The Phnom Penh Post Search

Search form

Logo of Phnom Penh Post newspaper Phnom Penh Post - ព្យុះ​ភ្លៀង​មួយ​មេ​សម្លាប់​មនុស្ស​៦​នាក់ បំផ្លាញ​ផ្ទះ​៦០០​ខ្នង




ព្យុះ​ភ្លៀង​មួយ​មេ​សម្លាប់​មនុស្ស​៦​នាក់ បំផ្លាញ​ផ្ទះ​៦០០​ខ្នង

ព្យុះ​ភ្លៀង​មួយ​មេ​សម្លាប់​មនុស្ស​៦​នាក់ បំផ្លាញ​ផ្ទះ​៦០០​ខ្នង

130318_08
> ផ្លេកបន្ទោរបង្កជារន្ទះគួរឲ្យព្រឺព្រួចមួយ កើតឡើងកាលពីចុងរដូវវស្សាឆ្នាំកន្លងទៅ ម៉េង គឹមឡុង

ផ្លេក​បន្ទោរបង្ក​ជារន្ទះ​គួរ​ឲ្យ​ព្រឺ​ព្រួច​មួយ កើត​ឡើង​​កាល​ពី​ចុងរដូវ​វស្សា​​ឆ្នាំ​​កន្លង​ទៅ​។ រូបថត ម៉េង គឹម​ឡុង​

ភ្នំពេញៈ លំនៅ​ឋាន​ពល​រដ្ឋ​ប្រហែល​​៦០០​ខ្នង​​​ត្រូវ​បាន​បំផ្លាញ​ មនុស្ស​៦នាក់​​ស្លាប់​និង​​ច្រើ​ន​នាក់​ទៀត​បាន​រង​របួស ដោយ​សារ​ព្យុះ​ភ្លៀង​​កាល​ពី​ចុង​សប្តា​ហ៍​​មុន​​នៅ​​តាម​បណ្តា​​ខេត្ត​ មួយ​ចំនួន​​ខណៈ​ដែល​ក្រសួង​ធនធាន​ទឹក​ និង​ឧតុនិយម​បាន​​ប្រកាស​ជូន​ដំណឹង​អំពី​បាតុភូត​ធម្ម​ជាតិ​ដែល​នឹង​កើត​មាន​លើ​ប្រទេស​កម្ពុជា​​អាច​ធ្វើ​ ឲ្យ​ប៉ះពាល់​ដល់​អាយុ​ជីវិត ទ្រព្យសម្បត្តិ​ របស់​មនុស្ស​សត្វ​ និង រុក្ខជាតិ។

លោក​ ឌៀប ឈុន​ អភិបាល​ស្រុក​ថ្មពួក ក្នុង​ខេត្ត​បន្ទាយ​មាន​ជ័យ​បាន​ឲ្យ​ដឹង​ថា ព្យុះ​ភ្លៀង​បាន​បំផ្លាញ​ផ្ទះ​ពលរដ្ឋ​នៅ​ស្រុក​ពីរគឺ ស្រុក​ស្វាយ​ចេក​ និង​ស្រុកថ្ម​ពួក ពី​ព្រលប់​ថ្ងៃ​ព្រហស្បតិ៍​អស់​រាប់​រយ​ខ្នង​ និង​បង្កឲ្យ​មនុស្ស​ម្នាក់​​ស្លាប់​ និង​ពីរ​នាក់ រងរបួស​។

លោក​បញ្ជាក់​ថា៖​«ផ្ទះ​២៩៦​ខ្នង បាន​រងការ​ខូចខាត​ ក្នុង​នោះ​មាន​២៨​ខ្នង បាក់​រាប​ដល់​ដី​​»។

លោក បន្ត​ទៀត​ថា​ មាន​ភ្លៀង​ព្យុះ​នេះ ក៏​មាន​រន្ទះ​បាញ់​ស​ម្លាប់​ស្រ្តី​វ័យ​៣១​ឆ្នាំ​ម្នាក់​ និង​បណ្តាល​ឲ្យ​ផ្ទះ​រដួល​រលំ​សង្កត់​ឪពុក​​និង​កូន​ប្រុស​វ័យ​១៣​ឆ្នាំ​ម្នាក់​ រង​របួស​ជា​ទម្ងន់​ ​ត្រូវ​បញ្ជូន​ទៅ​មន្ទីរ​ពេទ្យ​ខេត្ត​សៀមរាប​ផង​ដែរ​។

លោក ​បន្ត​ឲ្យ​ដឹង​ថា នៅ​ស្រុក​ស្វាយ​ចេក ​ក៏​មាន​ផ្ទះ​​៤៦​ខ្នង​ដួល​រលំ ​និង​មាន​មនុស្ស​ពីរ​នាក់​បាន​រង​របួស​​ដែរ​។​ លោក​ ឌៀប​ ឈុន​ ​ថ្លែង​ថា៖«ខ្ញុំ​បាន​ណែ​នាំ​ឲ្យ​ពលរដ្ឋ​​ប្រុង​ប្រយ័ត្ន​ ដោយ​ត្រៀម​ទីជម្រក​សមរម្យ​ទុក​ការពារ​ព្យុះ​ ព្រោះ​ផ្ទះ​គាត់​ភាគ​ច្រើន​​សង់​​មិន​សូវ​ធានា​​សុវត្ថិភាព​ប៉ុន្មាន​ទេ​។ ​ឆ្នាំ​មុន​មាន​ផ្ទះ​តែ​២៤ ​ត្រូវ​បាន​បំផ្លាញ ដោយ​ព្យុះ​ភ្លៀង​ដែរ​»។

