The Phnom Penh Post Search

Search form




Logo of Phnom Penh Post newspaper Phnom Penh Post - ពលរដ្ឋ​ ៥៣ ​គ្រួសារ​ សុំ​ឲ្យ​អាជ្ញាធរ​ជួយ​រក​ដំណោះស្រាយ​ពី​ការបង្ហូរ​ទឹក​កខ្វក់​ចូល​ក្នុង​ប្រឡាយ




ពលរដ្ឋ​ ៥៣ ​គ្រួសារ​ សុំ​ឲ្យ​អាជ្ញាធរ​ជួយ​រក​ដំណោះស្រាយ​ពី​ការបង្ហូរ​ទឹក​កខ្វក់​ចូល​ក្នុង​ប្រឡាយ

Content image - Phnom Penh Post
ពលរដ្ឋ​បង្ហាញ​ប្រឡាយ​ខាងក្រោយ​ខ្នង​ដែល​ទឹក​ក្លាយជា​ទឹក​កខ្វក់​។ រូបថត សហការី

ពលរដ្ឋ​ ៥៣ ​គ្រួសារ​ សុំ​ឲ្យ​អាជ្ញាធរ​ជួយ​រក​ដំណោះស្រាយ​ពី​ការបង្ហូរ​ទឹក​កខ្វក់​ចូល​ក្នុង​ប្រឡាយ

កំពង់ឆ្នាំង: ប្រជាពលរដ្ឋ​ចំនួន​ ៥៣ ​គ្រួសារ​ ក្នុង​ភូមិ​អន្លង់ព្រីង ឃុំ​ឈាន​ឡើង ស្រុក​សាមគ្គី​មានជ័យ​បាន​ចោទប្រកាន់​ម្ចាស់​កសិដ្ឋាន​ចិញ្ចឹម​ត្រី​មួយ​កន្លែង​បាន​បង្ហូរទឹក​កខ្វក់​ដែល​មាន​ក្លិនស្អុយ​ចូល​ប្រឡាយ​សាធារណៈ ហើយ​កាលពី​ម្សិលមិញ​បាន​ស្នើសុំ​ឲ្យ​អាជ្ញាធរ​ជួយ​រក​ដំណោះស្រាយ​។

អ្នកស្រី ជា សាម៉ាត់ អាយុ​ ៤៦ ​ឆ្នាំ​ ជា​អ្នកភូមិ​ម្នាក់​បាន​ឲ្យ​ដឹង​កាលពី​ម្សិលមិញ​ថា កសិដ្ឋាន​ចិញ្ចឹម​ត្រី​នេះ​ជា​កម្មសិទ្ធិ​របស់​លោក ស៊ឺ ម៉ៅ ដោយ​គាត់​បាន​បង្ហូរ​ទឹកស្អុយ​ចេញពី​កសិដ្ឋាន​ចូលមក​ប្រឡាយ​សាធារណៈ​បាន​ធ្វើឲ្យ​ប៉ះពាល់​ដល់​ពលរដ្ឋ​ចំនួន ៥៣ ​គ្រួសារ​ រស់នៅ​អម​មាត់​ប្រឡាយ​ប្រមាណ​ជាង​ ២ ​ហិកតា​។

អ្នកស្រី​បាន​ឲ្យ​ដឹងថា អាជ្ញាធរ​ហាក់​ដូចជា​មិនសូវ​ខ្វល់ខ្វាយ​ពី​ផលប៉ះពាល់​បរិស្ថាន និង​សុខភាព​ប្រជាពលរដ្ឋ​ទេ ទោះបី​ធ្លាប់​បាន​សំណូមពរ និង​ប្តឹង​ឲ្យ​ជួយ​ទប់ស្កាត់​ក៏ដោយ​។

លោកស្រី សាម៉ាត់ ថ្លែងថា​ប្រឡាយ​នេះ​មាន​ប្រវែង​វែង ពលរដ្ឋ​ ៥៣ ​គ្រួសារ​គាត់​រស់នៅ​អម​មាត់​ប្រឡាយ​។

