.jpg)
ព្រះមហាក្សត្រ ព្រះបាទ នរោត្តម សីហមុនី។ រូបថត ហ្វ្រេសញូវ
ភ្នំពេញៈ ព្រះករុណាព្រះបាទ សម្តេចព្រះ បរមនាថ នរោត្តម សីហមុនី បានចេញព្រះរាជក្រឹត្យត្រាស់បង្គាប់តែងតាំងចៅក្រមចំនួន ១៨ រូបនៃសាលាឧទ្ធរណ៍តំបន់ចំនួន ៣ ក្នុងនោះសាលាឧទ្ធរណ៍ត្បូងឃ្មុំចំនួន ៦ រូប បាត់ដំបងចំនួន ៦ រូប និងព្រះសីហនុ ចំនួន ៦ រូប។
យោងតាមព្រះរាជក្រឹត្យដែលត្រូវបានឡាយព្រះហស្តលេខាដោយព្រះមហាក្សត្រចុះថ្ងៃទី ១៩ ខែ មីនា ឆ្នាំ ២០២០ បានត្រាស់បង្គាប់តែងតាំងលោក ទី សំណាង វរចៅក្រមថ្នាក់ទី ១ និងលោក រៀល សុភិន វរព្រះរាជអាជ្ញាថ្នាក់ទី ១ រួមនឹងវរចៅក្រមថ្នាក់លេខ ៣-៤ ចំនួន ៤ រូបទៀតជាចៅក្រមសាលាឧទ្ធរណ៍ខេត្ដត្បូងឃ្មុំ។ ចំណែកលោក អ៊ី ឃាង និងលោក ម៉ុង មុនីសោភា វរចៅក្រមថ្នាក់លេខ ៣ រួមនឹងវរចៅក្រមថ្នាក់លេខ ៣-៤ និងវរព្រះរាជអាជ្ញាថ្នាក់លេខ ២-៤ ចំនួន ៤ រូបទៀតជាចៅក្រមសាលាឧទ្ធរណ៍ខេត្ដបាត់ដំបង។
រីឯលោក សួន សំណាង ឧត្តមចៅក្រមថ្នាក់លេខ ៥ និងលោក យាប់ មេត្តា ឧត្ដមចៅក្រម ថ្នាក់លេខ ៦ រួមនឹងវរចៅក្រមថ្នាក់លេខ ១-៣-៤ និងវរព្រះរាជអាជ្ញាថ្នាក់លេខ ៤ ចំនួន ៤ រូបទៀតជាចៅក្រមសាលាឧទ្ធរណ៍ខេត្ដព្រះសីហនុ។ សាលាឧទ្ធរណ៍ភ្នំពេញសាលាឧទ្ធរណ៍ត្បូងឃ្មុំ សាលាឧទ្ធរណ៍បាត់ដំបង និងសាលាឧទ្ធរណ៍ព្រះសីហនុត្រូវបានព្រះមហាក្សត្របានចេញព្រះរាជក្រឹត្យបង្កើតឡើងកាលពីថ្ងៃទី ១៧ ខែសីហា ឆ្នាំ ២០១៩ ដើម្បីសម្រួលដល់ការកាត់ក្ដីសំណុំរឿងរបស់ប្រជាពលរដ្ឋនៅតាមបណ្ដាខេត្ដ។
ដោយឡែកកាលពីថ្ងៃទី ២០ ខែកុម្ភៈ ឆ្នាំ ២០២០ ព្រះមហាក្សត្រ បានចេញព្រះរាជក្រឹត្យ ឡាយព្រះហស្តលេខា ត្រាស់បង្គាប់តែងតាំងលោក ម៉ុង មុនីចរិយា ដែលជាឧត្តមចៅក្រមថ្នាក់លេខ ១ ជាប្រធានសាលាឧទ្ធរណ៍ត្បូងឃ្មុំ និងព្រះរាជអាជ្ញា វ៉េង ប៊ុនធឿន ជាអនុប្រធានសាលាឧទ្ធរណ៍នេះ។ ចំណែកចៅក្រម សម ប៊ុនថុន ត្រូវបានតែងតាំងជាប្រធានសាលាឧទ្ធរណ៍បាត់ដំបង និងលោក ធូ មណី ជាអនុប្រធានសាលាឧទ្ធរណ៍នេះ។ រីឯលោក ប៉ាកច័ន្ទ សំបូរ ត្រូវបានតែងតាំងជាអនុប្រធានសាលាឧទ្ធរណ៍ព្រះសីហនុ ខណៈដែលតំណែងប្រធាននៅទំនេរនៅឡើយ។
តាមព្រះរាជក្រឹត្យដដែលក្រៅពីការតែងតាំងតំណែងប្រធាន និងអនុប្រធានសាលាឧទ្ធរណ៍តំបន់ទាំង ៣ ព្រះមហាក្សត្រក៏បានតែងតាំងអគ្គព្រះរាជអាជ្ញា អគ្គព្រះរាជអាជ្ញារង និងព្រះរាជអាជ្ញាចំនួន ១២ រូបសម្រាប់សាលាឧទ្ធរណ៍តំបន់ថ្មីទាំង ៣ នេះផងដែរ។ ជាមួយគ្នានេះអនុប្រធាន និងចៅក្រមចំនួន ៣២ រូប និងព្រះរាជអាជ្ញា និងព្រះរាជអាជ្ញារង ១៥ រូបក៏ត្រូវបានព្រះមហាក្សត្រត្រាស់បង្គាប់ផ្ទេរ និងតែងតាំងនៅតាមសាលាដំបូង និងអយ្យការអមសាលាដំបូងរាជធានី-ខេត្តនៅទូទាំងប្រទេស។
លោក ជិន ម៉ាលីន អ្នកនាំពាក្យក្រសួងយុត្តិធម៌ធ្លាប់បានបញ្ជាក់ប្រាប់ភ្នំពេញប៉ុស្ដិ៍កាលពីថ្ងៃទី ២៣ ខែកុម្ភៈថា សាលាឧទ្ធរណ៍តំបន់ទាំង ៣ នឹងត្រូវដាក់ឱ្យដំណើរការចាប់ពីថ្ងៃទី ១ ខែមេសាខាងមុខតទៅ។
លោកថ្លែងថា៖ «ការតែងតាំងមន្ត្រីគឺគេពិចារណាទៅលើគុណវុឌ្ឍិច្បាស់លាស់ណាស់ គឺរួមមានបទពិសោធសមត្ថភាព កម្រិតសញ្ញាបត្ររួមមានក្របខ័ណ្ឌឋានន្តរស័ក្ដិរបស់មន្ត្រីនីមួយៗ ដើម្បីឲ្យត្រូវទៅតាមតួនាទី និងភារកិច្ច។ ការសម្រេចតែងតាំងនេះគឺសម្រេចដោយឧត្តមក្រុមប្រឹក្សានៃអង្គចៅក្រមដែលមានការពិភាក្សាគ្នាការសិក្សាពិនិត្យច្បាស់លាស់រួមមានទាំងកេរ្តិ៍ឈ្មោះ និងសមត្ថភាព»។
លោកបានឱ្យដឹងថា ការបង្កើតសាលាឧទ្ធរណ៍តំបន់ទាំង ៣ នេះគឺដើម្បីជួយសម្រួលការលំបាករបស់ប្រជាពលរដ្ឋក្នុងការធ្វើដំណើរ និងការបន្តនីតិវិធីនៃការប្ដឹងតវ៉ា ព្រោះកាលពីមុនពេលពលរដ្ឋចង់ប្ដឹងឧទ្ធរណ៍គឺត្រូវឡើងមករាជធានីភ្នំពេញដែលបង្កការលំបាកដល់ពលរដ្ឋរស់នៅខេត្ដឆ្ងាយ៕
