The Phnom Penh Post Search

Search form




Logo of Phnom Penh Post newspaper Phnom Penh Post - ពិធី​​បុណ្យ​អុំទូក​ដែល​ពុំ​មាន​ទូក​អុំ​ មាន​សភាព​សោះកក្រោះ

ពិធី​​បុណ្យ​អុំទូក​ដែល​ពុំ​មាន​ទូក​អុំ​ មាន​សភាព​សោះកក្រោះ

ទិដ្ឋភាព​នៅ​មាត់​ទន្លេ​ក្បែរ​ព្រះបរម​រាជវាំង​កាលពី​ថ្ងៃ​ម្សិលមិញ​។
ទិដ្ឋភាព​នៅ​មាត់​ទន្លេ​ក្បែរ​ព្រះបរម​រាជវាំង​កាលពី​ថ្ងៃ​ម្សិលមិញ​។ ហេង ជីវ័ន

ពិធី​​បុណ្យ​អុំទូក​ដែល​ពុំ​មាន​ទូក​អុំ​ មាន​សភាព​សោះកក្រោះ

ភ្នំពេញៈ ព្រះរាជ​ពិធី​បុណ្យ​អុំទូក​នៅ​ភ្នំពេញ​នៅ​ឆ្នាំ​នេះ​ពុំ​មាន​ទូក​អុំ​ និង​ពុំ​មាន​ការ​បណ្តែត​ប្រទីប​ដូច​កាលពី​ឆ្នាំ​មុន​ទេ​ធ្វើឲ្យ​មាន​ភាព​សោះកក្រោះ និង​​ស្ងប់ស្ងាត់​បើ​ទោះបី​ជា​ព្រះរាជ​ពិធី​ អកអំបុក សំពះ​ព្រះខែ​ និង​ការ​ប្រគំ​តន្ត្រី​ផ្សេងៗ​រួម​ទាំង​ការ​បាញ់​កាំជ្រួច​នៅ​តែ​បន្ត​ធ្វើ​ដូច​ឆ្នាំ​មុន​ក្តី​។

ទោះបី​ជា​យ៉ាង​ណា​ព្រះរាជ​ពិធី​ដែល​ពុំ​មាន​ទូក​អុំ​ដូច​ឆ្នាំ​មុន​ប៉ុន្តែ​មន្ត្រី​រាជការ កម្មករ និយោជិត នៅ​តែ​ត្រូវ​បាន​អនុញ្ញាត​ឲ្យ​ឈប់​សម្រាក ៣ ថ្ងៃ​ទៅ​តាម​ប្រតិទិន​បុណ្យ​ជាតិ​​ដដែល​នេះ​ព្រះមហាក្សត្រ​ក៏​នៅ​តែ​បន្ត​ព្រះរាជ​ទាន​ការ​លើក​លែង​ទោស និង​បន្ធូរបន្ថយ​ទោស​ដល់​ទណ្ឌិត​រាប់​រយ​នាក់​ដូច​កាល​ពី​ឆ្នាំ​មុន​ផង​ដែរ​។

តាម​ដង​វិថី​នានា​ជាពិសេស​នៅ​ម្តុំ​វិមាន​ឯករាជ្យ​នៅ​ក្បែរ​ព្រះបរម​រាជវាំង និង​នៅ​កោះពេជ្រ​ដែល​ធ្លាប់​តែ​​មាន​ភាព​អ៊ូអរ​ និង​កក​ស្ទះ​ចរាចរណ៍​បែរ​ជា​មាន​ភាព​ស្ងប់ស្ងាត់​កាលពី​ម្សិលមិញ។

នៅក្នុង​ថ្ងៃ​ចុងក្រោយ​នៃ​ព្រះរាជ​ពិធី​បុណ្យ​​អុំទូក​កាលពី​ឆ្នាំ ២០១០ មាន​ឧបទ្ទវហេតុ​រត់​ជាន់​គ្នា​នៅលើ​ស្ពាន​ពេជ្រ​ដែល​បណ្តាល​ឲ្យ​មនុស្ស​ស្លាប់​ជាង ៣៥០ នាក់ និង​រងរបួស​ជិត ៤០០ នាក់​។ ចាប់​តាំងពី​ហេតុការណ៍​អាក្រក់​នេះ​មក​រាជរដ្ឋាភិបាល​បាន​ប្រកាស​​លុប​ចោល​ព្រះរាជ​ពិធី​បុណ្យ​អុំទូក​ ៣ ​ឆ្នាំ​ជាប់ៗ​គ្នា​ក្រោម​ហេតុផល​ផ្សេងៗ។

