយបង្ហាញក្ដីព្រួយបារម្ភពីការបាត់បង់ដីស្រែ ចម្ការជាបន្តបន្ទាប់ ព្រោះតែការទន្ទ្រានវាតទីពីក្រុមហ៊ុនឯកជនចំនួន ៣ ដែលទទួលបានសិទ្ធិវិនិយោគរ៉ែ និងដំណាំកសិកម្ម ហើយបញ្ហានេះបានកើតឡើងតាំងពីឆ្នាំ ២០១៥ ប៉ុន្តែគ្មានដំណោះស្រាយពីមន្ត្រីមានសមត្ថកិច្ចចាប់តាំងពីថ្នាក់មូលដ្ឋានរហូតដល់ក្រសួងមហាផ្ទៃ បើទោះបីពលរដ្ឋរងគ្រោះបានស្វែងរកដំណោះស្រាយជាច្រើនលើកច្រើនសា មកហើយនោះ។
ក្រុមហ៊ុនដែលត្រូវបានពលរដ្ឋប្រមាណ ២៣០ គ្រួសារ រស់នៅក្នុងភូមិចំនួន ៣ ក្នុងស្រុករវៀង ចោទប្រកាន់នោះ គឺមានក្រុមហ៊ុន ឌែលខម ខេមបូឌា (Delcom Cambodia) ក្រុមហ៊ុនតីនសាន ដែលជាក្រុមហ៊ុនប្រកបអាជីវកម្មរុករករ៉ែមាស និងក្រុមហ៊ុន គីម ជាធួន គ្រុប (Kim Gia Thuan Group Co., Ltd) ដែលជាក្រុមហ៊ុនទទួលបានសិទ្ធិធ្វើកសិកម្មដាំដុះកៅស៊ូ។
លោក អេត ថុន ជាអ្នកភូមិអូរទ្រលោក ដែលបានប្រឈមបញ្ហាជាមួយក្រុមហ៊ុន គីម ជាធួនគ្រុប បានប្រាប់ ភ្នំពេញ ប៉ុស្តិ៍ ថា ប្រជាពលរដ្ឋក្នុងភូមិអូរទ្រលោក និងអ្នកភូមិដទៃទៀត បានដាក់ញតិ្តទៅក្រសួងមហាផ្ទៃ ដើម្បីសុំកិច្ចអន្តរាគមន៍កាលពីឆ្នាំ ២០២០ ប៉ុន្តែជាលទ្ធផលនៅពាក់កណ្តាលខែមីនានេះ អ្នកភូមិដែលបានប្រមូលស្នាមមេដៃប្តឹងនោះ ត្រូវបានអាជ្ញាធរស្រុកហៅម្តងម្នាក់ៗ ទៅសួរនាំទាំងគ្មានទទួលបានលទ្ធផលអ្វីទាំងអស់ ក្រៅតែពីទទួលបានការភ័យខ្លាច និងបារម្ភពីសុវត្ថិភាព។
លោកបញ្ជាក់ថា៖ «ដីរបស់ខ្ញុំ ប៉ះពាល់ ៤ ហិកតា ដាំចេក ដាំអី តែគេឈូសឆាយវាទៅជាវាលធេងអស់ទៅហើយ។ យើងតវ៉ា ស្រាប់តែគេហៅយើងទៅសួរនាំរឿងមេដៃ សួរនាំរកអ្នកតំណាង អ្នកណាបង្ខំឱ្យផ្តិត? ចំពោះប្រជាពលរដ្ឋ គឺប្តឹងដោយស្ម័គ្រចិត្តដល់ពេលរដ្ឋបាលស្រុកគេហៅទៅសួរនាំអ៊ីចឹង យើងមិនដឹងថា គេចង់ធ្វើអ្វីទៀតទេ។ យើងមានតែបារម្ភ និងភ័យខ្លាច»។
លោក ទុយ ឆេង អាយុ ៦៤ ឆ្នាំ ជាអ្នកភូមិរំដែង បានប្រាប់ ភ្នំពេញ ប៉ុស្តិ៍ កាលពីម្សិលមិញថា ដីស្រែចម្ការរបស់លោក ៤ ហិកតា ក្នុងចំណោមដីស្រែចម្ការរបស់អ្នកភូមិជាច្រើនទៀត ត្រូវបានក្រុមហ៊ុនទាំង ៣ នេះ ហ៊ុមព័ទ្ធយកជាបន្តបន្ទាប់ ដោយសំអាងថា ក្រុមហ៊ុនទទួលបានសិទ្ធិវិនិយោគ។
