ភរិយារបស់លោក កែម ឡី សម្លឹងមើលសាកសពប្ដីដែលត្រូវបានបាញ់ស្លាប់នៅក្នុងហាងស្ដារម៉ាតនៃស្ថានីយប្រេងឥន្ធនៈកាល់តិច ស្ដុបបូកគោស្ថិតក្នុងខណ្ឌចំការមន រាជធានីភ្នំពេញកាលពីម្សិលមិញ។ ជីវ័ន
ភ្នំពេញៈ អ្នកវិភាគសង្គម និងនយោបាយឯករាជ្យដ៏ល្បីល្បាញរបស់កម្ពុជាលោក កែម ឡី ត្រូវបានខ្មាន់កាំភ្លើងបាញ់សម្លាប់បណ្តាលឲ្យស្លាប់ភ្លាមៗកាលពីម្សិលមិញនៅវេលាម៉ោង ៨ និង ៥០ នាទីព្រឹកនៅក្នុងហាងស្ដារម៉ាតនៃស្ថានីយប្រេងឥន្ធនៈកាល់តិចស្តុបបូកគោក្នុងខណ្ឌចំការមនដែលមានមនុស្សអ៊ូអរហើយខ្មាន់កាំភ្លើងម្នាក់ក៏ត្រូវបានចាប់ខ្លួនភ្លាមៗផងដែរ។ ការបាញ់ប្រហារទៅលើអ្នកវិភាគល្បីឈ្មោះរូបនេះបានធ្វើឲ្យមានការភ្ញាក់ផ្អើល និងមានការតក់ស្លុតយ៉ាងខ្លាំងដោយប្រជាពលរដ្ឋជាច្រើនបាននាំគ្នាទៅប្រមូលផ្តុំចោមរោមនៅកន្លែងកើតហេតុហើយមានប្រជាពលរដ្ឋខ្លះបានស្រែកយំរហូតដល់មានទំនាស់ពាក្យសម្តីជាមួយសមត្ថកិច្ចដែលហាមភរិយា និងកូនមិនឲ្យចូលមើលសពលោក កែម ឡី ទៀតផង។
ព្រះសង្ឃ និងសាធារណជនចោមរោមឡានដឹកសពលោក កែម ឡី បន្ទាប់ពីសមត្ថកិច្ចអនុញ្ញាតឲ្យយកសពចេញពីកន្លែងកើតហេតុ។ហេង ជីវ័ន
តើ លោក កែម ឡី ជានរណា?
លោក កែម ឡី កើតនៅថ្ងៃទី ១៩ ខែតុលា ឆ្នាំ ១៩៧០ ក្នុងគ្រួសារក្រីក្រមួយនៅភូមិអង្គតាកុក ឃុំលាយបូ ស្រុកត្រាំកក់ ខេត្តតាកែវ។ ឪពុករបស់លោកដែលជាសាស្ត្រាចារ្យបានស្លាប់នៅជំនាន់ ប៉ុល ពត ធ្វើឲ្យលោក និងបងប្អូនប្រុសស្រីពីរនាក់ទៀតក្លាយជាកូនកំព្រារស់នៅជាមួយម្តាយមេម៉ាយចាប់តាំងពី ឆ្នាំ ១៩៧៩ មក។
ដោយសារតែម្តាយជួបការលំបាកខាងជីវភាពនៅពេលរៀនបានត្រឹមថ្នាក់ ទី ៥ កុមារា កែម ឡី បានទៅសុំរស់នៅជាមួយស្ត្រីអ្នកលក់គុយទាវម្នាក់នៅទីរួមខេត្តតាកែវដើម្បីអាចបន្តការសិក្សាទៅមុខទៀត។
នៅពេលប្រឡងជាប់បាក់ឌុបលោក កែម ឡី បានចាកចេញពីខេត្តតាកែវមកសុំស្នាក់អាស្រ័យនៅវត្ត បទុម ក្នុងរាជធានីភ្នំពេញដើម្បីបន្តការសិក្សានៅមហាវិទ្យាល័យ។
