The Phnom Penh Post Search

Search form

Logo of Phnom Penh Post newspaper Phnom Penh Post - ព្រៃ​ឈើ​នៅ​តំបន់​ទំនប់​សេសាន​កំពុង​ត្រូវ​កាប់​បំផ្លាញ

ព្រៃ​ឈើ​នៅ​តំបន់​ទំនប់​សេសាន​កំពុង​ត្រូវ​កាប់​បំផ្លាញ

ព្រៃ​ឈើ​នៅ​តំបន់​ទំនប់​សេសាន​កំពុង​ត្រូវ​កាប់​បំផ្លាញ

130109_07a
ក្រុមកម្មករដែលស៊ីឈ្នួលកាប់ឈើ នៅក្នុងតំបន់ទំនប់វារីអគ្គិសនី សេសាន ក្នុងឃុំស្រែគ កំពុងដាំបាយកាលពីសប្តាហ៍មុន ម៉ៃ វីរៈ

ស្ទឹងត្រែងៈ លោក សៀក មេគង្គ ​មេ​ឃុំ បាន​ចូល​ទៅ​ប្តូរ​ឯក​សណ្ឋាន​ក្នុង​ផ្ទះ​ឈើ​ដ៏​តូច​របស់​គ្រួសារ​លោក​ ក្នុង​ភូមិ​ស្រែគ ១ ស្រុក​សេសាន​មុន​ពេល​ដឹក​នាំ​អ្នក​យក​ព័ត៌មាន​ទៅ​កាន់​ទូក​មួយ​នៅ​ទន្លេ សេសាន ហើយ​ប្រាប់​ពួក​គេ​ឲ្យ​ឡើង​លើ​ទូក។

មេ​ឃុំ​ស្រែគ ដែល​បង្ហាញ​ខ្លួន ដូច​ជា​មេ បញ្ជា​ការ បាន​ថ្លែង​ថា៖«​ប្រសិន​បើ​ខ្ញុំ​ចុះ​ទៅ​កន្លែង​កាប់​ឈើ​ដោយ​គ្មាន​ឯក​សណ្ឋាន ប្រហែល​ខ្ញុំ​នឹង​មាន​បញ្ហា។ ប៉ុន្តែ ខ្ញុំ​ជា​អាជ្ញាធរ ហើយ​ខ្ញុំ​មាន​សិទិ្ធ​ដឹក​នាំ​ភ្ញៀវ​ទៅ​ត្រួត​ពិនិត្យ​កន្លែង​នេះ»។​

លោក មេគង្គ​ដែល​ជា​មន្រ្តី​គណបក្ស សម រង្ស៊ី បាន​ថ្លែង​ថា កាល​ពី​សប្តាហ៍​មុន លោក​ត្រូវ​បាន​គំរាម​ដោយ​មន្រ្តី​រដ្ឋបាល​ព្រៃ​ឈើ ហើយ​បាន​ព្រមាន​កុំ​ឲ្យ​និយាយ​ទៅ​កាន់​ប្រព័ន្ធ​ផ្សព្វផ្សាយ អំពី​ឈើ​ប្រណីត​ដែល​លោក​អះអាង​ថា បាន​និង​កំពុង​ត្រូវ​គេ​កាប់​បំផ្លាញ។

ខណៈ​ដែល​លោក មេគង្គ និយាយ​អំពី​ការ​ការ​ពារ​សហគមន៍​របស់​លោក សេចក្តី​ប្រាថ្នា​របស់​លោក​ចង់​ទាញ​យក​ការ​យក​ចិត្ត​ទុក​ដាក់​ពី​អន្តរ ជាតិ​ លើ​បញ្ហា​របស់​អ្នក​ភូមិ ហើយ​លោក ឈុត វុទ្ធី​ សកម្ម​ជន​បរិស្ថាន​ដែល​ត្រូវ​បាន​គេ​បាញ់​សម្លាប់ ចំណុច​ច្បាស់​មួយ​គឺ​ថា ការ​គំរាម​បែប​នេះ​ពុំ​បាន​រារាំង​លោក​ទេ។ ខណៈ​ពេល​ទូក​កំពុង​បើក​ទៅ​តំបន់​ព្រៃ​ឈើ​ ដែល​លោក​ថា កំពុង​រងការ​បំផ្លាញ លោក​បញ្ជាក់​ថា៖ «​ខ្ញុំ​ដឹង​ថា មន្រ្តី​ជាន់​ខ្ពស់​ជា​ច្រើន​នាក់ ព្រម​ទាំង​បុគ្គលិក​ក្រុមហ៊ុន​ខឹង​លោក​។ គេ​ព្រមាន​ខ្ញុំ​ឲ្យ​ឈប់​និយាយ​បញ្ហា​នេះ​ តែ​ខ្ញុំ​ធ្វើ​ការ​ឲ្យ​ប្រជាជន​ខ្ញុំ ដូច្នេះ​ខ្ញុំ​មិន​ភ័យ​ខ្លាច​ទេ។

