.jpg)
តាកែវៈ ពលរដ្ឋនេសាទចំនួន ៥ ភូមិ ក្នុងឃុំកំពង់ក្រសាំងបាននាំគ្នាទៅតវ៉ា នៅសាលាស្រុកបុរីជលសា ទាមទារសុំឱ្យអាជ្ញាធរអនុញ្ញាតឱ្យពួកគាត់ប្រើប្រាស់ឧបករណ៍នេសាទលបពោះវៀនជ្រូក ឬប្រើស ១០០ វិញ ដើម្បីរកប្រាក់ផ្គត់ផ្គង់ជីវភាពប្រចាំថ្ងៃ ប៉ុន្តែ អាជ្ញាធរបានបដិសេធ ដោយសារតែឧបករណ៍នេសាទប្រភេទនេះ គឺខុសច្បាប់។
លោក ប៊ៀក វណ្ណៈ ជាអ្នកនេសាទអាយុ ៣៤ ឆ្នាំ បានប្រាប់ភ្នំពេញប៉ុស្ដិ៍ថា កាលពីថ្ងៃទី ១៦ ខែ កក្កដា ប្រជាពលរដ្ឋជិត ១០០ នាក់ មកពីភូមិទាំង ៥ នៃឃុំកំពង់ក្រសាំង ដូចជាភូមិបុរីជលសា កំពង់ក្រសាំង ក្ដុលជ្រំ សង្គមមានជ័យនិងភូមិព្រែកខ្សាច់បាននាំគ្នាទៅតវ៉ា នៅសាលាស្រុក ដើម្បីស្វែងរកដំណោះស្រាយជុំវិញការហាមឃាត់មិនឱ្យប្រើឧបករណ៍នេសាទប្រើស ១០០ ពីព្រោះការទប់ស្កាត់មិនឱ្យប្រើឧបករណ៍ប្រភេទនេះ គឺធ្វើឱ្យជីវភាពពួកគាត់កាន់តែប្រឈមនឹងការខ្វះខាត ដោយសារនេសាទត្រីលែងបាន ខណៈអ្នកខ្លះកំពុងជំពាក់លុយធនាគារ អ្នកខ្លះទៀតទើបជួបប្រទះនឹងគ្រោះមហន្តរាយខ្យល់ព្យុះរលំផ្ទះ រួមទាំងការធ្វើស្រែកាលពីឆ្នាំមុនត្រូវខាតបង់ជាដើម។
លោកបន្តថា៖ «កាលនៅប្រើឧបករណ៍ហ្នឹង ១ ថ្ងៃ អាចរកបាន ៤៥ ម៉ឺនរៀល ប៉ុន្តែអ្នកពូកែដាក់វិញ គឺអាចរកបានជិត ១០ ម៉ឺនរៀល អ៊ីចឹងទៅ ហើយឥឡូវហ្នឹងគេអនុញ្ញាតឱ្យប្រើតែមងប្រវែង ១០០ ម៉ែត្រទេ ប៉ុន្តែប្រើមង ១០០ ម៉ែត្រយកមកទប់ទល់ជីវភាពយ៉ាងម៉េច បើរកត្រីសម្រាប់ស្លមិនចង់គ្រាន់ផង កុំថាដើម្បីលក់បានលុយ»។
បើតាមលោក វណ្ណៈ ពលរដ្ឋខ្មែររស់នៅឃុំកំពង់ក្រសាំង ស្ទើរតែទាំងអស់គឺនាំគ្នាប្រើប្រាស់ឧបករណ៍នេសាទប្រើស ១០០ នេះ ប៉ុន្តែវាអាចរកបានខ្យងនិងក្ដាមច្រើនជាងត្រី និងមិនធ្វើឱ្យប៉ះពាល់កូនត្រីដូចជាស្បៃមុងនោះឡើយ។