លោកបានស្នាក់នៅវត្តរហូតដល់រៀនចប់មហាវិទ្យាល័យហើយបានចូលធ្វើការនៅក្រសួងសុខាភិបាលកាន់ខាងផ្នែកជំងឺឆ្លង។
ដោយសារតែធ្វើការងាររដ្ឋទទួលបានប្រាក់ខែទាបបុរសដែលមានមាឌធំសម្បុរសណ្តែកបាយនិយមកាត់សក់ខ្លីរូបនេះបានឈប់ធ្វើការងាររដ្ឋនៅក្នុងអំឡុងឆ្នាំ ២០០០ ហើយបានទៅធ្វើការនៅកាកបាទក្រហមកម្ពុជា។ បន្ទាប់មកលោកបានចេញទៅធ្វើការនៅអង្គការក្រៅរដ្ឋាភិបាល និងទៅធ្វើជាអ្នកប្រឹក្សាឲ្យអង្គការ UNDP អស់រយៈពេល ៤ ឆ្នាំ។ ក្រោយពីបញ្ចប់ការងារនៅ UNDP លោកបានទៅធ្វើការឲ្យក្រុមហ៊ុនមួយនៅថៃ។
លោក កែម ឡី បានបង្កើតក្រុមសិក្សាស្រាវជ្រាវផ្ទាល់ខ្លួនមួយដែលគេហៅថា Freeland consultant នៅឆ្នាំ ២០០៨ បន្ទាប់ពីលោកបានបញ្ចប់ការសិក្សានៅសាកលវិទ្យាល័យ ជូឡាឡុងកន ប្រទេសថៃផ្នែកជំនាញសិក្សាស្រាវជ្រាវលើផ្នែកសុខភាពសាធារណៈ និងបញ្ចប់ការសិក្សាពីសាកលវិទ្យាល័យ ម៉ាឡៃយ៉ាប្រទេសម៉ាឡេស៊ីលើផ្នែកវិទ្យាសាស្ត្រសង្គម។
ដំបូងឡើយលោក កែម ឡី បានធ្វើការសិក្សាស្រាវជ្រាវភាគច្រើនខាងផ្នែកសង្គមកិច្ចបន្ទាប់មកខាងផ្នែកដីធ្លីសិទ្ធិលំនៅឋានសិទ្ធិមនុស្សធនធានរ៉ែហើយចាប់ពីឆ្នាំ ២០១៤ លោកបានធ្វើការសិក្សាស្រាវជ្រាវភាគច្រើនទៅលើរឿងនយោបាយសេដ្ឋកិច្ច សង្គមកិច្ច និងវប្បធម៌។
ក្រៅពីនេះលោកក៏ជាអ្នករៀបចំគម្រោងសរសេរសំណើ ( Proposal) ឲ្យអង្គការក្រៅរដ្ឋាភិបាលជាតិអន្តរជាតិ និងជាអ្នកបង្កើតប្រព័ន្ធតាមដាន និងត្រួតពិនិត្យឲ្យក្រសួងសង្គមកិច្ច ក្រសួងការងារ និងទីស្តីការគណៈរដ្ឋមន្ត្រីទាក់ទងទៅនឹងកំណែទម្រង់រដ្ឋបាលសាធារណៈហើយលោកក៏ធ្លាប់ធ្វើការសិក្សាស្រាវជ្រាវឲ្យអុកស្វាមលើបញ្ហាវិភាគនយោបាយ និងសេដ្ឋកិច្ចធ្វើការសិក្សាស្រាវជ្រាវឲ្យអង្គការយូអេសអេអាយឌីលើការវាយតម្លៃលើគម្រោងបោះឆ្នោត។
