មណ្ឌលគិរីៈ ប្រជាពលរដ្ឋ ២ ភូមិនៅឃុំសែនមនោរម្យ ស្រុកអូររាំង ខេត្តមណ្ឌលគិរី ទទូចឲ្យអាជ្ញាធរពន្លឿនការដោះស្រាយជម្លោះដីធ្លី ដែលអតីតក្រុមប្រឹក្សាស្រុកអូររាំង រំលោភយកដីរបស់ពួកគាត់ បន្ទាប់ពីបុគ្គលរូបនោះបានទិញដីមួយចំនួនពីប្រជាពលរដ្ឋ ហើយបែរជាមកគ្រប់គ្រងដីរបស់អ្នកភូមិដល់ទៅ ២ ភូមិ។
តាមការអះអាងរបស់ប្រជាពលរដ្ឋរងគ្រោះលោក រ៉ាស់ និន ដែលរស់នៅភូមិពូទ្រូក្រោម បានឲ្យដឹងថាកាលពីឆ្នាំ ២០១៧ ប្រជាពលរដ្ឋនៅក្នុងភូមិប្រមាណ ៨ គ្រួសារបានលក់ដីឲ្យលោក សាន សូត្រ ហៅ តាផ្លោក ដែលជាអតីតក្រុមប្រឹក្សាស្រុកអូររាំងក្នុងទំហំដីក្បាល ១០០ ម៉ែត្រ និងបណ្តោយ ២០០ ម៉ែត្រ។ ប៉ុន្តែបុគ្គលរូបនោះមិនយកតាមទំហំនោះទេ បែរជាសរសេរក្នុងលិខិតថាបានទិញទំហំ ១០០ ម៉ែត្រ និងបណ្តាយ ២០០០ ម៉ែត្រទៅវិញ។
លោកបន្តថា ករណីនេះហើយដែលធ្វើឲ្យប៉ះពាល់ដីរបស់ពលរដ្ឋដទៃទៀត ដែលសរុបមានចំនួន ២ ភូមិគឺភូមិពូទ្រូលើ ភូមិពូទ្រូក្រោមដែលមានប្រមាណ ៤០ គ្រួសារ ខណៈប្រជាពលរដ្ឋខ្លះមិនបានលក់ដីទាំងនោះឲ្យទៅលោក សាន សូត្រ នោះទេ។
លោកបញ្ជាក់ថា៖ «បន្ទាប់ពីទិញហើយលោក សាន សូត្រ បានដើររំលោភយកដី និងបោះបង្គោលយ៉ាងអនាធិបតេយ្យរាប់រយហិកតា ហើយនៅពេលឃើញប្រជាពលរដ្ឋសង់លំនៅឋាន និងធ្វើស្រែចម្ការលើដីរបស់ខ្លួន បែរជានាំកម្លាំងប្រមាណជា ១០ ឡានសរុបមនុស្សជាង ១០០ នាក់មកដកបង្គោលរបស់ប្រជាពលរដ្ឋ ២ ភូមិដែលបានបោះចំណាំព្រំដីនោះ»។
ជាមួយនឹងការរំលោភយកដីនេះលោក រ៉ាស់ និន អះអាងថាពលរដ្ឋទាំង ២ ភូមិបានស្វែងរកកិច្ចអន្តរាគមន៍ទៅស្ថាប័នពាក់ព័ន្ធជាច្រើនលើកច្រើនសារមកហើយ ប៉ុន្តែនៅតែមិនមានដំណោះស្រាយ។
លោកបន្តថាជាថ្មីទៀត ប្រជាពលរដ្ឋបានទទូចជាថ្មីទៅកាន់សមាជិកគណៈកម្មាធិការសិទ្ធិមនុស្សកម្ពុជាដែលបានដឹកនាំក្រុមការងារចុះផ្ទាល់តាមបណ្តឹងរបស់ពលរដ្ឋកាលពីចុងសប្តាហ៍មុន ដើម្បីឲ្យប្រជាពលរដ្ឋជាម្ចាស់ដីអាចធ្វើស្រែចម្ការ និងរស់នៅលើដីរបស់ខ្លួនដោយមិនមានការភិតភ័យ។
លោក សាន សុផា មេធាវីការពារក្តីប្រជាពលរដ្ឋទាំង ២ ភូមិប្រាប់ភ្នំពេញប៉ុស្តិ៍ពីម្សិលមិញថា ក្រៅពីការរារាំងពលរដ្ឋមិនឲ្យរស់នៅលើដីរបស់ខ្លួន លោក សាន សូត្រ ក៏បានដាក់ពាក្យបណ្តឹងទៅតុលាការ ដើម្បីសុំរក្សាការពារដីទាំងនោះផងដែរ។
