ក្រចេះ: ប្រជាពលរដ្ឋ ២ ភូមិប្រមាណជាង ៣០ គ្រួសារ នៅសង្កាត់ក្រគរ ក្រុងក្រចេះ ខេត្តក្រចេះ ស្នើឲ្យមានការស្ដារបឹងធម្មជាតិមួយឈ្មោះបឹងរុន ដែលមានទំហំជិត ១០ ហិកតា ដើម្បីស្តុកទឹកប្រើប្រាស់ និងទុកស្រោចស្រពដំណាំដែលនៅជុំវិញបឹងនោះដែលសំណើនេះ ត្រូវបានអាជ្ញាធរឯកភាព ប៉ុន្ដែតម្រូវឲ្យម្ចាស់គ្រឿងចក្រស្តារបឹងបំពេញបែបបទឲ្យស្របតាមច្បាប់។
លោក ហម សុភា តំណាងពលរដ្ឋទាំង ៣០ គ្រួសារថ្លែងថា ដោយសារកន្លងមកស្ថានភាពអាកាសធាតុប្រែប្រួលធ្វើឲ្យទឹកបឹងរុនរីងស្ងួតខ្វះទឹកប្រើប្រាស់ ២ ឬ ៣ ឆ្នាំកន្លងមកហើយនោះ ប្រជាពលរដ្ឋ ២ ភូមិគឺភូមិអូរឫស្សី និងភូមិក្រគរបានមូលមតិគ្នាស្នើ អាជ្ញាធរជួយសម្របសម្រួលឲ្យមានក្រុមហ៊ុនជួយជីកដីបឹងឲ្យបានជម្រៅ ៣ ឬ ៤ ម៉ែត្រទៅក្រោម ដើម្បីធ្វើអាងស្ដុកទឹកសម្រាប់ប្រើប្រាស់នៅរដូវប្រាំង។
លោកបន្តថា ពលរដ្ឋចង់ឲ្យក្រុមហ៊ុនឯកជនមួយ (មិនមានឈ្មោះត្រឹមត្រូវ) ធ្វើការកាយដីក្នុងបឹងនោះហើយយកអាចម៍ដីទៅលក់ឲ្យអ្នកដែលចង់ទិញ។ ប៉ុន្ដែក្រុមហ៊ុនបានឯកភាពជួយស្ដារដីបឹងនោះយកអាចម៍ដី ដោយក្រុមហ៊ុនមិនគិតថ្លៃសេវាដឹកជញ្ជូន ឬថ្លៃកាយដីបឹងនោះទេ។
លោក ហម សុភា បញ្ជាក់ថា៖ «ពួកខ្ញុំចង់ឲ្យម្ចាស់គ្រឿងចក្រជួយស្ដារដីបឹងដែលមានទំហំជិត ១០ ហិកតា គឺយើងចង់ឲ្យគាត់យកអាចម៍ដីទៅលក់ទៅ ហើយម្ចាស់គ្រឿងចក្រក៏មិនគិតតម្លៃអ្វីពីពួកខ្ញុំ ឬអាជ្ញាធរដែរ។ ពោល គឺម្ចាស់គ្រឿងចក្រគាត់ចង់បានអាចម៍ដីយកទៅលក់ រីឯពលរដ្ឋពួកខ្ញុំ ចង់ឲ្យស្ដារបឹងនេះ ដើម្បីស្តុកទឹកប្រើប្រាស់»។
លោក តៅ ចាន់ណា ចៅសង្កាត់ក្រគរបានថ្លែងកាលពីថ្ងៃទី ២៣ មីនា ថា អាជ្ញាធរបានយល់ព្រមឲ្យមានការស្ដារបឹងឈ្មោះ បឹងរុន នោះហើយ។ ប៉ុន្ដែតម្រូវឲ្យម្ចាស់គ្រឿងចក្រត្រូវទៅស្នើសុំអាជ្ញាប័ណ្ណពីមន្ទីររ៉ែ និងថាមពលខេត្តជាមុនសិន ដើម្បីមានសិទ្ធិធ្វើអាជីវកម្មជីក ឬស្ដារបឹងនោះ។
