.jpg)
លោក កើត រិទ្ធ រដ្ឋមន្ត្រីក្រសួងយុត្ដិធម៌ ត្រូវបានព្រះមហាក្សត្រតែងតាំង ជាសមាជិកឧត្តមក្រុមប្រឹក្សានៃអង្គចៅក្រម។ រូបថត ក្រសួងយុត្តិធម៌
ភ្នំពេញៈ ព្រះករុណាព្រះបាទសម្ដេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជាកាលពីថ្ងៃអង្គារ ទី ១២ ឧសភា បានចេញព្រះរាជក្រឹត្យត្រាស់បង្គាប់តែងតាំងលោក កើត រិទ្ធ រដ្ឋមន្ត្រីក្រសួងយុត្ដិធម៌ជាសមាជិកឧត្ដមក្រុមប្រឹក្សានៃអង្គចៅក្រម។
ក្នុងព្រះរាជក្រឹត្យដដែល ព្រះមហាក្សត្រក៏បានបញ្ចប់មុខតំណែងលោក អង្គ វង្សវឌ្ឍានា ពីសមាជិកឧត្ដមក្រុមប្រឹក្សានៃអង្គចៅក្រមផងដែរ បន្ទាប់ពីលោកត្រូវបានតែងតាំងកាលពីថ្ងៃទី ១៤ ខែវិច្ឆិកា ឆ្នាំ ២០១៩។
តាមច្បាប់ស្ដីពីការរៀបចំ និងការប្រព្រឹត្តទៅនៃឧត្ដមក្រុមប្រឹក្សានៃអង្គចៅក្រម ជំពូក ២ មាត្រា ៤ បានចែងថា ឧត្ដមក្រុមប្រឹក្សានៃអង្គចៅក្រមស្ថិតក្រោមព្រះរាជាធិបតីភាពនៃព្រះមហាក្សត្រ និងរួមមានសមាសភាពដូចជារដ្ឋមន្ដ្រីក្រសួងយុត្ដិធម៌, ប្រធានតុលាការកំពូល និងអគ្គព្រះរាជអាជ្ញាអមតុលាការកំពូលជាសមាជិក។ សមាជិកឧត្ដមក្រុមប្រឹក្សានៃអង្គចៅក្រមទាំងអស់នេះត្រូវតែងតាំងដោយព្រះរាជក្រឹត្យ។ រដ្ឋមន្ដ្រីក្រសួងយុត្ដិធម៌លើកសេចក្ដីព្រាងព្រះរាជក្រឹត្យថ្វាយព្រះមហាក្សត្រចំពោះកិច្ចការនេះ។
លោកមេធាវី សុក សំអឿន ប្រធានអង្គការក្រុមប្រឹក្សាជំនួយផ្នែកច្បាប់បានលើកឡើងកាលពីម្សិលមិញថា ការតែងតាំងលោក កើត រិទ្ធ ជាសមាជិកឧត្ដមក្រុមប្រឹក្សានៃអង្គចៅក្រមនេះ ព្រោះរដ្ឋមន្ដ្រីក្រសួងយុត្តិធម៌ថ្មីត្រូវឡើងកាន់តំណែងនេះដោយស្វ័យប្រវត្តិតែម្ដង។
ក៏ប៉ុន្តែលោកមិនអាចបង្ហាញពីការអនុវត្ដតួនាទីភារកិច្ចរបស់សមាជិកឧត្ដមក្រុមប្រឹក្សានៃអង្គចៅក្រមបានទេ ដោយលោកបញ្ជាក់ថា កន្លងមកក្រុមការងារនេះមិនបានបង្ហាញជាសាធារណៈ។
លោកថា៖ «ទាក់ទងនឹងការងាររបស់សមាជិកឧត្ដមក្រុមប្រឹក្សានេះមានតម្លាភាពបែបណានោះទាល់តែឲ្យគេដឹង បើគេមិនដឹងផងធ្វើម៉េចនឹងឲ្យបង្ហាញពីតម្លាភាពកើត។ ចំពោះការពង្រឹងឯករាជភាពផ្នែកច្បាប់តាមរយៈសមាជិកនៃឧត្ដមក្រុមប្រឹក្សានៃអង្គចៅក្រមក៏យើងមិនអាចដឹងដែរ ព្រោះយោងតាមច្បាប់នៃការរៀបចំ និងប្រព្រឹត្តទៅនៃឧត្ដមក្រុមប្រឹក្សានៃអង្គចៅក្រម សមាជិកថ្មីគឺមានអ្នកនយោបាយក្នុងឧត្ដមក្រុមប្រឹក្សានៃអង្គចៅក្រមនេះ»។
លោក សុក សំអឿន បន្តថា៖ «ធម្មតាឲ្យតែមានអ្នកនយោបាយចូលរឿងអី ភាគច្រើនលាយគ្នាហើយ។ លាយទាំងនយោបាយលាយទាំងច្បាប់ហើយ។ ស្ថាប័នឧត្ដមក្រុមប្រឹក្សានៃអង្គចៅក្រមជាស្ថាប័នបច្ចេកទេស យកល្អឲ្យមានអ្នកបច្ចេកទេសច្រើនទើបអាចបានទៅរួច បើមានអ្នកនយោបាយច្រើន វាគ្រប់គ្រងតាមនយោបាយហើយ»។
លោក ជិន ម៉ាលីន រដ្ឋលេខាធិការ និងជាអ្នកនាំពាក្យក្រសួងយុត្ដិធម៌បានបញ្ជាក់បន្ថែមកាលពីថ្ងៃម្សិលមិញថា ការតែងតាំងលោក កើត រិទ្ធ ជាសមាជិកឧត្ដមក្រុមប្រឹក្សានៃអង្គចៅក្រមនេះជាការប្រព្រឹត្ដទៅតាមច្បាប់ស្ដីពីការរៀបចំ និងការប្រព្រឹត្តទៅនៃឧត្ដមក្រុមប្រឹក្សានៃអង្គចៅក្រម។
លោកបានបញ្ជាក់ថា៖ «ការផ្លាស់ប្ដូរតួនាទីនេះគឺជាបែបបទរដ្ឋបាលទូទៅទេ ដើម្បីបំពេញទៅតាមលក្ខខណ្ឌច្បាប់តែប៉ុណ្ណោះ ព្រោះច្បាប់បានចែងថា រដ្ឋមន្ដ្រីក្រសួងយុត្ដិធម៌ជាសមាជិកឧត្ដមក្រុមប្រឹក្សានៃអង្គចៅក្រម។ ដូច្នេះអ្នកណាក៏ដោយឲ្យតែឡើងមកជារដ្ឋមន្ត្រីក្រសួងយុត្ដិធម៌គឺត្រូវតែងតាំងជាសមាជិកឧត្ដមក្រុមប្រឹក្សានៃអង្គចៅក្រម»៕