លោកបន្តថា បន្ទាប់ពីអាជ្ញាធរបានចុះទៅហាមឃាត់ប្រជានេសាទ មិនឱ្យប្រើឧបករណ៍នេសាទប្រើស ១០០ នេះកាលពីសប្ដាហ៍មុនគឺពលរដ្ឋចាប់ផ្ដើមមានក្ដីកង្វល់ អំពីជីវភាពទៅថ្ងៃខាងមុខ ហើយប្រសិនបើគ្មានដំណោះស្រាយនោះ វានឹងធ្វើឱ្យពលរដ្ឋរស់នៅតាមតំបន់ព្រំដែនកម្ពុជាវៀតណាមទាំងនេះត្រូវប្រឈមនឹងការធ្វើចំណាកស្រុក។
លោក គីម សឺង អ្នកនេសាទម្នាក់ទៀត អាយុ ៣៧ ឆ្នាំ រស់នៅក្នុងភូមិព្រែកខ្សាច់ បានលើកឡើងដែរថានៅ ពេលរដូវវស្សាមកដល់ គឺជាពេលដែលអ្នកភូមិ ចាប់ផ្ដើមចុះនេសាទ ប៉ុន្តែលោកថា ក្រោយពីអាជ្ញាធរហាមមិនឱ្យប្រើឧបករណ៍ប្រើស ១០០ មក គឺពលរដ្ឋបាននាំគ្នាឈប់ចុះនេសាទ និងសម្រាកនៅតែផ្ទះ។
លោកថា៖ «ទើបតែឆ្នាំហ្នឹងគេហាមមិនឲ្យប្រើ ហើយនៅពេលពួកខ្ញុំឡើងទៅនិយាយ នៅសាលាស្រុក មន្ត្រីសាលាស្រុកបានបញ្ជាក់ថា ខាងស្រុកអត់ហ៊ានសម្រេចទេ ហើយគេចាំរាយការណ៍ទៅថ្នាក់ខេត្ត»។
ទោះយ៉ាងណា លោក អ៊ូច ភា អភិបាលខេត្តតាកែវ បានបញ្ជាក់យ៉ាងខ្លីថា អាជ្ញាធរមិនអាចធ្វើតាមការតវ៉ារបស់ពលរដ្ឋទាំងនេះបានទេ។
លោកបញ្ជាក់ថា៖ «ការងារហ្នឹង គឺយើងយកច្បាប់ជាធំហើយច្បាប់ដាក់ចេញគឺត្រូវតែអនុវត្ត»។
កាលពីខែឧសភា ក្រសួងកសិកម្ម រុក្ខាប្រមាញ់ និងនេសាទ បានចេញសារាចរណែនាំ ដើម្បីឱ្យសមត្ថកិច្ច នៅតាមខេត្តក្រុងត្រូវទប់ស្កាត់ និងបង្ក្រាបការប្រើប្រាស់បទល្មើសជលផលដោយប្រើប្រាស់ឧបករណ៍នេសាទលបពោះវៀនជ្រូក ឬហៅថា ប្រើស ១០០ ឱ្យមានប្រសិទ្ធភាពខ្ពស់ក្រោយពីក្រសួងបានសង្កេតឃើញថាការប្រើប្រាស់ឧបករណ៍ខុសច្បាប់នេះបន្តកើតឡើងគួរឱ្យព្រួយបារម្ភ ដែលធ្វើឲ្យអន្តរាយដល់ធនធានត្រី។
បើតាមប្រជាពលរដ្ឋនៅឃុំកំពង់ក្រសាំង បឹងនៅក្នុងស្រុកបុរីជលសានេះ គឺជាដីស្រែដែលត្រូវគោករយៈពេល ៦ ខែ និង ៦ ខែទៀត ទើបមានទឹកឡើងមកពេញ ហើយជាទម្លាប់នៅពេលរដូវវស្សាចូលមកដល់ អ្នកស្រុកបុរីជលសាតែងនាំគ្នាចុះនេសាទត្រីដើម្បីលក់ដូរចិញ្ចឹមជីវិត៕
