.jpg)
លោក ឡុង ប៉ុណ្ណាស៊ីរីវត្ថ អ្នកនាំពាក្យក្រសួងវប្បធម៌ក្នុងសន្និសីទថ្ងៃទី ៦ មេសា។ ហេង ជីវ័ន
ភ្នំពេញៈ ក្រសួងវប្បធម៌ និងវិចិត្រសិល្បៈព្រមានចាត់វិធានការតាមផ្លូវច្បាប់ចំពោះអ្នកប្រើប្រាស់គេហទំព័រ បណ្តាញទំនាក់ទំនងសង្គម និងអ្នកនិពន្ធ ដែលផ្សព្វផ្សាយគ្រប់រូបភាពសារជាអក្សរ សំឡេង វីដេអូមានចរិតលក្ខណៈអាសអាភាស ស្រើបស្រាល អុជអាល បំបែកបំបាក់ និងប្រកាន់ពូជសាសន៍ដែលមានផលប៉ះពាល់ដល់វប្បធម៌ ទំនៀមទម្លាប់ប្រពៃណីជាតិ។
តាមសេចក្តីណែនាំរបស់ក្រសួងវប្បធម៌ និងវិចិត្រសិល្បៈកាលពីថ្ងៃទី ៨ ឧសភា បញ្ជាក់ថា ក្រសួងវប្បធម៌ និងវិចិត្រសិល្បៈតែងសង្កេតឃើញអ្នកប្រើប្រាស់គេហទំព័រ និងបណ្ដាញទំនាក់ទំនងសង្គមមួយចំនួន ជាពិសេសអាជីវករតាមប្រព័ន្ធអនឡាញ (Online) អ្នកនិពន្ធបទភ្លេង ទំនុកច្រៀង និងអ្នកសម្ដែងក្រៅប្រព័ន្ធបានផ្សព្វផ្សាយរូបភាព សារជាអក្សរ សំឡេង និងវីដេអូ ប្រកបដោយអសីលញ្ញាណ។ ប្រាសចាកពីក្រមសីលធម៌បង្កឲ្យប៉ះពាល់យ៉ាងធ្ងន់ធ្ងរដល់វប្បធម៌ ទំនៀមទម្លាប់ ប្រពៃណី អត្តសញ្ញាណ និងកិត្យានុភាពជាតិជារឿយៗ។
លិខិតបន្តថា ដើម្បីបញ្ចៀសបាននូវផលប៉ះពាល់ និងរក្សាបានសេចក្តីថ្លៃថ្នូរ ព្រមទាំងគុណតម្លៃក្នុងនាមជាពលរដ្ឋកម្ពុជា «ព្រះរាជាណាចក្រនៃវប្បធម៌» ក្រសួងវប្បធម៌ និងវិចិត្រសិល្បៈណែនាំដល់អ្នកប្រើប្រាស់គេហទំព័រ និងបណ្តាញទំនាក់ទំនងសង្គមទាំងអស់បញ្ឈប់នូវការផ្សព្វផ្សាយគ្រប់រូបភាព សារជាអក្សរ សំឡេង និងវីដេអូដែលមានចរិតលក្ខណៈ អាសអាភាស ស្រើបស្រាល អុជអាល បំបែកបំបាក់ ប្រកាន់ពូជសាសន៍ ពណ៌សម្បុរ ដែលបង្កឲ្យមានផលប៉ះពាល់ដល់វប្បធម៌ ទំនៀមទម្លាប់ ប្រពៃណី ជំនឿ សាសនា សេចក្តីថ្លៃថ្នូរ និងកិត្យានុភាពរបស់សង្គមជាតិចាប់ពីថ្ងៃចេញសេចក្តីណែនាំ នេះតទៅជាកំហិត។
លិខិតបន្ថែមថា៖ «ក្នុងករណីដែលបុគ្គល ឬក្រុមណាមួយនៅបន្តប្រព្រឹត្តសកម្មភាពអវិជ្ជមានខាងលើ ក្រសួងវប្បធម៌ និងវិចិត្រសិល្បៈនឹងសហការជាមួយក្រសួងមហាផ្ទៃ ក្រសួងព័ត៌មាន ក្រសួងប្រៃសណីយ៍ និងទូរគមនាគមន៍ ស្ថាប័នពាក់ព័ន្ធមួយចំនួនទៀតចាត់វិធានការដោយអនុលោមតាមក្រមសីលធម៌នៃអ្នកសិល្បៈ»។
