ស្ទឹងត្រែងៈ មានពលរដ្ឋ ៨០ គ្រួសារហើយ ដែលស្ម័គ្រចិត្តយល់ព្រមរុះរើសំណង់ ឬផ្ទះចេញពីដងទន្លេសេកុង សម្រាប់ធ្វើការអភិវឌ្ឍរហូតមកដល់ថ្ងៃទី ១០ មករា ខណៈអ្នកផ្សេងៗទៀតដែលត្រូវរុះរើដែរនោះ កំពុងដាក់ពាក្យស្នើសុំទីតាំងដីថ្មីជាបន្តបន្ទាប់ ក្រោយពីអាជ្ញាធរចុះធ្វើការណែនាំឱ្យរុះរើចាប់តាំងពីចុងខែធ្នូមក។ នេះបើតាមអភិបាលស្រុកសៀមប៉ាង លោក ផាន់ យុត្ត កាលពីថ្ងៃទី ១០ មករា។
លោក ផាន់ យុត្ត បានឱ្យដឹងថា ប្រជាពលរដ្ឋដែលរស់នៅតាមដងទន្លេសេកុង ដែលត្រូវរុះរើចេញមានជាង ២០០ គ្រួសារ។ អាជ្ញាធរមិនបង្ខំពួកគេឱ្យធ្វើការរុះរើចេញនោះទេ ប៉ុន្តែអាជ្ញាធរគ្រាន់តែស្នើសុំឱ្យមានការរុះរើសម្រាប់ធ្វើការអភិវឌ្ឍ។ លោកថាអាជ្ញាធរចង់ឱ្យពលរដ្ឋរុះរើចេញឱ្យបានរួចរាល់នៅមុនដាច់ឆ្នាំ ២០២១ ដើម្បីធ្វើការអភិវឌ្ឍទីនោះឱ្យមានសោភណភាព ស្រស់ស្អាត ស្របតាមការរីកចម្រើនរបស់ប្រទេស។
លោកអភិបាលស្រុកប្រាប់ថា ការឱ្យប្រជាពលរដ្ឋរុះរើចេញនេះ គឺគិតពីសុវត្ថិភាពរបស់ប្រជាពលរដ្ឋកុំឱ្យមានការរងគ្រោះដោយប្រការណាមួយ ជាពិសេសគ្រោះបាក់ដី និងទឹកជំនន់។
លោក ផាន់ យុត្ត ថ្លែងថា៖ «ឥឡូវនេះមានបាក់ដីជាបន្តបន្ទាប់ ស្រុតផ្ទះស្រុតអី។ យើងឃើញថាប្រជាពលរដ្ឋមានការព្រួយបារម្ភអាចនឹងប្រឈមនឹងគ្រោះថ្នាក់។ បើសិនជាទឹកហូរខ្លាំងវាអាចបាក់ដាច់ផ្ទះទៅទន្លេទៅអ៊ីចឹង។ យើងខ្លាចមានគ្រោះថ្នាក់ហ្នឹង»។
បើតាមលោកអភិបាលស្រុកមានមូលហេតុមួយចំនួនទៀតដែលអាជ្ញាធរស្នើសុំឱ្យប្រជាពលរដ្ឋរុះរើចេញពីដងទន្លេសេកុងនេះ ទី១ គឺបញ្ហាសណ្តាប់ធ្នាប់បរិស្ថាន និងទី២ គឺដីចំណីទន្លេ។ តាមការបញ្ជាក់របស់លោកផាន់ យុត្ត អាជ្ញាធរមានរៀបចំដីបម្រុងទុកសម្រាប់ប្រជាពលរដ្ឋដែលរុះរើចេញ ក្នុង ១ គ្រួសារទទួលបានដីទំហំ ២៥ ម៉ែត្រ គុណ ៤៥ ម៉ែត្រសម្រាប់សាងសង់លំនៅឋាន។ ទីតាំងថ្មីនោះនឹងមានរៀបចំផ្សារសម្រាប់ពលរដ្ឋអាចធ្វើការលក់ដូរបានត្រឹមត្រូវផងដែរ។
លោក ផាន់ យុត្ត ថ្លែងថា៖ «ទីតាំងថ្មីនោះយើងមាននៅក្នុងភូមិសៀមប៉ាង ឃុំសេកុង និងភូមិផាបាំង ឃុំថ្មកែវ យើងមានធ្វើផ្លូវ ធ្វើប្រឡាយអីរួចរាល់អស់ហើយ ប្រជាពលរដ្ឋគ្រាន់តែទៅធ្វើផ្ទះនៅ គឺបានហើយ»។
ប្រជាពលរដ្ឋរស់នៅតាមដងទន្លេសេកុង អ្នកស្រី ភិន គន្ធា និយាយថា កាលពីប៉ុន្មានឆ្នាំមុនក៏មានការឱ្យរុះរើដែរ ប៉ុន្តែដោយសារមិនមានសំណងសមរម្យសម្រាប់ប្រជាពលរដ្ឋក្នុងការរុះរើចេញ ហេតុនេះក៏គ្មានអ្នកណាបានរុះរើចេញនោះដែរ។ លើកនេះ អាជ្ញាធរមានទីតាំងសម្រាប់ផ្តល់ជាសំណងត្រឹមត្រូវ ប្រជាពលរដ្ឋសប្បាយរីករាយក្នុងការរុះរើចេញទៅនៅទីតាំងថ្មី។
