ពោធិ៍សាត់/រតនគិរីៈ ជនសង្ស័យចំនួន ២ នាក់ ក្នុងចំណោម ៣ នាក់ ត្រូវបានសមត្ថកិច្ចផាកពិន័យជាទឹកប្រាក់ចន្លោះពី ៣ ទៅ ៦ លានរៀល ពាក់ព័ន្ធនឹងការលួចលាក់ឈើប្រភេទលេខ ១ ចំនួនជាង ២ ម៉ែត្រគុបនៅឃុំក្រពើ២ ស្រុកវាលវែង ខេត្តពោធិ៍សាត់កាលពីចុងសប្តាហ៍មុន។ រីឯសមត្ថកិច្ចខេត្តរតនគិរី ឯណោះវិញក៏កំពុងស្រាវជ្រាវរកអ្នកពាក់ព័ន្ធលួចលាក់ឈើចំនួន ២១ ដុំដែលបម្រុងដឹកទៅលក់នៅវៀតណាម។
លោក ផាន់ សុភារីន នាយកដែនជម្រកសត្វព្រៃភ្នំសំកុស ស្រុកវាលវែងថ្លែងពីម្សិលមិញថា បុរសជាជនសង្ស័យចំនួន ២ នាក់ ក្នុងចំណោម ៣ នាក់ ត្រូវបានផាកពិន័យជាទឹកប្រាក់ពី ៣ ទៅ ៦ លានរៀល។ ពួកគេពាក់ព័ន្ធនឹងការលួចលាក់ឈើប្រភេទលេខ ១ ចំនួន ៣៥ ដុំស្មើនឹងជាង ២ ម៉ែត្រគុបនៅក្បែរដែនជម្រកសត្វព្រៃភ្នំសំកុសក្នុងភូមិសំឡាញ់ ឃុំក្រពើ ២ ស្រុកវាលវែង ខេត្តពោធិ៍សាត់។ ប៉ុន្តែលោកមិនប្រាប់ពីអត្តសញ្ញាណជនសង្ស័យនោះទេ។
បើតាមលោក ផាន់ សុភារីន គឺសមត្ថកិច្ចបានឃាត់មនុស្សចំនួន ៣ នាក់ កាលពីថ្ងៃទី ២៨ ខែតុលា ប៉ុន្ដែមន្ត្រីជំនាញបានដោះលែងម្នាក់ ដោយសារមិនជាប់ពាក់ព័ន្ធករណីនេះ។
រីឯជនសង្ស័យ ២ នាក់ ជាម្ចាស់ឈើទាំង ៣៥ ដុំនេះទើបសមត្ថកិច្ចផាកពិន័យតាមច្បាប់ជាទឹកប្រាក់ទៅតាមទំហំឈើ និងប្រភេទឈើជាក់ស្ដែង ដោយទុកពេលឱ្យពួកគេ ១៥ ថ្ងៃ ដើម្បីរកលុយមកបង់ពិន័យប៉ុន្ដែមិនបានបញ្ជូនសំណុំរឿងទៅតុលាការទេ។
លោកបញ្ជាក់ថា៖ «ឈើទាំង ៣៥ ដុំនេះគាត់លាក់ទុកក្នុងព្រៃក្រោយផ្ទះគាត់ ហើយពួកខ្ញុំចុះល្បាតក៏ប្រទះឃើញ ក្រោយមកក៏ស្រាវជ្រាវរកឃើញម្ចាស់ ហើយហៅទៅសាកសួរ។ ប៉ុន្ដែយើងមិនបានឃាត់ខ្លួនគាត់ទេ គឺគ្រាន់តែផាកពិន័យ និងធ្វើកិច្ចសន្យាតាមច្បាប់។ ក្រៅពីឈើនេះយើងបានរឹបអូសឡាន ១ គ្រឿងដែរ ព្រោះនៅលើឡានមានឈើមួយចំនួន អ៊ីចឹងយើងក៏រឹបអូសទាំងឈើ និងឡានយកមករក្សាទុកនៅស្នាក់ការដែនជម្រកសត្វព្រៃភ្នំសំកុសបណ្ដោះអាសន្ន»។
ដោយឡែកសមត្ថកិច្ចខេត្តរតនគិរីកាលពីថ្ងៃទី ៣១ តុលា បានរឹបអូសឈើចំនួន ២១ ដុំស្មើ នឹងជិត ៧ ម៉ែត្រគុបដែលឈ្មួញលួចលាក់ទុក ២ ទីតាំងផ្សេងគ្នានៅឃុំញ៉ាង ស្រុកអណ្តូងមាស ខេត្តរតនគិរី។ ឈើទាំងនេះឈ្មួញបម្រុងដឹកជញ្ជូនយកទៅលក់នៅប្រទេសវៀតណាម ប៉ុន្ដែភ្លាមៗនោះជនសង្ស័យបានរត់គេចខ្លួន។
លោក សយ សូណា ប្រធានមន្ទីរកសិកម្ម រុក្ខាប្រមាញ់ និងនេសាទ ខេត្តរតនគិរី ថ្លែងពីម្សិលមិញថា ឈើចម្រុះ ២១ ដុំស្មើនឹង ៦.៧២០ ម៉ែត្រគុប ត្រូវបានគេលាក់ទុកក្នុងព្រៃ។ គំនរឈើទីតាំង ទី ១ រឹបអូសបានចំនួន ១១ ដុំ ស្ថិតក្នុងភូមិម៉ុយ និងទីតាំងទី ២ រឹបអូសឈើបាន ១០ ដុំស្ថិតក្នុងភូមិកេត ឃុំញ៉ាង ស្រុកអណ្តូងមាស។
លោកថា៖ «យើងបានទទួលព័ត៌មានពីពលរដ្ឋ ដោយពួកគាត់បានឃើញឈ្មួញយកឈើទៅលាក់ទុកនៅទីតាំងនោះ ហើយយើងបានចុះទៅបង្ក្រាបតែម្ដង ប៉ុន្ដែម្ចាស់ឈើបានរត់គេចខ្លួន ហើយយើងកំពុងស្រាវជ្រាវរកជនល្មើសហ្នឹងដែរ។ ឈើទាំងនេះប្រហែលជាឈ្មួញបម្រុងដឹកទៅលក់នៅប្រទេសវៀតណាម ប៉ុន្ដែយើងបង្ក្រាបទាន់ពេលវេលា»។
លោក សូណា បន្ថែមថា ប្រតិបត្តិការនេះមានការចូលរួមពីកម្លាំងសមត្ថកិច្ចចម្រុះដូចជា នគរបាលប្រឆាំងបទល្មើសសេដ្ឋកិច្ចខេត្ត មន្ត្រីរដ្ឋបាលព្រៃឈើ នគរបាលស្រុកអណ្តូងមាស និងកងរាជអាវុធហត្ថស្រុកអណ្តូងមាសដឹកនាំដោយលោក រ៉ា បូរ៉ាន់ឌី ព្រះរាជអាជ្ញារងសាលាដំបូងខេត្តរតនគិរី។
លោក ឃេន សានិត អភិបាលស្រុកអណ្ដូងមាស និងលោក សោម ចាន់ដារ៉ា អធិការនគរបាលស្រុកអណ្ដូងមាសពីម្សិលមិញមិនអាចទាក់ទងសុំការបញ្ជាក់បានទេ៕