.jpg)
ព្រះតេជគុណ ប៊ុន សាលួត និងប្រជាសហគមន៍កំពុងចុះពិនិត្យទីតាំងដែលមានការលួចកាប់ឈើក្នុងតំបន់សហគមន៍រុក្ខាវ័ន្តនាពេលថ្មីៗនេះ។ រូបថត សហគមន៍
ខេត្តឧត្តរមានជ័យ: សត្វព្រៃគ្រប់ប្រភេទ ក្នុងតំបន់សហគមន៍ការពារព្រៃឈើសង្ឃរុក្ខាវ័ន្ត កំពុងរងការគំរាមកំហែងពីក្រុមអ្នកបរបាញ់សត្វនាពេលយប់ ប៉ុន្ដែបទល្មើសកាប់បំផ្លាញព្រៃឈើមានអត្រាធ្លាក់ចុះ ខណៈព្រះសង្ឃ មន្ត្រីបរិស្ថាន មន្ត្រីរដ្ឋបាលព្រៃឈើ និងប្រជាពលរដ្ឋសហការគ្នាការពារព្រៃឈើ។ នេះបើតាមព្រះតេជគុណ ប៊ុន សាលួត ប្រធានសង្ឃសហគមន៍រុក្ខាវ័ន បានមានសង្ឃដីកាប្រាប់ភ្នំពេញប៉ុស្ដិ៍នៅថ្ងៃទី ៣ខែកញ្ញា។
តំបន់សហគមន៍ការពារព្រៃឈើ សង្ឃរុក្ខាវ័ន្ត មានផ្ទៃដីសរុបជិត ៣ ម៉ឺនហិកតា ស្ថិតនៅសង្កាត់កូនក្រៀល ក្រុងសំរោង ខេត្តឧត្តរមានជ័យ។ តំបន់ព្រៃឈើសង្ឃរុក្ខាវ័ន្ត ត្រូវបានគំរាមកំហែងខ្លាំង ចំពោះការបរបាញ់សត្វព្រៃ ការកាប់បំផ្លាញព្រៃឈើ និងការកាប់រុករានយកដីខុសច្បាប់ មុនពេលតំបន់នេះ ក្លាយជាទីតាំងសម្រាប់អភិរក្ស។
ព្រះតេជគុណ ប៊ុន សាលួត ប្រធានសង្ឃសហគមន៍រុក្ខាវ័ន្ដ បានមានសង្ឃដីកាថា សកម្មភាពកាប់បំផ្លាញព្រៃឈើមានអត្រាធ្លាក់ចុះត្រឹម ៥ ភាគរយ ប៉ុន្ដែការបរបាញ់សត្វព្រៃគ្រប់ប្រភេទ នៅក្នុងតំបន់នេះ មានការកើនឡើងគួរឲ្យកត់សម្គាល់ ព្រោះក្រុមអ្នកលួចបាញ់សត្វ ប្រើឧបករណ៍ឆក់នាពេលយប់ ព្រោះវាមានការលំបាកចំពោះអ្នកចុះល្បាត។
ព្រះតេជគុណបន្តថា ដោយមានការចូលរួមយ៉ាងសកម្ម ពីមន្ត្រី និងប្រជាសហគមន៍ បានធ្វើឲ្យពលរដ្ឋដែលធ្លាប់តែកាប់ព្រៃឈើ និងបរបាញ់សត្វព្រៃ មានការយល់ដឹងច្រើនពីសារៈប្រយោជន៍របស់ធនធានធម្មជាតិ និងគ្រោះមហន្តរាយនៃការបាត់បង់ធនធានធម្មជាតិ ព្រមទាំងចូលរួមការពារព្រៃឈើ និងអភិរក្សសត្វព្រៃ ទុកសម្រាប់កូនចៅជំនាន់ក្រោយ និងពិភពលោក។