ចៅសង្កាត់រូបនេះបន្ថែមថា ម្ចាស់គ្រឿងចក្រមិនទាន់មានច្បាប់ត្រឹមត្រូវ សម្រាប់ធ្វើអាជីវកម្មនៅឡើយ។ កន្លងមកគ្រឿងចក្រនេះបានរកស៊ីកាយដីស្រែបន្ដិចបន្ដួច ដើម្បីដឹកដីមកដាក់តាមផ្ទះ នៅពេលដែលមានអ្នកភូមិជួលឲ្យដឹកប៉ុណ្ណោះ ប៉ុន្តែលោកមិនបានស្គាល់ឈ្មោះម្ចាស់គ្រឿងចក្រនោះទេ។
លោកបញ្ជាក់ថា៖ «យើងក៏ចង់ឲ្យមានការស្ដារបឹងរុនហ្នឹងដែរ ប៉ុន្ដែគ្រឿងចក្រគាត់ហ្នឹងមិនទាន់មានច្បាប់ត្រឹមត្រូវ ព្រោះកន្លងមកគាត់ធ្វើអាជីវកម្មតិចតួច។ ដូច្នេះមន្ត្រីជំនាញខេត្តបានហាមឃាត់គ្រឿងចក្រនេះកាយដីបណ្ដោះអាសន្នសិន ដើម្បីឲ្យគាត់ទៅស្នើសុំអាជ្ញាប័ណ្ណពីស្ថាប័នពាក់ព័ន្ធសិន»។
លោក សេត ប៊ុនហេង អភិបាលក្រុងក្រចេះថ្លែងនៅថ្ងៃទី ២៣ មីនា ថា លោកបានទៅសម្របសម្រួលជុំវិញការស្នើសុំរបស់ពលរដ្ឋ ដោយលោកគាំទ្រឲ្យមានការស្ដារបឹងនេះឡើងវិញ ដើម្បីទុកជាកន្លែងស្ដុកទឹកសម្រាប់ប្រើប្រាស់នៅរដូវប្រាំង ប៉ុន្ដែម្ចាស់គ្រឿងចក្រមិនទាន់មានអាជ្ញាប័ណ្ណធ្វើអាជីវកម្មត្រឹមត្រូវ។
លោកអភិបាលក្រុងបានបន្តថា បច្ចុប្បន្នបឹងរុននេះគឺជាបឹងធម្មជាតិដែលមានទឹកបន្ដិចបន្ដួចនៅរាបបាតបឹង ប៉ុន្ដែមិនអាចប្រើប្រាស់ជាប្រយោជន៍ ច្រើនបានទេ ដោយគួរតែមានការជីកបឹងឲ្យជ្រៅជាងនេះ ទើបអាចយកទឹកពីបឹងនោះទៅប្រើប្រាស់តាមតម្រូវការ។
លោកបញ្ជាក់ថា៖ «បឹងហ្នឹងនៅខែវស្សាមានទឹកច្រើន ប៉ុន្ដែដល់រដូវប្រាំងសល់ទឹកតិចតួចនៅបាតបឹង ទោះយើងចង់បូមមកប្រើប្រាស់ ក៏មិនអាចបូមបានដែរ។ ប្រសិនយើងជីកវាឲ្យជ្រៅជាងនេះ ប្រហែលអាចប្រើប្រាស់ទឹកបានច្រើនយ៉ាង»។
លោក សៀន គិន នាយខណ្ឌរដ្ឋបាលជលផលខេត្តក្រចេះថ្លែងថ្ងៃទី ២៣ មីនា ថា ក្រោយពីការចុះពិនិត្យជាក់ស្ដែងចំពោះការស្ដារបឹងធម្មជាតិនេះ មិនប៉ះពាល់ដល់ធនធានធម្មជាតិឡើយ គឺអាចជួយបម្រើដល់ផលស្រែចម្ការរបស់ប្រជាពលរដ្ឋឲ្យកាន់តែប្រសើរថែមទៀត។