លោក កែម ឡី ដែលតែងតែបង្ហាញពីការខ្វាយខ្វល់យ៉ាងខ្លាំងតែទៅលើបញ្ហារបស់ប្រទេសជាតិនោះមិនចង់លាតត្រដាងច្រើនពីបញ្ហាផ្ទាល់ខ្លួននោះទេដោយគ្រាន់តែបង្ហើបយ៉ាងខ្លីថាលោកបានរៀបការនៅឆ្នាំ ២០០១ ហើយបច្ចុប្បន្ន មានកូនសុទ្ធតែប្រុសចំនួន ៤ រូបកូនបងអាយុ ១៤ ឆ្នាំ និងកូនតូចអាយុ ៦ ឆ្នាំ។ បច្ចុប្បន្នភរិយារបស់លោកកំពុងមានផ្ទៃពោះ ៦ ខែ។
លោកបានធ្វើការសិក្សាយកជំនាញខាងពេទ្យក៏ប៉ុន្តែលោកមិនដែលបានធ្វើការខាងពេទ្យនេះទេ។
លោក កែម ឡី មិនមានការងារ ឬមុខរបរអ្វីផ្សេងក្រៅពីការសិក្សាស្រាវជ្រាវនោះទេប៉ុន្តែភរិយារបស់លោកគឺជាអាជីវករលក់ខោជជុះនៅផ្ទះល្វែងមួយនៅផ្សារបឹងកេងកងក្នុងរាជធានីភ្នំពេញ។
តាមមើលទៅលោក កែម ឡី ហាក់បីដូចជាបានដឹងខ្លួនមុនរួចជាស្រេចទៅហើយពីជោគវាសនារបស់លោកដែលតែងតែធ្វើការរិះគន់ឥតសំចៃដោយលោកបាននិយាយកាលពីពេលកន្លងមកហើយត្រូវបានគេចែកចាយតាមបណ្តាញសង្គមហ្វេសប៊ុកថា៖ «ពេលខ្ញុំវិភាគម្តងៗខ្ញុំមិនដែលគិតថាខ្ញុំនឹងមានជីវិតទេព្រោះយើងដឹងហើយថាយើងរស់នៅក្នុងហ្វូងឆ្កែចចក ហ្វូងខ្លា ហ្វូងពស់វែក ហ្វូងក្រពើតែខ្ញុំចង់ឲ្យពលរដ្ឋខ្មែរមានភាពក្លាហានឡើងបើយើងនៅតែខ្លាចគេនៅតែជិះជាន់យើង»។
លោក កែម ឡី ធ្លាប់បាននិយាយប្រាប់ភ្នំពេញប៉ុស្តិ៍កាលពីពេលកន្លងមកថាលោកគ្មានបំណងទៅបង្កើតគណបក្សនយោបាយទៅចូលរួមជាមួយគណបក្សនយោបាយណាមួយ ឬទៅចូលរួមជាមួយរដ្ឋាភិបាលដើម្បីទទួលបានតំណែងណាមួយនោះទេគឺលោកចង់បន្តធ្វើជាអ្នកឃ្លាំមើលសង្គមឯករាជ្យពីព្រោះលោកចង់រក្សាកេរ្តិ៍ឈ្មោះរបស់លោកឲ្យបានល្អផូរផង់រហូតដល់ថ្ងៃស្លាប់៕
បុគ្គលិកបម្រើការនៅហាងកាល់តិចកន្លែងកើតហេតុនិយាយថា៖ «ពេលនោះអត់មានមនុស្សច្រើនទេភ្ញៀវទាំងអស់បានរត់ចេញក្រៅ។ ខ្ញុំស្មានតែមានអីផ្ទុះ។ មានមនុស្សនៅខាងក្នុងស្រែកថា «ចោរប្លន់ៗ!»។ ប៉ុន្ដែស្ត្រីម្នាក់បានចេញមកក្រៅហើយនិយាយថាមិនមែនចោរប្លន់ទេគឺបាញ់សម្លាប់»។
ភរិយារបស់លោក កែម ឡី គឺអ្នកស្រី ប៊ូ រចនា ដែលមានផ្ទៃពោះ ៦ ខែបានឈរយំមើលសពប្តីតាមកញ្ចក់ពីខាងក្រៅផ្សារស្តារម៉ាតដោយសមត្ថកិច្ចបានរារាំងមិនឲ្យអ្នកស្រី និងកូនចូលទៅមើលសពប្តី សពឪពុកឡើយខណៈសមត្ថកិច្ចជំនាញមិនទាន់ធ្វើការត្រួតពិនិត្យទៅលើសាកសព។
