The Phnom Penh Post Search

Search form




Logo of Phnom Penh Post newspaper Phnom Penh Post - ព្រះតេជគុណ​ ប៊ុត ប៊ុនតិញ ថា​មាន​នគរបាល​អនាមិក​ម្នាក់​ប្រាប់​ឲ្យ​ព្រះអង្គ​គេច​ខ្លួន

ព្រះតេជគុណ​ ប៊ុត ប៊ុនតិញ ថា​មាន​នគរបាល​អនាមិក​ម្នាក់​ប្រាប់​ឲ្យ​ព្រះអង្គ​គេច​ខ្លួន

ព្រះតេជគុណ ប៊ុត ប៊ុនតិញ។ រូបថត​បង្ហោះ​ក្នុង​ហ្វេសប៊ុក​របស់​តេជគុណ​ម្សិលមិញ។
ព្រះតេជគុណ ប៊ុត ប៊ុនតិញ។ រូបថត​បង្ហោះ​ក្នុង​ហ្វេសប៊ុក​របស់​តេជគុណ​ម្សិលមិញ។

ព្រះតេជគុណ​ ប៊ុត ប៊ុនតិញ ថា​មាន​នគរបាល​អនាមិក​ម្នាក់​ប្រាប់​ឲ្យ​ព្រះអង្គ​គេច​ខ្លួន

ភ្នំពេញៈ ប្រធាន​បណ្តាញ​ព្រះសង្ឃ​ឯករាជ្យ​ដែល​ជា​សមាជិក​ម្នាក់​នៃ​គណៈកម្មការ​រៀបចំ​បុណ្យ​សព​លោក​បណ្ឌិត កែម ឡី ព្រះតេជគុណ ប៊ុត ប៊ុនតិញ ដែល​ជា​អ្នក​ហ៊ាន​និយាយ​រិះគន់​ឥត​សំចៃ​ពី​ចំណុច​អវិជ្ជមាន​របស់​រដ្ឋាភិបាល និង​តែងតែ​ចេញ​មុខ​ដឹកនាំ​ព្រះសង្ឃ និង​ប្រជាពលរដ្ឋ​ចូលរួម​តវ៉ា​ប្រឆាំង​នឹង​អំពើ​អយុត្តិធម៌​សង្គម​បាន​អះអាង​ថា​ព្រះតេជគុណ​ត្រូវ​បាន​នគរបាល​អនាមិក​ម្នាក់​ទូរស័ព្ទ​ប្រាប់​កាលពី​ព្រឹក​ម្សិលមិញ​ឲ្យ​គេច​ខ្លួន​ដោយ​ថា​សមត្ថកិច្ច​កំពុង​តាម​ចាប់​ព្រះអង្គ។

ប្រធាន​បណ្តាញ​យុវជន​កម្ពុជា និង​ជា​សមាជិក​គណៈកម្មការ​បុណ្យ​សព​លោក កែម ឡី ម្នាក់​ទៀត​គឺ​លោក ទឹម ម៉ាឡៃ បាន​ឲ្យ​ដឹង​ថា​លោក​បាន​ទាក់ទង​ព្រះតេជគុណ ប៊ុនតិញ នៅ​ពេល​រសៀល​ហើយ​ព្រះអង្គ​បាន​ប្រាប់​លោក​ថា​ព្រះអង្គ​កំពុង​ស្នាក់នៅ​កន្លែង​មាន​សុវត្ថិភាព។

លោក​ថា៖ «សំខាន់​នេះ​គ្រាន់​តែ​ជា​រឿង​មួយ​អ្នក​ដែល​ចង់​គំរាម​កំហែង បំបិទ​សិទ្ធិ​អ្នក​បញ្ចេញ​មតិ​ច្រើន​គឺជា​ការ​បន្ត​បិទ​សិទ្ធិ​សេរីភាព​របស់​ប្រជាពលរដ្ឋ​ខ្មែរ»។

