ក្រចេះ: ពុទ្ធបរិស័ទ និងគណៈកម្មការអាចារ្យវត្តវិហារធំសសរ ១០០ មួយចំនួនសម្ដែងការភ្ញាក់ផ្អើល និងបញ្ចេញប្រតិកម្មជំទាស់ចំពោះវត្តមានព្រះតេជគុណ អេង ផល្លា ដែលបាននិមន្តមកគង់នៅ និងគ្រប់គ្រងក្នុង ឋានៈជាព្រះចៅអធិការវត្តវិហារធំសសរ១០០ សាជាថ្មី ក្រោយពីលោកត្រូវបានសម្តេចសង្ឃនាយកបញ្ចប់មុខតំណែងពីព្រះចៅអធិការវត្តនោះ។
កាលពីខែសីហា ឆ្នាំ ២០២០ ព្រះតេជគុណ អេង ផល្លា ត្រូវបានសម្ដេចព្រះសង្ឃនាយក នៃព្រះរាជាណាចក្រកម្ពុជា នន្ទ ង៉ែត បញ្ចប់ មុខតំណែងជាព្រះចៅអធិការវត្តវិហារធំសសរ ១០០ និងព្យួរតួនាទី ជាព្រះអនុគណស្រុកសំបូរ ខេត្តក្រចេះ បន្ទាប់ពីផ្ទុះអធិករណ៍ជាមួយ ពុទ្ធបរិស័ទ និងគណៈកម្មការអាចារ្យ វត្តមួយ ចំនួនពាក់ព័ន្ធការប្រើប្រាស់ថវិកាជាបច្ច័យវត្តគ្មានតម្លាភាព។
ទោះ ជាបែបណានាព្រឹកថ្ងៃទី ១៨ ខែមករា ព្រះតេជគុណ អេង ផល្លា បាននិមន្តមកបរិវេណវត្តនេះជាថ្មីម្ដងទៀតជាមួយសង្ឃប្រកាសរបស់សម្តេចព្រះសង្ឃនាយក នន្ទ ង៉ែត ចុះថ្ងៃទី ៨ មករា ឆ្នាំ ២០២១ តែងតាំងព្រះអង្គ ជាព្រះចៅអធិការវត្តវិហារធំសសរ ១០០ ឡើងវិញ។
លោក សោ ម៉ុន ដែលជាប្រធានគណៈកម្មការអាចារ្យវត្តវិហារធំសសរ ១០០ ប្រាប់ ភ្នំពេញ ប៉ុស្តិ៍ ពីថ្ងៃទី ១៨ មករា ថាវត្តមានរបស់ព្រះតេជគុណ អេង ផល្លា នៅពេលនេះមិនមែនជារឿងល្អសម្រាប់ប្រជាពុទ្ធបរិស័ទចំណុះជើងវត្តក៏ដូចជាគណៈកម្មការអាចារ្យវត្តវិហារធំសសរ ១០០ នោះទេ ព្រោះគរុភណ្ឌក្នុងវត្តជាច្រើនត្រូវបានបំផ្លាញ ក្រោមការគ្រប់គ្រងរបស់ព្រះតេជគុណ អេង ផល្លា ក្នុងរយៈពេល ៤ ឆ្នាំ (២០១៦-២០២០)។ ក្នុងនោះស្រះបុរាណដែលមានអាយុកាលជិត ៥០០ ឆ្នាំ សាលាបដិសណ្ឋារកិច្ច និងកុដិមួយចំនួនត្រូវបានកប់លុប និងរុះរើចោលដោយគ្មានការពិគ្រោះយោបល់ជាមួយគណៈកម្មការអាចារ្យវត្ត និងអាជ្ញាធរមូលដ្ឋាននោះឡើយ។
លោក ម៉ុន ថ្លែងថា៖ «ខ្ញុំពិតជាភ្ញាក់ផ្អើលខ្លាំងណាស់ នៅពេលឃើញវត្តមានបុគ្គលសង្ឃរូបនេះត្រឡប់មកគ្រប់គ្រងក្នុងឋានៈជាព្រះចៅអធិការវត្តវិហារធំសសរ ១០០ ជាថ្មីម្ដងទៀត»។
សមាជិកគណៈកម្មការវត្តនេះម្នាក់ទៀត អ្នកស្រី ហែប សារ៉ន បន្ទរថា៖ «យើងបារម្ភខ្លាំងណាស់ និងគ្មានទំនុកចិត្តចំពោះការគ្រប់គ្រងរបស់ព្រះតេជគុណ អេង ផល្លា ទៀតនោះទេព្រោះព្រះអង្គមានបំណុលជាប់ព្រះកាយរាប់សិបម៉ឺនដុល្លារ»។