អ្នកស្រី រចនា បាននិយាយទាំងទឹកភ្នែកថា៖ «វាមិនមែនជារឿងបុគ្គលទេវាពិបាកសម្រាប់ខ្ញុំនិយាយប៉ុន្តែវាជារឿងនយោបាយ។ វាអយុត្តិធម៌ណាស់សម្រាប់ប្តីរបស់ខ្ញុំពីព្រោះគាត់ជាមនុស្សល្អ។ ខ្ញុំបាត់បង់មនុស្សល្អវាអយុត្តិធម៌ណាស់។ មុនដំបូងគាត់ជូនខ្ញុំទៅផ្សាររួចហើយគាត់ក៏ចូលទៅផឹកកាហ្វេមិនទាន់បានផឹកផងកាហ្វេនៅលើតុនៅឡើយ»។
អ្នកនាំពាក្យអគ្គស្នងការនគរបាលជាតិលោក គៀត ច័ន្ទថារិទ្ធិ បានឲ្យដឹងថាជនសង្ស័យម្នាក់ត្រូវបានចាប់ខ្លួនភ្លាមៗប៉ុន្តែមិនទាន់ដឹងថាជនសង្ស័យមានគ្នាប៉ុន្មាននាក់នៅឡើយទេ។
លោកថ្លែងថា តាមអ្វីដែលជនសង្ស័យបានសារភាពដំបូងការបាញ់សម្លាប់នេះដោយសាររឿងជំពាក់លុយប៉ុន្តែលោកថាលោកមិនជឿលើការអះអាងនេះទេ។
កាលពីរសៀលម្សិលមិញលោក ជួន សុវណ្ណ អគ្គស្នងការរងនគរបាលជាតិ និងជាស្នងការរាជធានីភ្នំពេញបានធ្វើសន្និសីទកាសែតមួយដោយនិយាយថាជនសង្ស័យដែលចាប់បានគឺជាឃាតករយ៉ាងពិតប្រាកដ។
លោកថា សមត្ថកិច្ចនឹងបន្តស្រាវជ្រាវរកអ្នកដែលនៅពីក្រោយ ឬអ្នករួមគំនិត និងបក្ខពួកក្នុងឃាតកម្មនេះ។ លោកថាសមត្ថកិច្ចមានពន្លឺជាច្រើនរួចហើយ។ លោក ជួន សុវណ្ណ បន្តថាលោកមិនជឿថា ជួប សម្លាប់ គឺជាឈ្មោះពិតប្រាកដទេ។
ជាមួយគ្នានេះក្រសួងមហាផ្ទៃបានចេញសេចក្តីប្រកាសព័ត៌មានថាជនសង្ស័យមានឈ្មោះ ជួប សម្លាប់ អាយុ ៣៨ ឆ្នាំត្រូវបានចាប់ខ្លួនភ្លាមៗនៅលើផ្លូវសុធារសក្បែរវត្តស្វាយពពែក្នុងសង្កាត់ទន្លេបាសាក់ខណ្ឌចំការមន។ ជនសង្ស័យបានប្រើកាំភ្លើងម៉ាក Glock។
ជនសង្ស័យគឺជាកម្មករចម្ការដំណាំនៅខេត្តស្រះកែវប្រទេសថៃ និងមានស្រុកកំណើតនៅស្រុកស្វាយចេក ខេត្តបន្ទាយមានជ័យ។ ក្រៅពីថ្កោលទោស និងអះអាងថានឹងចាត់វិធានការតាមផ្លូវច្បាប់ក្រសួងមហាផ្ទៃក៏បានអំពាវនាវឲ្យសាធារណជន និងសារព័ត៌មានទុកពេលឲ្យសមត្ថកិច្ចធ្វើការតាមជំនាញចៀសវាងការផ្សាយព័ត៌មានដែលនាំឲ្យមតិសាធារណៈមានការយល់ច្រឡំ។
