The Phnom Penh Post Search

Search form




Logo of Phnom Penh Post newspaper Phnom Penh Post - ពុំ​ទាន់​មាន​ភាព​ច្បាស់​លាស់​ចំពោះ​យុទ្ធនាការ​ទាម​ទារ​ប្រាក់​ឈ្នួល​កម្មករ

ពុំ​ទាន់​មាន​ភាព​ច្បាស់​លាស់​ចំពោះ​យុទ្ធនាការ​ទាម​ទារ​ប្រាក់​ឈ្នួល​កម្មករ

កម្មករ កម្មការិនី រោងចក្រ​បាន​នាំ​គ្នា​ដើរ​ចេញ​ពី​រោងចក្រ​បន្ទាប់​ពី​ចប់​ម៉ោង​ធ្វើ​ការ​របស់​ខ្លួន។
កម្មករ កម្មការិនី រោងចក្រ​បាន​នាំ​គ្នា​ដើរ​ចេញ​ពី​រោងចក្រ​បន្ទាប់​ពី​ចប់​ម៉ោង​ធ្វើ​ការ​របស់​ខ្លួន។ ម៉ៃ វីរៈ

ពុំ​ទាន់​មាន​ភាព​ច្បាស់​លាស់​ចំពោះ​យុទ្ធនាការ​ទាម​ទារ​ប្រាក់​ឈ្នួល​កម្មករ

ភ្នំពេញៈ ការ​ធ្វើ​យុទ្ធនាការ​តវ៉ា​ប្រាក់​ឈ្នួល​ពី​សំណាក់​ថ្នាក់​ដឹក​នាំ​សហជីព​ដែល​មិន​ពេញ​ចិត្ត​នឹង​ការ​ត​ដំឡើង​ប្រាក់​ឈ្នួល​ថ្មី​ដែល​ត្រូវ​បាន​រាជ​រដ្ឋាភិបាល​សម្រេច​ផ្តល់​ជូន​កម្មករ​ចំនួន ១២៨ ដុល្លារ​ក្នុង​មួយ​ខែ​មិន​ទាន់​មាន​ភាព​ច្បាស់​លាស់​នៅ​ឡើយ​ទេ​ថា តើ​អាច​នឹង​កើត​មាន​ឡើង ឬ​ត្រូវ​បាន​បំភ្លេច​ចោល ខណៈ​ពេល​ដែល​កម្មករ​ភាគ​ច្រើន​ព្រម​ទទួល​យក​នូវ​ចំនួន​នេះ។

លោក ប៉ាវ ស៊ីណា ប្រធាន​សម្ព័ន្ធ​សហជីព​ចលនា​កម្មករ​ដែល​បាន​ចុះ​ជួប​ជាមួយ​ថ្នាក់​ដឹក​នាំ​សហជីព និង​សមាជិក​ខ្លួន​តាម​បណ្តា​រោងចក្រ​បាន​ឲ្យ​ដឹង​កាល​ពី​ថ្ងៃ​អាទិត្យ​ម្សិល​មិញ​ថា កម្មករ​មិន​បាន​ជំទាស់​នូវ​ចំនួន​ប្រាក់​ឈ្នួល​នេះ​ទេ ប៉ុន្តែ​ក្រុម​កម្មករ​បាន​ស្នើ​សុំ​ឲ្យ​ខាង​ក្រសួង​ការងារ​ធ្វើ​ការ​ទប់​ស្កាត់​ការ​ដំឡើង​ថ្លៃ​បន្ទប់​ជួល ទឹក​ភ្លើង​ជាដើម។ លោក​ថ្លែង​ថា៖ «តាម​ការ​សាក​សួរ ពួក​គេ​ភាគ​ច្រើន​មិន​បាន​ជំទាស់​អ្វី​ទេ​ទៅ​នឹង​ប្រាក់​ឈ្នួល ១២៨ ដុល្លារ​នេះ ទោះ​បី​ជា​ពួក​គាត់​មិន​ទទួល​បាន​តាម​ការ​ចង់​បាន​របស់​ពួក​គាត់ ប៉ុន្តែ​ពួក​គេ​ទទួល​ស្គាល់​ថា ប្រាក់​ឈ្នួល ឆ្នាំ​២០១៥ នេះ​ដំឡើង​បាន​ច្រើន​ជាង ឆ្នាំ​២០១៤»។

