រតនគិរីៈ អធិការនគរបាលស្រុកតាវែង លោក សម្បត្តិកុសល ត្រូវបានលោកស្នងការនគរបាលខេត្តរតនគិរីសម្រេចដាក់ពិន័យដោយព្យួរការងារជាបណ្ដោះអាសន្ន បន្ទាប់ពីលោករងបណ្ដឹងពីមន្ត្រីក្រោមឱវាទចោទពីបទ «ជេរប្រមាថ និងប្រើអំពើហិង្សាបាញ់គំរាមដោយអាវុធ»។ នេះបើតាមលោកស្នងការរងនគរបាលខេត្តម្នាក់កាលពីម្សិលមិញ។
លោក ចៅ នាង ស្នងការរងខេត្តរតនគិរីបានប្រាប់ភ្នំពេញប៉ុស្តិ៍ថា បន្ទាប់ពីពិនិត្យពាក្យបណ្ដឹងរបស់មន្ត្រីនគរបាលស្រុកតាវែងរួចមកនៅថ្ងៃទី ៤ ខែ មេសា ឆ្នាំ ២០២០ ក្រុមគណៈកម្មការវិន័យនៃស្នងការដ្ឋាននគរបាលខេត្តរតនគិរីបានសម្រេចដាក់ពិន័យរដ្ឋបាលទៅលើលោក សម្បត្តិ កុសល អធិការស្រុកតាវែងដោយព្យួរការងារជាបណ្ដោះអាសន្ន និងតម្រូវឲ្យចូលបង្ហាញខ្លួននៅការិយាល័យបុគ្គលិកនៃស្នងការដ្ឋាននគរបាលខេត្តរតនគិរីរៀងរាល់ម៉ោងធ្វើការដើម្បីរង់ចាំបទបញ្ជាថ្មី។
លោក នាង បានថ្លែងថាលោក សម្បត្តិ កុសល ត្រូវបានមន្ត្រីក្រោមឱវាទ ១៩ នាក់ ដែលភាគច្រើនជាអ្នកមានឋានន្តរស័ក្តិជានាយរងផ្នែក នាយផ្នែក និងអធិការរងបានប្ដឹងចោទប្រកាន់ពីបទ «ជេរប្រមាថ និងប្រើអំពើហិង្សាបាញ់គំរាមដោយអាវុធមកលើកងកម្លាំងនគរបាលជាតិ» ដែលជាមន្ត្រីក្រោមឱវាទរបស់ខ្លួន ដែលករណីនេះបានកើតឡើងកាលពីថ្ងៃទី ២៧ ខែ មីនា ឆ្នាំ ២០២០។ ក្នុងបណ្ដឹងនោះមន្ត្រីនគរបាលស្រុកតាវែងបានសំណូមពរឲ្យថ្នាក់ដឹកនាំផ្លាស់ប្ដូរការងារ លោក សម្បត្តិ កុសលចេញពីអធិការដ្ឋាននគរបាលស្រុកតាវែងផងដែរ។
លោកថ្លែងថា៖ «នៅពេលនេះក្រុមគណៈកម្មការវិន័យកំពុងបន្តស៊ើបអង្កេតលើសំណុំរឿងដ៏អាស្រូវនេះ ដោយបានព្យួរការងារលោក សម្បត្តិ កុសល ជាបណ្ដោះអាសន្ន និងតម្រូវឲ្យមកបង្ហាញខ្លួននៅការិយាល័យបុគ្គលិកនៃស្នងការដ្ឋាននគរបាលខេត្តរតនគិរីរៀងរាល់ម៉ោងធ្វើការដើម្បីរង់ចាំទទួលបទបញ្ជាថ្មី»។
ក្នុងពាក្យបណ្ដឹងរបស់មន្ត្រីនគរបាលស្រុកតាវែងដែលបានប្តឹងសុំកិច្ចអន្តរាគមន៍ទៅលោកស្នងការនគរបាលខេត្តរតនគិរីជួយរកយុត្តិធម៌ដល់ពួកគេនោះបានរៀបរាប់ថា ក្រៅពីជេរប្រមាថ និងបាញ់គំរាមដល់មន្ត្រីនគរបាលក្រោមឱវាទជាង ១០ គ្រាប់ លោក សម្បត្តិ កុសល បានអួតក្អេងក្អាងថា គ្មានអ្នកណាធ្វើអីគាត់បានទេ ព្រោះគាត់មានខ្នងបង្អែកជាអ្នកធំ ហើយថាកាលដែលគាត់បានឡើងតំណែងជាអធិការស្រុកតាវែងនេះគឺគាត់បានចំណាយលុយអស់ចំនួន ៥ ទៅ ៦ ម៉ឺនដុល្លារ។
ទោះជាយ៉ាងណាករណីនេះលោកសម្បត្តិ កុសល បានច្រានចោលចំពោះការចោទប្រកាន់នេះ ហើយថា «វាជារឿងមិនពិត»។ លោកបានបន្ថែមថា៖ «វាជារឿងយល់ ឬស្ដាប់ច្រឡំ [របស់ពួកគេ] តែប៉ុណ្ណោះ»។
ក៏ប៉ុន្តែកាលពីម្សិលមិញលោក ហុស រឹម អធិការស្ដីទីស្រុកតាវែងបានប្រាប់ភ្នំពេញ-ប៉ុស្តិ៍ថា ប្រសិនបើរឿងយល់ ឬស្ដាប់ច្រឡំនោះ គ្មានមន្ត្រីក្រោមឱវាទណាម្នាក់ប្ដឹងគាត់ [លោក សម្បត្តិ កុសល] ទៅស្នងការដ្ឋាននគរបាលខេត្តរតនគិរី ដើម្បីស្នើសុំជួយរកយុត្តិធម៌នោះទេ។
លោកបានបញ្ជាក់ថា៖ «វាជារឿងពិត។ គាត់បានជេរប្រមាថ និងបានបាញ់គំរាមពួកយើងជាមន្ត្រីក្រោមឱវាទចំនួន ១១ គ្រាប់កាលពីថ្ងៃទី ២៧ ខែ មីនា ឆ្នាំ ២០២០ ដែលសកម្មភាពនេះជាបទល្មើសព្រហ្មទណ្ឌ ដែលត្រូវប្រឈមផ្ដន្ទាទោសតាមបញ្ញត្តិមាត្រា ២០៧ នៃក្រមព្រហ្មទណ្ឌ»។
បើយោងមាត្រា ២០៧ នៃក្រមព្រហ្មទណ្ឌលោក សម្បត្តិកុសល អាចប្រឈមការផ្ដន្ទាទោសជាប់ពន្ធនាគារពី ១ ឆ្នាំទៅ ៣ ឆ្នាំ និងពិន័យជាប្រាក់ពី ២ លានរៀលទៅ ៥ លានរៀល ប្រសិនបើក្រុមគណៈកម្មការវិន័យនៃស្នងការដ្ឋាននគរបាលខេត្តរតនគិរីរកឃើញកំហុសនេះ ហើយបញ្ជូនទៅតុលាការដើម្បីសម្រេចក្ដីនោះ៕