នៅវេលាម៉ោង ២ និង ៣០ នាទីសាកសពរបស់លោក បណ្ឌិត កែម ឡី ត្រូវបានសាច់ញាតិ និងប្រជាពលរដ្ឋរាប់រយនាក់ដែលគោរពស្រឡាញ់គាត់មានអ្នកខ្លះទ្រហ៊ោយំ និងអ្នកខ្លះកោរសក់បានហែដោយថ្មើរជើងទៅកាន់វត្តចាស់នៅជ្រោយចង្វារដើម្បីធ្វើបុណ្យតាមប្រពៃណីសាសនាដោយដឹកសាកសពក្នុងឡានរបស់គាត់ផ្ទាល់។ អ្នកចូលរួមទាំងនេះបានហៅលោក កែម ឡី ថាជា «វីរជន»។
ភ្លាមៗបន្ទាប់ពីការបាញ់ប្រហារដែលធ្វើឲ្យមានការភ្ញាក់ផ្អើល និងមានការរំជួលចិត្តយ៉ាងខ្លាំងពីមជ្ឈដ្ឋានប្រជាពលរដ្ឋខ្មែរជាច្រើននេះគណបក្សនយោបាយមួយចំនួន និងអ្នកនយោបាយបានថ្កោលទោសចំពោះការបាញ់ប្រហារនេះ។
លោក សម រង្ស៊ី ប្រធានគណបក្សសង្គ្រោះជាតិដែលកំពុងនិរទេសខ្លួនឯងនៅក្រៅប្រទេសបានសរសេរនៅលើហ្វេសប៊ុករបស់លោកថា៖ «ដោយសារតែលោក (កែម ឡី) ជាគ្រោះថ្នាក់នយោបាយសម្រាប់ពួកគេម្ខាងទៀតបានជាពួកគេម្ខាងទៀតនោះបានជួលឃាតករឲ្យសម្លាប់លោក កែម ឡី ដូចគេបានជួលឃាតករកាលពីអតីតកាលថ្មីៗនេះឲ្យសម្លាប់លោក ជា វិជ្ជា និងលោក ឈុត វុទ្ធី ដែលជាកូនខ្មែរដ៏ឆ្នើមពីររូបទៀតដែលបានចេញមុខការពារផលប្រយោជន៍ប្រជារាស្ត្រខ្មែរដូចលោក កែម ឡី អ៊ីចឹងដែរ»។
លោក សម រង្ស៊ី បន្តថាលោក កែម ឡី មានចំណេះវិជ្ជាខ្ពង់ខ្ពស់ហើយមានទេពកោសល្យ និងសក្តានុពលនយោបាយគួរឲ្យកត់សម្គាល់។
មេបក្សប្រឆាំងរូបនេះបានចោទប្រកាន់ថា៖ «ដូចចំពោះការវាយប្រហារដោយគ្រាប់បែកកាលពីថ្ងៃ ៣០ មីនា ១៩៩៧ នៅទីក្រុងភ្នំពេញហើយដូចចំពោះការបាញ់សម្លាប់កណ្តាលថ្ងៃក្រោយមកជាបន្តបន្ទាប់នូវអ្នកប្រឆាំងដទៃទៀតដែលហ៊ានទិតៀនរដ្ឋាភិបាលអ៊ីចឹងដែរការបាញ់សម្លាប់លោក កែម ឡី ថ្ងៃនេះជាអំពើភេរវកម្មមួយទៀតរៀបចំដោយរដ្ឋអំណាច»។