លោក អ៊ី ផល្លា អាយុ​ ៥២ ​ឆ្នាំ អ្នកភូមិ​ម្នាក់ទៀត​បាន​ឲ្យ​ដឹងផង​ដែរ​ថា ពួកអ្នកស្រី​សំណូមពរ​ឲ្យ​អាជ្ញាធរ​ជំនាញ និង​សមត្ថកិច្ច​ពាក់ព័ន្ធ​ចុះ​មក​ពិនិត្យ និង​ដោះស្រាយ​ឲ្យ​ពលរដ្ឋ​អាច​ប្រើប្រាស់​ទឹក​ប្រឡាយ​ក្នុង​ភូមិ​បានជា​ធម្មតា​វិញ​។ ដោយ​បញ្ឈប់​ការបង្ហូរ​ទឹកស្អុយ​ចេញពី​ស្រះ​ចិញ្ចឹម​ត្រី​ទាំងនេះ ព្រោះ​ទឹក​កខ្វក់​ដែល​ចេញពី​កសិដ្ឋាន​បាន​សាយភាយ​ក្លិនស្អុយ​ដល់​អ្នកភូមិ​រយៈពេល​ជាង ២ ​ឆ្នាំ​ហើយ​ដែល​ធ្វើឲ្យ​ប៉ះពាល់​សុខភាព​អ្នកភូមិ និង​សត្វ​គោក្របី​ជាដើម​។

លោក​បញ្ជាក់ថា​៖ «​ទឹក​ប្រឡាយ​ដែល​ពលរដ្ឋ​ធ្លាប់​ប្រើប្រាស់​នេះ​គឺ​យើង​ប្រើប្រាស់​លែងកើត​ហើយ ព្រោះ​វា​ស្អុយ​មាន​រោគ ជាពិសេស​មាន​ជាតិគីមី​នៅក្នុង​ទឹក​ហ្នឹង​ដែរ​។ អ៊ីចឹង​សូម​អាជ្ញាធរ​ជួយ​ចាត់វិធានការ​ផង ប៉ះពាល់​ពលរដ្ឋ​ខ្លាំងណាស់​»​។

លោក រស់ ខុម មេភូមិ​អន្លង់​ព្រីង​បាន​ថ្លែង​ពី​ម្សិលមិញ​ថា កសិដ្ឋាន​ចិញ្ចឹម​ត្រី​មាន​ផ្ទៃដី ៧ ​ហិកតា​នេះ​មាន​ស្រះ​ត្រី​ ៧ ជា​កម្មសិទ្ធិ​របស់​ឈ្មោះ ស៊ឺ ម៉ៅ ដែល​តែងតែ​បើកទឹក​កខ្វក់​បង្ហូរ​ចូលក្នុង​ប្រឡាយទឹក​ដែល​នៅ​កណ្ដាល​ភូមិ​ដោយ​ប្រជាពលរដ្ឋ​ជាច្រើន​គ្រួសារ​ធ្លាប់​ប្រើប្រាស់​ទឹក​ប្រឡាយ​នេះ​។

លោក ស៊ឺ ម៉ៅ ម្ចាស់​កសិដ្ឋាន​ចិញ្ចឹម​ត្រី​បាន​ថ្លែងប្រាប់​ភ្នំពេញ​ប៉ុស្ដិ៍​ពី​ម្សិលមិញ​ថា កាលពី​ឆ្នាំ​ ២០១៧ លោក​ពិតជា​ធ្លាប់​បាន​បង្ហូរ​មែន ប៉ុន្ដែ​រយៈពេល​ជិត ២ ​ឆ្នាំ​ចុងក្រោយ​នេះ​លោក​បាន​ឈប់​បង្ហូរទឹក​ចេញពី​កសិដ្ឋាន​ហើយ ដោយ​លោក​បាន​ជីក​ស្រះ​ ១ ​នៅក្នុង​ដី​នោះ សម្រាប់​ស្ដុក​ទឹកស្អុយ​។

