.jpg)
ព្រះករុណា សម្តេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជាបានផ្ញើព្រះរាជសារ ១ ច្បាប់ ជូនប្រធានាធិបតីសហរដ្ឋអាមេរិក លោក Donald Trump ដើម្បីអបអរសាទរទិវាបុណ្យឯករាជ្យជាតិសហរដ្ឋអាមេរិក ៤ កក្កដា។ រូបថត Royal du Cambodge
ភ្នំពេញ៖ ព្រះករុណា សម្តេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជាបានផ្ញើព្រះរាជសារ ១ ច្បាប់ ជូនប្រធានាធិបតីសហរដ្ឋអាមេរិក លោក Donald Trump ដើម្បីអបអរសាទរទិវាបុណ្យឯករាជ្យជាតិសហរដ្ឋអាមេរិក ៤ កក្កដា។
ក្នុងព្រះរាជសារចុះថ្ងៃទី ២ ខែកក្កដា ព្រះអង្គមានព្រះរាជបន្ទូលថា៖ «ក្នុងឱកាសទិវាបុណ្យឯករាជ្យជាតិសហរដ្ឋអាមេរិក ខ្ញុំសូមសម្ដែងនូវការអបអរសាទរដ៏ស្មោះស្ម័គ្រ និងប្រសិទ្ធពរជ័យដ៏កក់ក្តៅជាទីបំផុតចំពោះប្រជាជនសហរដ្ឋអាមេរិកប្រកបដោយសុខុមាលភាព សេចក្តីសុខ និងភាពរុងរឿង ព្រមទាំងសុខុមាលភាពផ្ទាល់ខ្លួនរបស់ឯកឧត្តមផងដែរ»។
នៅក្នុងព្រះរាជសារនេះ ព្រះអង្គក៏បានសម្ដែងនូវការសព្វព្រះរាជហឫទ័យចំពោះមិត្តភាព និងកិច្ចសហប្រតិបត្តិការ ដែលបានបង្កើតឡើងជាយូរមកហើយរវាងសហរដ្ឋអាមេរិក និងប្រទេសកម្ពុជា ដែលបានរីកចម្រើនទៅមុខអស់រយៈពេលជាច្រើនឆ្នាំកន្លងមកនេះ។
ហ្វេសប៊ុកស្ថានទូតអាមេរិកប្រចាំកម្ពុជាកាលពីថ្ងៃអាទិត្យបញ្ជាក់ថា ពិធីទី៣ និងក្រោយគេនៃការរំឭកដល់បុណ្យឯករាជ្យជាតិរបស់សហរដ្ឋអាមេរិក ត្រូវបានធ្វើនៅទីតាំងប្រវត្តិសាស្រ្ត គឺនៅសណ្ឋាគារ Raffles Hotel Le Royal ជាទីដែល លោក ឯកអគ្គរដ្ឋទូត Donald R. Heath បានបង្កើតទំនាក់ទំនងការទូតជាលើកដំបូង រវាងប្រទេសកម្ពុជា និងអាមេរិក កាលពី ៧០ ឆ្នាំមុន។
ហ្វេសប៊ុកស្ថានទូតដដែលបញ្ជាក់ថា៖ «ដូចកាលពីក្នុងទសវត្សរ៍ឆ្នាំ ១៩៥០ ដែរ ពេលនេះសហរដ្ឋអាមេរិកនៅតែប្តេជ្ញាចង់ឃើញប្រទេសកម្ពុជា មានសន្តិសុខ វិបុលភាព និងប្រជាជនមានសុខភាពល្អ។ រីករាយថ្ងៃបុណ្យឯករាជ្យជាតិ! ជនជាតិអាមេរិកគ្រប់ទីកន្លែងប្រារព្ធ “ថ្ងៃខួបកំណើត” របស់ប្រទេសយើងដែលជាខួបនៃការចុះហត្ថលេខាលើសេចក្ដីប្រកាសឯករាជ្យនៅ ឆ្នាំ ១៧៧៦។ នេះជាការក្រឡេកមើលពីរបៀបដែលជនជាតិអាមេរិកប្រារព្ធថ្ងៃឈប់សម្រាកដ៏សំខាន់នេះ»។
ហ្វេសប៊ុកស្ថានទូតអាមេរិកបញ្ជាក់កាលពីថ្ងៃទី ៤ ខែកក្កដា ថា៖ «នៅភ្នំពេញ យើងរីករាយនឹងអបអរទិវាឯករាជ្យជាតិអាមេរិកជាមួយដៃគូជាច្រើនរបស់យើង ដែលធ្វើការទាក់ទងនឹងវប្បធម៌ ការអប់រំ និងយុវជន! ពិធីដ៏សប្បាយ និងពោរពេញដោយភាពស្វាហាប់ នៅនិវេសនដ្ឋានរបស់លោកឯកអគ្គរដ្ឋទូត W. Patrick Murphy បានបង្ហាញឲ្យឃើញនូវទំនាក់ទំនងរឹងមាំ រវាងប្រជាជន និងប្រជាជន ដែលជាគ្រឹះនៃទំនាក់ទំនងរវាងសហរដ្ឋអាមេរិក និងប្រទេសកម្ពុជា»។ លោក Patrick ថ្លែងថា៖ «ពិតជាសប្បាយមែនដោយយើងរៀបចំពិធីជាមួយអង្គការហ្វារពន្លឺសិល្បៈ»៕