លោក​បន្ថែម​ថា៖ «ខ្ញុំ​បាន​ទូរស័ព្ទ​ទៅ​កាល​ពេល​នោះ​ព្រះតេជគុណ​នៅ​ស្រុក​ខ្មែរ​ប៉ុន្តែ​ល្ងាច​នេះ ឬ​យប់​នេះ​ព្រះតេជគុណ​ស្នាក់នៅ ឬ​មិន​ស្នាក់​នៅ​ក្នុង​ប្រទេស​ខ្ញុំ​មិន​ដឹង​ដែរ​ព្រោះ​ខ្ញុំ​អត់​ទាន់​បាន​ទាក់ទង​ព្រះអង្គ​ទៀត​ទេ»។

នៅ​លើ​ហ្វេសប៊ុក​របស់​ព្រះតេជគុណ ប៊ុត ប៊ុនតិញ កាលពី​ម្សិលមិញ​បាន​សរសេរ​ថា «រស់​នៅ​ក្រោម​ការ​ភ័យខ្លាច​យើង​អាយុ​មិន​វែង​ទេ​តែ​មុន​យើង​ស្លាប់​ចាំបាច់​ត្រូវ​ធ្វើ​អំពើ​ល្អ​ឱ្យ​បាន​ច្រើន​តាម​លទ្ធភាព​អាត្មា​មិន​អាច​រស់​លាក់​ខ្លួន​សុខ​តែ​ម្នាក់​ឯង​បាន​ទេ»។

ក្នុង​ហ្វេសប៊ុក​ក៏​បាន​បង្ហោះ​រូបថត​ព្រះតេជគុណ​ភ្ជាប់​ជាមួយ​រូបថត​មាន​ពែង​កាហ្វេ​ដែល​សរសេរ​អក្សរ​ឡាវ​ផង​ដែរ។

ព្រះតេជគុណ ប៊ុត ប៊ុនតិញ មិន​អាច​ទាក់ទង​សុំ​អធិប្បាយ​បាន​ទេ​ប៉ុន្តែ​ព្រះអង្គ​បាន​ប្រាប់​វីអូឌី​ថា​ព្រះអង្គ​បាន​ទទួល​ទូរស័ព្ទ​ពី​ជន​មិន​ស្គាល់​អត្តសញ្ញាណ​ម្នាក់​នៅ​ម៉ោង ៧ ព្រឹក​ម្សិលមិញ​ដោយ​អះអាង​ថា​រូប​គេ​ជា​នគរបាល​ហើយ​ប្រាប់​ព្រះអង្គ​ថា​មាន​សមត្ថកិច្ច​កំពុង​តាម​រក​ព្រះអង្គ​ប៉ុន្តែ​មិន​បាន​បញ្ជាក់​ពី​មូលហេតុ​អ្វី​ទេ​រួច​ក៏​បាន​បិទ​ទូរស័ព្ទ។

ព្រះអង្គ​មាន​សង្ឃដីកា​ថា៖ «ទទួល​ទូរស័ព្ទ​តាំង​ពី​ម៉ោង​ ៧ ព្រឹក​នេះ​ថា​គាត់​ជា​ប៉ូលិស​គាត់​អាណិត​អាត្មា ស្រឡាញ់​អាត្មា​ហើយ​គាត់​ប្រគេន​ដំណឹង​មក​អាត្មា​សុំ​ឲ្យ​រក​កន្លែង​មាន​សុវត្ថិភាព​ទៅ​ព្រោះ​ឥឡូវ​នេះ​ខាង​ប៉ូលិស​គេ​តាមដាន​រក​អាត្មា​ហើយ»។ «អាត្មា​គិត​តាម​ឧត្តម​បណ្ឌិត​របស់​លោក កែម ឡី ដែល​ថា​យើង​រស់នៅ​ស្រុក​មួយ​ដែល​មាន​ខ្លា មាន​សត្វ​សាហាវ មាន​ពស់វែក​អី​ច្រើន​ យើង​ខំ​ប្រឹង​គេច​ទៅ​ណា​ក៏​គេច​មិន​រួច​ដែរ​ពិបាក​នឹង​គេច​ណាស់​បើ​គេ​ចង់​ចាក់​គេ​ចង់​ខាំ​ វា​ងាយ​ស្រួល​សម្រាប់​គេ​ទេ ព្រោះ​យើង​ស្ថិត​ក្នុង​ទីតាំង​មួយ​ដែល​គេ​អាច​ធ្វើ​បាប​យើង​បាន​គ្រប់​ពេល»។

