ភ្នំពេញៈ ព្រះមហាក្សត្របានកែសម្រួល និងតែងតាំងសមាសភាពរដ្ឋមន្ត្រីចំនួន ៥ រូប និងទេសរដ្ឋមន្ត្រី ៥ រូប បន្ទាប់ពីរដ្ឋសភាបានបោះឆ្នោតគាំទ្រតាមសំណើរបស់លោកនាយករដ្ឋមន្ត្រី ហ៊ុន សែន ដើម្បីបង្កើនប្រសិទ្ធភាពការដឹកនាំរដ្ឋាភិបាល។
ព្រះមហាក្សត្រ និងរដ្ឋសភា កាលពីម្សិលមិញបានត្រាស់បង្គាប់ និងប្រកាសតែងតាំង សមាសភាពរដ្ឋមន្ត្រីថ្មី ៥ រូប រួមមានលោក ចម ប្រសិទ្ធ ជារដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍លោក កើត រិទ្ធ ជារដ្ឋមន្ត្រីក្រសួងយុត្តិធម៌ លោក ជា វ៉ាន់ដេត ជារដ្ឋមន្ត្រីក្រសួងប្រៃសណីយ៍ និងទូរគមនាគមន៍ លោក ឈិត សុខុន ជារដ្ឋមន្ត្រីក្រសួងធម្មការ និងសាសនា និងលោក ព្រុំ សុខា ជារដ្ឋមន្ត្រីក្រសួងមុខងារសាធារណៈ។ នេះបើតាមព្រះរាជក្រឹត្យ និងសេចក្ដីប្រកាសរបស់រដ្ឋសភាកាលពីម្សិលមិញ។
ចំណែកអតីតរដ្ឋមន្ត្រីទាំង ៤ រូប រួមមានលោក ហ៊ឹម ឆែម លោក អង្គ វង្សវឌ្ឍានា លោក ត្រាំ អ៊ីវតឹក និងលោក ពេជ្រ ប៊ុនធិន ត្រូវបានតែងតាំងជាទេសរដ្ឋមន្ត្រី ទទួលបន្ទុកបេសកកម្មពិសេស ហើយលោក ចម ប្រសិទ្ធ ក៏ត្រូវបានតែងតាំងជាទេសរដ្ឋមន្ត្រីផងដែរ។
ថ្លែងក្នុងសន្និសីទសារព័ត៌មានបន្ទាប់ពីកិច្ចប្រជុំនៅរដ្ឋសភា លោក ហ៊ុន សែន បានលើកឡើងថា ការកែសម្រួលសមាសភាពរាជរដ្ឋាភិបាលនាពេលនេះ ធ្វើឡើងតម្រូវតាមការចាំបាច់ ដើម្បីអនុវត្តកម្មវិធីនយោបាយរបស់រាជរដ្ឋាភិបាលឲ្យកាន់តែមានប្រសិទ្ធភាពថែមទៀត។ លោកថា រដ្ឋមន្ត្រីដែលបានចាកចេញ គឺមានវ័យចំណាស់ដោយលោកប្រើពាក្យថា U90 និង U80 ដែលមានន័យថា ពួកគាត់មានអាយុជិត ៩០ និងជិត ៨០ ឆ្នាំហើយ។
លោកថ្លែងថា៖ «ឯកឧត្តម ហ៊ឹម ឆែម ពេជ្រ ប៊ុនធិន អង្គ វង្សវឌ្ឍានា ត្រាំ អ៊ីវតឹក និយាយរួមអ្នកទាំងអស់នេះសុទ្ធតែអ្នកមានសមត្ថភាព ក៏ប៉ុន្តែយើងត្រូវមើលឃើញវ័យរបស់ពួកគាត់។ ដល់ដំណាក់កាលដែលគាត់ជួបការលំបាកហើយ។ យើងមិនអាចចេះតែបង្ខំគាត់ឲ្យធ្វើៗៗៗដោយមិនគិតគូរពីសុខភាពរបស់ពួកគាត់ទេ»។
លោកថ្លែងថា កំណែទម្រង់រដ្ឋបាលសាធារណៈកំណែទម្រង់ប្រព័ន្ធយុត្តិធម៌ និងតុលាការ កំណែទម្រង់ហិរញ្ញវត្ថុសាធារណៈ គឺជាកំណែទម្រង់មុតស្រួចដែលលោកបានដាក់ចេញ។ ភាពចាំបាច់ក្នុងការធ្វើកំណែទម្រង់មុតស្រួចនេះ គឺការប្ដូររដ្ឋមន្ត្រី ២ រូបរួមមានរដ្ឋមន្ត្រីក្រសួងមុខងារសាធារណៈ និងរដ្ឋមន្ត្រីក្រសួងយុត្តិធម៌។