បើតាមអ្នកស្រី សារ៉ន ក្ដីបារម្ភរបស់ប្រជាពុទ្ធបរិស័ទ និងគណៈកម្មការអាចារ្យវត្តចំពោះវត្តមានរបស់ព្រះតេជគុណ អេង ផល្លា នាពេលនេះគឺខ្លាចព្រះអង្គមកបង្កខូចខាតទ្រព្យសម្បត្តិនៅក្នុងវត្តកាន់តែច្រើនថែមទៀត ខណៈព្រះអង្គកំពុងមានបំណុលជាប់ព្រះកាយដ៏សន្ធឹកសន្ធាប់រហូតជាង ៣០ ម៉ឺនដុល្លារអាមេរិក។
ប៉ុន្តែព្រះតេជគុណ អេង ផល្លា ប្រាប់ ភ្នំពេញ ប៉ុស្តិ៍ ថា បំណុលដែលព្រះអង្គជំពាក់នោះគឺដោយសារព្រះអង្គសាងសង់សាលាឆាន់ និងសាលាធម្មសភា សម្រាប់ជាប្រយោជន៍រួមក្នុងវត្ត។ ដើម្បីអភិវឌ្ឍ សាងសង់សាលាឆាន់ និងសាលាធម្មសភានេះ ព្រះអង្គចាំបាច់ត្រូវរុះរើកុដិ ដែលមានសភាពចាស់ទ្រុឌទ្រោម កាប់ដើមឈើ និងលុបស្រះទឹកមួយចំនួនក្នុងវត្តនេះ។
ព្រះអង្គបញ្ជាក់ថា៖ «បើសិនជាអាត្មាបំផ្លិចបំផ្លាញ និង បុលប្រាក់គេមកចាយវាយជាប្រយោជន៍ផ្ទាល់ខ្លួនមែននោះ ប្រហែលជាអាត្មាត្រូវបានអាជ្ញាធរចាប់ផ្សឹក និងបញ្ជូនទៅដាក់គុកបាត់ទៅហើយ។ ប៉ុន្តែសម្ដេចព្រះសង្ឃនាយកបានផ្ដល់យុត្តិធម៌សម្រាប់អាត្មា និងផ្ដល់ទំនុកចិត្តដល់អាត្មាឱ្យត្រឡប់មកគ្រប់គ្រង និងអភិវឌ្ឍវត្តនេះជាថ្មីម្ដងទៀត»។
ទោះយ៉ាងណាប្រជាពុទ្ធបរិស័ទចំណុះជើងវត្តវិហារធំសសរ ១០០ ដែលមានទីតាំងក្នុងភូមិសំបូរ ឃុំសំបូរ ស្រុកសំបូរ អ្នកស្រី ប៊ុត សឿន ប្រាប់ ភ្នំពេញ ប៉ុស្តិ៍ ថា អ្នកភូមិភាគច្រើនមិនសប្បាយចិត្តចំពោះវត្តមានរបស់ព្រះតេជគុណ អេង ផល្លា នៅក្នុងវត្តនោះទៀតទេ។ ប៉ុន្តែមិនហ៊ានប្រឆាំងព្រោះព្រះអង្គបានឡប់មកជាមួយសង្ឃប្រកាសរបស់សម្តេចព្រះសង្ឃនាយក។ អ្នកស្រីថា៖ «ខ្ញុំក៏មិនសប្បាយចិត្តដែរ ប៉ុន្តែធ្វើម៉េចបើសង្ឃប្រកាសបានសម្រេចតែងតាំងឱ្យព្រះតេជគុណ អេង ផល្លា ត្រឡប់មកគ្រប់គ្រងវត្តយើងជាថ្មីម្ដងទៀត»។
អ្នកស្រីបន្តថា ខ្លឹមសារនៃសង្ឃប្រកាសបានដាក់វត្តវិហារធំសសរ ១០០ ឱ្យស្ថិតក្រោមការគ្រប់គ្រងផ្ទាល់ពីសម្ដេចសង្ឃនាយក មិនមែនស្ថិតក្រោមការគ្រប់គ្រងរបស់មេគណខេត្តក្រចេះទៀតទេ និងតម្រូវឱ្យព្រះតេជគុណ អេង ផល្លា ធ្វើរបាយការណ៍ស្ដីពីវឌ្ឍនភាពក្នុងវត្តរៀងរាល់ខែ និងបញ្ចប់ឱ្យអស់ អធិករណ៍ដែលកើតឡើងកន្លងមកក្នុងវត្តរួមទាំងបំណុលផងដែរ៕