ភ្នំពេញៈ ចាប់ពីថ្ងៃទី ២ ដល់ថ្ងៃទី ៦ ខែមេសា អាចនឹងមានភ្លៀងធ្លាក់ពីកម្រិតខ្សោយទៅបង្គួរនៅតំបន់មួយចំនួន ខណៈដែលអំឡុងពេលនោះ សីតុណ្ហភាពអប្បបរមាទូទាំងប្រទេសមានចន្លោះពី ២៤-២៧ អង្សាសេ និងអតិបរមាមានចន្លោះពី ៣២-៣៧ អង្សាសេ។ នេះបើតាមក្រសួងធនធានទឹក និងឧតុនិយម។
ក្រសួងធនធានទឹកបានចេញសេចក្តីជូនដំណឹងស្តីពីស្ថានភាពធាតុអាកាសចុះថ្ងៃទី ៣១ ខែ មីនា ឆ្នាំ ២០២០ ឲ្យដឹងថាចាប់ពីថ្ងៃទី ១ ដល់ថ្ងៃទី ៧ ខែ មេសា ឆ្នាំ ២០២០ កម្ពុជានឹងទទួលរងឥទ្ធិពលពីជ្រលងសម្ពាធទាបលើផ្ទៃប្រទេសជាមួយនឹងខ្យល់បក់មកពីសមុទ្រចិនខាងត្បូងដែលជាហេតុនាំឲ្យបណ្តាខេត្តនៅតំបន់វាលទំនាបកណ្តាល តំបន់ខ្ពង់រាបឦសាន និងតំបន់មាត់សមុទ្រ នឹងមានភ្លៀងធ្លាក់។
ក្រសួងបានឲ្យដឹងក្នុងសេចក្តីជូនដំណឹងដដែលថាចាប់ពីថ្ងៃទី ២ ដល់ថ្ងៃទី ៦ ខែមេសា បណ្តាខេត្តនៅតំបន់វាលទំនាបភាគកណ្តាល និងភាគពាយព្យនឹងមានភ្លៀងធ្លាក់នៅក្នុងកម្រិតពីមធ្យមទៅបង្គូរ។ ចំណែកបណ្តាខេត្តដទៃទៀតនឹងអាចមានភ្លៀងតិចហើយចាប់ពីថ្ងៃទី ៤ ដល់ថ្ងៃទី ៧ ផ្នែកមួយចំនួននៅតំបន់ខ្ពង់រាបឦសានអាចនឹងមានភ្លៀងនៅក្នុងកម្រិតពីខ្សោយទៅមធ្យម។ សម្រាប់តំបន់ជាប់មាត់សមុទ្រចាប់ពីថ្ងៃទី ២ ដល់ថ្ងៃទី ៧ ខែមេសា នឹងអាចមានភ្លៀងធ្លាក់នៅក្នុងកម្រិតពីតិចទៅបង្គួរដែលក្នុងផ្នែកមួយចំនួននៃខេត្តកោះកុងនឹងអាចមានភ្លៀងធ្លាក់នៅក្នុងកម្រិតពីមធ្យមទៅបង្គួរផងដែរ។
ក្រសួងបន្តថា៖ «អាស្រ័យស្ថានភាពធាតុអាកាសដូចបានជម្រាបជូនខាងលើ សូមសាធារណជនជ្រាបជាព័ត៌មាន។ សូមប្រុងប្រយ័ត្នចំពោះបាតុភូតផ្គរ រន្ទះ និងខ្យល់កន្ត្រាក់ដែលនឹងអាចកើតមានចាប់ពីថ្ងៃទី ២ ដល់ថ្ងៃទី ៦ ខែមេសា»។
លោក ស៊ុន សុផាត តំណាងសហគមន៍ និងជាប្រធានសម្ព័ន្ធកសិករនៅខេត្តព្រះសីហនុបានប្រាប់ភ្នំពេញប៉ុស្តិ៍ពីម្សិលមិញថា ប្រជាសហគមន៍នៅក្នុងខេត្តរបស់លោករង់ចាំតែទឹកភ្លៀង ដើម្បីចាប់ផ្តើមបង្កបង្កើនផលដាំដំណាំធ្វើស្រែធ្វើចម្ការរបស់ខ្លួនតែប៉ុណ្ណោះ ព្រោះថាមួយរយៈចុងក្រោយនេះមិនមានភ្លៀងធ្លាក់សោះ។ «បើសិនជានៅក្នុងដើមខែមេសាពិតជាមានធ្លាក់ភ្លៀងមែននឹងធ្វើឲ្យប្រជាកសិករយើងមានភាពសប្បាយចិត្តព្រោះតំបន់របស់យើងសុទ្ធតែប្រជាកសិករដែលចាំបាច់ត្រូវប្រើប្រាស់ទឹកក្នុងការដាំដំណាំជាលក្ខណៈគ្រួសារ។ បើសិនជាភ្លៀងធ្លាក់ច្រើនទៅបានចាប់ផ្តើមធ្វើស្រែ ព្រោះមិនមានប្រព័ន្ធធារាសាស្ត្រអីទៅដល់ពួកយើងទេ ទាល់តែរដូវវស្សាមកបានទឹកប្រើប្រាស់គ្រប់។ បើតំបន់មួយចំនួនមានប្រព័ន្ធធារាសាស្ត្រក៏ត្រូវរាំងស្ងួតអស់ដែរ»។
ទោះយ៉ាងណាលោក សុផាត បារម្ភថា ក្នុងករណីដែលភ្លៀងក្នុងអំឡុងពេលនេះ គ្រាន់តែជាភ្លៀងកក់ខែ ដែលមានចំនួនតិចតួចហើយបន្តក្តៅហួតហែងទៅវិញនោះបញ្ហាខ្វះខាតទឹកប្រើប្រាស់ និងប្រកបរបរកសិកម្ម នៅតែជួបប្រទះនូវការលំបាកដដែល៕