.jpg)
អ្នកជំនាញស៊ីម៉ាក់កំពុងត្រួតពិនិត្យគ្រាប់មីនកន្លងមក។ រូបថត ស៊ីម៉ាក់
ភ្នំពេញៈ ក្នុងរយៈពេលពេញ ១ ឆ្នាំ ២០១៩ មជ្ឈមណ្ឌលសកម្មភាពកំចាត់មីនកម្ពុជា (ស៊ីម៉ាក់) បានរកឃើញ និងកម្ទេចចោលគ្រាប់មីន និងយុទ្ធភណ្ឌមិនទាន់ផ្ទុះជាង ៣៦ ០០០ គ្រាប់នៅលើផ្ទៃដីជិត ៦ ៧០០ ហិកតា នៃតំបន់ចម្ការមីន និងគ្រាប់មិនទាន់ផ្ទុះចំនួន ៤៨៧ ទីតាំងនៅទូទាំងប្រទេស ខណៈដែលរដ្ឋាភិបាលបានប្តេជ្ញាដោះមីនឲ្យអស់នៅត្រឹមឆ្នាំ ២០២៥។ នេះបើយោងតាមទិន្នន័យរបស់ស៊ីម៉ាក់ដែលត្រូវបានផ្សព្វផ្សាយកាលពីថ្ងៃពុធ។
ក្នុងរបាយការណ៍ផ្សព្វផ្សាយនោះលោក ហេង រតនា ប្រតិភូរាជរដ្ឋាភិបាលទទួលបន្ទុកជាអគ្គនាយកមជ្ឈមណ្ឌលសកម្មភាពកំចាត់មីនកម្ពុជាបានរៀបរាប់អំពីសកម្មភាពការងាររបស់អង្គភាពស៊ីម៉ាក់ដោយសង្ខេបថានៅរយៈពេល ១២ ខែនៃឆ្នាំ ២០១៩ ស៊ីម៉ាក់បានរកឃើញ និងកម្ទេចចោលគ្រាប់មីន និងយុទ្ធភណ្ឌមិនទាន់ផ្ទុះសរុប ៣៦ ១៦៥ គ្រាប់ ក្នុងនោះមានមីនប្រឆាំងមនុស្សចំនួន ៥ ៤១៥ គ្រាប់, មីនប្រឆាំងរថក្រោះចំនួន ៧៥ គ្រាប់, មីនច្នៃចំនួន ១៥ គ្រាប់ និងគ្រាប់យុទ្ធភណ្ឌមិនទាន់ផ្ទុះចំនួន ៣០ ៦៦០ គ្រាប់ លើផ្ទៃដីទំហំ ៦៦ ៩៦៦,៥៤៤ ម៉ែត្រការ៉េ ឬជិត ៦៧ គីឡូម៉ែត្រការ៉េ នៃតំបន់ចម្ការមីន និងគ្រាប់យុទ្ធភណ្ឌមិនទាន់ផ្ទុះចំនួន ៤៨៧ ទីតាំង។
លើសពីនេះ ស៊ីម៉ាក់បានបោះស្លាកសញ្ញាព្រំចម្ការមីនបានប្រវែង ៣៧១ ២០០ ម៉ែត្រ ព្រមទាំងឆ្លើយតបតាមសំណើសុំអន្តរាគមន៍របស់ប្រជាពលរដ្ឋ (EOD Calls) ចំនួន ៣ ១៤៤ សំណើ។
លោកគូសបញ្ជាក់ថា៖ «លទ្ធផលនៃប្រតិបត្តិការបោសសំអាតមីនពេញ ១ ឆ្នាំនេះបានផ្តល់ផលប្រយោជន៍ផ្ទាល់ដល់ប្រជាពលរដ្ឋចំនួន ៤០ ៨៥០ គ្រួសារ និងដោយប្រយោលជាង ៥០ ០០០ គ្រួសារ គិតជាមនុស្សជិត ១ លាននាក់»។