Content image - Phnom Penh Post

ប្រជាជន​រាប់​រយ​គ្រួសារ ក្នុង​ឃុំ​របស់​លោក មេគង្គ និង​ប្រហែល​១០០០ គ្រួសារ​ជា​សរុប​នៅ​តំបន់​ធំ​ជាង​នេះ កំពុង​រស់​នៅ​ក្នុង​ផ្ទះ​ ដែល​នឹង​ជន់​លិច​ដោយ​អាង​ទឹក​ទំនប់​វារី​អគ្គិសនី​សេសាន​ក្រោម ២ ដែល​បាន​អនុម័ត​កាល​ពី​ខែ​កុម្ភៈ។

រដ្ឋាភិបាល បាន​សន្យា​ថា​ ជា​ការ​ដោះ​ដូរ​ដើម្បី​ត្រួស​ត្រាយ​ផ្លូវ​ដល់​ទំនប់​កម្លាំង ៤០០ មេហ្គាវ៉ាត់ តម្លៃ​៧៨១ ​លាន​ដុល្លារ​អាមេរិក​ដែល​នឹង​សាង​សង់​ដោយ​ក្រុមហ៊ុន Royal Group ​និង​ក្រុមហ៊ុន​ចិន​ Hydrolancang International Energy ចាប់​ពី​ឆ្នាំ​ក្រោយ គ្រួសារ​ទាំង​នោះ​នឹង​ទទួល​បាន​ដី​ស្រែ ផ្ទះ និង​ហេដ្ឋា​រចនា​សម្ព័ន្ធ​ នៅ​នឹង​កន្លែង​ចម្ងាយ​១៥​ គីឡូ​ម៉ែត្រ​។ ​

លោក មេគង្គ ​ថ្លែង​ថា៖ «​យើង​ដឹង​ថា រដ្ឋាភិបាល​ចាំ​បាច់​ត្រូវ​អភិវឌ្ឍ​ទំនប់​វារី​អគ្គិសនី ដូច្នេះ គេ​ត្រូវ​ផ្លាស់​យើង​ទៅ​កន្លែង​ថ្មី ប៉ុន្តែ​ [ក្រុម​ហ៊ុន Royal Group] ពុំ​ទាន់​បាន​រៀបចំ​ហេដ្ឋារចនា​សម្ព័ន្ធ និង​ផ្ទះ​នៅ​ឡើយ​ទេ។ ផ្ទុយ​ទៅ​វិញ ពួក​គេ បាន​ចាប់​ផ្តើម​កាប់​បំផ្លាញ​ព្រៃ​ឈើ ក្នុង​សហគមន៍​យើង​ហើយ»។

នេះ​ជា​ការ​អះអាង​ដែល​មន្រ្តី​ព្រៃ​ឈើ​បាន​បដិសេធ​ ប៉ុន្តែ ខណៈ​ពេល​លោក មេគង្គ​ទាញ​ទូក​ឡើង​គែម​ទន្លេ ហើយ​នាំ​អ្នក​ចូល​រួម​ក្រុម​ឡើង​ច្រាំង​ខ្ពស់​ទៅ​កន្លែង​ដែល​មាន​ មនុស្ស​មាឌ​ធំ ប្រហែល ៣០ នាក់ ខ្លះ​ពាក់​ឯកសណ្ឋាន​ខ្លះ​ស្លៀក​ពាក់​ធម្មតា​បាន​ប្រមូល​ផ្តុំ​ គ្នា​នៅ​កន្លែង​បោះ​ជំរំ​ពេល​នោះ​វា​ច្បាស់​ថា លោក មេគង្គ​មិន​មែន​និយាយ​បំផ្លើស​ទេ។ គេ​​មើល​ឃើញ​ម៉ាស៊ីន​តូច តែ​ដើម​ឈើ ដែល​លោក មេគង្គ ថា ជា​ព្រៃ​សហគមន៍ ត្រូវ​បាន​កាត់​ ហើយ​ស្នាម​កង់​រថយន្ត​ថ្មី​អាច​មើល​ឃើញ​លើ​ផ្លូវ​ចេញ​ពី​ព្រៃ។