លោកថា ដើម្បីឆ្លើយតបនឹងការស្នើសុំដីការក្សាការពាររបស់បុគ្គលរូបនេះ ប្រជាពលរដ្ឋក៏បានដាក់ពាក្យបណ្តឹងទៅតុលាការខេត្តមណ្ឌលគិរីវិញ ប៉ុន្តែសំណើរបស់អ្នកភូមិបែរជាត្រូវបានច្រានចោល។
លោកថ្លែងថា៖ «ក្នុងដីការរក្សាការពាររបស់តុលាការដែលភាគី សាន សូត្រ ប្តឹងសុំគឺក្នុងដីទំហំ ១៧០ ហិកតា។ ប៉ុន្តែជាក់ស្តែងគាត់បានចូលដណ្តើមកាន់កាប់ដីពីប្រជាពលរដ្ឋ ដោយដណ្តើមកាន់កាប់ដោយខុសច្បាប់ក្នុងទំហំធំជាងនេះប្រមាណជា ៤០០ ទៅ ៥០០ ហិកតា»។
ក្រៅពីអះអាងយ៉ាងដូច្នេះលោក សាន សុផា បញ្ជាក់ថាលោកមានភ័ស្តុតាងសំអាងហេតុមួយទៀតដែលបញ្ជាក់ថា ការទិញលក់រវាងពលរដ្ឋ ៨ គ្រួសារមិនមានលិខិតផ្ទេរសិទិ្ធកាន់កាប់ដីធ្លីនោះទេ គឺគ្រាន់តែជាលិខិតប្រគល់ និងទទួលប្រាក់រវាងអ្នកកម្រៃជើងសាលើទំហំដីជាង ៤៩ ហិកតាប៉ុណ្ណោះ។
លោក សាន សូត្រ អតីតក្រុមប្រឹក្សាស្រុកអូររាំងដែលរងការចោទប្រកាន់មិនអាចទាក់ទងសុំអត្ថាធិប្បាយបានទេពីម្សិលមិញ។
លោកស្រី ថ្វាន់ ត្រែល មេឃុំសែនមនោរម្យប្រាប់ភ្នំពេញប៉ុស្តិ៍ពីម្សិលមិញថា កន្លងទៅពិតជាមានប្រជាពលរដ្ឋខ្លះបានលក់ដីឲ្យលោក សាន សូត្រ ពិតមែន។ ប៉ុន្តែលោកស្រីមិនដឹងថា ដីនោះប៉ះពាល់យ៉ាងណាបន្តទៀតនោះទេ ព្រោះនៅពេលការទិញលក់នោះលោកស្រីមិនទាន់ឡើងជាមេឃុំនៅឡើយ។
លោកស្រីបន្ថែមថា៖ «លោក សាន សូត្រ ទិញដីនោះក្នុងអំឡុងឆ្នាំ ២០១៧ អី ប៉ុន្តែប្រជាពលរដ្ឋខ្លះក៏មិនបានលក់ឲ្យគាត់ទេ។ ឃើញថាពេលនេះពលរដ្ឋគាត់ ចង់ឲ្យលោក សាន សូត្រ មកដោះស្រាយវាស់វែងដីឲ្យបានត្រឹមត្រូវជូនពួកគាត់។ ប៉ុន្តែមិនដឹងគាត់នៅឯណា ទាក់ទងមិនដែលបាន។ ឮថាគាត់ [សាន សូត្រ] រស់នៅភ្នំពេញខ្ញុំមិនច្បាស់ដែរ»។
លោក ស្វាយ សំអ៊ាង អភិបាលខេត្តមណ្ឌលគិរីមិនអាចសុំអត្ថាធិប្បាយបានទេកាលពីម្សិលមិញដោយសារលោកមិនលើកទូរស័ព្ទ។ ចំណែកអ្នកនាំពាក្យសាលាខេត្តមណ្ឌលគិរីលោក សុក សេរ៉ា ក៏មិនអាចទាក់ទងបានដែរ។
ទោះយ៉ាងណាថ្លែងប្រាប់អង្គភាព Fresh News កាលពីថ្ងៃចន្ទលោក ស្វាយ សំអ៊ាង បានអះអាងថាលោកនឹងដឹកនាំមន្ត្រីចុះទៅធ្វើការពិនិត្យ និងធ្វើការស្រាវជ្រាវនៅទីតាំងដែលមានការរំលោភបំពានរឿងដីធ្លីនៅភូមិទាំង ២ ក្នុងស្រុកអូររាំង។
លោកបានបន្តថាក្នុងករណីរកឃើញការរំលោភពិតប្រាកដមែននោះ រដ្ឋបាលសាលាខេត្តនឹងធ្វើការដោះស្រាយជូនប្រជាពលរដ្ឋភ្លាមៗ និងរឹបអូសដីព្រៃរបស់រដ្ឋមកវិញ និងចាត់វិធានការទៅលើបុគ្គលដែលបានប្រព្រឹត្តផ្ទុយពីច្បាប់ឲ្យខាងតែបាន៕