.jpg)
លោក Murphy (កណ្ដាល) និងលោក William (ឆ្វេង)។ ផា លីណា
ភ្នំពេញៈ ព្រឹទ្ធសភានៃសហរដ្ឋអាមេរិក កាលពីដើមខែមករា បានច្រានចោលសេចក្ដីស្នើរបស់រដ្ឋាភិបាលអាមេរិកដែលបានស្នើតែងតាំងលោក Patrick Murphy ជាឯកអគ្គរដ្ឋទូតប្រចាំនៅព្រះរាជាណាចក្រកម្ពុជាកាលពីខែសីហា ឆ្នាំ ២០១៨ ជំនួសលោក William A Heidt។ យោងតាមគេហទំព័ររបស់ស្ថាប័ននីតិប្បញ្ញត្តិរបស់សហរដ្ឋអាមេរិក។
គេហទំព័រដដែលនេះបានឲ្យដឹងថា ព្រឹទ្ធសភាសហរដ្ឋអាមេរិកបានសម្រេចធ្វើការបញ្ជូនត្រឡប់វិញនូវបេក្ខភាពលោក Murphy ដោយសារតែរូបលោកមិនត្រូវបានព្រឹទ្ធសភានីតិកាលទី ១១៥ អនុម័តយល់ព្រមតែងតាំងធ្វើជាឯកអគ្គរដ្ឋទូតអាមេរិកប្រចាំកម្ពុជានោះទេ។
ព្រឹទ្ធសភាអាមេរិក បានអនុម័តសំណើតែងតាំងបេក្ខជនជាច្រើនរូបជា ឯកអគ្គរដ្ឋទូតអាមេរិកនៅក្រៅប្រទេសដែលស្នើដោយលោក ប្រធានាធិបតី ដូណាល់ ត្រាំ មុនបញ្ចប់នីតិកាលទី ១១៥។ ទន្ទឹមគ្នានោះដែរបេក្ខភាពមួយចំនួនផ្សេងទៀត ក៏មិនត្រូវបានព្រឹទ្ធសភាអនុម័តផងដែរ ក្នុងនោះក៏មាន លោក Patrick Murphy ដែលជាបេក្ខភាពឯកអគ្គរដ្ឋទូតអាមេរិកប្រចាំកម្ពុជាហើយ ព្រឹទ្ធសភាបានសម្រេចបង្វិលបេក្ខភាពទាំងនោះទៅឲ្យប្រធានាធិបតី វិញ។
សេចក្តីប្រកាសបញ្ជាក់ដូច្នេះថា៖ «(Patrick Murphy) ត្រូវបញ្ជូនទៅឲ្យប្រធានាធិបតីអាមេរិកវិញ គឺជាការអនុវត្តតាមកថាខណ្ឌ ៦ មាត្រា ៣១ នៃបទបញ្ជាផ្ទៃក្នុងព្រឹទ្ធសភាអាមេរិក»។
បើយោងតាមកថាខណ្ឌនេះបានឲ្យដឹងថា ក្នុងករណីព្រឹទ្ធសភាផ្អាក ឬស្ថិតក្នុងវិស្សមកាលច្រើនជាង ៣០ ថ្ងៃ សំណើតែងតាំង ទាំងអស់ដែលកំពុងស្ថិតក្នុងដំណើរការ ហើយមិនទាន់បញ្ចប់អំឡុងពេលនេះ នឹងត្រូវបញ្ជូនត្រឡប់ទៅប្រធានាធិបតីតាមរយៈរដ្ឋមន្ត្រីការបរទេស ហើយសំណើទាំងនេះ នឹងមិនត្រូវបានពិចារណាឡើយរហូតដល់មានការស្នើឡើងវិញពីសំណាក់ប្រធានាធិបតី។
លោក Arend C Zwartjes អ្នកនាំពាក្យស្ថានទូតអាមេរិកប្រចាំនៅប្រទេសកម្ពុជាសុំមិនធ្វើការបកស្រាយ ទាក់ទងនឹងបញ្ហានេះដោយសារតែ ការបិទរដ្ឋាភិបាលសហរដ្ឋអាមេរិក។