លោក ម៉ែន​ វណ្ណា ​អភិបាល​ស្រុក​ស្នួល​ ខេត្ត​ក្រចេះ ​បាន​ឲ្យ​ដឹង​ថា​ ព្យុះភ្លៀង​ពី​យប់​ថ្ងៃ​ព្រហស្បតិ៍​បាន​បំផ្លាញ​ផ្ទះ​ជាង​៤០​ខ្នង​នៅ​ក្នុង ស្រុក​នេះ​ដែរ​។

លោក​​ថ្លែង​ថា៖ «ផ្ទះ​៤៤​ខ្នង​រង​ការ​បំផ្លាញ​ ​ក្នុង​នោះ​មួយ​ចំនួន​បាន​ដួល​រលំ​ខ្ទេច​តែម្តង​ ហើយ​​បុរសម្នាក់​វ័យ៤០​ឆ្នាំ​ បាន​ស្លាប់​ដោយ​​ផ្ទះ​​បាក់​សង្កត់​ និង​៣នាក់​​ទៀត​បាន​រងរបួស​ធ្ងន់​»។

ព្យុះភ្លៀង​បាន​កើត​មាន​នៅ​ស្រុក​ រតនមណ្ឌល​ និង​ស្រុក​ភ្នំព្រឹក​ ខេត្ត​បាត់ដំបង​ដែរ​ ដែល​បង្ក​​ឲ្យ​មនុស្ស​ម្នាក់​ស្លាប់​ដោយ​ត្រូវ​ដើម​ឈើ​បាក់​សង្កត់ និង​​ដួល​រលំ​ផ្ទះ​ជាង​៤០​ខ្នង​។​

ផ្ទះជា​ច្រើន​ខ្នង​ទៀត​ក៏​រង​ការ​ បំផ្លាញ​នៅ​ខេត្ត​ព្រះវិហារ​ ហើយ​មាន​មនុស្ស​២​នាក់​បាន​ស្លាប់​ ខេត្ត​កំពង់ចាម ម្នាក់​បាន​ស្លាប់​ ខេត្ត​ក្រចេះ​ និង​ខេត្ត​ប៉ៃលិន​។

កាល​ពី​ថ្ងៃសុក្រ​ ក្រសួង​ធនធាន​ទឹក និង​ឧតុ​និយម​បាន​ចេញ​សេចក្តី​ជូន​ដំណឹង​ដល់​សាធារណជន​ឲ្យ​មាន​ការ​ប្រុង​ប្រយ័ត្ន​ចំពោះ​ព្យុះភ្លៀង​ ដែល​នឹង​អាច​កើត​មាន​ចាប់​ពី​ពាក់​កណ្តាល​ខែ​មីនា​ រហូត​ដល់​ខែ​មិថុនា។​

ប្រទេស កម្ពុជា​នឹង​អាច​មាន​បាតុ​ភូត​​ធម្មជាតិ​គ្រោះថ្នាក់​មួយ​ចំនួន​ដូចជា​ ផ្គរ រន្ទះ​ ខ្យល់​កន្រ្តាក់​កើត​ឡើង។ ក្នុង​សេចក្តី​ប្រកាស​នេះ​​បញ្ជាក់​ថា​ បាតុ​ភូត​ធម្មជាតិ​ទាំងនេះ​អាច​ធ្វើ​ឲ្យ​មាន​ការ​ប៉ះពាល់​​ដល់​អាយុ​ជីវិត ​ទ្រព្យសម្បត្តិ​របស់​មនុស្ស​ សត្វ​ រុក្ខជាតិ​​។

ក្រសួង​ធនធាន​ទឹក​ និង​ឧតុនិយម បញ្ជាក់​ជូន​សាធារណជន​ឲ្យ​​ជ្រាបថា ជា​ទូទៅ​បាតុភូត​ទាំង​អស់​នេះ ច្រើន​កើត​នៅ​តំបន់​មាន​អាកាសធាតុ​ក្តៅ​ខ្លាំង និង​មាន​ការ​កកើត ជា​បណ្តុំ​ពពក មាន​រាង​ដូច​ជា​ផ្សិត និង​បន្ទាប់​មក​ពពក​នេះ បាន​វិវត្ត​ទៅ​ជា​ពណ៌​ខ្មៅ រក​កល​ភ្លៀង ស្រប​ពេល​នោះ​ផ្គរ​រន្ទះ​ខ្យល់​កន្ត្រាក់ ក៏​កើត​មាន​ឡើង​ផង​ដែរ​៕

អត្ថបទគួរចាប់អារម្មណ៍