លោក មេគង្គ ​បាន​ថ្លែង​ទៅ​កាន់​កម្មករ​ដែល​ព័ទ្ធ​ជុំវិញ​គាត់ និង​ជំទប់​របស់​គាត់​ឈ្មោះ​ បៀន ទៀន ថា៖ «អ្នក​ទាំង​អស់​គ្នា​កំពុង​កាប់​ឈើ​ដោយ​ពុំ​បាន​ស្នើ​សុំ​ពី​ខ្ញុំ​ទេ ។ ​ខ្ញុំ​ជា​អាជ្ញាធរ​នៅ​ទី​នេះ ​ហើយ​​ទាំង​អ្នក និង​ក្រុមហ៊ុន​ពុំ​ទាក់ទង​មក​ខ្ញុំ​អំពី​ការ​កាប់​ឈើ​នេះ​ទេ។ ​អ្នក​ទាំង​អស់​គ្នា​មើល​ងាយ​អាជ្ញាធរ​»។ ​កម្មករ​ហាក់​ដូច​ជា​ពុំ​ខ្វល់​អ្វី​ឡើយ ខណៈ​ពេល​លោក មេគង្គ​ បន្ត​និយាយ​ទៅ​កាន់​ពួក​គេ ណែ​នាំ ហើយ​ថែម​ទាំង​កាន់​វត្ថុ​ដូច​សន្និសីទ​កាសែត​ចំពោះ​មុខ​ពួក​គេ​។ ​លោក​បាន​សួរ​កម្មករ​ថា៖«​តើ​អ្នក​ទទួល​បាន​ប្រាក់​ប៉ុន្មាន​មក​កាប់​ឈើ​ នេះ?»។ បន្ទាប់​មក កម្មករ​ឆ្លើយ​ថា៖ « ៥៥០ ដុល្លារ ក្នុង​មួយ​ហិកតា»។ «​តើ​អ្នក​កាប់​ប៉ុន្មាន​ហិកតា​?» « ៥ ហិក​តា តែ​យើង​កាប់​តែ​ឈើ​តូច​ៗ​ទេ។ យើង​មិន​កាប់​ឈើ​ធំ​ទេ។ ប៉ុន្តែ​ប្រសិន​បើ​គេ​ចង់​ឲ្យ​យើង​ធ្វើ យើង​នឹង​ធ្វើ យើង​ត្រូវ​ការ​ចិញ្ចឹម​គ្រួសារ​យើង​»។

ខាង​ក្នុង​ជំរំ​កម្ម ​ករ អ្នក​យក​ព័ត៌​មាន​ភ្នំពេញ​ ប៉ុស្តិ៍ បាន​ឃើញ​ឈើ​ស្រឡៅ ​ផ្ចឹក សុក្រំ ជា​ឈើ​មាន​តម្លៃ​និង​ធំ​ជាង​អ្វី​ដែល​ក្រុម​កម្មករ​អះអាង​ថា បាន​កាប់។ ​កម្មករ មក​ពី​ខេត្ត​រតនគិរី ក្រចេះ និង​ស្ទឹងត្រែង តែ​លោក មេគង្គ ស្គាល់​បី​នាក់​ ពី​ឃុំ​របស់​លោក​ដែល​ពុំ​បាន​និយាយ​​អំពី​ការ​កាប់​ឈើ​ទេ តែ​អះអាង​ថា ធ្វើ​ការ​ឲ្យ​ជន​ម្នាក់​ហៅ​ថា ឧកញ៉ា ខ្នា។ លោក មេគង្គ ថា៖ «នេះ​ជា​គម្រោង​របស់​ក្រុម​ហ៊ុន​ Royal Group  តែ​ខ្ញុំ​មិន​ដឹង​ទេ​ថា​តើ​គាត់​មាន​អាជ្ញាប័ណ្ណ​កាប់​ឈើ​នៅ​ទី​នេះ​ឬ​អត់​ទេ​»។ ​