ចំណែកលោកនាយករដ្ឋមន្ត្រី ហ៊ុន សែន ក៏បានចូលរួមរំលែកទុក្ខផងដែរហើយបានស្នើឲ្យសមត្ថកិច្ច «ចាត់វិធានការយ៉ាងម៉ឺងម៉ាត់ចំពោះករណីនេះ និងខិតខំត្រួតពិនិត្យអាវុធជាតិផ្ទុះ និងចាត់វិធានការពង្រឹងសន្តិសុខដើម្បីការពារសុវត្ថិភាពប្រជាជននៅទូទាំងប្រទេស»។
លោកបណ្ឌិត កែម ឡី កាលពីពេលថ្មីៗនេះបានចុះធ្វើការសិក្សាស្រាវជ្រាវអំពីបង្ហាញជនអន្តោប្រវេសន៍វៀតណាម និងទីកន្លែងផ្តល់ដីសម្បទានទៅឲ្យក្រុមហ៊ុនវៀតណាមនៅក្នុងខេត្តមួយចំនួន។
ថ្មីៗនេះលោកបានប្រាប់វិទ្យុក្នុងស្រុកមួយថាអ្នកវិភាគត្រូវមានវីសាចំនួន ៣ សម្រាប់ធ្វើដំណើរ «ទី ១ បើសិនគេមិនសប្បាយចិត្តគេឲ្យយើងទៅមន្ទីរពេទ្យយើងទៅៗគេឲ្យយើងទៅព្រៃសយើងទៅៗ។ បើសិនគេមិនសប្បាយចិត្តគេឲ្យយើងទៅវត្តព្រះពុទ្ធយើងទៅៗ។ អាហ្នឹងបានយើងវិភាគទៅយើងបញ្ចេញយោបល់ទៅវាត្រូវជ្រុង។ តែបើសិនជាយើងខ្លាចវីសាទាំង ៣ ហ្នឹងខ្ញុំគិតថាពិបាកនឹងផ្តល់ផលទៅដល់សង្គម»។
កូនប្រុសច្បងលោក កែម ឡី (អាវក្រហម) អង្គុយមើលសពឪពុកដេកក្នុងថ្លុកឈាម។ផា លីណា
ភរិយាលោក កែម ឡី អង្គុយយំមើលសពប្តីតាមកញ្ចក់នៅខាងក្រៅស្តារម៉ាតកាល់តិច។ហុង មិនា
ទិដ្ឋភាពពេលដង្ហែសពចេញពីកន្លែងកើតហេតុកាលពីម្សិលមិញ។ផា លីណា
ព្រះសង្ឃនាំមុខពិធីហែសពតាមផ្លូវព្រះមុនីវង្ស។ រូបថត ហេង ជីវ័ន ហេង ជីវ័ន
ផ្ទះវីឡាលោក កែម ឡី នៅទីរួមខេត្តតាកែវ។ហុង មិនា
ទិដ្ឋភាពនៅស្ថានីយប្រេងឥន្ធនៈកាល់តិចបូកគោកាលពីម្សិលមិញ។ហេង ជីវ័ន
ការដង្ហែសពទៅដល់ស្ពានជ្រោយចង្វារពីម្សិលមិញ។ រូបថត ហ្វេសប៊ុក
សពលោក កែម ឡី នៅវត្តចាស់។ផា លីណា
ក្រុមអ្នកគាំទ្រដែលមានកំហឹងនៅកាល់តិចម្សិលមិញ។ផា លីណា
លោក កែម ឡី អ្នកវិភាគឯករាជ្យដ៏ល្បីល្បាញ។ រូបថត ហ្វេសប៊ុក កែម ឡី
Contact PhnomPenh Post for full article
SR Digital Media Co., Ltd.ផ្ទះលេខ៤១ ផ្លូវ ២២៨ ភូមិ៤, សង្កាត់បឹងរាំង ខណ្ឌដូនពេញ រាជធានីភ្នំពេញ កម្ពុជា
Tel: +855 92 555 741
Email: webmasterpppost@gmail.com
Copyright © រក្សាសិទ្ធិ ដោយ ភ្នំពេញប៉ុស្តិ៍
