ភ្នំពេញៈ ព្រឹត្ដិការណ៍ពិព័រណ៍សៀវភៅលំដាប់ពិភពលោក «Big Bad Wolf Book Sale» បាននាំយកសៀវភៅជាភាសាអង់គ្លេសច្បាប់ដើមពីក្រៅប្រទេសជាង ១ លានក្បាល មកលក់បញ្ចុះតម្លៃចាប់ពី ៥០ ដល់ ៩០ ភាគរយ ជាលើកដំបូងនៅកម្ពុជា និងបានប្រកាសបរិច្ចាគចំនួន ៥០០ ក្បាល ដល់បណ្ណាល័យមួយចំនួនព្រមទាំងលើកទឹកចិត្តឲ្យអ្នកចូលរួមបរិច្ចាគបន្ថែមដើម្បីផ្ដល់ឱកាសឱ្យអ្នកមានជីវភាពខ្វះខាតអាចអានបានផងដែរ។
តាមសេចក្ដីប្រកាសព័ត៌មានរបស់ Big Bad Wolf Book Sale ក្នុងពេលបើកសម្ពោធពិព័រណ៍សៀវភៅនេះជាផ្លូវការកាលពីម្សិលមិញបានលើកឡើងថាការបរិច្ចាគសៀវភៅនេះ គឺស្របតាមការជឿជាក់ថា មនុស្សគ្រប់រូបគួរតែមានលទ្ធភាពទទួលបានសៀវភៅភាសាអង់គ្លេសដែលមានគុណភាពមិនថាពួកគេស្ថិតក្នុងស្ថានភាពណាឡើយ។
សេចក្ដីប្រកាសព័ត៌មាននេះបង្ហាញថា Big Bad Wolf Book Sale បានសហការជាមួយបណ្ណាល័យបញ្ញវន្ត និងបណ្ណាល័យកណ្តាលរបស់ក្រសួងអប់រំយុវជន និងកីឡាធ្វើជាដៃគូសម្រាប់កម្មវិធីទទួលខុសត្រូវចំពោះសង្គម (CSR) របស់ខ្លួនដែលមានឈ្មោះថា Red Readerhood ដើម្បីបរិច្ចាគសៀវភៅឲ្យទៅអ្នកដែលខ្វះខាតនៅកម្ពុជា។
សេចក្ដីប្រកាសនេះបញ្ជាក់ថា៖ «អ្នកចូលរួមត្រូវបានលើកទឹកចិត្តឱ្យបរិច្ចាគសៀវភៅនៅបញ្ជរ Red Readerhood ដែលមានទីតាំងបន្ទាប់ពីបញ្ជរគិតលុយនៅក្នុងសាលពិព័រណ៍។ សម្រាប់គំនិតផ្តួចផ្តើមនៅក្នុងកម្មវិធី Red Readerhood នេះ Big Bad Wolf Book Sale សន្យាថា នឹងបរិច្ចាគសៀវភៅចំនួន ៥០០ ក្បាលពីលើការបរិច្ចាគដែលប្រមូលបាននៅក្នុងកម្មវិធីពិព័រណ៍នេះថែមទៀត»។
លោក អ៊ុក ចាន់ដារ៉ា អ្នកនាំពាក្យពិព័រណ៍សៀវភៅនេះបានបញ្ជាក់ថា ការនាំយកសៀវភៅជាភាសាអង់គ្លេសច្បាប់ដើមពីក្រៅប្រទេសមកលក់ជូនសិស្សានុសិស្ស យុវវ័យ និងពលរដ្ឋខ្មែរនេះគឺដើម្បីបង្កើតឱកាសឲ្យបានអានសៀវភៅល្អ ច្បាប់ដើម និងបង្កើនជំនាញភាសាអង់គ្លេសរបស់ខ្លួនផងដែរ។
