.jpg)
ព្រះមហាក្សត្រកម្ពុជា ព្រះបាទ ព្រះបរមនាថ នរោត្តម សីហមុនី។ រូបថត Royal du Cambodge
ភ្នំពេញៈ ព្រះករុណា ព្រះបាទសម្ដេចព្រះបរមនាថ នរោត្តម សីហមុនី ទ្រង់បានចេញព្រះរាជក្រឹត្យត្រាស់បង្គាប់ដំឡើងឋានន្ដរស័ក្ដិដល់នាយនគរបាលថ្នាក់ឧត្តមសេនីយ៍ និងនាយនគរបាលជាន់ខ្ពស់ចំនួន ១៦ រូបដែលអ្នកនាំពាក្យអគ្គស្នងការនគរបាលជាតិបានអះអាងថា ពួកគាត់បានកសាងស្នាដៃល្អដែលស័ក្តិសមនឹងទទួលបានឋានៈនេះ។
យោងតាមព្រះរាជក្រឹត្យដែលទើបត្រូវបានផ្សព្វផ្សាយកាលពីថ្មីៗនេះបានឲ្យដឹងថា នាយនគរបាលដែលត្រូវបានដំឡើងឋានន្ដរស័ក្ដិនោះរួមមាន ឋានៈឧត្តមសេនីយ៍ឯក (ផ្កាយ ៣) ចំនួន ១ រូប និងឋានៈជាឧត្តមសេនីយ៍ទោ (ផ្កាយ២) ចំនួន ៧ រូប ព្រមទាំងឋានៈជាឧត្តមសេនីយ៍ត្រី (ផ្កាយ ១) ចំនួន ៨ រូប។
ព្រះរាជក្រឹត្យនោះបន្តថា៖ «សម្តេច អគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាត្រូវទទួលបន្ទុកអនុវត្តព្រះរាជក្រឹត្យនេះចាប់ពីថ្ងៃឡាយព្រះហស្តលេខាតទៅ»។
លោក ឆាយ គឹមខឿន អ្នកនាំពាក្យអគ្គស្នងការដ្ឋាននគរបាលជាតិបានប្រាប់ភ្នំពេញប៉ុស្តិ៍ពីម្សិលមិញថា ការដែលលោកនាយករដ្ឋមន្ត្រី ហ៊ុន សែន ស្នើដល់ព្រះមហាក្សត្រ ដើម្បីដំឡើងឋានន្ដរស័ក្ដិដល់មន្ត្រីគឺលុះត្រាមន្ត្រីទាំងនោះបានបំពេញតួនាទី និងភារកិច្ចបានល្អត្រឹមត្រូវ។ ជាងនេះទៅទៀតលោកថា ពួកគាត់ក៏បានបំពេញការងារយូរ ដែលសមស្របនឹងទទួលបានការដំឡើងតំណែងផងដែរ។
លោកបានបញ្ជាក់ថា៖ «ប្រសិនបើព្រះមហាក្សត្រដំឡើងឋានៈហើយ បើមន្ត្រីទាំងនោះមិនល្អ មិនពូកែ មិនមានស្នាដៃនោះទេ គេមិនដំឡើងឲ្យទេ។ ម្យ៉ាងទៀត ប្រសិនបើពួកគាត់មានអតីតភាពយូរ ក៏ជាឱកាសដែលរដ្ឋាភិបាលត្រូវដំឡើងឋានៈឲ្យដែរ ព្រោះបើពួកគាត់មិនមានអតីតភាពយូរ ក៏គេមិនដំឡើងឲ្យដែរ»។
បើតាមលោក ឆាយ គឹមខឿន ការដំឡើងឋានៈដល់មន្ត្រីគឺរដ្ឋាភិបាលតែងសម្លឹងលើចំណុចសំខាន់ៗចំនួន ៣ គឺអតីតភាពការងារ សមត្ថភាព និងស្នាដៃ ហើយករណីខ្លះក៏ផ្អែកតាមតម្រូវការដើម្បីជំនួសតំណែងមន្ត្រីចាស់ ដែលចូលនិវត្តន៍ផងដែរ។
លោក ប៉ា ច័ន្ទរឿន ប្រធានវិទ្យាស្ថានប្រជាធិបតេយ្យកម្ពុជាបានលើកឡើងថា ប្រសិនបើច្បាប់កម្ពុជាបានចែងអំពីការដំឡើងឋានន្ដរស័ក្ដិ នោះការដំឡើងឋានន្ដរស័ក្ដិទៅដល់មន្ត្រីទាំង ១៦ រូបនេះគឺមិនមានអ្វីខុសឆ្គងទេ។ ប៉ុន្តែលោក រំពឹងថារាល់ការដំឡើងតំណែង និងតួនាទីដល់មន្ត្រីរាជការគឺមិនមានការរើសអើង ឬមានអំពើពុករលួយដែលបង្កឲ្យមានភាពអយុត្តិធម៌ដល់កងកម្លាំងប្រដាប់អាវុធដទៃទៀតទេ។
លោកបន្ថែមថា៖ «កងកម្លាំងប្រដាប់អាវុធនៅក្នុងសង្គមហ្នឹងដូចជា មានច្រើនដែរហើយ ផ្កាយចេះតែមានច្រើនទៅៗ ប៉ុន្តែសន្តិសុខ សណ្តាប់ធ្នាប់សង្គមយើងហាក់បីដូចជា មិនសូវប្រសើរតាមពន្លឺផ្កាយដែលកាន់តែមានច្រើននៅក្នុងសង្គមហ្នឹងសោះ។ ដូច្នេះសុំអំពាវនាវក្នុងនាមជាពលរដ្ឋម្នាក់ សុំឲ្យកងកម្លាំងប្រដាប់អាវុធយើងដែលទទួលបានលើកទឹកចិត្ត និងការដំឡើងឋានន្ដរស័ក្ដិហ្នឹងខិតខំបន្តបំពេញកិច្ចការងាររបស់ខ្លួន ប្រកបដោយប្រសិទ្ធភាព ប្រសិទ្ធផល និងប្រកបដោយក្រមសីលធម៌ ដើម្បីលើកកម្ពស់សន្តិសុខសណ្តាប់ធ្នាប់ដល់ប្រជាពលរដ្ឋឲ្យបានល្អ»៕
