ក្រចេះ: អាជ្ញាធរខេត្តក្រចេះ និងអ្នកនាំពាក្យអគ្គស្នងការនគរបាលជាតិបានបដិសេធថា ពុំមានមនុស្សស្លាប់នៅក្នុងការប៉ះទង្គិចគ្នានៅក្នុងការតវ៉ាបិទផ្លូវ រឿងវិវាទដីធ្លីរបស់ប្រជាពលរដ្ឋ និងក្រុមហ៊ុននៅស្រុកស្នួលកាលពីម្សិលមិញដូចការអះអាងពីប្រភពមួយចំនួននោះទេ គឺមានតែអ្នករងរបួសតែប៉ុណ្ណោះ។
លោក គង់ គឹមនី អភិបាលស្រុកស្នួលបានថ្លែងថា មុនពេលប៉ះទង្គិចនេះអាជ្ញាធរបានចុះចរចា និងសម្របសម្រួលចំនួន ២ លើកមកហើយ ប៉ុន្ដែក្រុមប្រជាពលរដ្ឋទាំងនោះមិនយល់ព្រមតាមយោបល់របស់អាជ្ញាធរទេ។
លោកបន្តថា៖ «យើងជួបប្រជុំជាមួយពួកគាត់ ប៉ុន្ដែពួកគាត់មិនបានយល់ព្រម ហើយក៏មានការបិទផ្លូវដែលធ្វើឲ្យប៉ះទង្គិចគ្នានេះបណ្ដាលឲ្យសមត្ថកិច្ចរងរបួសស្រាល ៧ នាក់ហើយពលរដ្ឋរបួសស្រាល ២ នាក់ដែរ តែអត់មានស្លាប់ទេ ហើយក៏ត្រូវបានយកទៅមន្ទីរពេទ្យបង្អែកខេត្តក្រចេះអស់ហើយដែរ»។
ចំណែកលោក គៀត ច័ន្ទថារិទ្ធ អ្នកនាំពាក្យអគ្គស្នងការនគរបាលជាតិបានថ្លែងថា ពុំមានមនុស្សស្លាប់នៅក្នុងការប៉ះទង្គិចគ្នារវាងប្រជាពលដ្ឋ និងអាជ្ញាធរនៅខេត្តក្រចេះនោះទេ គឺមានតែរងរបួសប៉ុណ្ណោះ។
លោកបញ្ជាក់ថា៖ «តាមរបាយការណ៍ដែលខ្ញុំទទួលបានពីស្នងការខេត្តក្រចេះព្រឹកមិញ (៨ មីនា) គឺមានប្រតិបត្តិការមួយដឹកនាំដោយអភិបាលរង និងព្រះរាជអាជ្ញារងខេត្ត ចុះទៅជួយការពារការកាយដីធ្វើព្រំរបស់ក្រុមហ៊ុនមេមត់។ នៅពេលដែលពួកគាត់ចុះទៅក៏មានប្រជាពលរដ្ឋ ២០០ ទៅ ៣០០ នាក់តវ៉ាសុំឲ្យផ្អាក ហើយក៏មានការសម្របសម្រួលរវាងព្រះរាជអាជ្ញា អភិបាលរងខេត្ត និងប្រជាពលរដ្ឋ តែខាងប្រជាពលរដ្ឋលោកមិនព្រម»។
លោកបន្តថា ក្រោយមកប្រហែលម៉ោង ១១ ថ្ងៃត្រង់ប្រជាពលរដ្ឋបានបិទផ្លូវប្រហែល ២ ម៉ោងជាង។ នៅពេលនោះក្រុមប្រតិបត្តិការព្យាយាមសម្របសម្រួលពលរដ្ឋ ប៉ុន្តែប្រជាពលរដ្ឋមិនព្រម។ «ហើយចុងក្រោយពួកគាត់ហាក់ដូចមានសកម្មភាពដូចជាមានកាំបិត ពូថៅ គ្រោងនឹងធ្វើអំពើហិង្សា និងដុតគ្រឿងចក្រហើយដើម្បីទប់ស្កាត់អំពើអស់ហ្នឹង ក៏មានការផ្ទុះអាវុធឡើងលើដើម្បីកុំឲ្យប្រជាពលរដ្ឋប្រើអំពើហិង្សា»។ «បន្ទាប់ពីផ្ទុះអាវុធប៉ុន្មានគ្រាប់ យើងមិនបានដឹងថា ប៉ុន្មានគ្រាប់ដែរ។ ការផ្ទុះអាវុធមួយចំនួនប្រជាពលរដ្ឋក៏បានរំសាយទៅ ប៉ុន្តែមិនដឹងថាអាវុធវាយ៉ាងម៉េច វាប្លាតត្រូវរបួសប្រជាពលរដ្ឋ ២ នាក់ប្រុសម្នាក់ស្រីម្នាក់ ហើយតាមរបាយការណ៍គឺថារបួសស្រាលហើយប្រហែលជាត្រូវដៃ ឬជើង»។