លោកថ្លែងថា៖ «ចំណែកក្រសួងទូរគមនាគមន៍អស់លោកបានដឹងហើយថា ដំណាក់កាលនេះជាដំណាក់កាលឌីជីថលតម្រូវឲ្យរដ្ឋមន្ត្រីប្រៃសណីយ៍ និងទូរគមនាគមន៍ជារដ្ឋមន្ត្រីដែលមានភាពរហ័សរហួន និងមានគំនិតផ្ដួចផ្ដើមឲ្យទាន់ពេលវេលា។ យើងកំពុងឈានទៅដល់ដំណាក់កាលពីការប្ដូរប្រព័ន្ធពី Analog ទៅឌីជីថល»។ លោកបន្តថា ការដូររដ្ឋមន្ត្រីក្រសួងធម្មការគឺផ្លាស់ប្ដូរដោយសារកត្តាសុខភាព។
លោក អ៊ូ ច័ន្ទរ័ត្ន អតីតតំណាងរាស្ត្រខេត្តតាកែវនៃអតីតគណបក្សសង្គ្រោះជាតិថ្លែងពីម្សិលមិញថា លោកមើលឃើញភាពវិជ្ជមានខ្លះលើការផ្លាស់ប្ដូរនេះ គឺវិជ្ជមានត្រង់ថា យ៉ាងហោចណាស់ក៏មានការប្ដូរមនុស្សដែលមានលក្ខណៈខុសគ្នា ដូចជាភាពរហ័សរហួនក្នុងការងារ។
ប៉ុន្តែលោកថ្លែងថា អ្វីដែលសំខាន់ គឺគោលនយោបាយ និងការដឹកនាំរបស់គណបក្សកាន់អំណាច។ លោកថ្លែងថា៖ «តែការផ្លាស់ប្ដូរមួយចំនួនផ្សេងទៀតមិនបានបញ្ចប់តួនាទីទេ តែបន្តជាទេសរដ្ឋមន្ត្រីជាអីក្ដី ហាក់ដូចជាបន្តវប្បធម៌មួយ ឬប្រពៃណីមួយដែលហាក់ដូចជាមិនព្រមលះបង់អំណាចសោះរហូតដល់ជរាហើយនៅតែចង់បន្តទៀត។ ដូច្នេះវាធ្វើឲ្យបាត់បង់ឱកាសដល់អ្នកដែលមានសក្ដានុពល ប៉ះពាល់ដល់បញ្ញវន្តដែលមានសមត្ថភាពខ្ពង់ខ្ពស់»។
លោកបន្តថា៖ «កន្លងមក ខ្ញុំឃើញផ្លាស់ប្ដូរបុគ្គលពីក្រសួងមួយទៅក្រសួងមួយ។ ការផ្លាស់ប្ដូរបែបនេះ វាមិនមានប្រសិទ្ធភាពនោះទេ ពីព្រោះបើបុគ្គលគ្មានសមត្ថភាព ទោះបីផ្លាស់ទៅដល់ទីណាក៏នៅតែគ្មានសមត្ថភាពដែរ។ ប៉ុន្តែឃើញលើកនេះភាគច្រើនឡើងជារដ្ឋលេខាធិការទៅជំនួសកន្លែងរដ្ឋមន្ត្រី។ តែមិនដឹងលោកមានសក្ដានុពល ហើយលោកមានប្រសិទ្ធភាពប៉ុនណាទេ។ តែប្រសិទ្ធភាពមិនអាស្រ័យទៅលើតែបុគ្គលដែលមានសមត្ថភាពទេ ប៉ុន្តែអាស្រ័យទៅលើគោលនយោបាយរបស់គណបក្សកាន់អំណាច។ បើបុគ្គលធ្វើខុសហើយ នៅតែមិនចាត់វិធានការនៅតែមានការលើកលែង និងអនុគ្រោះជារបៀបគ្រួសារ អាហ្នឹងវាក៏នៅតែប៉ុណ្ណឹងដែរ»។
លោកលើកឡើងថា ក្រសួងយុត្តិធម៌បានរងការត្អូញត្អែរពីពលរដ្ឋ សហគមន៍ជាតិ និងអន្តរជាតិកាលពីរាប់ឆ្នាំមកហើយជាក្រសួងដែលមិនគួរទុកចិត្តបាន និងមានបញ្ហាក្នុងការផ្ដល់យុត្តិធម៌សង្គម និងរឿងសិទ្ធិមនុស្ស។ លោកសង្ឃឹមថាក្រសួងនេះនឹងមានការកែប្រែច្រើន ក្រោមការដឹកនាំរបស់រដ្ឋមន្ត្រីថ្មីនេះ។ តែលោកបញ្ជាក់ថា អ្វីៗគឺអាស្រ័យលើគោលនយោបាយបក្សកាន់អំណាចដដែល៕