លោក Murphy គឺជាឧបការីរងរដ្ឋមន្ត្រីការបរទេសសហរដ្ឋអាមេរិក ទទួលបន្ទុកកិច្ចការតំបន់អាស៊ីបូព៌ា និងប៉ាស៊ីហ្វិក ហើយ លោកត្រូវបានលោក ដូណាល់ ត្រាំ ជ្រើសរើសជាបេក្ខភាពឯកអគ្គរដ្ឋទូតវិសាមញ្ញ និងពេញសមត្ថភាពរបស់អាមេរិក ប្រចាំនៅព្រះរាជាណាចក្រកម្ពុជាកាលពីថ្ងៃទី ១០ ខែសីហា ជំនួសតំណែងឯកអគ្គរដ្ឋទូតផុតអាណត្តិ លោក វីលៀម ហេដត៍ (William A Heidt)។
សំណើតែងតាំងលោក ត្រូវបញ្ជូនទៅដល់ព្រឹទ្ធសភានៅថ្ងៃទី ១៦ ខែសីហា ឆ្នាំ ២០១៨ ហើយគណៈកម្មាធិការទំនាក់ទំនងបរទេសនៃព្រឹទ្ធសភាអាមេរិក បានបើកវេទិកាដេញដោលរូបលោកកាលពីថ្ងៃទី ០៤ ខែធ្នូ ឆ្នាំ ២០១៨។
កាលពីខែសីហា ឆ្នាំ ២០១៨ បើយោងតាម លោក វីលៀម ហេដត៍ដែលបានចុះផ្សាយតាមគណនី Instagram ផ្លូវការរបស់ស្ថានទូតអាមេរិកប្រចាំនៅកម្ពុជាឲ្យដឹងថា លោក Murphy ជាបេក្ខជនស័ក្តិសមបំផុតសម្រាប់តំណែងឯកអគ្គរដ្ឋទូតអាមេរិកនៅកម្ពុជានេះដែរព្រោះតែលោកមានបទពិសោធខ្ពស់ និងយល់ដឹងរាក់ជ្រៅពីការងារការទូតក្នុងតំបន់។
លោក វីលៀម ហេដត៍ បានបញ្ជាក់ដូច្នេះថា៖ «លោក Murphy មានការពិសោធដ៏ចំណានក្នុងការងារការទូត ហើយលោកស្គាល់តំបន់អាស៊ីអាគ្នេយ៍ច្បាស់ ហើយក៏យល់ដឹងពីគោលនយោបាយរបស់សហរដ្ឋអាមេរិកនៅក្នុងតំបន់ច្បាស់លាស់ខ្លាំងដូចគ្នាដែរ»។
លោក ផៃ ស៊ីផាន អ្នកនាំពាក្យរាជរដ្ឋាភិបាលបានថ្លែងឲ្យដឹងកាលពីថ្ងៃម្សិលមិញថា សេចក្ដីសម្រេចនោះជាជម្រើសព្រឹទ្ធសភារបស់សហរដ្ឋអាមេរិក។
លោកបានថ្លែងថា៖ «យើងមិនមានយោបល់អ្វីទេ។ អ្វីដែលយើងសង្ឃឹម ឯកអគ្គរដ្ឋទូត ដែលនឹងអញ្ជើញមកធ្វើការនៅស្រុកខ្មែរគឺតំណាងផលប្រយោជន៍ទាំង ២ ពិសេសគឺទំនាក់ទំនងល្អ និងកិច្ចសហប្រតិបត្តិការ។
សង្ឃឹមថា ឯកអគ្គរដ្ឋថ្មីដែលនឹងត្រូវបានតែងតាំងនាពេលឆាប់ៗនេះមិនលូកដៃចូលកិច្ចការផ្ទៃក្នុងរបស់ប្រទេសកម្ពុជា យើងគោរពគ្នាទៅវិញទៅមកហើយមិនជ្រៀតជ្រែកបញ្ហាផ្ទៃក្នុងរបស់ប្រទេសនីមួយៗ»៕