ទើប​តែ​នៅ​ឆ្នាំ​ ២០១៤ រដ្ឋាភិបាល​បាន​ប្រារព្ធ​ព្រះរាជ​ពិធី​បុណ្យ​អុំទូក​ដូច​ធម្មតា​វិញ​ហើយ​នៅ​ឆ្នាំ ២០១៥ នេះ​រាជរដ្ឋាភិបាល​​បាន​ប្រកាស​លុប​ចោល​​ការ​ប្រណាំង​ទូក​ និង​បណ្ដែត​ប្រទីប​ជាថ្មី​ទៀត​ក្រោម​ហេតុផល​ថា​ទឹកទន្លេ​រាក់​ពេក​មិន​អាច​អុំ​ទូក​បាន។

ការ​អាក់ខាន​នៃ​ការ​រៀបចំ​ព្រះរាជ​ពិធី​បុណ្យ​អុំទូក​បណ្ដែត​​ប្រទីប​នេះ​បាន​ធ្វើឲ្យ​ប្រជាពលរដ្ឋ​ជាច្រើន​មាន​ក្ដីបារម្ភ​ចំពោះ​ការ​បាត់បង់​នូវ​ប្រពៃណី​ជាតិ​ដែល​ដូនតា​បាន​បន្សល់​ទុក​តាំងពី​យូរ​លង់​ណាស់​មក​ហើយ​។ ព្រះរាជ​ពិធី​បុណ្យ​អុំទូក​ត្រូវ​បាន​ធ្វើ​ឡើង​ដើម្បី​រំឭក​ដល់​វីរ​កងទ័ព​ជើងទឹក​ខ្មែរ​ដ៏អង់អាច​ក្លាហាន​ដែល​បាន​ប្រយុទ្ធ​យក​ឈ្នះ​កងទ័ព​ខ្មាំង​សត្រូវ​ដែល​ឈ្លានពាន​ចូល​ដណ្ដើម​កាន់កាប់​ទឹកដី​ខ្មែរ។

លោក ម៉ា ឈាន អាយុ ២៥ ឆ្នាំ​មកពី​ខេត្ត​ស្វាយរៀង​បាន​និយាយ​ថា៖ «ខ្ញុំ​ពិតជា​បារម្ភ​ខ្លាច​ពិធី​​បុណ្យ​អុំទូក បណ្ដែត​ប្រទីប​ត្រូវ​បាន​គេ​លុប​បំបាត់​ចោល​ជា​រៀងរហូត​ក្រោម​ហេតុផល​ទឹក​ទន្លេ​រាក់​គ្មាន​ទឹក​អុំ»។

លោក ចែម សំណាង អាយុ ៣២ ឆ្នាំ​ក៏​បាន​​និយាយ​ខណៈ​កំពុង​អង្គុយ​ញ៉ាំ​អាហារ​ជាមួយ​មិត្តភក្តិ ៤ ​នាក់​នៅ​សួនច្បារ​ខាង​មុខ​ព្រះបរមរាជវាំង​កាលពី​រសៀល​ថ្ងៃ​ម្សិលមិញ​ដែរ​ថា​៖ «សម្រាប់​ខ្ញុំ​ពិធី​បុណ្យ​អុំទូក​គ្មាន​ទូក​អុំ​នៅពេល​នេះ​វា​ដូចជា​សោះ​កក្រោះ​ខ្លាំង​ណាស់»។

លោក សំណាង ដែល​រស់នៅ​សង្កាត់​ព្រែកលៀប ខណ្ឌ​ជ្រោយចង្វារ​ដែល​ធ្លាប់​ជា​កីឡាករ​ចំណុះ​ទូក​វត្ត​ខ្ទរពោធិព្រឹក្ស​កាលពី​ឆ្នាំ​មុន​បាន​និយាយ​ទៀត​ថា​៖ «​ខ្ញុំ​យល់​ថា​ការ​អះអាង​របស់​ប្រមុខ​រដ្ឋាភិបាល​ដែល​ថា​ទឹក​ទន្លេ​រាក់​អុំទូក​មិន​កើត​នេះ​ហាក់​ដូចជា​មិន​ត្រឹម​ត្រូវ​ទាល់​តែ​សោះ​ព្រោះ​ត្បិត​នៅពេល​នេះ​កាណូត​ទេសចរណ៍ និង​កប៉ាល់​ដឹក​ប្រេង សាឡង់​ដឹក​ខ្សាច់​​កំពុង​ធ្វើ​ចរាចរណ៍​ទៅ​មក​ឥត​ដាច់​ដែល​នាវា​ទាំង​នេះ​ធំ​ និង​ផ្ទុក​ធ្ងន់​ជាង​ទូកង​រាប់រយ​ដង​ទៅ​ទៀត​»។