យ៉ាងណាក្តីលោក រតនា បានកត់សម្គាល់ថា លទ្ធផលនៃការអនុវត្តផែនការបោសសម្អាតមីនឆ្នាំនេះមានការធ្លាក់ចុះប្រមាណជាង ៨ ភាគរយ បើធៀបទៅនឹងឆ្នាំមុនដែលសម្រេចបានលទ្ធផលការងាររហូតដល់ជាង ៨២ ភាគរយ នៃផែនការដែលត្រូវបោសសម្អាតមីនក្នុងទំហំផ្ទៃដី ១១០ គីឡូម៉ែត្រការ៉េ ក្នុង ១ ឆ្នាំ។
ឆ្នាំ ២០១៨ រំដោះផ្ទៃដីចម្ការមីនបានរហូតដល់ជាង ៧៥ គីឡូម៉ែត្រការ៉េ។ ការធ្លាក់ចុះនេះគឺដោយសារការផ្លាស់ប្តូរផែនការ និងកម្លាំងបោសសម្អាតមីនមកបង្កើនកម្លាំងលើភារកិច្ចស្រាវជ្រាវចម្ការមីន និងចម្ការគ្រាប់វិញ។
លោកបញ្ជាក់ថា៖ «យើងបានបង្កើនការងារស្រាវជ្រាវ និងដាក់ស្លាកសញ្ញាកំណត់ព្រំប្រទល់ចម្ការមីន ចម្ការគ្រាប់បែកចង្កោម តាមលក្ខណៈបច្ចេកទេស និងមិនបច្ចេកទេសបានប្រមាណជិត ៩០០ ហិកតា។ តាមរយៈគម្រោង UNDP-CFR យើងបានបង្កើនការងារស្រាវជ្រាវ តំបន់ចម្ការមីនលើភូមិចំនួន ៣៨៦ បន្ថែមទៀតដែលស្ថិតក្នុងខេត្តប៉ៃលិន បាត់ដំបង និងខេត្តបន្ទាយមានជ័យហើយបានរកឃើញចម្ការមីន និងចម្ការគ្រាប់ថ្មីចំនួន ៦២២ ទីតាំងស្មើនឹងផ្ទៃដី ៩៦ ២៨៦-៥៨៦ ម៉ែត្រការ៉េ»។
ក្រៅពីសកម្មភាពបោសសម្អាតមីន និងគ្រាប់យុទ្ធភណ្ឌមិនទាន់ផ្ទុះស៊ីម៉ាក់ក៏បានចុះធ្វើការផ្សព្វផ្សាយអប់រំពីគ្រោះថ្នាក់នៃគ្រាប់មីន និងសំណល់ជាតិផ្ទុះពីសង្គ្រាមដល់ក្រុមគោលដៅបានចំនួន ១១២៣០ លើក និងជួយកៀរគរជំនួយសម្រាប់ការឧបត្ថម្ភគាំទ្រដល់ជនរងគ្រោះដោយសារគ្រាប់មីនផងដែរ។
លោក រតនា ក៏បានបង្ហាញអំពីការចូលរួមចំណែករបស់ស៊ីម៉ាក់ក្នុងការអនុវត្តគោលនយោបាយកាត់បន្ថយអត្រាគ្រោះថ្នាក់ ដោយសារគ្រាប់មីន និងការគាំទ្រការអភិវឌ្ឍន៍ហេដ្ឋារចនាសម្ព័ន្ធរូបវ័ន្ដនៅតំបន់រងការគំរាមកំហែងដោយសារមីនរបស់រាជរដ្ឋាភិបាលផងដែរតាមរយៈផ្ដល់ការហ្វឹកហ្វឺនដើម្បីពង្រឹងសមត្ថភាពជំនាញក្នុងការឆ្លើយតបព័ត៌មានស្ដីពីគ្រាប់មីន និងគ្រាប់យុទ្ធភណ្ឌមិនទាន់ផ្ទុះដល់កងកម្លាំងនគរបាលជាតិ និងកងយោធពលខេមរភូមិន្ទ ជាពិសេសបញ្ជាការដ្ឋានកងទ័ពជើងគោកប្រមាណជាង ៤០០ នាក់។