ព្រះតេជគុណ ប៊ុត ប៊ុនតិញ បន្ត​ថា​ព្រះអង្គ​មាន​ការ​បារម្ភ​ខ្លះ​ដែរ​ពី​សុវត្ថិភាព​តែ​ព្រះអង្គ​ថា​ទោះ​ជា​ចង់​គេច​ទៅ​ណា​ក៏​មិន​រួច​ដែរ​បើ​សមត្ថកិច្ច​ចង់​ចាប់​ព្រះអង្គ​មែន​នោះ។

អ្នក​នាំពាក្យ​ក្រសួង​មហាផ្ទៃ​លោក ខៀវ សុភ័គ មិន​អាច​ទាក់ទង​សុំ​អធិប្បាយ​បាន​ទេ​កាល​ពី​ម្សិលមិញ។ តែ​អ្នក​នាំ​ពាក្យ​រូប​នេះ​បាន​ប្រាប់ វីអូឌី ដោយ​បាន​បដិសេធ​ពី​ដំណឹង​ដែល​ថា​សមត្ថកិច្ច​តាម​រក​ចាប់​ព្រះតេជគុណ ប៊ុត ប៊ុនតិញ ដោយ​លោក​ថា​មិន​មាន​ហេតុផល​ណា​ដែល​សមត្ថកិច្ច​ត្រូវការ​តាម​រក​ព្រះសង្ឃ​អង្គ​នេះ​ទេ។

លោក សុភ័គ ថ្លែង​ថា៖ «សូម​ព្រះអង្គ​គិត​ឡើង​វិញ​មើល​ក្រែង​ថា​វា​មិនមែន​សមត្ថកិច្ច ឬ​មួយ​យ៉ាង​ម៉េច​យ៉ាង​ម៉ា ឬ​ក៏​អ្នក​ដទៃ​បើ​ជា​សមត្ថកិច្ច​គ្មាន​ទេ»។

កាលពី​ពេល​ថ្មីៗ​នេះ​ព្រះតេជគុណ ប៊ុត ប៊ុនតិញ ដែល​កាលពី​ពេល​កន្លង​មក​តែងតែ​ជួប​ពិភាក្សា​ញឹកញាប់​ជាមួយ​លោក​បណ្ឌិត កែម ឡី ពី​បញ្ហា​សង្គម​ផ្សេងៗ​បាន​អះអាង​ប្រាប់​ភ្នំពេញ​ប៉ុស្តិ៍​ថា​ព្រះតេជគុណ​ត្រូវ​បាន​មនុស្ស​មួយ​ក្រុម​តាមដាន​ពី​ក្រោយ​ហើយ​ព្រះតេជគុណ​បាន​សុំ​ចូល​ក្នុង​ស្ថានទូត​អាមេរិក។

នៅ​ពេល​ក្រោយ​មក​គឺ​កាល​ពី​យប់​ថ្ងៃ​សៅរ៍​នៅ​មុន​ថ្ងៃ​ដង្ហែ​សព​លោក កែម ឡី មួយ​ថ្ងៃ​ព្រះតេជគុណ​ក៏​មាន​សង្ឃដីកា​ផង​ដែរ​ថា​មាន​មនុស្ស​ជាច្រើន​ដែល​ព្រះតេជគុណ​សង្ស័យ​ថា​ជា​សមត្ថកិច្ច​បាន​តាម​ថតរូប​ព្រះតេជគុណ​នៅ​គ្រប់​ទីកន្លែង​ដែល​ព្រះតេជគុណ​ទៅ។

យ៉ាង​ណា​ក៏ដោយ​មិន​មាន​ប្រភព​ណា​ផ្សេង​ទៀត​បញ្ជាក់​ពី​បញ្ហា​នេះ​ទេ៕

អត្ថបទគួរចាប់អារម្មណ៍