លោកថ្លែងថា៖ «ការតាំងពិព័រណ៍សៀវភៅនេះក៏ដើម្បីចូលរួមជួយដល់សង្គមកម្ពុជាផងដែរ មានន័យថាយើងបានអំពាវនាវដល់ប្រជាពលរដ្ឋ យុវជន សិស្សានុសិស្សដែលបានមកចូលរួម និងបានទិញសៀវភៅអាចចូលរួមបរិច្ចាគសៀវភៅ ១ ក្បាលតាមរយៈសកម្មភាព Red Readerhood ដែលសកម្មភាពនេះជាការសហការឧបត្ថម្ភសៀវភៅដល់បណ្ណាល័យ សម្ដេច ហ៊ុន សែន និងបណ្ណាល័យបញ្ញវន្តនៅរាជធានី-ភ្នំពេញផងដែរ»។
លោក ចាន់ដារ៉ា បានបង្ហាញជំនឿថា ព្រឹត្ដិការណ៍ពិព័រណ៍សៀវភៅលំដាប់ពិភពលោកដែលចាប់ពីថ្ងៃទី ៩ ដល់ថ្ងៃទី ២០ ខែមករា នៅផ្សាររុងរឿងក្នុងខណ្ឌជ្រោយចង្វារនេះនឹងមានមនុស្សប្រមាណ ៥០ ម៉ឺននាក់ ចូលរួមទស្សនា។
លោក សុខ ឡាក់ សហស្ថាបនិកបណ្ណាល័យបញ្ញវន្តបានចាត់ទុកពិព័រណ៍សៀវភៅនេះថាជាឱកាសដ៏កម្រមួយសម្រាប់អ្នកចូលចិត្ដអានសៀវភៅអាចទិញសៀវភៅច្បាប់ដើមល្អៗជាភាសាអង់គ្លេសនៅក្នុងប្រទេសកម្ពុជាបាន។
លោកថ្លែងថា៖ «សៀវភៅដែលដាក់លក់នេះមានតម្លៃទាបខ្លាំង បើប្រៀបធៀបនឹងការដាក់លក់ក្នុងទីផ្សារជាតិ និងអន្តរជាតិដែលអាចផ្ដល់ឱកាសដល់អ្នកមានលទ្ធភាពតិចតួច និងមធ្យមអាចទទួលបានសៀវភៅល្អ មានគុណភាពខ្ពស់សម្រាប់អានទុកជាចំណេះដឹងរបស់ខ្លួន»។
លោក សុខ ឡាក់ សង្ឃឹមថា ពិព័រណ៍នេះក៏នឹងផ្ដល់ឱកាសដល់ពលរដ្ឋ និងយុវជនខ្មែរនៅតាមបណ្ដាខេត្ដនានាឲ្យអាចទទួលបានសៀវភៅល្អៗបែបនេះយកទៅទុកអានផងដែរដែលស្របតាមគោលដៅកំណត់នៃពិព័រណ៍នេះថា មនុស្សទាំងអស់គួរតែមានលទ្ធភាពទទួលបានសៀវភៅល្អៗបែបនេះទាំងអស់គ្នា។
គួរបញ្ជាក់ថា សៀវភៅដែលនាំមកលក់បញ្ចុះតម្លៃក្នុងពិព័រណ៍សៀវភៅ Big Bad WolfBook នេះមានច្រើនប្រភេទដូចជា សៀវភៅសម្រាប់កុមារសៀវភៅប្រលោមលោកសៀវភៅរឿងពិត សៀវភៅលក់ដាច់បំផុត សៀវភៅប្រលោមលោកបែបវិទ្យាសាស្ត្រ សៀវភៅស្នេហា សៀវភៅអភិវឌ្ឍន៍ខ្លួនឯង សៀវភៅក្រាហ្វិក សៀវភៅអាជីវកម្ម សៀវភៅស្ថាបត្យកម្មសៀវភៅរចនា និងសៀវភៅជាច្រើនប្រភេទទៀត ៕