លោកបញ្ជាក់ថា៖ «ខ្ញុំបានចុះទៅពិនិត្យមើលរួចរាល់ហើយ គឺគ្មានប៉ះពាល់អ្វីដល់បរិស្ថាន ឬធម្មជាតិដែលនៅជុំវិញនោះទេ។ ខ្ញុំយល់ថា បើបានជីកបឹងនោះឲ្យជ្រៅបន្ដិចទៀត ហើយយើងរៀបចំមុខទឹកទុកបង្ហូរទឹកពីកន្លែងនានាចូល (ចៀសវាងទឹកស្អុយ) ហើយយើងមានដាំរុក្ខជាតិលើទឹកដូចព្រលិត រំចង់ ឬឈូក ថែមទៀតគឺពិតជាល្អខ្លាំងណាស់»។
ម្ចាស់គ្រឿងចក្រដែលមានគម្រោងជីក «បឹងរុន» ខាងលើនេះមិនទាន់អាចស្វែងរកប្រភពទាក់ទងសុំការបញ្ជាក់ជុំវិញការលើកឡើងថា គ្រឿងចក្ររបស់គាត់គ្មានអាជ្ញាប័ណ្ណត្រឹមត្រូវនេះនៅឡើយ។
បន្ថែមលើនេះប្រជាពលរដ្ឋស្នើក្រុមហ៊ុន ប៊ុន ធឿន ដែលជាក្រុមហ៊ុនសាងសង់លំនៅឋានជួយស្ថាបនាផ្លូវថ្មី និងរៀបចំប្រព័ន្ធលូឲ្យបានត្រឹមត្រូវ ដោយពួកគាត់ព្រួយបារម្ភថា ការធ្វើផ្លូវដោយគ្មានការរៀបចំប្រព័ន្ធលូត្រឹមត្រូវ អាចធ្វើឲ្យស្ទះទឹកភ្លៀងជន់លិចផ្ទះសំបែង សាលារៀន និងវត្តអារាមដែលនៅចម្ងាយប្រមាណជាង ១០០ ម៉ែត្រពីគម្រោងផ្លូវថ្មី និងបឹងនោះ។
លោក ប៊ុន ធឿន តំណាងក្រុមហ៊ុនសាងសង់លំនៅឋានមិនទាន់អាចស្វែងរកប្រភពទាក់ទងសុំការបញ្ជាក់បានទេ។ ប៉ុន្ដែលោក ប៊ុន ធឿន ត្រូវបាន Fresh News ដកស្រង់សម្តីកាលពីពេលកន្លងទៅថា ក្រុមហ៊ុនរបស់លោកមានច្បាប់សាងសង់ត្រឹមត្រូវ ហើយផ្លូវដែលជាប់ពីមាត់បឹងនោះស្ថិតនៅក្នុងដីកម្មសិទ្ធិរបស់លោកត្រឹមត្រូវដែលទទួលស្គាល់ដោយមន្ត្រីជំនាញ និងអាជ្ញាធរក្រុងក្រចេះ។
លោកបាននិយាយថា ប្រសិនបើក្រុមហ៊ុនរបស់លោកសាងសង់ផ្លូវ ឬលំនៅឋាននៅក្នុងប្លង់កម្មសិទ្ធិនោះគឺមិនមានបញ្ហាអ្វីទេ ព្រោះលោកអភិបាលក្រុងក្រចេះ និងមន្ត្រីជំនាញក្រោមឱវាទក៏បានចុះពិនិត្យពីផលប៉ះពាល់រួចរាល់អស់ហើយ។ ប៉ុន្តែប្រសិនបើមានការប្ដឹងជំទាស់ពីប្រជាពលរដ្ឋចំពោះការអភិវឌ្ឍនេះលោកថានឹងអនុវត្តទៅតាមផ្លូវច្បាប់ គឺគ្រប់គ្រងដីដែលជាកម្មសិទ្ធិទាំងស្រុងរបស់លោកផ្ទាល់ដោយមិនអនុញ្ញាតឲ្យមានការធ្វើដំណើរឆ្លងកាត់តាមផ្លូវនោះឡើយ៕