លោក ម៉ៅ ថ្លែង​ថា​៖ «​ខ្ញុំ​សុំ​ឲ្យ​ពលរដ្ឋ​ពិនិត្យមើល​ដើមហេតុ​ឲ្យ​ច្បាស់​កុំ​មក​ចោទប្រកាន់​តែ​កសិដ្ឋាន​ខ្ញុំ​ពេក ហើយ​អាជ្ញាធរ​ក៏​គាត់​តែងតែ​ចុះមក​​ពិនិត្យ​កសិដ្ឋាន​ខ្ញុំ គឺ​គ្មាន​និយាយ​ពី​បញ្ហា​អ្វី​ទេ​»​។ លោក ងិន ហ៊ុន ប្រធាន​មន្ទីរ​កសិកម្ម រុក្ខាប្រមាញ់ និង​នេសាទ​ខេត្ត​កំពង់ឆ្នាំង​បាន​ឲ្យ​ដឹងថា មន្ត្រី​ជំនាញ​បាន​ចុះ​ទៅ​ត្រួតពិនិត្យ​ស្ថានភាព​ជាក់ស្ដែង​នៅ​ទីតាំង​កសិដ្ឋាន​ដែល​ប៉ះពាល់​ប្រជាពលរដ្ឋ​នោះ​ហើយ​។

លោក​ថ្លែង​ថា​៖ «​មន្ត្រី​ជំនាញ​ខ្ញុំ និង​មន្ត្រី​បរិស្ថាន​ខេត្ត​កំពង់ឆ្នាំង​គាត់​នាំគ្នា​ចុះទៅ​ពិនិត្យ​នៅ​ព្រឹក​ថ្ងៃទី​ ២៣ ខែមេសា​នេះ​ហើយ ប៉ុន្ដែ​ខ្ញុំ​មិនទាន់​បានដឹង​ពី​លទ្ធផល​ត្រួតពិនិត្យ​នេះ​ទេ​»៕

អត្ថបទគួរចាប់អារម្មណ៍

  • ព្រះសីហនុៈ រដ្ឋបាលខេត្ត​ព្រះសីហនុ​កំពុង​ចាក់​ខ្សាច់​ថ្មី​បំពេញ​នៅតាម​កន្លែង​ជ្រលង​ទឹកហូរ​ដែលមាន​ខ្សាច់​ទាប និង​ខ្សាច់​ខ្មៅ​នៅ​ចំណុច​ឆ្នេរ​អូរឈើទាល​ក្នុង​សង្កាត់​លេខ​ ៤ ក្រុងព្រះសីហនុ ដើម្បី​កែលម្អ​សោភណភាព​ឆ្នេរ​ខ្សាច់ ក៏ប៉ុន្តែ​មន្ត្រីខេត្ត​នៅ​មិន​អាច​ប៉ាន់ប្រមាណ​ថា​នឹង​ត្រូវ​ប្រើ​ខ្សាច់​ប៉ុន្មាន​រថយន្ត​នោះទេ​។

  • ភ្នំពេញៈ ប្រទេស​ជប៉ុន​ ផ្តល់​ជំនួយ​ឥតសំណង​ដល់​កម្ពុជា​ចំនួន ១ ១៣២ ​លាន​យ៉េន​ (១០,៨ ​លាន​ដុល្លារ​) ​សម្រាប់​អនុវត្ត​គម្រោង​អភិវឌ្ឍន៍​ចរាចរណ៍​នាវា​នៅ​កំពង់ផែ​ស្វយ័ត​ក្រុងព្រះសីហនុ​ដើម្បី ​ធ្វើឱ្យ​ប្រសើរ​ឡើង​នូវ​សុវត្ថិភាព​ផ្លូវ​សមុទ្រ​។ នេះ​បើតាម​ស្ថានទូត​ជប៉ុន​ប្រចាំ​នៅ​កម្ពុជា​។