លោក ប៉ាវ ស៊ីណា បាន​បន្ត​ថា កម្មករ​នឹង​មិន​បន្ត​ធ្វើ​ការ​ទាម​ទារ​អ្វី​ទៀត​ទេ​ចំពោះ​ប្រាក់​ឈ្នួល​នេះ តែ​ពួក​គាត់​មិន​សប្បាយ​ចិត្ត​ចំពោះ​ក្រសួង​ការងារ​មិន​បាន​គិត​ដល់​កម្មករ​មួយ​ចំនួន​ដែល​មាន​ប្រាក់​ឈ្នួល​លើស​ពី ១២៨ ដុល្លារ ដែល​ពួក​គាត់​នឹង​មិន​អាច​ទទួល​បាន​ប្រាក់​ដែល​ដំឡើង​ថ្មី​នេះ​ទេ។

លោក ប៉ាវ ស៊ីណា បាន​បន្ត​បញ្ជាក់​ថា៖ «ចំពោះ​រូប​ខ្ញុំ​ផ្ទាល់ ខ្ញុំ​នៅ​តែ​ចូល​រួម​តវ៉ា​ជាមួយ​នឹង​សហជីព​ផ្សេងៗ​ដែល​បន្ត​ធ្វើ​យុទ្ធនាការ​ទាមទារ​នេះ ទោះ​បី​ជា​ខាង​កម្មករ​មិន​ទាម​ទារ​ក៏​ដោយ ដោយ​សារ​តែ​យើង​ធ្វើ​ការ​ជា​ក្រុម​ជាមួយ​សហជីព​ផ្សេង​ទៀត»។

ចំណែក​លោក ហ្វា សាលី ប្រធាន​សម្ព័ន្ធ​សហជីព​ជាតិ​បាន​និយាយ​ថា កម្មករ​នៃ​សហជីព​គាត់​ប្រមាណ​ជា ៨០ ភាគរយ​យល់​ព្រម​ទទួល​យក​ប្រាក់​ឈ្នួល​ថ្មី។

លោក​បាន​និយាយ​កាល​ពី​ថ្ងៃ​អាទិត្យ​ម្សិល​មិញ​ថា បេះដូង​លោក​អាច​ទទួល​យក​បាន​ខ្លះ​ដែរ​ពី​ប្រាក់​ឈ្នួល​ថ្មី​នេះ ប៉ុន្តែ​មិន​ទាន់​ជា​ទី​គាប់​ចិត្ត​នៅ​ឡើយ តាម​អ្វី​ដែល​យើង​ខិត​ខំ​ទាម​ទារ​កន្លង​មក។

លោក​ថា៖ «គម្លាត​នៃ​ការ​ដំឡើង​ប្រាក់​ឈ្នួល​ហាក់​មាន​ចំនួន​ច្រើន ដែល​យើង​ក៏​រីក​រាយ​ដែរ​ដែល​យើង​ទទួល​បាន​ជោគ​ជ័យ​មួយ​កម្រិត»។

លោក សាលី បញ្ជាក់​បន្ថែម​ទៀត​ថា ការ​តវ៉ា​ប្រហែល​ជា​នៅ​កើត​មាន​ឡើង​ទោះ​បី​ជា​មិន​មាន​ការ​ចូល​រួម​ពី​កម្មករ ប៉ុន្តែ​តាម​រូបភាព​ផ្សេង ដោយ​មិន​មាន​ការ​តវ៉ា​ជា​ការ​ធ្វើ​បាតុកម្ម កូដកម្ម​តាម​រោងចក្រ ឬ​តាម​ផ្លូវ​ទេ តែ​បង្វែរ​ដោយ​ការ​តវ៉ា​ទាម​ទារ​ទៅ​អ្នក​បញ្ជា​ទិញ ម្ចាស់​រោងចក្រ និង​រាជ​រដ្ឋាភិបាល​ឲ្យ​គិត​គូរ​ម្តង​ទៀត​លើ​ប្រាក់​ឈ្នួល​នេះ ដោយ​សារ​វា​នៅ​តិច​តួច​នៅ​ឡើយ។

លោក​បាន​ថ្លែង​ឲ្យ​ដឹង​ទៀត​ថា៖ «ខ្ញុំ​ចង់​ទាម​ទារ​តាម​នីតិវិធី​ច្បាប់ មិន​ទាមទារ​តាម​ការ​ធ្វើ​បាតុកម្ម កូដកម្ម​ទេ។ ខ្ញុំ​ក៏​មិន​ខឹង​កម្មករ​ដែល​ព្រម​ទទួល​យក​ការ​ដំឡើង​នេះ​ដែរ វាជា​សិទ្ធិ​របស់​ពួក​គាត់»។

ចំពោះ​លោក ជា មុនី ប្រធាន​សហជីព​សេរី​កម្មករ​ដែល​ធ្វើ​ការ​រិះគន់​ក្រសួង​ការងារ រដ្ឋាភិបាល និង​ស្ថាប័ន្ធ​តុលាការ​មិន​សំចៃ​មាត់​នោះ មិន​ពេញ​ចិត្ត​នឹង​ចំនួន​ប្រាក់​ឈ្នួល​ដែល​បាន​ដំឡើង​មិន​សម​តាម​ការ​ចង់​បាន​របស់​សមាជិក និង​កម្មករ​របស់​លោក​ឡើយ។

