មណ្ឌលគិរីៈ អាជ្ញាធរបានកោះហៅអនុប្រធានភូមិម្នាក់ និងអតីតនាយកសាលាម្នាក់ទៅសួរនាំនៅថ្ងៃសុក្រសប្តាហ៍ក្រោយនេះ បន្ទាប់ពីសហគមន៍ជនជាតិដើមភាគតិចព្នង ៥៥ គ្រួសារបានប្តឹងពួកគេរឿងលក់ដីយ៉ាងហោចណាស់ ៥៩ ហិកតាឲ្យថៅកែសាំងម្នាក់នៅក្នុងក្រុងសែនមនោរម្យ។
សហគមន៍ជនជាតិដើមភាគតិចព្នង ៥៥ គ្រួសារនៅភូមិពូរ៉ាង ឃុំសែនមនោរម្យ ស្រុកអូររាំងបានដាក់ពាក្យបណ្តឹងទៅអាជ្ញាធរឃុំ និងអង្គការអាដហុក ខេត្តមណ្ឌលគិរីកាលពីសប្តាហ៍មុន ដើម្បីសុំអន្តរាគមន៍រកដំណោះស្រាយរឿងលក់ដីសហគមន៍នៅភូមិពូរ៉ាង។
ប្រធានសហគមន៍លោក ញ៉ាន ស្រេវ បានឲ្យដឹងថាលោក សេង យិ ដែលបច្ចុប្បន្នជាអនុភូមិ និងជាអតីមេភូមិពូរ៉ាង ហើយនឹងឈ្មោះ យ៉ន សារិទ្ធ អតីតនាយកសាលាបឋមសិក្សាពូរ៉ាងបានលួចលក់ដីយ៉ាងហោចណាស់ ៥៩ ហិកតាទៅឲ្យឈ្មោះ ស្រេង ឡន ដែលជាថៅកែលក់សាំងម្នាក់នៅក្នុងក្រុងសែនមនោរម្យ ដោយមានការស៊ីញ៉េទទួលស្គាល់ពីអាជ្ញាធរមូលដ្ឋានកាលពីដើមឆ្នាំ ២០១៨ នេះ។
លោក ស្រេវ បានបញ្ជាក់កាលពីម្សិលមិញថា៖ «យើងអត់ដឹងគេលក់ទេ។ ទាល់តែគេឈូសឆាយដីរុញនឹងអាត្រាក់បានដឹង។ មួយកន្លែងទៀត គេកំពុងតែធ្វើរបង។ លក់ដីហ្នឹងល្មើស [ច្បាប់] តែម្តងអ៊ីចឹងបានប្តឹង»។
លោកបន្តថា ក្រោយពេលដឹងរឿងលក់ដីនោះសហគមន៍បានទៅសួរអាជ្ញាធរឃុំពីរឿងនេះ ហើយសាលាឃុំបានប្រាប់ថាដីដែលលក់នោះមានទំហំ ៥៩ ហិកតា។ ប៉ុន្តែផ្ទៃដីដែលសហគមន៍បានចុះចុច GPS និងពិនិត្យជាក់ស្តែង ឃើញថាដីដែលបាត់បង់មានរហូតដល់ទៅ ៦៣ ហិកតាឯនោះ។ សហគមន៍បានកំណត់ព្រំប្រទល់ព្រៃសហគមន៍អស់ហើយ និងត្រូវបានចុះបញ្ជីបឋមរួចរាល់ជាមួយនឹងអាជ្ញាធរមូលដ្ឋានដោយមានអង្គការភូមិខ្ញុំជាអ្នកជួយជ្រោមជ្រែង។