អ្នកស្រី ភិន គន្ធា ថ្លែងថា៖ «ខ្ញុំគិតថា មុនក្រោយគង់តែរុះរើដដែល អ៊ីចឹងរុះរើឱ្យហើយតែម្តងទៅ។ ព្រោះការរុះរើ យើងអាចយកឈើធ្វើអីផ្សេងបានទៀត ហើយបើរុះរើមុនចាប់បានដីទីតាំងល្អមុនគេ»។
ពលរដ្ឋម្នាក់ដែលត្រូវរុះរើលំនៅឋានដែរនោះ លោក ស្តើង ភឿង ទទួលស្គាល់ថា ពេលរស់នៅតាមដងទន្លេសេកុងមានការប្រឈមច្រើនពាក់ព័ន្ធនឹងទឹកជំនន់ គ្រោះបាក់ដីច្រាំងទន្លេ ហេតុនេះលោកលើកឡើងថា ការសម្រេចដោះដូររបស់អាជ្ញាធរគឺជារឿងល្អ។
លោក ភឿង ថ្លែងថា៖ «បើខ្ញុំវិញ ខ្ញុំថាល្អ ព្រោះថាអាជ្ញាធររៀបចំដោះដូរដីឱ្យយើងនេះ ព្រោះយើង ពេលដែលនៅមាត់ទន្លេយើងមានបញ្ហាប្រឈមច្រើនណាស់។ ព្រោះពេលទឹកជំនន់ម្តងៗផ្ទះយើងនៅមាត់ទន្លេហ្នឹងវាអាចបាក់ច្រាំង វាអាចហូរផ្ទះយើងទៅនាំឱ្យមានគ្រោះថ្នាក់ច្រើនកន្លែងហ្នឹង»។
ដោយឡែកពលរដ្ឋម្នាក់ទៀត អ្នកស្រី ខាត់ ភិន ហាក់សម្តែងការមិនសប្បាយចិត្តចំពោះការរុះរើនេះ ដោយអ្នកស្រីអះអាងថា ប្រជាពលរដ្ឋមិនបដិសេធក្នុងការរុះរើចេញពីដងទន្លេសេកុងឡើយ ប៉ុន្តែក្នុងកាលៈទេសៈបច្ចុប្បន្ន មិនអំណោយផលសម្រាប់ការរុះរើទេ ដោយសារតែប្រជាពលរដ្ឋភាគច្រើនមានបញ្ហាហិរញ្ញវត្ថុ។
អ្នកស្រី ខាត់ ភិន និយាយថា៖ «ឥឡូវកំពុងមានបញ្ហាដោយសារជំងឺរាតត្បាត រកលុយក៏មិនសូវបានដល់ពេលគេឱ្យរុះរើទៅអត់សូវមានលុយមានកាក់អ៊ីចឹងទៅ វារាងយ៉ាប់ដែរ។ ប្រជាពលរដ្ឋអត់ប្រកែកទេ ប៉ុន្តែបើអាចជួយពន្យារពេល បានវែងបន្តិច [៣ ឆ្នាំ] គឺជារឿងល្អ»។
លោក ប៊ី វ៉ាន់នី អ្នកសម្របសម្រួលសមាគមការពារសិទ្ធិមនុស្ស អាដហុក ខេត្តស្ទឹងត្រែង ថ្លែងថា អាជ្ញាធរអាចជួយផ្តល់ជាថវិកាដល់ប្រជាពលរដ្ឋខ្លះ បើសិនជាមានអ្នកមួយចំនួន ខ្វះលទ្ធភាពក្នុងការរុះរើចេញ។
លោកថ្លែងថា៖ «បើសិនជាប្រជាពលរដ្ឋមួយចំនួនអត់មានលទ្ធភាពក្នុងការរុះរើចេញ អាជ្ញាធរអាច ៥០ ភាគរយបូក ៥០ ភាគរយ។ យើងចង់និយាយថាអាចជួយជាសោហ៊ុយ ឬជាស្អីមួយជួយគាត់ ៥០ ភាគរយ ឬក៏អាចទុកពេលឱ្យគាត់រយៈពេលវែងបន្តិចទៅ ដើម្បីឱ្យគាត់ធ្វើការរុះរើដោយមានកិច្ចសន្យា»។
ទោះយ៉ាងណាលោក ផាន់ យុត្ត ក៏បានបញ្ជាក់ដែរថា ជុំវិញរឿងដែលប្រជាពលរដ្ឋស្នើសុំការពន្យារពេលដោយសារតែមានបញ្ហាហិរញ្ញវត្ថុនោះ អាជ្ញាធរស្រុកនឹងលើកពីបញ្ហានេះទៅពិភាក្សាជាមួយថ្នាក់ខេត្ត។ លទ្ធផលយ៉ាងណា លោកមិនទាន់ហ៊ានបញ្ជាក់នៅឡើយទេ។ ចំណែកការរុះរើរបស់ប្រជាពលរដ្ឋនោះគឺជាការស្ម័គ្រចិត្ត អាជ្ញាធរមិនទាន់មានវិធានការតឹងរ៉ឹង ដែលតម្រូវឱ្យប្រជាពលរដ្ឋត្រូវតែរុះរើចេញភ្លាមៗនោះទេ៕