ដើម​ឈើ​ត្រូវ​បាញ់​ថ្នាំ​ពណ៌​ក្រហម

បន្ទាប់ ពី​លោក មេគង្គ ចេញ​ពី​កម្មករ​ព្រៃឈើ​ លោក​បាន​នាំ​អ្នក​យក​ព័ត៌មាន​ទៅ​ទីតាំង​មួយ​ទៀត ដែល​ដើរ​ប្រមាណ​ប៉ុន្មាន​នាទី​ប៉ុណ្ណោះ។ ​ឈើ​រាប់​ជា​ជួរ​មាន​ឈើ​ប្រណីត ត្រូវ​បាន​បាញ់​ថ្នាំ​ពណ៌​ក្រហម ដែល​បង្ហាញ​ថា ឈើ​ទាំង​នោះ​នឹង​ត្រូវ​កាប់​ក្នុង​ពេល​ឆាប់​ៗ។ លោក​បន្ថែម​ថា៖ «​ឥឡូវ​នេះ​កម្ពុជា​មាន​ខ្យល់​ព្យុះ​ច្រើន ហើយ​តំបន់​នេះ​ ជា​ភ្នំ​សុវត្ថិភាព​សម្រាប់​អ្នក​ភូមិ ពេល​មាន​ទឹក​ជំនន់។ ក្រុម​ហ៊ុន​យក​ទីតាំង​នេះ​ ជា​កន្លែង​កែ​ច្នៃ​ឈើ ​តើ​យើង​នឹង​ទៅ​ទីណា ពេល​មាន​ខ្យល់​ព្យុះ?»។

លោក ទៀង ជំទប់ របស់​លោក មេគង្គ បាន​ជំរុញ​ឲ្យ​មន្រ្តី​ស្រុក និង​រដ្ឋ​បាល​ព្រៃ​ឈើ​ រារាំង​កម្មករ កុំ​ឲ្យ​កាប់​​ឈើ​លើទី​ទួល​សុវត្ថិភាព ​និ​ងក្នុង​ព្រៃ​ឈើ​សហគមន៍ និង​ផ្តោត​លើ​ការ​ផ្លាស់​លំនៅ​ជា​មុន​សិន។

លោក​បាន​បន្ថែម​ថា៖ «​មន្រ្តី​មក​ពី​រដ្ឋបាល​ព្រៃ​ឈើ​ខេត្ត បាន​ថ្លែង​ថា កុំ​និយាយ​អំពី​បញ្ហា​នេះ ​និង​ការ​ទាម​ទារ​ព្រៃ​សហគមន៍ ក្រុម​ហ៊ុន​មាន​អាជ្ញាប័ណ្ណ និង​ចាំបាច់​ត្រូវ​កាប់​ឈើ​ទាំង​អស់​នៅ​ទីនេះ​។ ប្រជាជន​មិន​គួរ​បញ្ឈប់​ពួក​គេ​ទេ​»។

អាជ្ញាធរ​ស្រុក​មើល​មិន​ឃើញ​ការ​កាប់​ឈើ

នៅ​ពេល​អ្នក​យក​ព័ត៌​មាន​ភ្នំពេញ ប៉ុស្តិ៍ ជួប​ជាមួយ​នឹង​មន្រ្តី​ស្រុក​សេសាន នៅ​សាលា​ខេត្ត លោក​ស្រី យឿង ស្រីភារី អភិបាល​រង​ស្រុក បាន​ថ្លែង​ថា ប្រជាជន ៩០០ ទៅ​១០៥០ គ្រួសារ​ដែល​ទទួល​រង​ដោយ​អាង​ទន្លេ​សេសាន​ក្រោម២​នឹង​ផ្លាស់​លំនៅ​ នៅ​ចុង​ឆ្នាំ​នេះ ឬ​ដើម​ឆ្នាំ ក្រោយ យោង​តាម​ព័ត៌មាន​ដែល​លោក​ស្រី​ទទួល​បាន​ពី​មន្រ្តី​ខេត្ត។ ​លោក​ស្រី យឿង ភារី បាន​បន្ថែម​ថា លោក​ស្រី​បាន​ទទួល​របាយការណ៍​ពី​អ្នក​ភូមិ​ថា ​មាន​ការ​កាប់​ឈើ​ប្រណីត​នៅ​ជិត​ផ្ទះ​ពួក​គេ ប៉ុន្តែ​មន្រ្តី​លោក​ស្រី​ ពុំ​បាន​រក​ឃើញ​ភ័ស្តុតាង​នៃ​ការ​កាប់​ឈើ​ឡើយ។

