.jpg)
ពលរដ្ឋមានវិវាទដីធ្លីតវ៉ានៅមុខក្រសួងរៀបចំដែនដីម្សិលមិញ។ ហុង មិនា
ភ្នំពេញៈ ពលរដ្ឋ ២ ក្រុមមកពីខេត្តកោះកុង និងខណ្ឌព្រែកព្នៅប្រមាណជិត ២០០ នាក់ កាលពីម្សិលមិញបានមកប្រមូលផ្ដុំគ្នាតវ៉ានៅមុខក្រសួងរៀបចំដែនដីដើម្បីស្នើឲ្យក្រសួងនេះជួយអន្តរាគមន៍ ដោះស្រាយពាក់ព័ន្ធបញ្ហាទំនាស់ដីធ្លីដ៏រ៉ាំរ៉ៃរបស់ពួកគាត់ជាមួយក្រុមហ៊ុន និងបុគ្គលម្នាក់។
ពលរដ្ឋប្រមាណជាង ១០០ នាក់ដែលដឹកនាំដោយអ្នកស្រី លី ជូ ដែលតំណាងឲ្យប្រជាពលរដ្ឋជាង ២០០ គ្រួសារមកពីឃុំព្រែកខ្សាច់ ឃុំកោះស្ដេច ស្រុកគិរីសាគរ ខេត្តកោះកុង ដែលកំពុងមានជម្លោះដីធ្លីជាមួយក្រុមហ៊ុនចិន Unions Development Group (UDG)។ ចំណែកពលរដ្ឋ និងព្រះសង្ឃជាង ៥០ នាក់/អង្គ មកពីភូមិព្រៃពង្រ សង្កាត់ពញាពន់ ខណ្ឌព្រែកព្នៅ រាជធានីភ្នំពេញ កំពុងមានទំនាស់ដីធ្លីជាមួយបុគ្គលម្នាក់ដោយពួកគាត់ថា បុគ្គលនោះបានលួចធ្វើប័ណ្ណកម្មសិទ្ធិដីធ្លីរបស់វត្ត «សុវណ្ណធម្មរាជ» ហើយយកទៅពុះជាដីឡូត៍លក់ឲ្យអ្នកផ្សេងទៀត។
អ្នកស្រី លី ជូ បានឲ្យដឹងថាមូលហេតុដែលពួកគាត់ឡើងមករកអន្តរាគមន៍នៅភ្នំពេញនេះដោយសារអាជ្ញាធរភូមិ ឃុំ រហូតដល់ខេត្តមិនរកដំណោះស្រាយជូនពួកគាត់ឡើយ។ «ខ្ញុំដាក់ញត្តិកន្លែងឃុំ កន្លែងខេត្ត គេអត់រកដំណោះស្រាយឲ្យពួកខ្ញុំទេ អ៊ីចឹងបានពួកខ្ញុំមកដល់ភ្នំពេញនេះគឺមកជំរុញឲ្យពន្លឿនការដោះស្រាយ ព្រោះពួកខ្ញុំបានដាក់រួចហើយកាលពីខែមុន ដូចជាស្ងាត់ឈឹងមិនឃើញមានឆ្លើយតបអ្វីទេ»។
អ្នកស្រីបន្តថាក្រុមហ៊ុនចិន UDG តែងតែធ្វើទុក្ខបុកម្នេញ មិនឲ្យប្រជាពលរដ្ឋបង្កបង្កើនផលលើដីស្រែចម្ការដែលពលរដ្ឋធ្លាប់កាន់កាប់អាស្រ័យផលយូរឆ្នាំមកហើយនោះទេ។ «ខែប្រាំងឡើងដុតដំណាំពួកយើងខ្ញុំបំបាត់ភ័ស្តុតាងនៅសល់តែដីទេ»។
អ្នកនាំពាក្យក្រុមហ៊ុន UDG អ្នកស្រី Bella Zhang មិនបានឆ្លើយតបនឹងសំណើសុំអធិប្បាយទេកាលពីម្សិលមិញ។
