.jpg)
លោក ថ្លាង ភិនរ៉ា ប្រធានការិយាល័យប្រឆាំងភេរវកម្មនៃក្រសួងមហាផ្ទៃ និងជាមេធាវី ត្រូវបានពិន័យ និងព្យួរការងារ ករណីដកកាំភ្លើងភ្ជង់ម្ចាស់ហាង។ រូបថត ហ្វេសប៊ុក
ភ្នំពេញ: លោក ថ្លាង ភិនរ៉ា ប្រធានការិយាល័យប្រឆាំងភេរវកម្មនៃក្រសួងមហាផ្ទៃ និងជាមេធាវី ត្រូវបានអគ្គស្នងការនគរបាលជាតិបានសម្រេចអនុវត្តវិន័យកងកម្លាំង និងព្យួរការងារកាលពីចុងសប្ដាហ៍មុន ដើម្បីទុកលទ្ធភាពឱ្យតុលាការចាត់វិធានការច្បាប់ ករណីមន្ត្រីរូបនេះបានដកកាំភ្លើងភ្ជង់គំរាមសម្លាប់ម្ចាស់ហាងគុយទាវ ២ នាក់ប្ដីប្រពន្ធក្នុងវង់ស៊ីផឹក។
កាលពីថ្ងៃទី ២០ ខែកញ្ញា លោក ថ្លាង ភិនរ៉ា រងការចោទប្រកាន់ថា បានដកកាំភ្លើងពីចង្កេះយកទៅភ្ជង់ និងគំរាមសម្លាប់ម្ចាស់ហាងគុយទាវ ២ នាក់ប្ដីប្រពន្ធ (ជុយ សុខហេង (ប្ដី) និង ពៅ ឌីណា (ប្រពន្ធ)) ក្នុងវង់ស៊ីផឹក ១ កន្លែង នៅសង្កាត់បឹងកក់ ២ ខណ្ឌទួលគោក រាជាធានីភ្នំពេញ។ បន្ទាប់មក ជនរងគ្រោះបានប្តឹងទៅតុលាការ និងក្រសួងមហាផ្ទៃព្រមទាំងគណៈមេធាវី។
លោក អ៊ី សុខឃី អគ្គស្នងការរងនគរបាលជាតិបានថ្លែងពីម្សិលមិញថា ដោយអនុវត្តតាមបទបញ្ជារបស់នាយឧត្តមសេនីយ៍ នេត សាវឿន អគ្គស្នងការនគរបាលជាតិ អង្គភាពជំនាញបានអនុវត្តវិន័យកងកម្លាំង និងព្យួរការងារលោក ថ្លាង ភិនរ៉ា រួចរាល់ហើយ។ ការសម្រេចនេះ បន្ទាប់ពីជនរងគ្រោះមិនព្រមបញ្ចប់រឿងក្រៅប្រព័ន្ធតុលាការជាមួយភាគីជនបង្ក។ លើសពីនេះលោកបានណែនាំឱ្យមន្ត្រីចុះសួរសុខទុក្ខជនរងគ្រោះ ដើម្បីផ្ដល់ភាពកក់ក្ដៅបន្ថែមទៀត។
លោក សុខឃី បញ្ជាក់ថា៖ «សំណុំរឿងនេះ គឺហួសពីដែនសមត្ថកិច្ចយើងហើយ ដោយយើងបានព្យួរការងារគាត់ហើយ អ៊ីចឹងការងារបន្ទាប់ គឺតុលាការគាត់ចាត់វិធានបែបណាទៀត វាជាការសម្រេចរបស់តុលាការ ។ កន្លងមក យើងបានសម្របសម្រួល ប៉ុន្ដែជនរងគ្រោះគាត់មិនព្រមទេ អ៊ីចឹងរឿងហ្នឹងឱ្យតុលាការចាត់ចែង»។
លោក ជុយ សុខហេង ជាម្ចាស់ហាងគុយទាវអង្គរជុំសាខាទួលគោកដែលជាដើមបណ្ដឹងកាលពីម្សិលមិញបានបង្ហាញការអរគុណថ្នាក់ដឹកនាំក្រសួងមហាផ្ទៃ ចំពោះការដាក់វិន័យ និងការព្យួរការងារលោក ថ្លាង ភិនរ៉ា នេះ។
លោកបន្តថា គ្រួសារលោកប្រកាន់ជំហរមិនចរចាបញ្ចប់រឿងក្រៅប្រព័ន្ធតុលាការ ឬប្រព័ន្ធច្បាប់ទេពោលគឺទុកលទ្ធភាពឱ្យច្បាប់ជាអ្នកចាត់ចែងតាមនីតិវិធី»។
លោក គុជ គឹមឡុង អ្នកនាំពាក្យសាលាដំបូងរាជធានីភ្នំពេញមិនអាចទាក់ទងសុំការបញ្ជាក់បន្ថែមពីសំណុំរឿងនេះបានទេកាលពីម្សិលមិញ។
តាមពាក្យបណ្ដឹងរបស់ជនរងគ្រោះទៅស្ថាប័នទាំង៣ ខាងលើពីថ្ងៃទី ២២ ខែកញ្ញា ថា លោក ថ្លាង ភិនរ៉ា បានជេរប្រមាថ និងគំរាមបាញ់សម្លាប់លោក និងភរិយាដោយដកកាំភ្លើងពីចង្កេះអាម៉េបញ្ចូលគ្រាប់តម្រង់ទៅលើលោក និងភរិយា ខណៈកំពុងហូបអាហារថ្ងៃត្រង់ជុំគ្នាជាមួយមិត្តភក្តិ ៨ នាក់ ក្នុងហាងលោកផ្ទាល់។
តាមបណ្ដឹងនោះថា៖ «យើងខ្ញុំសូមអំពាវនាវឱ្យសម្ដេចក្រឡាហោម ស ខេង និងតុលាការជួយរកយុត្តិធម៌ឱ្យគ្រួសារយើងខ្ញុំផង ព្រោះយើងខ្ញុំនៅបារម្ភសុវត្ថិភាពនៅឡើយ។...យើងខ្ញុំសូមទាមទារសំណងជំងឺចិត្ត ១០ ម៉ឺនដុល្លារ និងស្នើសុំឱ្យច្បាប់ផ្តន្ទាទោសធ្ងន់ធ្ងរមិនអាចលើកលែងបានទេ»។
លោក ថ្លាង ភិនរ៉ា មិនអាចសុំការបញ្ជាក់ពីករណីនេះបានទេកាលពីម្សិលមិញ ដោយអ្នកលើកទូរស័ព្ទលោកប្រាប់ថា លោក ថ្លាង ភិនរ៉ា កំពុងបំពេញការងារនៅក្រសួងមហាផ្ទៃ៕
វីដេអូ៖