ព្រះតេជគុណ សាលួតបញ្ជាក់ថា៖«សព្វថ្ងៃនេះ គឺយើងបានការពារបានច្រើនជាងមុន ប៉ុន្ដែការបរបាញ់សត្វព្រៃនេះ គឺនៅតែបន្តកើតមានឡើងជាបន្ដបន្ទាប់ ព្រោះក្រុមអ្នកបរបាញ់បានប្រើប្រាស់អន្ទាក់ឆក់ពេលយប់ ហើយវាក៏ជាហានិភ័យចំពោះអ្នកចុះល្បាតពេលយប់ដែរ»។
លោក ភួង លីណា ប្រធានមន្ទីរបរិស្ថានខេត្តឧត្តរមានជ័យ បានលើកឡើងថា បទល្មើសព្រៃឈើ និងសត្វព្រៃនាពេលនេះ មិនទាន់អាចលុបបំបាត់ទាំងស្រុងបានទេ ព្រោះក្រុមជនល្មើសមួយចំនួន បានធ្វើសកម្មភាពលួចលាក់តែពេលយប់ ដែលមានការលំបាក ចំពោះប្រជាសហគមន៍ និងមន្ត្រីចុះល្បាតក្នុងព្រៃ។
លោកបន្តថា សកម្មភាពបទល្មើសនៅមានបន្ដិចបន្ដួចតាមតំបន់ ប៉ុន្ដែមន្ត្រី និងប្រជាសហគមន៍បានទប់ស្កាត់ជាច្រើនករណីនៅក្នុងតំបន់នោះដែរ។ «យើងបានធ្វើការផ្សព្វផ្សាយពីច្បាប់ និងផលវិបាកនៃការកាប់បំផ្លាញព្រៃឈើ និងសត្វព្រៃ ហើយខ្ញុំបានចុះទៅជួបជាមួយសហគមន៍ការពារតំបន់នោះ ឲ្យពួកគាត់និយាយពីការលំបាកពីការងារនេះ ពួកគាត់ប្រាប់ខ្ញុំថា ឥឡូវនេះ ពេលថ្ងៃមិនមានបទល្មើសទេ គឺមានតែពេលយប់ ហើយពេលយប់ហ្នឹង មានការលំបាកក្នុងការចុះល្បាត ទើបយើងធ្វើឲ្យមានការខ្វះចន្លោះ»។
លោក ស្រី ណារ៉េន អ្នកសម្របសម្រួលសមាគមការពារសិទ្ធិមនុស្សអាដហុក (ADHOC) ខេត្តឧត្តរមានជ័យបានឲ្យដឹងថា សកម្មភាពបទល្មើសព្រៃឈើនេះ វានៅតែមានជាហូរហែរ ប៉ុន្ដែមានថ្ងៃខ្លះច្រើនករណី និងថ្ងៃខ្លះទៀតមានតិចករណី។ លោកចោទសួរថា នៅក្នុងតំបន់នោះ មានអ្នកការពារជាច្រើនស្ថាប័ន រួមទាំងប្រជាសហមគន៍ ហេតុអ្វីបានជាវានៅតែបន្តមានបទល្មើសកើតឡើងបែបនេះ។
លោកបញ្ជាក់ថា៖«មានការទប់ស្កាត់បណ្ដើរ និងមានការកាប់បំផ្លាញបណ្ដើរ ខ្ញុំអត់ដឹងពីមូលហេតុច្បាស់លាស់ទេ ប៉ុន្ដែខ្ញុំគិតថា បើខ្មោចស្រុកមិនបើកដៃ ខ្មោចព្រៃក៏មិនហ៊ានចូលមកដែរ។ អ៊ីចឹងអាចនឹងមានការឃុបឃិតគ្នារវាងឈ្មួញ និងមន្ត្រីពាក់ព័ន្ធ ហើយអ្នកគ្រប់គ្រងតំបន់នោះ គួរពិនិត្យតាមដានករណីនេះឲ្យបានច្បាស់ ព្រោះយើងមិនចង់ឲ្យមានអ្នកយាម ហើយមានអ្នកចាំបំផ្លាញអ៊ីចឹងទេ»៕
