ភ្នំពេញៈ ព្រះមហាក្សត្រ សម្តេចព្រះបរមនាថ នរោត្តម សីហមុនី បានចេញព្រះរាជក្រឹត្យចុះថ្ងៃទី ២៤ ខែមិថុនា ឆ្នាំ ២០២០ ស្ដីពីការរៀបចំ និងការប្រព្រឹត្តទៅរបស់ក្រុមប្រឹក្សាអ្នកច្បាប់ប្រចាំនៅទីស្ដីការគណៈរដ្ឋមន្ត្រីដោយមន្ត្រីបញ្ជាក់ថា ការចេញព្រះរាជក្រឹត្យនេះគឺដើម្បីកំណត់ការងាររបស់ក្រុមប្រឹក្សាអ្នកច្បាប់ជាលាយលក្ខណ៍អក្សរឱ្យបានច្បាស់។
នៅក្នុងព្រះរាជក្រឹត្យនេះគឺបានសម្រេចបង្កើតក្រុមប្រឹក្សាអ្នកច្បាប់ជាអង្គភាពអមទីស្ដីការគណៈរដ្ឋមន្ត្រីក្នុងការសម្របសម្រួលការងារតាក់តែង និងក្នុងការពិនិត្យផ្ដល់យោបល់លើសេចក្ដីព្រាងច្បាប់លិខិតបទដ្ឋានគតិយុត្តផ្សេងទៀតជូនរដ្ឋាភិបាល។
ស្ថាប័ននេះមានតួនាទីជាង ១០ ដូចជា សិក្សាលើច្បាប់ និងលិខិតបទដ្ឋានគតិយុត្តដែលមិនសមស្របនឹងវឌ្ឍនភាពសង្គមដើម្បីលើកយោបល់ដាក់ឱ្យរដ្ឋាភិបាលធ្វើវិសោធនកម្មការរៀបចំសេចក្ដីព្រាងច្បាប់ និងលិខិតបទដ្ឋានគតិយុត្តដែលចាំបាច់សម្រាប់បម្រើឱ្យគោលនយោបាយរបស់រដ្ឋាភិបាល ការធ្វើទំនាក់ទំនងជាមួយអង្គការជាតិ និងអន្តរជាតិ ដើម្បីសិក្សាធ្វើកិច្ចសហប្រតិបត្តិការការងារ ការជួយធ្វើលិខិតឆ្លើយបំភ្លឺឱ្យរដ្ឋាភិបាលទៅកាន់រដ្ឋសភា និងការរៀបចំបែបបទជូននាយករដ្ឋមន្ត្រីដើម្បីថ្វាយព្រះមហាក្សត្រឡាយព្រះហស្តលេខាឱ្យប្រើប្រាស់ច្បាប់ដែលទទួលបានការអនុម័តពីស្ថាប័ននីតិប្បញ្ញត្តិជាដើម។
ចំពោះការប្រព្រឹត្តទៅរបស់ស្ថាប័នក្រុមប្រឹក្សាអ្នកច្បាប់នេះមានដូចជា ការចាត់ចែងការងារ និងជ្រើសរើសមន្ត្រីមកបំពេញការងារជាដើមក្នុងនោះ ដូចជា ត្រូវប្រជុំសាមញ្ញយ៉ាងតិច ២ ដងក្នុង ១ ឆ្នាំ និងមានសិទ្ធិអាចអញ្ជើញតំណាងក្រសួងស្ថាប័នពាក់ព័ន្ធ មន្ត្រីជំនាញ ចូលរួមប្រជុំពិគ្រោះយោបល់ និងបំភ្លឺលើរាល់បញ្ហាទាំងឡាយដែលពាក់ព័ន្ធនឹងក្របខ័ណ្ឌការងាររបស់ក្រសួងស្ថាប័នទាំងនោះ ហើយអាចតម្រូវឱ្យក្រសួងស្ថាប័ន ផ្ដល់ឯកសារទិន្នន័យ និងព័ត៌មាននានាដែលទាក់ទងនឹងការកសាងច្បាប់ និងលិខិតបទដ្ឋានគតិយុត្ត។
លើសពីនេះក្រុមប្រឹក្សាអ្នកច្បាប់ត្រូវមានតំណាងចូលរួមប្រជុំពេញអង្គគណៈរដ្ឋមន្ត្រី និងកិច្ចប្រជុំនានាដែលរៀបចំដោយទីស្ដីការគណៈរដ្ឋមន្ត្រី រួមទាំងមានសិទ្ធិប្រើប្រាស់ត្រារបស់ទីស្ដីការគណៈរដ្ឋមន្ត្រីដើម្បីដំណើរការការងារប្រចាំថ្ងៃជាដើម។
លោក ផៃ ស៊ីផាន អ្នកនាំពាក្យរដ្ឋាភិបាលបានប្រាប់ភ្នំពេញប៉ុស្ដិ៍យ៉ាងខ្លីនៅថ្ងៃទី ២៩ មិថុនា ថា ការចេញព្រះរាជក្រឹត្យនេះ គឺដើម្បីចាត់ចែងការងាររបស់ក្រុមប្រឹក្សានេះឲ្យបានច្បាស់លាស់ និងឱ្យទៅជាច្បាប់។ លោកថា៖ «កាលពីពេលមុន យើងអត់មានការចង្អុលបង្ហាញអំពីដំណើរការ និងអង្គប្រព្រឹត្តរបស់ក្រុមប្រឹក្សាអ្នកច្បាប់ហ្នឹងទេ។ យើង (ក្រុមប្រឹក្សាអ្នកច្បាប់) បំពេញការងារតាំងពីដើមមក ក៏ប៉ុន្តែម្ដងនេះ គឺយើងបំពេញការងារទៅតាមច្បាប់ដែលមានលាយលក្ខណ៍អក្សរ»។
នៅក្នុងព្រះរាជក្រឹត្យបញ្ជាក់ថា អនុក្រឹត្យចុះថ្ងៃទី ២៨ ខែកក្កដា ឆ្នាំ ២០០៤ ស្ដីពីការបង្កើតក្រុមប្រឹក្សាអ្នកច្បាប់ និងបទប្បញ្ញត្តិទាំងឡាយណាដែលផ្ទុយនឹងព្រះរាជក្រឹត្យនេះគឺទុកជានិរាករណ៍៕