.jpg)
ពិធីប្រារព្ធខួប ៧ មករានៅពហុកីឡដ្ឋានជាតិអូឡាំពិកកាលពីឆ្នាំមុន។ ហេង ជីវ័ន
ភ្នំពេញៈ អ្នកនាំពាក្យគណបក្សប្រជាជនកម្ពុជាបានថ្លែងថានឹងមានមហាជនប្រមាណពី ៥ ម៉ឺន ទៅ ១០ ម៉ឺននាក់នឹងចូលរួមការប្រារព្ធពិធីអបអរខួបលើកទី ៤១ ឆ្នាំនៃទិវាជ័យជម្នះ ៧ មករា នៅថ្ងៃអង្គារស្អែកនេះ ដោយសារនយោបាយសំខាន់សម្រាប់ឆ្នាំនេះគឺបញ្ហាសន្តិភាព និងការអភិវឌ្ឍ។
លោក សុខ ឥសាន បានថ្លែងកាលពីថ្ងៃអាទិត្យថានឹងមានមហាជនប្រមាណពី ៥ ម៉ឺនទៅ ១០ ម៉ឺននាក់ដែលមកពីខេត្តកណ្តាល និងរាជធានីភ្នំពេញចូលរួមប្រារព្ធខួបលើកទី ៤១ នៃទិវាជ័យជម្នះ ៧ មករាដែលនឹងធ្វើឡើងនៅកោះពេជ្រ និងនៅតាមបណ្តាខេត្តផ្សេងៗនៅទូទាំងប្រទេស ដើម្បីអបអរសាទរ សន្តិភាព និងការរីកចម្រើនដែលប្រទេសកម្ពុជាសម្រេចបាននាពេលកន្លងមក។
លោកបញ្ជាក់ថា៖ «សារនយោបាយសំខាន់ហ្នឹងគឺអបអរសាទរ អរគុណសន្តិភាព ដោយសារយើងមានរហូតមកដល់សព្វថ្ងៃនេះ ដោយសារតែការរីកចម្រើនទូទាំងប្រទេសដោយសារតែសន្តិភាព និងស្ថិរភាពនយោបាយ បើគ្មានសន្តិភាព និងស្ថិរភាពនយោបាយទេប្រជាពលរដ្ឋក៏មិនអាចរស់នៅដោយសន្តិភាព និងសប្បាយរីករាយ និងមានការរីកចម្រើនក្នុងជីវភាពរស់នៅនោះដែរ»។
លោកបន្ថែមថា លោកនាយករដ្ឋមន្ត្រី ហ៊ុន សែន ដែលជាប្រធានគណបក្សប្រជាជននឹងថ្លែងសារនយោបាយអំពីផែនការ និងគោលដៅក្នុងការអភិវឌ្ឍប្រទេស សេដ្ឋកិច្ច និងការពារប្រទេសជាតិទៅកាន់មហាជនមន្ត្រីជាន់ខ្ពស់មន្ត្រីទូត អង្គការ និងសមាគមដែលនឹងចូលរួមក្នុងខួបលើកទី ៤១ ឆ្នាំនេះ។
នាយឧត្តមសេនីយ៍ ទូច ណារ៉ុថ អគ្គស្នងការរងនគរបាលជាតិ និងជាប្រធាននាយកដ្ឋានអង្គរក្សថ្លែងពីម្សិលមិញថា កម្លាំងសមត្ថកិច្ចចម្រុះរួមមាននគរបាលជាតិ កងរាជអាវុធហត្ថ និងកម្លាំងកងអង្គរក្សនឹងត្រូវដាក់ពង្រាយ នៅតាមទីតាំងជុំវិញកន្លែងប្រារព្ធពិធីដើម្បីជួយសម្រួលធ្វើយ៉ាងណាឲ្យពិធីមីទ្ទីងប្រារព្ធខួបថ្ងៃរំដោះ ៧ មករានេះប្រព្រឹត្តទៅដោយរលូន ដែលក្នុងនោះមានការចាត់ចែងពីទីតាំងចំណតរថយន្ត ច្រកសុវត្ថិភាព ចេញចូល ជាពិសេសពាក់ព័ន្ធពីការបង្ហោះដ្រូនដែលគ្មានការអនុញ្ញាត និងត្រូវឃាត់ដកហូតរក្សាទុកផងដែរ។
លោកបញ្ជាក់ថា៖ «យើងបានត្រៀមកម្លាំងការពារអស់ហើយ ជុំវិញខួបលើកទី ៤១ នៃទិវាជ័យជម្នះ ៧ មករា។ កម្លាំងយើងមានគ្រប់គ្រាន់ ដើម្បីការពារ។ បច្ចុប្បន្ននេះយើងមាន ៣២០០ នាក់»។