បើតាមលោក ច័ន្ទថារិទ្ធ នៅក្នុងហេតុការណ៍នេះព្រះរាជអាជ្ញាបានបញ្ជាឲ្យឃាត់ខ្លួនប្រជាពលរដ្ឋ ១០ នាក់ដែលបានញុះញង់ឲ្យមានអំពើហិង្សាដើម្បីសួរនាំ ហើយក្នុងចំណោម ១០ នាក់នោះមាន ២ នាក់រងរបួសស្រាល។
លោកក៏ឲ្យដឹងដែរថា កម្លាំងសមត្ថកិច្ចដែលចូលរួមក្នុងប្រតិបត្តិការនេះមាន «នគរបាល ៥០ នាក់កងរាជអាវុធហត្ថ ៥០ នាក់ហើយកម្លាំងប្រតិបត្តិការសឹករងខេត្ត ៥០ នាក់»។
លោកគូសបញ្ជាក់ទៀតថា៖ «ក្នុងនាមនគរបាលជាតិដោយសារមានការរបួសស្នាមគឺយើងមានការសោកស្តាយ មិនគួរឲ្យមានរឿងនេះកើតឡើង តែយើងក៏មិនដឹងថាស្ថានភាពជាក់ស្តែងដែលនាំឲ្យកើតរឿងនេះវាយ៉ាងម៉េចបានជាឈានទៅដូច្នេះ»។
ប៉ុន្តែមេឃុំ ២ ធ្នូ និងបុគ្គលិកអង្គការអាដហុកព្រមទាំងពលរដ្ឋមួយចំនួនបានអះអាងផ្ទុយពីនេះដោយថា មានមនុស្សស្លាប់នៅក្នុងការប៉ះទង្គិចគ្នានេះ។
លោក ប៉ឹង វិន មេឃុំ ២ ធ្នូ ខេត្តក្រចេះអះអាងថាលោកក៏បានស្ថិតនៅក្នុងហេតុការណ៍នោះដែរដោយលោកថា៖ «ខ្ញុំបានទៅកន្លែងកើតហេតុ ប្រជាពលរដ្ឋបានបិទផ្លូវដោយសារគាត់ខឹងអាជ្ញាធរបានមកដុតផ្ទះ ដំណាំក្នុងចម្ការ ខ្ញុំឃើញសពមនុស្សសែងនឹងអង្រឹង។ ខ្ញុំបាននៅនឹងកន្លែងកើតនោះដែរ ដោយមានក្រុមប៉ូលិសទាហាន ខណៈដែលពួកគាត់បានទាមទារសុំបែងចែកដីពីក្រុមហ៊ុន។ ពេលថ្ងៃហ្នឹងខ្ញុំបានឃើញមនុស្សស្លាប់ ២ នាក់ផ្ទាល់នឹងភ្នែកខ្ញុំ ប៉ុន្ដែល្ងាចនេះខ្ញុំក៏បានឃើញគេសែងអង្រឹងដាក់សាកសព ២ ឬ ៣ នាក់បន្ថែមទៀត»។
លោក ប៊ី វណ្ណី បុគ្គលិក អង្គការអាដហុកក៏បានអះអាងដែរថា ក្រុមអាជ្ញាធរបានចុះរុះរើខ្ទមដែលពលរដ្ឋសង់លើដីជម្លោះ ហើយពលរដ្ឋបានធ្វើការតវ៉ា ដែលបណ្តាលឲ្យមានការប៉ះទង្គិចគ្នា និងការបាញ់កាំភ្លើងកើតឡើង។
លោកបញ្ជាក់ថា ហេតុការណ៍នេះធ្វើឲ្យប្រជាពលរដ្ឋចំនួន ២ នាក់បានស្លាប់ នៅនឹងកន្លែង និង ៤ នាក់ទៀតបានស្លាប់តាមផ្លូវពេលបញ្ជូនទៅមន្ទីរពេទ្យ ហើយនៅក្នុងហេតុការណ៍នេះ ទូរស័ព្ទរបស់ប្រជាពលរដ្ឋប្រមាណជា ២០០ គ្រឿងត្រូវបានអាជ្ញាធរដកហូត។ នៅពេលទាក់ទងសុំការបញ្ជាក់ក្រោយមកទៀត លោក ប៊ី វណ្ណី ថ្លែងថាព័ត៌មានដែលថា ស្លាប់ ៦ នាក់នោះគឺលោកទទួលបានពីពលរដ្ឋ ហើយក្រោយមកទៀតទើបមានសេចក្តីរាយការណ៍ថា មានទាំងពលរដ្ឋ និងកម្លាំងអាជ្ញាធររងរបួស។