លោក​ស្រី​​បន្ត​ថា៖ «​ខ្ញុំ​បាន​បញ្ជូន​មន្រ្តី​យើង​ម្នាក់​ពី​សាលា​ស្រុក ជាមួយ​នឹង​រដ្ឋបាល​ព្រៃ​ឈើ ក្រសួង​កសិកម្ម និង​មន្រ្តី​ខេត្ត​»។ «គេ​ប្រាប់​ខ្ញុំ​តាម​ទូរស័ព្ទ​ថា ​ការ​អះអាង​របស់​អ្នក​ភូមិ​គឺ​ខុស​ តែ​ខ្ញុំ​មិន​ទទួល​បាន​ឯកសារ​គាំទ្រ​ចំណុច​នេះ​ទេ។ «នៅ​តំបន់​នោះ ក្រុម​ហ៊ុន​មាន​អាជ្ញាប័ណ្ណ​ពី​រដ្ឋាភិបាល ដើម្បី​ឈូស​ឆាយ​បាត​អាង​ទំនប់​វារី​អគ្គិសនី»។

លោក មេគង្គ ស្ថិត​ក្នុង​អគារ​ជាប់​នោះ ​ហើយ​កំពុង​ពន្យល់​មន្រ្តី​គណបក្ស​ប្រជាជន​កម្ពុជា​ថា សហគមន៍​របស់​លោក​ព្រួយបារម្ភ​អំពី​ព័ត៌មាន​តិច​តួច​ដែល​ខ្លួន​មាន​អំពី​ ការ​ផ្លាស់​លំនៅ​ថ្មី។ ​លោក​បាន​ប្រាប់ ភ្នំពេញ ប៉ុស្តិ៍ ក្រោយ​មក​ថា៖ « រហូត​មកដ​ល់​ពេល​នេះ យើង​មិន​ទាន់​ដឹង​ទេ​ថា​ តើ​ទីតំាង​ថ្មី​ នៅ​កន្លែង​ណា ថា​តើ​យើង​នឹង​ត្រូវ​បញ្ជូន​ទៅ​កន្លែង​ណា»។ លោក​​បន្ថែម​ថា មន្រ្តី​គណបក្ស​កាន់​អំណាច​បាន​សន្យា​ព្យាយាម​ដោះស្រាយ​បញ្ហា​ព័ត៌មាន នេះ។ ​

លោក​ មេគង្គ បាន​ឲ្យ​ដឹង​ទៀត​ថា បញ្ហា​បន្ទាន់​មួយ​ទៀត​គឺ​ការ​កាប់​ឈើ​ក្នុង​ព្រៃ​ដែល​ប្រជាជន​ពឹង​ ផ្អែក។ ​លោក​បាន​បន្ថែម​ថា៖ «​យើង​ព្រួយ​បារម្ភ​អំពី​ពួក​គេ​កាប់​ឈើ​ធំ​ៗឥឡូវ​នេះ ហើយ​មិន​សាង​សង់​ទំនប់​ទេ។ ខ្ញុំ​ឃើញ​ករណី​នេះ​ កើត​ឡើង​នៅ​កម្ពុជា​ពី​មុន»។

«ឥឡូវ​នេះ យើង​មាន​ព្រៃ​សហគមន៍ ​យើង​ពឹងផ្អែក​លើ​អនុផល​ព្រៃ​ឈើ ដូច​ជា​ទឹក​ឃ្មុំ និង​​ជ័រ​ពី​ដើម​ឈើ ហើយ​យើង​ត្រូវ​ការ​ឈើ​ធ្វើ​ផ្ទះ និង​ជួសជុល​ផ្ទះ»។ ​«​អាជ្ញាធរ​ត្រូវ​សាង​សង់​ហេដ្ឋា​រចនា​សម្ព័ន្ធ ឥឡូវ​នេះ នៅ​ទីតាំង​ថ្មី ហើយ​សង​ប្រជាជន មុន​ពេល​ពួក​គេ​កាប់​ឈើ​នៅ​តំបន់​នេះ​»។​

ប្រភព​អនាមិក​មួយ​បាន​ប្រាប់​ ភ្នំពេញ​ប៉ុស្តិ៍ ថា ជា​ផ្នែក​នៃ​កិច្ច​សន្យា ក្រុម​ហ៊ុន Royal Group នឹង​កាប់​ឈើ១​លាន​ម៉ែត្រ​គុប ក្នុង​តំបន់​អាង​ទឹក​នេះ ដែល​គ្រប​ដណ្តប់​ផ្ទៃ​ដី​៣៦០០​ហិកតា។

ប្រភព​នោះ ​បន្ថែម​ថា៖ «ពួក​គេ​បាន​ចាប់​ផ្តើម​ឈូស​ឆាយ​ហើយ​»។ លោក​បន្ថែម​ថា លោក​ក៏​ជឿ​ជាក់​ថា លោក​ឧកញ៉ា ខ្នា ពាក់​ព័ន្ធ​ក្នុង​គម្រោង​នេះ។