លោកស្រី ក្វាន់ ត្រែល មេឃុំសែនមនោរម្យបានទទួលស្គាល់ថាអាជ្ញាធរឃុំបានស៊ីញ៉េលើឯកសារទិញលក់ដីនោះមែន ព្រោះថាភាគីអ្នកលក់ទាំង ២ នាក់មានឯកសារកាន់កាប់ដីនោះ ដែលចេញដោយមេឃុំចាស់កាលពីឆ្នាំ ២០០៨។ ម្យ៉ាងវិញទៀតសាលាឃុំក៏មិនបានដឹងថា ដីនោះវាពាក់ព័ន្ធនឹងដីព្រៃសហគមន៍នោះដែរ។ សហគមន៍ទៅចុច GPS លើដីហ្នឹងថាជាដីសហគមន៍។ ខាងលោក យិ និង សារិទ្ធ ហ្នឹងបានផ្ទេរដីឲ្យគេ [ឈ្មោះ ស្រេង ឡន] អ៊ីចឹងមេឃុំក៏យោងតាមប្លង់កាន់កាប់ចាស់ចេញឆ្នាំ ២០០៨ ក៏ធ្វើ [ស៊ីញ៉េ] ឲ្យទៅ ព្រោះអត់ដឹងថាមានផលប៉ះពាល់អីលើដីសហគមន៍ទេ។
លោក សេង យិ អនុប្រធានភូមិពូរ៉ាងមិនអាចទាក់ទងសុំអត្ថាធិប្បាយបានទេទាក់ទងនឹងរឿងសហគមន៍ចោទថាលួចលក់ដីនេះ។ ទោះយ៉ាងណាលោក អ៊ុង សេរីវុទ្ធី មេភូមិពូរ៉ាងបានអះអាងថាលោកបានពិនិត្យឯកសារដីនោះ និងបានចុះទៅពិនិត្យមើលដីនោះផ្ទាល់ ហើយឃើញថាអ្នកលក់មានលិខិតកាន់កាប់ដីនោះកាលពីអំឡុងឆ្នាំ ២០០០ មកទើបហ៊ានស៊ីញ៉េទទួលស្គាល់លើការទិញលក់នោះ។ ហើយភាគីអ្នកលក់ទាំង ២ នាក់បានកាន់កាប់ដីនោះ នៅមុនពេលសហគមន៍នោះត្រូវបានបង្កើតទៅទៀត។ ដីដែលលក់នោះមានមួយចំណែកជារបស់លោក យិ និងមួយចំណែកទៀតជារបស់លោក សារិទ្ធ ដែលនៅជាប់គ្នាសរុបមាន ៥៩ ហិកតា។
លោក សុក រដ្ឋា អ្នកសម្របសម្រួលអង្គការអាដហុកដែលបានចុះទៅពិនិត្យបានឲ្យដឹងថា ផែនទីព្រាងបឋមដែលសហគមន៍បានដាក់សុំចុះបញ្ជីនៅមន្ទីរដែនដីខេត្តបានបង្ហាញថា ដីសហគមន៍នោះមានទំហំជាង ៧៦១ ហិកតា។ តាមការចង្អុលបង្ហាញរបស់សហគមន៍ឃើញថា ដីនោះគឺជាដីព្រៃដែលជាទ្រព្យសម្បត្តិសាធារណៈរបស់រដ្ឋដែលអាជ្ញាធរមូលដ្ឋានបានសហការជាមួយនឹងសហគមន៍ ដើម្បីចុះបញ្ជីដីនោះជាដីសមូហភាពរបស់សហគមន៍។ អាជ្ញាធរជាអ្នកទទួលស្គាល់ដីនោះជាមួយនឹងសហគមន៍ក្នុងការចុះបញ្ជីជាដីសមូហភាព ហើយបើបែរជាស៊ីញ៉េលក់ដីនោះទៀតនោះគឺជាកំហុសទាំងស្រុងរបស់អាជ្ញាធរ។
ភ្នំពេញ ប៉ុស្តិ៍ មិនអាចស្វែងរកទំនាក់ទំនងជាមួយអ្នកទិញដីសុំអត្ថាធិប្បាយបានទេកាលពីម្សិលមិញ៕