លោកបញ្ជាក់ថា៖ «នៅឆ្នាំនេះយើងបានផ្ដល់ការបណ្ដុះបណ្ដាលការអប់រំយល់ដឹងពីមីនដល់មន្ត្រីនគរបាលស្ម័គ្រចិត្តចំនួនជាង ១០០ នាក់ និងការហ្វឹកហ្វឺនជំនាញកម្ទេចយុទ្ធភណ្ឌមិនទាន់ផ្ទុះដល់កងយោធពលខេមរភូមិន្ទជាង ៣០០ នាក់។ ជាមួយគ្នានេះអង្គភាពរបស់យើងក៏បានផ្ដល់ការហ្វឹកហ្វឺនជំនាញក្នុងវិស័យសកម្មភាពកំចាត់មីនដល់មន្ត្រីជំនាញសកម្មភាពមីនមកពីប្រទេស អ៊ីរ៉ាក់ ឃើដ កូឡុំប៊ី និងប្រទេស ឡាវ។ ការហ្វឹកហ្វឺនទាំងនេះ ទទួលបានការគាំទ្រពី JICA និង JICS ដែលមានសិក្ខាកាមចូលរួមសរុប ១១៥ នាក់»។
បើតាមរបាយការណ៍ស៊ីម៉ាក់រហូតមកដល់បច្ចុប្បន្ននេះ កម្ពុជានៅមានផ្ទៃដីលាយឡំជាមួយមីន និងគ្រាប់យុទ្ធភណ្ឌមិនទាន់ផ្ទុះប្រមាណ ២ ១០០ គីឡូម៉ែត្រការ៉េ។ រាជរដ្ឋាភិបាលកម្ពុជាបានកំណត់គោលដៅច្បាស់លាស់ក្នុងការកម្ចាត់គ្រាប់មីនប្រឆាំងមនុស្សឲ្យអស់ត្រឹមឆ្នាំ ២០២៥។ ដើម្បីសម្រេចឲ្យបាននូវគោលដៅនេះមិនត្រឹមតែការគាំទ្រពីសហគមន៍អន្តរជាតិប៉ុណ្ណោះទេ ប៉ុន្តែការខិតខំប្រឹងប្រែងរបស់រាជរដ្ឋាភិបាល គឺសំខាន់ជាងអ្វីទាំងអស់។
គួរបញ្ជាក់ថាចាប់តាំងពីឆ្នាំ ១៩៩២ មកទល់បច្ចុប្បន្ន ប្រទេស ជប៉ុន នៅតែឈានមុខគេក្នុងចំណោមបណ្ដាប្រទេសដែលបានផ្ដល់ជំនួយគាំទ្រដល់ការងារបោសសម្អាតមីន និងយុទ្ធភណ្ឌមិនទាន់ផ្ទុះនៅកម្ពុជាដែលក្នុងនោះមានទាំងអាមេរិក កូរ៉េ និងចិនផងដែរ។
កាលពីពេលថ្មីៗនេះប្រទេសចិនបានផ្ដល់ជំនួយ ២,៥ លានដុល្លារដល់ស៊ីម៉ាក់សម្រាប់គាំទ្រសកម្មភាពបោសសម្អាតមីនរយៈពេល ៣ ឆ្នាំ (២០២០-២០២២) នៅខេត្តព្រះវិហារ, ឧត្តរមានជ័យ, ស្ទឹងត្រែង និងគាំទ្រដល់កម្លាំងអន្តរាគមន៍ដោះមីននៅខេត្តសៀមរាប កំពង់ឆ្នាំង និងខេត្តកំពង់ធំជាដើមដែលមានផែនការរំដោះផ្ទៃដីចម្ការមីន និងចម្ការគ្រាប់ជាង ១៧ គីឡូម៉ែត្រការ៉េ៕