ក្នុង​ព្រះរាជ​ពិធី​បុណ្យ​ជាតិ​រយៈពេល ៣ ថ្ងៃ​ដែល​ចាប់ផ្តើម​កាលពី​ម្សិលមិញ​នេះ​ព្រះមហាក្សត្រ​បាន​សម្រេច​ព្រះរាជទាន​ការ​លើក​លែង​ទោស​ទណ្ឌិត​ចំនួន​ ១០៦ នាក់​ឲ្យ​មាន​សេរីភាព​វិញ និង​បន្ធូរ​បន្ថយ​ទោស​ទណ្ឌិត ៥៧៦ នាក់​តាម​ការ​ស្នើសុំ​របស់​រដ្ឋាភិបាល​សម្រាប់​ពិធី​បុណ្យ​អុំទូក អក​អំបុក និង​សំពះ​ព្រះខែ​ឆ្នាំ​នេះ។

អ្នក​នាំពាក្យ​ក្រសួង​យុត្តិធម៌​លោក ជិន ម៉ាលីន បាន​ឲ្យ​ដឹង​ពី​ម្សិលមិញ​ថា​ទណ្ឌិត​សរុប​ចំនួន ៦៨២ នាក់​ដែល​ទទួល​បាន​ការ​លើកលែង​ទោស និង​បន្ធូរបន្ថយ​ទោស​ទាំង​នេះ​ស្ថិត​ក្នុង​ចំណោម​បញ្ជី​ឈ្មោះ​ជាង ៧០០ នាក់​មកពី​អគ្គនាយកដ្ឋាន​ពន្ធនាគារ​ក្រសួង​មហាផ្ទៃ​ត្រូវ​បាន​គណៈកម្មការ​ថ្នាក់​ជាតិ​ដឹកនាំ​ដោយ​ក្រសួង​យុត្តិធម៌​ចាប់ផ្តើម​ពិនិត្យ និង​វាយតម្លៃ​តាំងពី​ដើម​ខែ​វិច្ឆិកា​មក​តាម​ការ​ស្នើសុំ​របស់​ប្រធាន​ពន្ធនាគារ​ទាំង​ ២១ ខេត្ត​ ក្រុង និង​មណ្ឌល​កែប្រែ ម ទាំង ៤។

ប្រធាន​នាយកដ្ឋាន​ប្រតិបត្តិ​នៃ​អគ្គនាយកដ្ឋាន​ពន្ធនាគារ​ក្រសួង​មហាផ្ទៃ​លោក បេ ទាឡេង បាន​ឲ្យ​ដឹង​ថា​ទណ្ឌិត​សរុប ៦៨២ ​នាក់​នោះ​មាន​ស្រី ៥៩ ​នាក់​ហើយ​ក្នុង​ចំណោម ១០៦ នាក់​ដែល​ត្រូវ​ដោះលែង​មាន​ស្រី ១៨ នាក់។ ទណ្ឌិត​ដែល​ត្រូវ​បាន​លើក​លែង​ទោស​ត្រូវ​បាន​ដោះលែង​ឲ្យ​មាន​សេរីភាព​កាលពី​ល្ងាច​ថ្ងៃ​ចន្ទ​។

លោក អំ សំអាត អ្នក​គ្រប់គ្រង​បច្ចេកទេស​ស៊ើប​អង្កេត​នៃ​អង្គការ​លីកាដូ​នៅ​តែ​បារម្ភ​ចំពោះ​ភាព​មិន​ប្រក្រតី​នៃ​ការ​លើកលែង​ទោស​ដោយ​អ្នក​ទោស​មួយ​ចំនួន​បាន​ប្រាប់​លោក​ថា​មន្ត្រី​ពន្ធនាគារ​បាន​ប្រព្រឹត្ត​អំពើ​ពុករលួយ​ចំពោះ​ការ​លើកលែង​ទោស និង​បន្ធូរបន្ថយ​ទោស។ «ទណ្ឌិត​ណា​មាន​លុយ​ទើប​មាន​ឈ្មោះ​បើ​គ្មាន​លុយ​គឺ​មិន​មាន​ឈ្មោះ​ក្នុង​បញ្ជី​នោះ​ទេ​នេះ​គឺជា​រឿង​អយុត្តិធម៌​មួយ...​»៕

អត្ថបទគួរចាប់អារម្មណ៍