លោក​បាន​ឲ្យ​ដឹង​ថា៖ «នៅ​ពេល​កំណត់​ប្រាក់​បៀវត្សរ៍​របស់​ក្រសួង​ការងារ​រួច​ហើយ គឺ​កម្មករ​ភាគ​ច្រើន​មាន​ការ​ក្រេវ​ក្រោធ ព្រោះ​ការ​ចាយ​វាយ​របស់​ពួក​គេ​មិន​ទាន់​បាន​គ្រប់​គ្រាន់ ហើយ​ពួក​គេ​ថា នឹង​នាំ​គ្នា​ធ្វើ​ការ​តវ៉ា ប៉ុន្តែ​ការ​ធ្វើ​ការ​តវ៉ា​នេះ​ប្រហែល​ជា​ឈាន​ទៅ​ដល់ ឆ្នាំ​២០១៥»។

លោក ជា មុនី បាន​បន្ត​ទៀត​ថា កម្មករ​របស់​លោក​ទទួល​យក​ប្រាក់​ឈ្នួល​ចំនួន ១៣០ ដុល្លារ​សម្រាប់​ការ​អនុវត្ត​ក្នុង ឆ្នាំ​២០១៤ នេះ ប៉ុន្តែ​នៅ​ពេល​សម្រេច​បែរ​ជា​ទទួល​បាន ១២៨ ដុល្លារ តែ​ចាប់​អនុវត្ត​នៅ ឆ្នាំ​២០១៥ ដែល​ខុស​ពី​អ្វី​ដែល​កម្មករ​ចង់​បាន។

លោក​បាន​ថ្លែង​ថា៖ «យើង​ចង់​បាន ១៣០ ដុល្លារ ឬ​លើស​ពី​នេះ​សម្រាប់ ឆ្នាំ​២០១៤ ហើយ​សុំ​ឲ្យ​មាន​ការ​ដំឡើង​ប្រមាណ​ជា ១៥ ទៅ ២០ ភាគរយ​ទៀត​សម្រាប់ ឆ្នាំ​២០១៥ ដែល​នោះ​ផ្ទុយ​ពី​ការ​ចង់​បាន​របស់​កម្មករ​អ៊ីចឹង យើង​មិន​ចង់​បាន ១២៨ ដុល្លារ​នៅ ឆ្នាំ​២០១៥ ទេ ដែល​នេះ​អាច​ធ្វើ​ឲ្យ​បញ្ហា​នៅ​តែ​កើត​មាន​ដដែល​ក្នុង​វិស័យ​ឧស្សាហ​កម្ម​កាត់​ដេរ»។

លោក ជា មុនី បាន​បញ្ជាក់​ទៀត​ថា ក្រសួង​ការងារ​មិន​បាន​យក​ខួរ​ក្បាល​មក​គិត ហើយ​សហជីព​លោក​នឹង​បន្ត​ធ្វើ​ការ​ទាមទារ​បន្ថែម​ទៀត​ដើម្បី​ឲ្យ​កម្មករ​មាន​ប្រាក់​ឈ្នួល​ហូប​ចុក​គ្រប់​គ្រាន់។

បន្ទាប់​ពី​ការ​សម្រេច​ដំឡើង​ប្រាក់​ឈ្នួល ឆ្នាំ​២០១៥ រួច​មក ខាង​និយោជក​បង្ហាញ​ពី​ការ​មិន​ពេញ​ចិត្ត ប៉ុន្តែ​ពួក​គេ​នឹង​គោរព​តាម​អ្វី​ដែល​រាជ​រដ្ឋាភិបាល​បាន​សម្រេច។ ជាមួយ​គ្នា​នេះ​ដែរ​ខាង​សមាគម​រោងចក្រ​កាត់ដេរ​ក៏​បាន​ប៉ាន់​ប្រមាណ​ផង​ដែរ​ថា នឹង​មាន​រោងចក្រ​ប្រមាណ​ជា ៣០ ទៅ ៥០ រោងចក្រ​អាច​ប្រឈម​នឹង​ការ​បិទ​ទ្វារ​រោងចក្រ​ផង​ដែរ ដែល​ធ្វើ​ឲ្យ​ប៉ះពាល់​ដល់​កម្មករ​ប្រមាណ​ជាង ៥០ ០០០ នាក់​ផង​ដែរ៕

អត្ថបទគួរចាប់អារម្មណ៍