  • ភ្នំពេញ៖ កីឡាការិនី​កូន​ខ្មែរ​កាត់​បារាំង វ័យ ១៧ ឆ្នាំ ម៉ា រីយ៉ាន មាន​ចំណង់​ចំណូលចិត្ត​ខ្លាំង​ទៅ​លើ​ប្រភេទ​កីឡា​ប្រយុទ្ធ ពិសេស​ការ​ប្រណាំង​ម៉ូតូ​ហោះ ហើយ​កញ្ញា​បាន​អះអាង​ថា នឹង​មិន​បោះបង់​ចោល​ជំនាញ​នេះ​ឡើយ បើ​ទោះបី​ជា​ប្រភេទ​កីឡា​នេះ មាន​ផល​ប៉ះពាល់ និង​ធ្លាប់​ជួប​ឧបសគ្គ​គ្រោះ​ថ្នាក់​ធំ​​ក៏​ដោយ។

  • ភ្នំពេញៈ តម្លៃ​ពោត​ក្នុង​រដូវ​ប្រមូលផល​ឆ្នាំនេះ​បាន​ស្ទុះ​ឡើង ដោយសារ​តែ​ការកើនឡើង​នៃ​តម្រូវការ​សម្រាប់​ការផលិត​ចំណី​សត្វ​ក្នុងស្រុក​។ ការប្រមូលផល​ពោតក្រហម​នៅក្នុង​ខេត្ត​ត្បូងឃ្មុំ​ពេលនេះ​សម្រេច​បាន​ប្រមាណ ៥០ ​ភាគរយ​ហើយ​ដោយ​តម្លៃ​គ្រាប់ពោត​ស្ងួត​បាន​កើនឡើង​ជិត ២០ ​ភាគរយ​ បើ​ធៀប​នឹង​រយៈពេល​ដូចគ្នា​កាលពី​ឆ្នាំមុន

  • កោះកុងៈ ដី​គម្រប​ព្រៃឈើ​របស់​រដ្ឋ​រាប់ពាន់​ម៉ែត្រការ៉េ​ក្នុង​ទំហំ​ដី​បម្រុង​របស់​រដ្ឋ​ទំហំ​ប្រមាណ​ ១១ ​ហិកតា ស្ថិតនៅ​ភូមិ​កោះស្តេច ឃុំ​កោះ​ស្តេច ស្រុក​គិរីសាគរ ខេត្តកោះកុង​ត្រូវបាន​ជន​មិន​ស្គាល់​អត្តសញ្ញាណ​ចាប់ផ្ដើម​លួច​បោះបង្គោល​ថ្ម និង​ឈើ​ទន្ទ្រាន​យក​ដោយ​ខុសច្បាប់​។

  • កំពង់ស្ពឺៈ ពលរដ្ឋ​ជាង​ ៥០០ ​គ្រួសារ ​រស់នៅក្នុង​ឃុំ​ទួល​អម្ពិល​ស្រុក​បសេដ្ឋ ខេត្តកំពង់ស្ពឺ​បាន​បង្ហាញ​ក្ដីបារម្ភ​ពី​ការខ្វះ​ទឹក​សម្រាប់​ស្រោចស្រព​ស្រែចម្ការ និង​ដំណាំ​ផ្សេងៗ ខណៈ​បច្ចុប្បន្ន​មាន​ឈ្មួញ​យក​ម៉ាស៊ីន​ទៅ​បូមទឹក​ទាំងយប់​ទាំង​ថ្ងៃ​នៅក្នុង​ទំនប់​បុរាណ​ព្រៃពាយ​ដែល​ពួកគាត់​កំពុង​ប្រើប្រាស់​ជាប្រចាំ​។