ភ្នំពេញៈ យ៉ាងហោចណាស់មានមនុស្ស ៣ នាក់បានរងរបួស និងផ្ទះជាង ៣០០ ខ្នងរបស់ប្រជាពលរដ្ឋនៅក្នុងខេត្តចំនួន ៤ រួមមាន ខេត្តពោធិ៍សាត់ បាត់ដំបង ព្រះវិហារ និងខេត្តឧត្តរមានជ័យ បានរងការខូចខាតជាខ្លាំងដោយសារបាតុភូតធម្មជាតិ ភ្លៀងលាយឡំជាមួយខ្យល់កន្ត្រាក់កាលពីថ្ងៃទី ១ ខែមេសាឆ្នាំ ២០២០។
លោក សូ សាហុង អភិបាលស្រុកភ្នំក្រវាញបានប្រាប់ភ្នំពេញប៉ុស្តិ៍កាលពីម្សិលមិញថា ភ្លៀងលាយឡំនឹងខ្យល់កន្ត្រាក់កាលពីរសៀលថ្ងៃពុធបានបង្ករបួសពលរដ្ឋចំនួន ៣ នាក់ និងផ្ទះពលរដ្ឋចំនួន ៤៦ ខ្នងនៅក្នុងឃុំលាច និងឃុំសំរោងបានរងការខូចខាត ដោយខ្លះប៉ើងរបើកដំបូល សំយាប និងបាក់រលំរាបដល់ដី។
លោក សាហុង បានបញ្ជាក់ថា៖ «កាលពីរសៀលថ្ងៃពុធមានភ្លៀងធ្លាក់ស្រិចៗប៉ុណ្ណោះមិនធំទេ តែមានខ្យល់បក់បោកខ្លាំងធ្វើឲ្យបាក់រលំផ្ទះសង្កត់ពលរដ្ឋ ៣ នាក់បណ្ដាលឲ្យរងរបួសធ្ងន់ និងខូចខាតផ្ទះសរុប ៤៦ ខ្នងក្នុងនោះ ១៦ ខ្នងបាក់រលំខូចខាតទាំងស្រុង»។
លោក កែវ វី ទីប្រឹក្សាគណៈកម្មាធិការជាតិគ្រប់គ្រងគ្រោះមហន្តរាយបានថ្លែងកាលពីម្សិលមិញថា ករណីភ្លៀងលាយខ្យល់កន្ត្រាក់នេះមិនមែនកើតមានតែនៅស្រុកភ្នំក្រវាញ ខេត្តពោធិ៍សាត់នោះទេ ក៏ប៉ុន្តែនៅឯខេត្តបាត់ដំបង ខេត្តឧត្តរមានជ័យ និងខេត្តព្រះវិហារក៏មានករណីនេះកើតឡើងផងដែរកាលពីល្ងាចថ្ងៃទី ១ ខែមេសា ឆ្នាំ ២០២០។
លោក កែវ វី បានបញ្ជាក់ថា៖ «នៅខេត្តបាត់ដំបងថ្វីដ្បិតតែពុំមានជនរងគ្រោះ ប៉ុន្តែផលប៉ះពាល់ទៅលើសំណង់ លំនៅឋានប្រជាពលរដ្ឋមានទំហំធំ និងធ្ងន់ធ្ងរជាងនៅខេត្តពោធិ៍សាត់»។
លោកបានបន្តថា បាតុភូតភ្លៀងលាយឡំខ្យល់កន្ត្រាក់នៅក្នុងខេត្តបាត់ដំបង បានធ្វើឲ្យប៉ះពាល់លំនៅឋានប្រជាពលរដ្ឋសរុបចំនួន ៣០១ ខ្នងផ្ទះនៅក្នុងក្រុង-ស្រុកចំនួន ៥ រួមមាន ក្រុងបាត់ដំបង ស្រុកសំពៅលូន ស្រុករុក្ខគិរី ស្រុកមោងឫស្សី និងស្រុកគាស់ក្រឡ។ ក្នុងចំណោមសំណងលំនៅឋានទាំងនោះ មានសំណង់អគារលំនៅឋានខ្លះជាសំណង់អគារសម័យបារាំងដែលមានអាយុកាលជិត ១០០ ឆ្នាំមកហើយ។
តាមរបាយការណ៍រដ្ឋបាលខេត្តបាត់ដំបងក្នុងចំណោមក្រុង/ស្រុកទាំង ៥ ដែលរងផលប៉ះពាល់ដោយបាតុភូតភ្លៀងលាយឡំខ្យល់កន្ត្រាក់កាលពីថ្ងៃពុធនោះ ស្រុកមោងឫស្សីមានផលប៉ះពាល់ផ្ទះពលរដ្ឋច្រើនជាងគេគឺរហូតដល់ ១៤១ ខ្នងផ្ទះ ខណៈស្រុករុក្ខគិរីប៉ះពាល់ផ្ទះ ៣៦ ខ្នង,ស្រុកសំពៅលូន ប៉ះពាល់ផ្ទះ ៣១ ខ្នង,ស្រុកគាស់ក្រឡប៉ះពាល់ផ្ទះ ១២ ខ្នង និងនៅក្រុងបាត់ដំបង ប៉ះពាល់ផ្ទះ ៣០ ខ្នង។
ដោយឡែកលោកស្រី ចឹក ហេង អភិបាលរង និងជាអ្នកនាំពាក្យរដ្ឋបាលខេត្តព្រះវិហារប្រាប់ភ្នំពេញប៉ុស្ដិ៍ពីម្សិលមិញដែរថា ភ្លៀងលាយឡំជាមួយខ្យល់កន្ត្រាក់កាលពីថ្ងៃទី ១ មេសា ឆ្នាំ ២០២០ បានធ្វើឲ្យប៉ះពាល់ផ្ទះពលរដ្ឋសរុប ៥ ខ្នង និងប៉ើងរបើកដំបូលអគាររបស់រដ្ឋមួយចំនួនរួមមានអគារសាលាខេត្តចំនួន ១ អគារការិយាល័យច្រកចេញចូលតែមួយចំនួន ១ និងដំបូលអគាររដ្ឋបាលមន្ទីរធនធានទឹក និងឧតុនិយមចំនួន ១ ព្រមទាំងបាក់រលំបង្គោលដងទង់ជាតិនៅមុខមន្ទីរប្រៃសណីយ៍ខេត្តចំនួន ១ ផងដែរ។
យ៉ាងណាក្ដីលោកស្រីបានបញ្ជាក់ថា៖ «ក្នុងហេតុការណ៍នោះមិនមានពលរដ្ឋ ឬមន្ត្រីណាម្នាក់រងគ្រោះថ្នាក់នោះទេ»។
ចំណែកលោក ជា ពិសិដ្ឋ អ្នកនាំពាក្យរដ្ឋបាលខេត្តឧត្តរមានជ័យបានប្រាប់ភ្នំពេញប៉ុស្តិ៍ថា កាលពីល្ងាចថ្ងៃទី ១ ខែមេសា ភ្លៀងលាយឡំខ្យល់កន្ត្រាក់បានបង្កផលប៉ះពាល់លំនៅឋានពលរដ្ឋសរុប ២៧ ខ្នងក្នុងស្រុកចំនួន ៣ គឺស្រុកអន្លង់វែង, ស្រុកត្រពាំងប្រាសាទ និងស្រុកចុងកាល់ ប៉ុន្តែមិនមានអ្នករងគ្រោះដោយសារបាតុភូតនេះទេ៕