លោកបន្តថា ថ្មីៗនេះ ក្រុមហ៊ុនមួយក្នុងចំណោមក្រុមហ៊ុនទាំង ៣ ក៏បានបន្តសកម្មភាពវាតទីហ៊ុមព័ទ្ធយកដីបន្ថែមទៀត ដែលធ្វើឱ្យប៉ះពាល់ដីរបស់អ្នកភូមិចំនួន ១០ គ្រួសារទៀត បើទោះជាពលរដ្ឋព្យាយាមស្វែងរកកិច្ចអន្តរាគមន៍យ៉ាងណាក៏ដោយ។
លោក បញ្ជាក់ថា៖ «ក្រុមហ៊ុនរ៉ែមាសនោះ គឺនៅតែហ៊ុមព័ទ្ធយកដីរបស់ប្រជាពលរដ្ឋដដែលហ្នឹងឯង (នៅថ្ងៃទី ១៦ និង ១៥ មីនា) គេចាប់ផ្តើមវាតទីចេញពីកន្លែងបង្គោលចាស់គេ ប្រវែង ៥០០ ម៉ែតទៀត ចូលដីប្រជាពលរដ្ឋ ១០ គ្រួសារទៀត»។
ភ្នំពេញ ប៉ុស្តិ៍ មិនអាចស្វែងរកប្រភព ដើម្បីទាក់ទងតំណាងក្រុមហ៊ុន ឌែលខម ខេមបូឌា តំណាងក្រុមហ៊ុន គីម ជាធួនគ្រុប និងតំណាងក្រុមហ៊ុន តីន សាន នេះបានទេ ពីម្សិលមិញ។
លោក ហោ ប៊ុនហ៊ួរ អភិបាលស្រុករវៀង ខេត្តព្រះវិហារ ក៏មិនអាចសុំការអត្ថាធិប្បាយបានជុំវិញករណីដែលពលរដ្ឋចោទប្រកាន់ថា ហៅពលរដ្ឋមកសួរនាំនេះបានដែរ ដោយសារតែលោក មិនលើកទូរស័ព្ទ។
លោក ប្រាក់ សុវណ្ណ អភិបាលខេត្តព្រះវិហារ បាននិយាយប្រាប់ ភ្នំពេញ ប៉ុស្តិ៍ ឱ្យដឹងថា លោកនឹងចាត់ឱ្យមន្ត្រីជំនាញចុះទៅស្រាវជ្រាវបន្ត ខណៈលោកគ្រាន់តែបញ្ជាក់យ៉ាងខ្លីថា ក្រុមហ៊ុនទាំងនេះគឺអាចទទួលបានសិទ្ធិធ្វើវិនិយោគស្របច្បាប់ ទើបបានជាពួកគេ បន្តសកម្មភាពយ៉ាងដូច្នេះ។
លោកបញ្ជាក់ថា៖ «ខ្ញុំមិនទាន់ទទួលបានព័ត៌មានថ្មីនេះទេ ចាំមើលខ្ញុំទាក់ទងសួរទៅអាជ្ញាធរស្រុក។ វាមានការប៉ះពាល់អ៊ីចឹង គឺខ្ញុំពិបាកជម្រាបជូនណាស់។ ខ្ញុំនឹងឱ្យអាជ្ញាធរស្រុករាយការណ៍មកបន្ថែម»។
លោក ឡោ ចាន់ មន្ត្រីសម្របសម្រួលសមាគមអាដហុកបានថ្លែងថា នៅពេលដែលពលរដ្ឋស្វែងរកកិច្ចអន្តរាគមន៍ពីអាជ្ញាធរមានសមត្ថកិច្ច គឺពួកគាត់ មិនទទួលបានដំណោះស្រាយនោះទេ តែបែរជាទទួលបានការគំរាមកំហែងតាមរយៈការហៅប្រជាពលរដ្ឋទៅសួរនាំ និងព្យាយាមធ្វើឱ្យពលរដ្ឋមានការភ័យខ្លាច។
លោកថ្លែងថា៖ «អាជ្ញាធរគួរណាតែមានដំណោះស្រាយជូនប្រជាពលរដ្ឋដែលរងគ្រោះពិតប្រាកដ ហើយណាមួយគួរតែយកតាមគោលការណ៍រាជរដ្ឋាភិបាលតាមរយៈបទបញ្ជា ០០១ កន្លងមក។ ព្រោះបទបញ្ជានេះ គឺត្រូវប្រើរូបមន្តស្បែកខ្លា ដោយកាត់ឆ្វៀលដីជូនពលរដ្ឋ»។ ជម្លោះដីធ្លីរវាងពលរដ្ឋជាមួយក្រុមហ៊ុនទាំងនោះ បានកើតឡើងតាំងពីឆ្នាំ ២០១៥ និងបន្តអូសបន្លាយរ៉ាំរ៉ៃ ដោយគ្មានដំណោះស្រាយរហូតមកទល់បច្ចុប្បន្ន៕