.jpg)
ការបោះឆ្នោតជ្រើសរើសក្រុមប្រឹក្សារាជធានី ខេត្ត ស្រុក ខណ្ឌ កាលពីថ្មីៗនេះ។ ហុង មិនា
ភ្នំពេញៈ ក្រសួងមហាផ្ទៃបានប្រកាសថា ពិធីចូលកាន់តំណែងរបស់សមាជិកក្រុម ប្រឹក្សាអាណត្តិទី៣ របស់ខេត្ត-ក្រុងទាំង ២៥ នឹងធ្វើឡើងចាប់ពីថ្ងៃទី ១២ ខែ មិថុនា រហូតដល់ថ្ងៃទី ១៧ មិថុនា ក្រោយពីគណៈកម្មាធិការជាតិរៀបចំការបោះឆ្នោត (គជប) បានប្រកាសលទ្ធផលឆ្នោតជាផ្លូវការដោយថា គណបក្សប្រជាជនកម្ពុជាបានទទួលអាសនៈច្រើនបំផុតក្នុងអាណត្តិថ្មីនេះ។
ការប្រកាសចូលកាន់តំណែងរបស់ក្រុមប្រឹក្សាអាណត្តិទី៣ នៅរាជធានីភ្នំពេញ ខេត្តបន្ទាយមានជ័យ ខេត្តត្បូងឃ្មុំ និងខេត្តកណ្ដាល នឹងធ្វើឡើងនៅថ្ងៃទី ១២ មិថុនា ហើយនៅថ្ងៃទី ១៣ មិថុនា ធ្វើឡើងនៅខេត្តតាកែវ កំពត ខេត្តកំពង់ស្ពឺ ឧត្តរមានជ័យ កំពង់ឆ្នាំង ប៉ៃលិន បាត់ដំបង និងខេត្តសៀមរាប។
ចំណែក ខេត្តព្រះវិហារ កែប រតនគិរី ស្ទឹងត្រែង និងខេត្តព្រះសីហនុ ធ្វើឡើងនៅថ្ងៃទី ១៤ មិថុនា បន្ទាប់មកនៅថ្ងៃទី ១៥ ធ្វើឡើងនៅខេត្តកោះកុង ពោធិ៍សាត់ ហើយខេត្តស្វាយរៀង និងព្រៃវែងធ្វើឡើងនៅថ្ងៃអាទិត្យ ទី ១៦ មិថុនា រីឯខេត្តកំពង់ធំ ក្រចេះ មណ្ឌលគិរី និងខេត្តកំពង់ចាម នឹងធ្វើឡើងនៅថ្ងៃទី ១៧ ខែមិថុនា។
លោក ហង្ស ពុទ្ធា មន្ត្រីនាំពាក្យ គ.ជ.ប បានប្រាប់ភ្នំពេញប៉ុស្ដិ៍នៅថ្ងៃ ៩ មិថុនាថា ថ្វីដ្បិតតាមច្បាប់ការប្រកាសចូលកាន់តំណែងរបស់សមាជិកប្រឹក្សាត្រូវធ្វើឡើងនៅរយៈពេល ១៤ ថ្ងៃ បន្ទាប់ពីការប្រកាសលទ្ធផលឆ្នោតជាផ្លូវការក្ដី ប៉ុន្តែ ការប្រកាសនោះ អាចធ្វើមុនឬក្រោយបាន អាស្រ័យទៅតាមពេលវេលាដែលកំណត់ដោយក្រសួងមហាផ្ទៃ។
ការប្រកាសចូលកាន់តំណែងនេះ បានធ្វើឡើង បន្ទាប់ពី គ.ជ.ប បានប្រកាសលទ្ធផលបោះឆ្នោតជ្រើសរើសក្រុមប្រឹក្សារាជធានី-ខេត្ត និងក្រុមប្រឹក្សាក្រុង ស្រុក ខណ្ឌ កាលពីថ្ងៃទី ៨ មិថុនា ដោយបង្ហាញថា ក្នុងចំណោមអាសនៈសរុបទាំង ៤ ១១៤ គឺគណបក្សប្រជាជនកម្ពុជាទទួលបាន ៤ ០៣៤ អាសនៈ គណបក្សខ្មែររួបរួមជាតិទទួលបាន ៤៤ អាសនៈ និងគណបក្សហ៊្វុនស៊ិនប៉ិចទទួលបាន ៣៦ អាសនៈ ក្នុងចំណោមគណបក្សចំនួន ៧ ដែលបានចូលរួមបោះឆ្នោត។
លោក សុខ ឥសាន មន្ត្រីនាំពាក្យគណបក្សកាន់អំណាចបានប្រាប់ភ្នំពេញប៉ុស្ដិ៍ម្សិលមិញថា លោកមិនមានតួលេខដែលបង្ហាញថា គណបក្សបានសម្រេចផ្លាស់ប្ដូរសមាជិកខ្លះរបស់ក្រុមប្រឹក្សានៅតាមខេត្ត-ក្រុងឡើយ ប៉ុន្តែលោកអះអាងថា ក្រុមប្រឹក្សាដែលជាប់ឆ្នោតនេះ នឹងត្រូវបំពេញការងារតាមច្បាប់ដើម្បីបម្រើប្រជាពលរដ្ឋ ។
លោកថា៖ «អាហ្នឹងវាជាការទទួលខុសត្រូវក្នុងការអនុវត្តតួនាទី និងភារកិច្ចដែលមានចែងនៅក្នុងច្បាប់ស្ដីពីរដ្ឋបាលថ្នាក់ក្រោមជាតិដែលក្រសួងមហាផ្ទៃមានការណែនាំហើយ ហើយសាមីជនម្នាក់ៗដែលជាប់ឆ្នោតហ្នឹង ត្រូវមានការទទួលខុសត្រូវចំពោះមុខប្រជាពលរដ្ឋ និងចំពោះមុខច្បាប់ដែលមានចែង»។
ទោះជាយ៉ាងណា លោក កន សាវាង្ស អ្នកសម្របសម្រួលផ្នែកអង្កេតរបស់អង្គការឃ្លាំមើលការបោះឆ្នោត Comfrel ធ្លាប់បានអះអាងថា ការបោះឆ្នោតអសកលនេះ មិនមែនជាការបោះឆ្នោតមួយស្ថិតក្នុងប្រព័ន្ធនៃរបបលទ្ធិប្រជាធិបតេយ្យឡើយ៕