នៅក្នុងកិច្ចប្រជុំត្រួតពិនិត្យការងាររៀបចំបុណ្យខួបលើកទី ៤១ ឆ្នាំថ្ងៃ ៧ មករា នៅសាលារាជធានីភ្នំពេញនាព្រឹកថ្ងៃទី ៣ ខែមករា លោក ឃួង ស្រេង អភិបាលរាជធានីភ្នំពេញបានណែនាំឲ្យអភិបាលខណ្ឌ និងអាជ្ញាធរ ព្រមទាំងសមត្ថកិច្ចពាក់ព័ន្ធធ្វើយ៉ាងណារៀបចំ អនាម័យបរិស្ថាន និងសណ្តាប់ធ្នាប់ជុំវិញទីតាំងប្រារព្ធពិធីក្នុងនោះក៏បានណែនាំឲ្យអាជ្ញាធរ និងសមត្ថកិច្ចពាក់ព័ន្ធ យកចិត្តទុកដាក់ខ្ពស់សំដៅការពារសុខសុវត្ថិភាពមហាជនឲ្យបាន ១០០ ភាគរយ។
លោកបញ្ជាក់ថា៖ «ក្នុងនាមរដ្ឋបាលរាជធានីភ្នំពេញត្រូវតែមានការចូលរួមសហការពីសមត្ថកិច្ចជំនាញពាក់ព័ន្ធទាំងអស់ទើបធ្វើឲ្យពិធីទទួលបានជោគជ័យ បើទោះបីជាពិធីបុណ្យនេះ យើងធ្លាប់បានប្រារព្ធធ្វើជាច្រើនដងកន្លងមកទទួលបានជោគជ័យជាបន្តបន្ទាប់ក៏ដោយ...»។
លោក អ៊ូ ច័ន្ទរ័ត្ន អតីតតំណាងរាស្ត្រអតីតគណបក្សសង្គ្រោះជាតិថ្លែងថា មានទស្សនៈមួយបានគាំទ្រថ្ងៃ ៧ មករាថាជាថ្ងៃជ័យជម្នះលើរបបប្រល័យពូជសាសន៍ខ្មែរក្រហម ខណៈមានទស្សនៈផ្សេងទៀតបានរិះគន់ថ្ងៃ ៧ មករាថា ជាថ្ងៃដែលវៀតណាមបានឈ្លានពានប្រទេសកម្ពុជា។
លោកបានលើកឡើងថា៖ «ទស្សនៈខ្ញុំផ្ទាល់វៀតណាមជួយសង្គ្រោះកម្ពុជាគ្រាន់តែជាលេស។ យើងត្រូវមានសំណួរឡើងវិញ តើខ្មែរក្រហមកើតឡើងចេញពីណា ហើយនរណាខ្លះ អ្នកជ្រោមជ្រែង (ខ្មែរក្រហម) ហើយមូលហេតុអ្វីដែលមានការកាប់សម្លាប់។ ខ្ញុំមិនបដិសេធទេថា វៀតណាមបានរំដោះនោះជាភាពជាក់ស្តែង តែអ្វីដែលនៅពីក្រោយគួរតែលាតត្រដាងឲ្យមហាជនដឹងផង»។
យ៉ាងណាក្តីលោក សុខ ឥសាន បានថ្លែងថា ថ្ងៃ ៧ មករាគឺជាថ្ងៃជ័យជម្នះលើរបបប្រល័យពូជសាសន៍ ប៉ុល ពត ដែលកម្លាំងមហាសាមគ្គីជាតិដែលរៀបចំដោយរណសិរ្សសង្គ្រោះជាតិកម្ពុជាដែលត្រូវបានបង្កើតឡើងក្នុងថ្ងៃទី ២ ធ្នូឆ្នាំ ១៩៧៨ ដោយមានការគាំទ្រពីវៀតណាមដែលធ្វើឲ្យកម្ពុជាបានយកជ័យជម្នះទាន់ពេលវេលា និងរំដោះជាតិ និងអាយុជីវិតប្រជាជនពីរបបប្រល័យពូជសាសន៍ ប៉ុល ពត ដែលនេះគឺជាសច្ចធម៌ប្រវត្តិសាស្ត្រមិនអាចលុបបំបាត់ និងបំភ្លៃ បំផ្លើស និងបំផ្លាញបានឡើយ។
លោកបញ្ជាក់ថា៖ «នេះគឺជាសច្ចធម៌ប្រវត្តិសាស្ត្រមិនអាចលុបបំបាត់បានទេ បើទោះបីជាមជ្ឈដ្ឋានប្រឆាំងថា ជាការឈ្លានពានរបស់វៀតណាមចូលកម្ពុជា ក៏ប៉ុន្តែសច្ចធម៌នេះត្រូវបានរក្សា និងលើកកម្ពស់រហូតដល់បច្ចុប្បន្ននេះ»។
លោកលើកឡើងទៀតថា កាលពីមុនមានសហរដ្ឋអាមេរិក និងបណ្តាប្រទេសលោកខាងលិច គេបានថ្កោលទោសថា វៀតណាមឈ្លានពានកម្ពុជា។ ប៉ុន្តែបន្ទាប់ពីមានការរៀបចំ បង្កើតសាលាក្តីកាត់ទោសអតីតមេដឹកនាំខ្មែរក្រហម «ឥឡូវការដែលចោទលើបញ្ហាហ្នឹងត្រូវបានលុបបំបាត់ចោលពីព្រោះវាជាសច្ចធម៌ប្រវត្តិសាស្ត្រមិនអាចនរណាលុបបំបាត់បានទេ។ មាសទោះបីធ្លាក់ចូលទៅក្នុងភក់ជ្រៅយ៉ាងណា ក៏វានៅតែជាមាសដដែល»៕