លើសពីនេះលិខិតបញ្ជាក់ថា៖ «នឹងដាក់ពាក្យបណ្ដឹងទៅតុលាការដោយអនុលោមទៅតាមក្រមព្រហ្មទណ្ឌច្បាប់ស្តីពីការបង្ក្រាបអំពើជួញដូរមនុស្ស និងអំពើធ្វើអាជីវកម្មផ្លូវភេទ អាស្រ័យទៅតាមស្ថានបទល្មើសដែលអ្នកប្រើប្រាស់គេហទំព័រ និងបណ្តាញទំនាក់ទំនងសង្គមបានប្រព្រឹត្ត»។
លោក ឡុង ប៉ុណ្ណាស៊ីរីវត្ថ រដ្ឋលេខាធិការ និងជាអ្នកនាំពាក្យក្រសួងវប្បធម៌ និងវិចិត្រសិល្បៈថ្លែងកាលពីថ្ងៃទី ១០ ឧសភា ថាមន្ត្រីជំនាញនៃក្រសួងវប្បធម៌កំពុងធ្វើការតាមនីតិវិធី។ ជំហានដំបូងបានធ្វើការអប់រំ ណែនាំចំពោះអ្នកដែលបានប្រព្រឹត្តខុស ឬធ្វើឲ្យប៉ះពាល់ដល់កិត្តិយសវប្បធម៌ ទំនៀមទម្លាប់ និងប្រពៃណី។ ជំហានបន្ទាប់ទៀត កោះហៅសាមីខ្លួន និងអ្នកពាក់ព័ន្ធមកធ្វើការបំភ្លឺនៅទីស្ដីការក្រសួងវប្បធម៌ និងវិចិត្រសិល្បៈផ្ទាល់ ព្រមទាំងតម្រូវឲ្យធ្វើកិច្ចសន្យាបញ្ឈប់សកម្មភាពទាំងឡាយណាដែលក្រសួងបានណែនាំកន្លងមក។
លោកបន្តថា ចំពោះជំហានចុងក្រោយនេះក្រសួងវប្បធម៌នឹងសហការជាមួយក្រសួងព័ត៌មាន និងក្រសួងប្រៃសណីយ៍ និងទូរគមនាគមន៍ ដើម្បីព្រមានសាមីខ្លួនបន្ថែមទៀត និងតម្រូវឲ្យលុបរូបភាព ឬវីដេអូទាំងអស់ដែលប៉ះពាល់ទំនៀមទម្លាប់ចេញវិញ។ ប៉ុន្ដែករណីមិនព្រមអនុវត្ត ក្រសួងវប្បធម៌ និងវិចិត្រសិល្បៈនឹងសហការជាមួយក្រសួងមហាផ្ទៃ ដើម្បីដាក់ពាក្យបណ្ដឹងទៅតុលាការដោយអនុលោមទៅតាមក្រមព្រហ្មទណ្ឌច្បាប់ស្តីពីការបង្ក្រាបអំពើជួញដូរមនុស្ស និងអំពើធ្វើអាជីវកម្មផ្លូវភេទតាមស្ថានភាពជាក់ស្ដែងនៃបទល្មើស។
លោកបញ្ជាក់ថា៖ «យើងធ្លាប់ចាត់វិធានការរដ្ឋបាលគឺយើងបានអញ្ជើញគាត់មកទីស្ដីការក្រសួងវប្បធម៌ ដើម្បីធ្វើការអប់រំ ណែនាំបន្ថែមទៀតជុំវិញសកម្មភាពមិនប្រក្រតីរបស់គាត់នៅលើបណ្ដាញទំនាក់ទំនងសង្គម។ ប៉ុន្ដែខ្ញុំមិនចាំចំនួនប៉ុន្មាននាក់ទេដែលយើងធ្លាប់ហៅមកអប់រំផ្ទាល់កន្លងមកនេះ»។
លោកស្រី ចន ច័ន្ទលក្ខិណា ប្រធានសមាគមសិល្បករខ្មែរមិនអាចទាក់ទងសុំការបញ្ជាក់ជុំវិញករណីនេះបានទេ ដោយទូរស័ព្ទលោកស្រីគ្មានអ្នកទទួល។ ចំណែកលោក ព្រឿង ប្រណិត ប្រធានសមាគមអ្នកនិពន្ធខ្មែរក៏មិនអាចទាក់ទងសុំការអធិប្បាយជុំវិញសេចក្ដីណែនាំ និងការព្រមាននេះបានដែរ ដោយទូរស័ព្ទលោកគ្មានអ្នកទទួល។
ដោយឡែកលោក ឡឹក ជំនោរ អនុប្រធានសមាគមអ្នកនិពន្ធខ្មែរកាលពីថ្ងៃទី ១០ ឧសភា បានបដិសេធធ្វើអត្ថាធិប្បាយដោយលោកបញ្ជាក់ថា លោកមិនសូវទទួលបានព័ត៌មានច្បាស់លាស់ពីការណែនាំនេះទេ៕