លោក ទេព ប៊ុណ្ណារិទិ្ធ ប្រធាន​សមាគម​អភិរក្ស​វប្បធម៌ និង​បរិស្ថាន បាន​ថ្លែង​ថា ​គ្រឿង​បរិក្ខា​រសាង​សង់​​ បាន​នាំ​ទៅ​តំបន់​អាង​ទំនប់​ហើយ។ លោក​បញ្ជាក់​ថា​៖ « ​បើ​ខ្ញុំ​ស្មាន​ថា​ តើ​នឹង​កាប់​ឈើ​ប៉ុន​ណា នឹង​មាន​តួ​លេខ​កាន់​តែ​ច្បាស់​ក្នុង​កិច្ច​សន្យា​»។ «​យោង​តាម​អ្វី​ដែល​យើង​ឮ​ពី​អ្នក​ភូមិ ក្រុម​ហ៊ុន​ បាន​កាប់​ឈើ​នៅ​ក្រៅ​តំបន់​អាង​ផង​ដែរ»។

សហគមន៍​នឹង​មិន​នៅ​ស្ងៀម​ទេ​

បន្ទាប់​ពី​អ្នក​ភូមិ​ក្នុង​ឃុំ​ស្រែគ ១ ​បាន​សម្តែង​ក្តី​បារម្ភ​ប្រាប់​ភ្នំពេញ ប៉ុស្តិ៍ ថា ​ពួក​គេ​នឹង​គ្មាន​ហេដ្ឋា​រចនា​សម្ព័ន្ធ ដូច​ជា​សាលា​រៀន​នៅ​ទីតាំង​ថ្មី ឬ​ព្រៃ​ និង​ទន្លេ លោក មេគង្គ បាន​​ថ្លែង​ថា ការ​ប្រយុទ្ធ​របស់​សហគមន៍​លោក​ត្រូវ​តែ​បន្ត​ទៅ​មុខ​ទៀត​។ ​លោក​បាន​បន្ថែម​ថា៖ «​ខ្ញុំ​បាន​ព្យាយាម​ចរចា ជាមួយ​នឹង​ក្រុម​ហ៊ុន និង​អាជ្ញាធរ​ អំពី​ដំណោះស្រាយ​ ប៉ុន្តែ​គេ​ថា ត្រូវ​រង់​ចាំ​ដល់​ឆ្នាំ​ក្រោយ​»។ «​ខ្ញុំ​ត្រូវ​បាន​គេ​គំរាម​កុំ​ឲ្យ​និយាយ ហើយ​ប្រាប់​ឲ្យ​ឈប់​និយាយ​ពី​បញ្ហា​នេះ តែ​ខ្ញុំ​នឹង​បន្ត​និយាយ​រហូត​ទាល់​តែ​គេ​ផ្តល់​ដំណោះស្រាយ​ដល់​យើង​។ ខ្ញុំ​ត្រូវ​ប្រាប់​អ្នក​សារ​ព័ត៌​មាន ដូច្នេះ គេ​អាច​ផ្សព្វផ្សាយ​ព័ត៌មាន។ ដូច្នេះ សហគមន៍​កម្ពុជា និង​អន្តរជាតិ​ដឹង​អំពី​ក្តី​បារម្ភ​របស់​យើង»។ «ប្រសិន​បើ​ខ្ញុំ​ស្លាប់​មក​ពី​និយាយ​ខ្ញុំ​មិន​សោក​ស្តាយ​ទេ ព្រោះ​ខ្ញុំ​កំពុង​តែ​ជួយ​សហគមន៍​ខ្ញុំ»។

លោក គិត ម៉េង ប្រធាន​ក្រុមហ៊ុន Royal Group ​បាន​ថ្លែង​ថា លោក​កំពុង​ស្ថិត​នៅ​ក្នុង​កិច្ច​ប្រជុំ​នៅ​ចិន បន្ទាប់​មក​លោក​បាន​បិទ​ទូរស័ព្ទ​ ចំណែក​លោក ខ្នា និង​លោក សិទ្ធ សំណាង ​ប្រធាន​រដ្ឋបាល​ព្រៃ​ឈើ​ស្រុក​សេសាន ពុំ​អាច​ទាក់ទង​បាន​ទេ៕ TK

អត្ថបទគួរចាប់អារម្មណ៍