ពលរដ្ឋម្នាក់អាយុ ៥៣ ឆ្នាំដែលសុំមិនប្រាប់ឈ្មោះបានអះអាងថា លោកកំពុងតែធ្វើដំណើរចូលទៅកាន់កន្លែងកើតហេតុស្រាប់តែអ្នកតវ៉ានៅខាងក្នុងម្នាក់ បានទូរស័ព្ទប្រាប់លោកកុំឲ្យចូលទៅដោយថា មានពលរដ្ឋពួកគាត់ ២ នាក់ប្រុសម្នាក់ស្រីម្នាក់ត្រូវបានបាញ់ស្លាប់ ហើយម្នាក់ទៀតរបួស។ បុរសរូបនេះអះអាងបន្តថាលោកជឿជាក់ថាពលរដ្ឋពួកលោកពិតជាត្រូវបាញ់ស្លាប់មែន ហើយអ្វីដែលអាជ្ញាធរបានបដិសេធនោះគឺដើម្បីបិទបាំងព័ត៌មានប៉ុណ្ណោះ។ «រឿងសាកសពហ្នឹង គេយកទៅណា ខ្ញុំមិនដឹងដែរ...ធម្មតារាស្ត្រស្លាប់ អាជ្ញាធរគេថា មិនស្លាប់។ ស្លាប់ដូចខ្មោចឆ្កែ»។
បុរសរូបនេះបានអះអាងថាលោកមានដីចំនួន ១ ហិកតាកន្លះនៅកន្លែងដីទំនាស់នោះ តែក្រុមហ៊ុនបានទៅឈូសឆាយជីកប្រឡាយដើម្បីធ្វើក្រវាត់ព្រំដី។ លោកថា លោកនៅតែតវ៉ាយកដី ដោយនឹងនាំគ្នាផ្តិតមេដៃដើម្បីដាក់ជូនសុំអន្តរាគមន៍ពីលោក ហ៊ុន សែន។
លោក សឺន សែនករុណា អ្នកនាំពាក្យអង្គការអាដហុកបានឲ្យដឹងថា មន្ត្រីតុលាការខេត្តម្នាក់បានទូរស័ព្ទទៅបុគ្គលិកអាដហុកនៅខេត្តក្រចេះដោយបង្គាប់ឲ្យធ្វើការកែតម្រូវព័ត៌មានដែលថា មានអ្នកស្លាប់នោះ។
លោកពន្យល់ថា អាដហុក បានទទួលសេចក្តីរាយការណ៍ពីពលរដ្ឋពីករណីស្លាប់នោះ ហើយបានប្រាប់ទៅសារព័ត៌មានដោយយោងទៅតាមសម្តីរបស់ប្រជាពលរដ្ឋនោះ ដោយមិនទាន់បានចុះអង្កេតខ្លួនឯងនោះទេ។ «អ្នកខ្លះប្រាប់ថា មានស្លាប់ ២ នាក់នៅកន្លែងកើតហេតុ។ ខាងសមត្ថកិច្ចមិនឲ្យចូលយក [សព] អ៊ីចឹងហើយមានការដឹកទៅមន្ទីរពេទ្យខេត្ត។ ដឹកមិនដល់ក៏ស្លាប់តាមផ្លូវ តែពេលឲ្យគាត់ប្រាប់ឈ្មោះអ្នកស្លាប់គាត់ថាមិនទាន់ច្បាស់ដែរ»។
លោកបន្តថា ក្រោយមកខាងអាជ្ញាធរក៏បានប្រាប់មកវិញថា គ្មានអ្នកស្លាប់ទេ មានតែរបួស ២ រូប និងចាប់ខ្លួន ៧ រូបហើយនឹងម៉ូតូ ៣៦ គ្រឿង។ លើសពីនោះសមត្ថកិច្ចក៏មានរបួស ៧ រូបដែរ។
ទាក់ទងទៅនឹងរឿងឲ្យកែតម្រូវវិញលោកថា៖ «យើងអត់កែតម្រូវអីទេ។ យើងគ្រាន់តែជាអ្នកទទួលព័ត៌មានពីពលរដ្ឋមក...យើងមិនអាចទៅកែទេ ព្រោះយើងម៉េចនឹងដឹង?។ បើសមត្ថកិច្ចចង់បិទព័ត៌មាន យើងធ្វើម៉េច?»។
លោកបន្តថា ក្នុងនាមជាអង្គការសង្គមស៊ីវិលលោកមានការសោកស្តាយចំពោះអ្វីដែលបានកើតឡើង ហើយសុំឲ្យភាគីពលរដ្ឋ និងអាជ្ញាធរស្វែងរកដំណោះស្រាយដោយសន្តិវិធី ដោយចៀសវាងការប្រើហិង្សាដាក់គ្នា។
លោកបន្តថា លើសពីនោះអាជ្ញាធរថ្នាក់លើក៏គួរមានការត្រួតពិនិត្យមើលថ្នាក់ក្រោមពីការប្រើប្រាស់អាវុធក្នុងការបាញ់បោះបែបនោះដែរ។
លោក ទីវ វុធធេន អ្នកនាំពាក្យសាលាដំបូងខេត្តក្រចេះបានអះអាងថា មន្ត្រីតុលាការអត់បានទាក់ទងទៅបុគ្គលិកអង្គការអាដហុកនោះទេ៕
រាយការណ៍បន្ថែមៈ ម៉ិច ដារ៉ា