ចំណែកករណីទំនាស់ដីធ្លីនៅសង្កាត់ពញាពន់ ខណ្ឌព្រែកព្នៅដឹកនាំដោយព្រះតេជគុណ គង់ សាមន ព្រះចៅអធិការវត្ត «សុវណ្ណធម្មរាជ» មានសង្ឃដីកាថា ដីជិត ៧ ហិកតារបស់វត្តត្រូវបានពុទ្ធបរិស័ទឯកភាពប្រមូលបច្ច័យមកពីគ្រប់ទិសទីដើម្បីទិញយកមកធ្វើជាដីវត្តពីអ្នកភូមិចំនួន ៤ គ្រួសារតាំងពីឆ្នាំ ២០០៧ រហូតមក។ ស្រាប់តែក្នុងឆ្នាំ ២០១៦ លេចមុខលោក រស់ សារិន អតីតប្រធានគណៈកម្មការវត្តចាស់បានក្លែងបន្លំឯកសារធ្វើប្លង់យកដីរបស់វត្តទៅលក់ឲ្យឈ្មួញក្នុងតម្លៃរាប់សិបម៉ឺនដុល្លារ។
ព្រះអង្គបន្តថា ក្នុងនាមគណៈកម្មការអាចារ្យវត្តទាំងអស់គ្មានអ្វីក្រៅពីការស្នើសុំអំពាវនាវយ៉ាងទទូចចំពោះថ្នាក់ដឹកនាំគ្រប់លំដាប់ថ្នាក់ មេត្តាជួយអន្តរាគមន៍ពន្លឿនការដោះស្រាយដើម្បីយកដីត្រឡប់មកវិញដែលវត្តបានថែរក្សាគ្រប់គ្រងជាយូរមកហើយតាំងពីឆ្នាំ ២០០៧ មកម្ល៉េះ។
បើតាមពលរដ្ឋដែលមកតវ៉ានោះលោក រស់ សារិន អតីតប្រធានគណៈកម្មការអាចារ្យវត្ត «សុវណ្ណធម្មរាជ» បានស្លាប់កាលពីខែមុន ប៉ុន្ដែលោកបានផ្ទេរដីវត្តនេះទៅឲ្យកូនរបស់គាត់ ហើយកូនៗរបស់គាត់បានយកទៅពុះធ្វើជាដីឡូត៍លក់បន្តទៀត។
លោក ហេង រ៉ាន់ ប្រធានក្រុមទី ៣៥ ផ្នែកដោះស្រាយវិវាទដីធ្លីនៃក្រសួងរៀបចំដែនដី នគរូបនីយកម្ម និងសំណង់ដែលចេញមកជួបពលរដ្ឋ និងព្រះសង្ឃទាំង ២ ក្រុមនេះបានស្នើឱ្យពលរដ្ឋរក្សាភាពស្ងប់ស្ងាត់សិន ខណៈក្រសួងកំពុងដោះស្រាយបញ្ហានេះ និងវិវាទដីធ្លីដទៃទៀតដែលទាមទារត្រូវប្រើពេលយូរ។
តែលោកបញ្ជាក់ថា៖ «ករណីដែលគេរំលោភយកដីវត្តនោះត្រូវបានសាលាក្រុងភ្នំពេញជួយធ្វើអន្តរាគមន៍រួចហើយដោយសាលាក្រុងបានចេញលិខិតមួយបង្កកដីនោះមិនឲ្យលក់ដូរ ឬធ្វើអ្វីនោះទេ រង់ចាំការដោះស្រាយគ្នាសិន»។
លោក ស៊ឹង សែនករុណា មន្ត្រីអង្កេតផ្នែកសិទ្ធិមនុស្សនៃសមាគមអាដហុក ADHOC បានយល់ឃើញថាការតវ៉ានេះគឺជាសិទ្ធិរបស់ប្រជាពលដ្ឋបន្ទាប់ពីគ្មានដំណោះស្រាយពីអាជ្ញាធរមូលដ្ឋាន និងអាជ្ញាធរខេត្តមិនបានយកចិត្តទុកដាក់ដោះស្រាយជូនពួកគាត់។
លោកបានបញ្ជាក់ថា៖ «ខ្ញុំសង្កេតឃើញថាកន្លងមកបញ្ហាជម្លោះដីធ្លីនេះ គឺមានការសន្យាច្រើន ប៉ុន្ដែមិនត្រូវបានដោះស្រាយបញ្ចប់នោះទេ ហើយមានប្រជាពលរដ្ឋបានឡើងមកតវ៉ាដល់ក្រសួងរៀបចំដែនដីជាបន្តបន្ទាប់។ ខ្ញុំធ្លាប់បាននិយាយជាច្រើនដងមកហើយគឺពេលនេះ វាល្មមដល់ពេលធ្វើការដោះស្រាយឲ្យពួកគាត់បញ្ចប់ហើយ»៕
