.jpg)
លោក ឆាង ហេង ពលរដ្ឋម្នាក់ក្នុងចំណោមអ្នកប្រឈមដេញចេញ។ រូបថត លីកាដូ
ប៉ោយប៉ែតៈ ពលរដ្ឋ ៣១ គ្រួសារមានការបារម្ភខ្លាចបាត់បង់ផ្ទះសំបែងក្រោយពេលដែលអាជ្ញាធរអះអាងថា បានសាងសង់នៅលើដីផ្លូវ ក្នុងភូមិក្បាលស្ពាន ១ សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ។ ការបារម្ភនេះកើតមានឡើងក្រោយពេលគណៈកម្មការវាស់វែងដីធ្លីជាលក្ខណៈប្រព័ន្ធខេត្ត បានបដិសេធមិនវាស់វែងឲ្យពួកគាត់ ដោយសារតែពួកគាត់រស់នៅលើដីផ្លូវទទឹងទំហំ ២០ ម៉ែត្របណ្ដោយជាង ២០០ ម៉ែត្រ។
លោក ឆាង ហេង ដែលកំពុងកាន់កាប់ដីមានទទឹង ៤ ម៉ែត្រ និងបណ្ដោយ ២០ ម៉ែត្រប្រហែលជា ១០ ឆ្នាំមកហើយនោះបានអះអាងថា បានទិញដីបន្តពីអ្នកផ្សេងនៅក្នុងតំបន់នេះតែមិនមានឯកសារប្លង់ត្រឹមត្រូវទេ។ ខណៈដែលរដ្ឋាភិបាលបានចុះវាស់វែងជាប្រព័ន្ធ គេអត់វាស់ឲ្យទេ គេថាដីហ្នឹងគេគម្រោងធ្វើផ្លូវ ប៉ុន្តែផ្លូវនេះទៅមុខទៀតជាផ្លូវទាល់។ តាំងពីឆ្នាំ ៩០ ជាងអត់មានផ្លូវទេ ហើយក៏អត់មានចរាចរណ៍ដែរ។ តាំងពីដើមមកមិនដែលមានអាជ្ញាធរចុះទៅប្រាប់ថាពួកគាត់រស់នៅលើដីផ្លូវទេ ហើយក៏មិនបានឲ្យពួកគាត់ចេញដែរ។
ក្រុមពលរដ្ឋទាំង ៣១ គ្រួសារបានដាក់លិខិតមួយទៅរដ្ឋបាលក្រុងប៉ោយប៉ែត កាលពីខែកុម្ភៈដោយស្នើឲ្យលោកអភិបាលជួយអន្តរាគមន៍ឲ្យពួកគាត់ទទួលបានកម្មសិទ្ធិស្របច្បាប់លើដីដែលពួកគាត់រស់នៅ។
លោក ភោគ លន ចៅសង្កាត់ប៉ោយប៉ែតដែលទើបឡើងថ្មីបាននិយាយថាកាលណាជំនាញគេថាផ្លូវគឺផ្លូវហើយ។ ទោះបីបងប្អូនប្រជាពលរដ្ឋរស់នៅតាំងពី ៧៩ ក៏ដោយ ក៏នៅជាផ្លូវដែរព្រោះជាគម្រោងរបស់ប្លង់មេ។
លោក សាន ស៊ានហូ អភិបាលក្រុងប៉ោយប៉ែតដែលទើបឡើងថ្មី អះអាងថាបានទទួលលិខិតសុំអន្តរាគមន៍ ហើយបានឆ្លើយតបទៅពលរដ្ឋវិញថា មិនអាចសម្រេចលើការស្នើសុំនេះបានទេ។ លោកនិយាយថា៖ «បាល់នៅលើគណៈកម្មការនោះ ទាក់ទងនឹងស៊ុតបញ្ចូលទី ឬមិនចូលទីគឺគាត់ហើយ»។ លោកបន្តថាគាត់បាននៅយូរមែន ប៉ុន្តែបើនៅបានចេះតែនៅទៅ បើគេមិនដេញទៅណា ករណីដែលរដ្ឋយកដីនោះវិញ វាជាការសម្រេចរបស់រដ្ឋ។
លោក ប្រាក់ ប៉ូលី ប្រធានមន្ទីរៀបចំដែនដី នគរូបនីយកម្ម និងសុរិយោដីខេត្តបន្ទាយមានជ័យថ្លែងថាគណៈកម្មការមិនអាចចុះបញ្ជីឲ្យពួកគាត់បានទេ ព្រោះដីផ្លូវ បើចេញកម្មសិទ្ធិឲ្យខុសច្បាប់។ ហើយមកទល់ពេលនេះក៏មិនបានដឹងថានឹងមានគម្រោងសាងសង់ផ្លូវនោះនៅពេលណាទេ៕
